Naamosi 4
4
1Nkeewani mwaatti manyaathiyana o Usamaria, nnokhalha thoko ing'ope cho Ubashani, nnaapangelha chittu cho uhilhoka attu o uhuperiacha ni amashikini, ni weerelha manyaawannyu, “Nniwiihereke idivai niwurieke.” Mwiiweke etu nttenga ulha, 2Mii Apwiiya Nlhuku kiri Ntakatifu kinolhupelha wiira, “Mahuku anoowa, yo uvariya ni amalhaponi inyu thoko ihopa, chinoovariya muntunjeni. 3Nnoopurulhachiya mpaka vakittu va ishirini iphomolhiye, ni urihelhiya vathe ulhukama Uharmoni. Mii Apwiiya Nlhuku kihoolhumacha.”
Attu o Israeli khanarukunuwacha ni uhiya uwonya
4Apwiiya Nlhuku aneera wiira, “Ukhalhawaya nhokhota urukunuwa paahi, nrweeke mpaka iwaani itakatifu yo Ubetheli mwakiwonyeke. Nrwaacheke Ugilgali mwathepeke ukiwonya. Nkumiheke isadaka chinyu kila wichishu, ni kila ikikhumi chinyu kaanyuma yo nihuku no neeraru. 5Nrweeke umihoolho mwakumiheke mikatte cho waashukuru Apwiiya Nlhuku. Mwahimiacheke mmawani mwonkhaye wiira nhokumiha wo uttuna winyu mwaashinene, ittu mwaathanana inyu upanga. Mii Apwiiya Nlhuku kiheera.
6“Mii kihowiihelhani ithalha, nansho ata chiicho, khamwaakihokolhenlhe, mii Apwiiya Nlhuku. 7Tho, kahoothuwani ipulha wo mieri miraru ikatema minyepu vaathanana aya chinene ipulha. Kahorupiha ipulha iwaani imoka, nkakaattuka ihirupe iwani ikina. Imata imoka yahorupelhiya ipulha, ni iwaani ikina khayaarupelhiye, minyepu nkayooma. 8Attu o iwaani piilhi ama ttaaru ahottawelha iwaani ikina wiira apatte maashi, nansho kapattilhe o waathosha. Ata chiicho, khamwaakihokolhenlhe, mii Apwiiya Nlhuku.
9“Kahowaatani wo uwiiherani iphioo iri ni ntukutta chinene, nkakaanyaalhiha minyepu cho imata chinyu cho mizabibu. Anashombe ahokhuruwa nkayaalhia imata chinyu cho izabibu ni izeituni. Ata chiicho, khamwaakihokolhenlhe, mii Apwiiya Nlhuku.
10“Kahokurusha ireta yo uhilhoka chinene thoko yaakurunshe aka Umisri. Kaheevakacha ashimirawo ukhotoni ni ukushiha mateeka afarasi inyu. Mitembo nkachaachara mmapuroni mwinyu, unukha nkawaawanelha kila vakittu. Ata chiicho, khamwaakihokolhenlhe, mii Apwiiya Nlhuku.
11“Kahaarimelhiha attu akina munlhokoni mwinyu thoko chaarimelhinhe aka iwaani cho Usodoma ni Ugomora, ni inyu nkamwaakhalha thoko nuuni nithamihiye vamooroni ata chiicho, khamwaakihokolhenlhe, mii Apwiiya Nlhuku. 12Paahi vano, inyu Aisraeli kinoutwarushani. Ukhalhawaya kiholhakelha upanga chiicho, nkhalheke chiire uhukumulhiya!” 13Apwiiya Nlhuku phi uupilhe miako, nkawuupa iphioo. Anaachuwelhiha attu irusho chaya, phi anopanga uthana ni uhiyu. Aneeta vachulhu ilhapo. Apwiiya Nlhuku phi nchina naya.
The Bible Version in Makua @The Word for The World International and Makua Language translators. All rights reserved.