Naamosi 3
3
1Mwaatti attu o Israeli nkeewani nlhove nulhumanche aya Apwiiya Nlhuku, mwaatti mwaathamihiye ilhapo yo Umisri, 2“Iriyari attu o ilhapo chonkhaye, vekha inyu phi attu kaathanlhe aka munlhokoni mwa attu o makosho onkhaye. Paahi kinoutwarushani wo nlhatu no uwonya winyu wonkhaye.”
Ntheko wa anamilhohi
3Chani attu eelhi anowooria urwaa nkwaha vamoka wo uhiiwanana thoko?
4Chani kharamu nooturuma wiithuphini ahinavara ittu iriyoothe?
Chani mwakharamu nooturuma nnikhukuni hinavara ittu?
5Chani, mwaanuni noowaya munriankhoni vaheeshiye yolhia?
Chani nrianko unoofiakuwa uneneru wo uhifiakulhiya?
6Chani nipalhapata ninooruma vawani attu ahoovache?
Chani iwaani inookelhiya ni mariro ahinowiihiya ni Apwiiya Nlhuku?
7Wo ikeekhene Apwiiya Nlhuku khanopanga ittu wo uhaapatakulhelha anamitheko aya, anamilhohi chittu chilhakenlhe aya.
8Kharamu vanoturuma awe, apani ahinoova?
Apwiiya Nlhuku oolhumachaka, apani nokhota uhimiacha nlhove naya?
Utanganyia wo iwaani yo Usamaria
9Mwaahimiachereke attu onkhaye anokhalhacha ihano cho Umisri ni Uashdodi wiira, “Nthukumanacheke umiakoni unorukureriacha ilhapo yo Usamariya, mwooneke mwaashinene injarare ni chittu cho uhilhoka chinopangiya wowo.”
10Apwiiya Nlhuku aneera wiira, “Attu alha ahocharihacha mmanupani mwaya chittu cho wiiya. Khachuwenlhe upanga chittu choombone. 11Apwiiya Nlhuku aneera wiira, amalhaponi anoorukureriacha ilhapo aya, anootanganyacha mapuro aya o uttawelha, ni uvara mateeka ihano chaya.”
12Apwiiya Nlhuku aneera wiira, “Thoko nshunga chinomwaakha awe kharamu mieto miilhi ama nnyaru no ikhondoro, phi chiichammo chinohalha aya ukulhuphuwa attu vakani o Israeli anokhalhacha Usamaria, anari ni ikipande yo ikori ni ishuka.” 13Apwiiya Nlhuku o machiri aneera wiira, “Nkiiweke, mwaamukeke achishaana a Nayakhobo wiira, 14nihuku no waatwarusha attu o Israeli wo nlhatu no uwonya waya, kinoophomolhacha madhubahu o Ubetheli. 15Kinoophomolhacha inupa chuulhupalhe chithekihiye wo inyaka cho ittepo, chinorupiya ikatema yo uririya ni ikatema yo ntukutta, kihihalhihaka ata inupa imoka. Mii Apwiiya Nlhuku kihoolhumacha.”
The Bible Version in Makua @The Word for The World International and Makua Language translators. All rights reserved.