2Nasamweli 6
6
Nsanduku wo malhehano ninoorweehiya Uyerusalemu
(1Ikat13:1-14; 15:25-16:6; 6:43)
1Wo nkwaha nkina tho, Nadaudi ahaathukumaniha manyaasikari o wooria waatakana a Aisraeli, maelufu makhumi mararu. 2Nadaudi nkayaathama ni urwaa vamoka ni attu aya onkhaye, mpaka Ubaala. Yuda, wiira akushe wowo Nsanduku na Apwiiya Nlhuku, neehaniye wo nchina naya Apwiiya Nlhuku o Miphingo, anokhalha vachulhu mfiniko minepa aari ni mapupha. 3Paahi, ahokushacha Nsanduku na Apwiiya Nlhuku ukhuma unupani wa Naabinadabu iri umwaakoni, nkayaakusha ni uwelhiha vachulhu nkukuta wo naanano ninopurulhiya ni Ing'ope. Nauzia ni Naahio achishaana a Naabinadabu phi eetihilhe yoyo nkukuta uyo, 4Naahio ahoolhelhaka. 5Nadaudi ni attu onkhaye o Israeli, yaari eepaka ichipo ni wiina umihoolho wa Apwiiya Nlhuku, wo machiri aya onkhaye. Nkayoopa achikwesha, ivinanda, idufu ni matoazi. 6Vaaphiya aya vapuwani vaneepettelhiya cholhia Unakoni, ing'ope yahokwakwathuwa, Nauzia nkayookolha moono aya ni uvara Nsanduku wo malhehano wo Nlhuku wiira nihiwulhuwe. 7Vavawo, Urushiya wa Apwiiya Nlhuku wahopharelha wo nlhattu ni Nauzia, wo ittu yaapangilhe aya iyo. Nkayaakhwa vavawo vachereshere wo Nsanduku wo Malhehano vawo. 8Nadaudi nkayaathunalha wo nlhattu Apwiiya Nlhuku naapangenlhe aya Nauza, paahi nkayeehana vavawo vakittu vawo Peres Uza, maana aya “Untunanelha u Nauza”, vaneehaniya aya mpaka lhelho nna.
9Nenno nihuku nno, Nadaudi ahomwoova Apwiiya Nlhuku nkeera, “Vano ninohalha uwa chani Nsanduku nno?” 10Paahi, nkayaahiya urweeha Nsanduku na Apwiiya Nlhuku urwaana Uyerusalemu, utulhi waya ahorukunuwa ni urweeha unupani u Naobed Edomu, ntu o ukhuma iwani yo Ugiti. 11Ni nno nahokhalha uwani u Naobed Edomu mieri miraru. Ni Apwiiya Nlhuku ahaavahera ibarakha yayo Naobed Edomu ayo vamoka ni ashilhoko aya.
12Yamalhekeru, amwene Nadaudi yeewekeru wiira Apwiiya Nlhuku ahaavahera ibarakha ashilhoko a Naobed Edomu ni chittu chawe chonkhaye chaarina aya, wo nlhattu wo ukhalhana Nsanduku na Apwiiya Nlhuku, ahorwaa etu uukushani Nsanduku nno ukhuma iwani i Naobed Edomu ni urweha Uyerusalemu, uno ashangararaka. 13Kila attu aakushilhe Nsanduku na Apwiiya Nlhuku nno veetilhe aya ihatua sita, Nadaudi ahaakumihera Apwiiya Nlhuku isadaka yo ndume wo ing'ope ni mwang'ope mmoka o ulhokalhoka. 14Nadaudi uno anawanre ikuwo yo ihariri nnyuununi mwaya, aheena wo machiri aya onkhaye umihoolho wa Apwiiya Nlhuku. 15Paahi etu, anene ayo vamoka ni Aisraeli onkhaye nkayaarweha Nsanduku na Apwiiya Nlhuku mpaka iwani i Nadaudi wo ushangarara ni mapalhapata oopiyaka.
16Nsanduku na Apwiiya Nlhuku vaaphiya aya iwani i Nadaudi, Namikali anaaya Nasauli ahothurumelha vanlhirishani nkayoona Amwene Nadaudi eenaka wo uthuphathupha ni urukureria umihoolho wa Apwiiya Nlhuku, ahochukulha munrimani mwaya, ni woona thoko khaarina irusho. 17Nkayaaphiya Nsanduku wo Apwiiya Nlhuku nno vanipuroni u Nadaudi, ni weesha Nsanduku nno vakittu waya. Nkayaakumihera isadaka Apwiiya Nlhuku, cho upahiya vamooroni ni cho isadaka cho uwiiha mpuha umihoolho wa Apwiiya Nlhuku. 18Amalhihekeru ukumihera isadaka cho upahiya vamooro ni cho uwiiha mpuha, Nadaudi ahaavahera ibarakha attu onkhaye wo nchina na Apwiiya Nlhuku o machiri. 19Nkaakawelhacha cholhia attu onkhaye. Kila mmoka, manyaalhopwana ni manyaathiyana, ahommaha nkatte, ikipande yo inama yo wooshiya ni nkatte wo izabibu. Baada yo vavawo, attu onkhaye ahothamacha, kila attu nkaahokolhiya uwannyawe.
20Nadaudi vaahokholhia awe uwannyaya wiira aashikurie ashilhoko aya, Namikali anaaya Nasauli, vaakhumme aya vathe uweekamelhani, nkayeerelha Nadaudi, “Amwene a Aisraeli aheeheulhiha lhelho, wo weeta pwithipwithi teu umihoolho wa akarumiya aya, ashilhopwana ni ashithiyana thoko nthirikhi, urulha ikuwo wo uhoona ishoni.”
21Nadaudi nkayaakhulha Namikali wiira, “Kaapangilhe chiicho umihoolho wa Apwiiya Nlhuku, ahokithanlha mii baada yo athumwaninyu ama ni ashilhoko inyu wi inupa aya ikatema vakeeshilhe aka kikhalhe ntawara vachulhu wa attu o Israeli, attu a Apwiiya Nlhuku. Paahi etu, mii kinoothepa wiina umihoolho wa Apwiiya Nlhuku. 22Kinoothepa wiikurusha kimwanene upwaha va. Kinookhalha thoko akirina ittu, nansho akarumiya ashithiyana mwaaromonlhe inyu ayo onkhaye anookithimicha.”
23Paahi Namikali anaaya Nasauli khayaari ni mwaana mpaka ukhwa waya.
The Bible Version in Makua @The Word for The World International and Makua Language translators. All rights reserved.