2Nasamweli 7
7
Nttenga u Nanathani wa Nadaudi
(1Ikat17:1-15)
1Amwene Nadaudi vaari aya akhalhaka uhano waya, ni Apwiiya Nlhuku ahaashungerera wiira ahithemwihiye ni ashimalhaponi aya kila mpata. 2Paahi, amwene Nadaudi aheerelha anamilhohi Nanathani wiira, “Mmweheke, mii kinokhalha inupa ithekiye wo miri cho mierezi, nansho Nsanduku wo Nlhuku ninokhalha unihemani.”
3Nanathani ahomwaakhulha amwene, “Nrweeke mwapangeke ittu iriyoothe inoopuwelha inyu munrimani mwinyu, ukhalhawaya Apwiiya Nlhuku ari vamoka ni inyu.” 4Nansho uhiyu yolhe Apwiiya Nlhuku ahaavaha nlhove Nanathani, 5wiira, “Nrwee mwaahimerie akarumia aka Nadaudi wiira Apwiiya Nlhuku aneera cho, ‘Inyuva nnokithekelha inupa yo ukhalha mii. 6Ukhalhawaya toka nihuku nne waakumiha Aisraeli wiilhaponi Umisri mpaka lhelho nna, akinakhalha wi Inupa aka. Kinovira kila vakittu kikhalhaka nnihemani. 7Nkwaha aka wonkhaye vamoka ni Aisraeli, akinankoha nholhelhi riyoothe kinthalhilhe aka wiira chani woonaka khanakithekelha inupa yo miri cho mierezi?’
8“Paahi etu mweerelheke akarumiya aka Nadaudi wiira, Apwiiya Nlhuku o Machiri aneera, ‘Kahoukushani ukhuma upottani waashunga inyu ikhondoro wiira mwaataware attu aka Aisraeli. 9Ukhuma yeyo ikatema iyo kinokhalha vamoka ni inyu variwoothe unorwaa inyu, ni kiheevakacha amalhaponi inyu onkhaye umihoolho winyu. Ni vavawo, kinoupangani nkhalhe ntu o uchuwania thoko aholhelhi akina o velhaponi va. 10Ni chiicho, kihaathanlhelha attu aka Aisraeli vakittu voombone vo ukhalha, vanohalha aya ukhalha wo uhihuvihiya tho ni yayo attu o nanara mirima thoko chera aya khalhai. Eiyo, toka nihuku naakenlhe aya velhaponi va, ahaamererihachiya ni attu o uhilhoka mirima, nansho yeyo khinokhumelhelha tho. Kinowaashungerera wiira nhithuriye ni amalhaponi inyu. 11Ni waavaha ilhapo achishaana inyu. 12Vanohalha inyu urimeelha ni ulhutaana ni manyaapwiiya inyu, kinompanga mmoka a achishaana inyu ukhalha mwene, ni uchiniha imwene aya ukhalha yo machiri. 13Yoyo phi nohalha utheka inupa aka, wo nlhattu naka ni uchiniha ihiche ye imwene awe unolhokelha mahuku o uhimalha. 14Kinookhalha phi athumwanawe, ni uyo anookhalha mwaamwanaka. Awonyaka, kinomwaamuka thoko naangoro chinomwaamuka awe mwaamwanawe. 15Nansho akinohiya unkavihera thoko chenre aka u Nasauli, kaahilhe aka waakaviherera, ni inyu nkamwaakhalha amwene. 16Iyari inyu khinowukuwa, ni imwene inyu kinowa yaamalha. Imwene inyu inolhokelha mahuku o uhimalha.’ ”
17Nanathani nkaahimeria Nadaudi kila ittu yaalheheriye aya ni Nlhuku.
Ulhapelha ni ushukuru u Nadaudi
(1Ikat17:16-27)
18Yamalhekeru, amwene Nadaudi ahokelha mpaani ni ukhalha umihoolho wa Apwiiya Nlhuku, nkayaakhalha vathi ni ulhapelha eeraka, “Thithi Nlhuku, mi phi mpani, ni ashilhoko aka phi ashipani, ukhalhawaya akinophwanelhiya chittu chikipangenlhe inyu, mpaka nkamwaakiwiiha uno. 19Tho, nari nikani mmiithoni mwinyu, Pwiiya, nenno nlhove nno mpaka nkamwaalhehera malhehano anaacha achishaana aka, wo mahuku anowa ni wiira, nnookooniha yayo. 20Kuulhumachekeni etu tho! Inyuva nhokichuwelha mii, karumiya inyu. 21Ukhalhawaya yayo ulhikaana ni ittu uhimia inyu mwaanene, wiira mpange yayo, nhopanga chittu chulhupalhe chi, wiira munchuwelhihe karumiya inyu. 22Ukhalhawaya inyuva Apwiiya Nlhuku phi olhupalhe! Khaawo ri thoko inyuva, ni Khaawo nkina nansho inyuva. 23Tho, khaniwo nikosho nikina velhaponi va, thoko attu inyu Aisraeli, mwookolhe inyu upottani, akhalhe phi attu inyu. Chittu chulhupalhe, cho ushangiha mwaapangenlhe inyu chihouwanelhihani velhaponi wonkhaye. Mwahoomolhacha makosho makina ni milhuku chaya, attu inyu ayo ahinaaya uphiya wowo, attu mwookolhe inyu ukhuma Umisri, wiira akhalhe attu inyu. 24Nhaapanga Aisraeli atimarike ni ukhalha attu inyu, akhalhe attu inyu mahuku o uhimalha, ni ukhalha phi Nlhuku aya.
25“Paahi vano, inyu Apwiiya Nlhuku ntimiriheke malhehano onkhaye mwalhenhe inyu vachulhu waka mii karumiya inyu, ni wa ashilhoko aka, mpangeke etu thoko chaalhehilhe inyu. 26Nchina ninyu ninototopelhiya ni attu mahuku onkhaye ni ayo anowiira, ‘Apwiiya Nlhuku o Machiri, phi Nlhuku a Aisraeli.’ Ni inupa aka mii karumiya inyu Daudi inokhalha ni machiri mahuku onkhaye. 27Ukhalhawaya, inyuva Apwiiya Nlhuku o Machiri, Nlhuku a attu o Israeli, nhokipatakulhelha wiira kinouthekelhani inupa, paahi mii karumiya inyu, akinoova ulhepelheni munrimani mwaka.
28“Ni vano, inyu Apwiiya Nlhuku aka, inyuva phi Nlhuku, ni malhehano inyu phi o ikekhiaye, ni inyu nhokhilheha miyaano karumiya inyu mwaha wo urera uyo. 29Kinoulhepelhani wiira mwaavahere ibarakha achishaana aka, wiira athepe uvaheriya ni inyu. Inyu Pwiiya, mwaholheha yayo, ni ibarakha chinyu chikhalheke unupani waka wo mahuku o uhimalha.”
The Bible Version in Makua @The Word for The World International and Makua Language translators. All rights reserved.