2Nasamweli 5
5
Nadaudi anoohikiya makhura o ukhalha amwene o Uisraeli ni Uyuda.
(1Ikat11:1-9; 14:1-7)
1Yamalhekeru, makosho onkhaye o Uisraeli ahorwaa u Nadaudi Uhebroni uwo, ni uweerelha, “Hiyaano, phi iruttu inyu ni iphome inyu. 2Mpacho vawo, Nasauli aari amwene ihu, inyuva mwaari phi nholhelhi ihu attu o Israeli vaarwaa ihu ukhotoni, ni Apwiiya Nlhuku kahouhimeriani wiira, ‘Nnoowashunga attu aka, ni waatawara.’ ” 3Paahi, ashulhupalhe onkhaye a Aisraeli nkaarwelha amwene Nadaudi Uhebroni uwo, ni ayo nkaapanga malhehano ni Apwiiya Nlhuku, tho nkayaahika Nadaudi makhura akhalhe amwene a Aisraeli. 4Nadaudi aari o iyaakha makhumi mararu vaachokhonlhe aya utawara, ni ahotawara wo iyaakha makhumi ncheshe. 5Uhebroni uwo aatawanre attu o Uyuda wo iyaakha saba ni mieri sita, ni Uyerusalemu ahotawara attu o Israeli atawanre vamoka ni attu o Uyuda wo iyaakha makhumi mararu ni iyaakha taaru.
6Nihuku nimoka amwene ni attu aya ahorwaa Uyerusalemu ni waakelhelha Ayebusi, anenchi aakhalhacha wowo, ni ayo nkayeerelha Nadaudi wiira, “Khannokelha mwiilhaponi mu mena, ukhalhawaya attu o ahoona ni o uheeta anowoomolhani nthame.” 7Nansho ata aneeraka chiicho, Nadaudi ahokusha wo machiri iwani yo Usiyoni, yaani iwani i Nadaudi. 8Nihuku nno, Nadaudi aheera wiira, “Ntu iriyoothe nohalha umwaata Nyebusi, avireke munferejini wo maashi ni waatakacha attu o ahoona ni uremara ayo, anovingiya ni nnepa aka.” Phi nuulhumo etu kineera, attu ahinoona ni uremara khankhelhacha vawani.
9Nadaudi ahokhalha mu ingome iyo, ni iwaani iyo nkeehana, “Iwani i Nadaudi.” Nadaudi ahotheka iwani urukureria, achokholhelhaka Umilo ukelhelha nhina. 10Nadaudi nkaathepa ukhalha wo uchuania chinene, ukhalhawaya Apwiiya Nlhuku, Nlhuku a manyaasikari aari vamoka ni ayo.
11Yamalhekeru, amwene Nahiramu o Utiro ahaaruma akarumiya u Nadaudi, nkaarwehelha ni miri cho mierezi, attu o koorosha ihiche ni milhako, ni attu o uthekacha manupa, nkaathekelha Nadaudi inupa ye imwene. 12Paahi Nadaudi ahochuwelha wiira, Apwiiya Nlhuku ahaavara nchina ukhalha amwene a attu o Israeli, ni uchiniha imwene aya wo nlhattu na attu o Israeli.
13Nadaudi ahaapatta ipocha ni manyaahanu aya wowo Uyerusalemu uwo, baada yo uthama Uhebroni uwo, ni waayara achishaana enchi ashilhopwana ni ashithiyana. 14Anottwara alha phi machina a achishaana ashilhopwana, aayanre aya Uyerusalemu: Nashamua, Nashobabu, Nanathani ni Nasolomoni, 15akina aari Naibhari, Naelishua, Nanefegi, Nayafia, 16Naelishama, Naeliada ni Naelifeleti.
Nadaudi anowaakottolha Afilisti
(1Ikat14:8-17)
17Attu o Ufilisti veewilhe aya wiira Nadaudi ahohikiya makhura akhalhe amwene o Aisraeli, manyaasikari onkhaye ahokhuma urwaa wiira aavare. Nansho Nadaudi aheewa mwaha wonkhaye, nkaayeevitha uningomeni. 18Afilisti ahophiyacha ni umwaaria nikoote wo Urefaimu. 19Paahi, Nadaudi nkaakoha Apwiiya Nlhuku, “Chani kirwee kaatakane ni Afilisti? Chani nnookooriha wiira kaakottolhe?”
Apwiiya Nlhuku nkaakhulha, “Eiyo, nrweeke, maana kinowakottolha Afilisti.”
20Paahi Nadaudi ahophiya Ubaal Perasimu, ni wowo ahaakottolha Afilisti. Nkeera, “Apwiiya Nlhuku, ahaakhupa amalhaponi aka, thoko niwambwe wo maashi.” 21Afilisti nkayaahiyacha isinyago chaya cho milhuku aya vakittu vawo, ni Nadaudi ni attu aya nkayaakusha.
22Yamalheke, Afilisti ahohokolhia nkwaha wo nayelhi ni umwaaria tho unikoote wo Urefaimu. 23Nadaudi ahaalhepelha Nlhove Apwiiya Nlhuku tho, Apwiiya Nlhuku nkeera, “Nhaakelhelhe wo ukhuma va, nansho mwaarukurerieke, ni ukhalha tayari waakelhelha wo ukhuma mpata nkina wo vakhiviru ni miri cho nsorofaji. 24Vanohalha inyu wiiwa ikhitto cho inyaa cho manyaasikari vachulhu miri cho nsorofaji, mwaakelhelheke, ukhalhawaya mii kinoowa kaaholhelha umihoolho winyu wiira kaakottolhe manyaasikari a Afilisti.” 25Nadaudi nkaapanga thoko chaalhelhiye aya ni Apwiiya Nlhuku, nkayaata Afilisti ukhuma Ugeba mpaka uphiya Ugezeri.
The Bible Version in Makua @The Word for The World International and Makua Language translators. All rights reserved.