Naamosi 2
2
Nlhuku nowaahukumulha attu o Umoabu
1Apwiiya Nlhuku aneera wiira, “Attu o Umoabu ahowonyacha tho ni tho, wo nlhatu uyo etu, kinowaatwarusha. Ahoveehacha makhuva a amwene o Umoabu, ahopaha mooro ni ukorosha ituura. 2Paahi kinooruma mooro vachulhu ilhapo yo Umoabu kipahe ikikhichero cho Ukeriothi. Mphingo wakhuwelhaka ni oopaka mapalhapata, attu o Umoabu anookhwacha eewaka ikutto cho ikhoto chiyo. 3Kinoomwiva amwene o Umoabu ni ahoolhelhi onkhaye o ilhapo iyo, kineera mii Apwiiya Nlhuku.”
Nlhuku nowaahukumulha attu o Uyuda
4Apwiiya Nlhuku aneera wiira, “Attu o Uyuda ahowonyacha tho ni tho, wo nlhatu uyo etu, kinowaatwarusha. Ukhalhawaya ahoveehacha meettuchiho aka nkayaahiya uvarechesha malhehero aka. Ahohoolhelhiya ni milhuku cho woothacha chaattwara manyaapwiiya aya. 5Paahi kinooruma mooro vachulhu ilhapo yo Uyuda kipahe ikikhichero cho Uyerusalemu.”
Uhukumulha wa Apwiiya Nlhuku o Israeli
6Apwiiya Nlhuku aneera wiira, “Attu o Uisraeli ahowonyacha tho ni tho, wo nlhatu uyo etu, kinowaatwarusha. Ahaathumihacha upottani attu kinonkhulhuvelha aka, ni waathumiha amashikini wo uvahiya ichampali. 7Anowaavengacha ni waamereriha attu ahineechoria, ni waapangelha waathuwa ikekhiaye amashikini. Ni ntu na athumwanawe anoorupa ni mwalhi mmoka ni unanariha nchina naka nitakatifu. 8Kila vakittu vari madhubahu anoorupelha ikuwo chaathurunlhe aya amashikini ulhiveriha madeni aya. Ni unupani wa nlhuku aya mmo, anoowuria idivai chikunshe aya wa attu anaadai.
9“Ata chiicho, inyu attu aka, wo nlhatu winyu kahaarimeelhiha attu o Uamori, attu o machusha moolhupalhe thoko mierezi ni o machiri thoko miri cho mialoni. 10Kahoothamihani wiilhaponi Umisri, nkakooholhelhani uthakoni wo iyaakha makhumi ncheshe, nkamwaakusha ilhapo ya attu o Uamori ikhalhe yawinyu. 11Kahaathanlha achishaana inyu akina wiira akhalhe anamilhohi, ni ashimirawo inyu akina eekumiheke upanga ntheko wa Nlhuku. Chani mwaatti attu o Israeli yayo kahii o ikekheene? Mii Apwiiya Nlhuku kihoolhumacha yayo. 12Nansho mwaatti mwahaavahacha idivai achishaana inyu eekuminhe upanga ntheko wa Nlhuku wiira awuriache, nkamwaalhehera anamilhohi ayo ahilhohere. 13Paahi vano, kinowaanyakathani, thoko nkukuta uchanre mituro. 14Ata attu anooria uttawa chinene ayo khanooria ukittawa. Attu o machiri anoowukuwa machiri aya, ni manyaasikaari khanooria wiichokholha ukumi aya. 15Mphingo unopurulha miupa anoottawa, ata mphingo o uttawa chinene khanooria wichookholha, ata mphingo awenlhe afarasi khanookholha ukumi aya. 16Nihuku nno, ata mphingo urina machiri unoottawa uno arihaka kila ittu. Mii Apwiiya Nlhuku kihoolhumacha.”
The Bible Version in Makua @The Word for The World International and Makua Language translators. All rights reserved.