2Nasamweli 4
4
Naishboshethi anowiiviya.
1Naishboshethi anaaya Nasauli, eeweke wiira Naabneri aheeviya Uhebroni uwo, ahokhwa nrima ni attu onkhaye o Israeli ahohuvacha. 2Naishboshethi anaaya Nasauli aari ni attu elhi aari aholhelhi o miphingo cha attu o waatakana ikhoto, mmoka ehaniye Nabaana ni nkina Narekabu. Yayo aari achishaana a Narimoni, ntu o nikosho wo Ubenyamini o ukhuma iwani yo Ubealothi. 3Anenchi o Ubealothi ahowiiraka uttawelha Ugitaimu uwo, anokhalha aya ulhetoni mpaka lhelho nna.
4Ni Nayonathani anaaya Nasauli aari ni mwaana mwanlhopwana o uremara mieto chaya choomilhi. Eehaniya Mefiboshethi. o malhipa o iyaakha nthanu. ikatema mwaha wo urimeelha Nasauli ni Nayonathani vaaphilhe aya ukhuma Uyezreeli. opani anlhelha mwaana ulhe ahonkusha ni unttawana, Nansho vaari aya attawaka chinene, mwaana uyo nkayaawulhuwa vathi, nkayoonthia ni ukhalha o uremara.
5Narekabu ni Nabaana achishaana a Narimoni, o Ubealothi, ahorwaacha unipuroni u Naishboshethi, ni uphiya wowo uthana, ni Naishboshethi aari aneettuwilhe unipuroni waya. 6Ahokelha mpaani ni umwiiva thoko anothanana ukushacha ingaano, nkayoona Nashboshethi anarumpe vankorini uchuumbani waya, nkayaahoma nivaka vanthunkwani. 7Kaanyuma vaakenlhe ya nhina inupa ahomwiiva, ahotupulha muru aya ni urwaa wo iphiro yo Uaraba. 8Ni urweeha wa Nadaudi Uhebroni, ni weerelha amwene ayo wiira, “Ulha va, muru wa Nashboshethi anaaya Nasauli, ntu mwaavengana inyu, aathanana uwiivani uyo. Lhelho Apwiiya Nlhuku ahaalhivihera Apwiiya aka, wo waakottolha Nasauli ni achishaana aya.”
9Nansho Nadaudi nkayaakhulha Narekabu ni Nabaana, ahimaaya, achishaana a Narimoni, o Ubealothi, wo wiira, “Kinolhupelha wa Apwiiya Nlhuku arii akumi anokilhitelhelha ni kila chittu chonkhaye cho uhilhoka. 10Ntu mmoka vaakihimenrie awe Nasauli ahokhwa, aanyiheraka wiira wo ukiwiihera nttenga worera, kahomvara ni umwiiva yoyo Usikilagi uwo, ukhalha phi izawadi aya mwaha waakihimenrie awe. 11Chani, ntu o uhilhoka amwiivaka ntu ahirina milhatu anari vankorini, uwaannya awe, chani, kihilhivihere wo nlhattu wo umwiiva nkhunana awe?”
12Nadaudi ahaaruma manyaasikari aya, ni ayo nkeevakacha Narekabu ni Nabaana. Nkaatupulha miono ni mieto chaya ni waathomiacha mmirini vachereshere nttiya wo Uhebroni uwo. Yamalheke, ahokusha muru u Naishboshethi ni uvitha variyari unihiyeni u Naabneri wowo Uhebroni uwo.
The Bible Version in Makua @The Word for The World International and Makua Language translators. All rights reserved.