2Nasamweli 3
3
1Ikhoto yaatakaniya ashilhoko a Nasauli ni attu aalhutanne ni amwene Nadaudi yahaatakaniya mahuku menchi. Nadaudi vaathepa aya ukhalha ni machiri menchi chinene, nlhoko u Nasauli wahothepa uwolholha ni uhikhalha ni machiri.
Achishaana ashilhopwana a Nadaudi
2Alha phi aari achishaana ashilhopwana aayariye ni Nadaudi vaari aya Uhebroni wo utwaraana chenre aya wo uyaria; Naamnoni, anumwanaya arii Naahinoamu o ukhuma Uyezreeli; 3Nakalebu, anumwanaya arii Naabigaili, nankhwelhi a Nanaabali o ukhuma Ukarmeli; Naabsalomu, anumwanaya arii Namaaka, arokoraya Natalmai amwene o Ugeshuri; 4Mwaana o necheshe Naadoniya, anumwanaya arii Nahagithi; o nethanu Nashefatia, anumwanaya arii Naabitali, 5ni o sita aari Naithreamu, anumwanaya arii Naegla, ahanu aya Nadaudi. Yayo achishaana onkhaye a Nadaudi ayo, aayarelhe vaari aya akhalhaka Uwo Uhebroni.
Naabneri anolhutaana ni Nadaudi
6Ikhoto vaari aya ithepaka waatakaniya, manyaasikari a Nadaudi ni alhe a Nasauli, Naabneri ahothepa ukhalha ni machiri menchi munlhokoni mwa manyaasikari o Nasauli.
7Nihuku nimoka Nashboshethi anaaya Nasauli ahohimiacha wiira Naabneri ahonrupana namitheko nthiyana a Nasauli, Rispa, abiti a Aiya. 8Nenno Nlhove nno nahaarusha Naabneri chinene Naabneri, nkayaakoha, “Chani, nnaanyihera kinowooria waapangelha ittu yo uhilhoka Nasauli? Chani nnaanyihera wiira mii kinowaalhutana ashilhoko a Nayuda? Toka nihuku wo upacha kihokhalha o ukhulhuvelhiya wa athumwaninyu Nasauli, wa ashilhoko aya, ni wa manyampwana aya, ni ahowookholhani nhikottolhiye ni Nadaudi. Nansho lhelho nnokinanariha wo nlhattu wa nthiyana! 9Nlhuku etu akiiveke, yakhalhaka akinopanga chittu chaalhupenlhe awe Nadaudi.” 10Venre aya wiira, anoothamiha umwene ukhuma u Nasauli ni achishaana aya, ni waavaha yayo, ataware makosho a Aisraeli ni Uyuda, ukhuma Udani mpaka Ubeer Sheba. 11Nansho Naishboshethi ahoova chinene, ni wala khayoonrie waakhulha Naabneri.
12Paahi Naabneri ahaaruma attu u Nadaudi, aari yeyo ikatema iyo Uhebroni, eeraka, “Apani anohalha utawara ilha ilhapo yonkhaye ilha ni nhakhu aya? Nngweeke nilhehane, ni mii kinoukavihani wiira mwaavare attu onkhaye o Israeli akhalhe mmathathani mwinyu.”
13Nadaudi nkaakhulha, “Vahorera, kinoolhehana etu ni inyu, nansho mwakipangelhaka ittu imoka. Nkiwiihereke thoko Namikali, mwaamwana mwanthiyana a Nasauli, vavawo nnookona, vanohalha inyu uwa.” 14Nadaudi ahoruma tho nttenga u Nashboshethi anaaya Nasauli nkeera, “Nkihokolhoshereke ahanu aka Namikali kaathenlhe aka wo ulhiva marapalha o umattepe imia imoka, kaapantte aka baada yo weeva Afilisti.”
15Paahi Naishboshethi ahaaruma attu aakushe Namikali ukhuma wa Napaltieli mwaana o Nalaishi, nlhopwana aathenlhe vano. 16Nansho Napaltieli ahottwara mpaka Ubahurimu, onlhaka iphiro yonkhaye. Nansho wowo Naabneri nkeerelha Napaltieli, “Nhokolhie uwani.” Ni ayo ahohokolhia.
17Naabneri nkaarwaa wa manyaaholhelhi a Aisraeli, ni waarerihana, eerelhaka, “Mahuku menchi mwaatti mwahothanana wiira Nadaudi akhalheke phi amwene inyu. 18Vano etu, nhopatta nipesha wo upanga chiicho. Muupuwelheke wiira, Apwiiya Nlhuku ahomwiirelha cho Nadaudi wiira, ‘Kinonruma karumiya aka Nadaudi wiira ookholhe attu aka Aisraeli ukhuma wa Afilisti ni ukhuma wa amalhaponi aya akina.’ ” 19Naabneri ni ayo ahoolhumana attu o nikosho ni Nabenyamini. Yamalheke, nkaarwaa Uhebroni uwaahimeriani Nadaudi mwaha wonkhaye ulhakelhiye upangiya ni attu o Israeli ni nikosho nonkhaye ni Nabenyamini.
20Ikatema Naabneri vaarwelhe aya u Nadaudi, aattukanaka manyaalhopwana makhumi melhi, Nadaudi ahaaterekhelha yolhia. 21Vaaphilhe aya u Nadaudi nkeera, “Pwiiya, mii vano etu kinoorwaa ni waawiha uwannyu attu onkhaye o Israeli. Anoowacha ni upanga malhehano ni inyu, wiira nkhalheke amwene aya, ni inyu mwaatawareke thoko chinottuna inyu.” Yamalheke, Nadaudi ahaalheha Naabneri, ni ayo ahothama ni urwaa wo mpuha.
Naabneri anowiiviya
22Kaanyuma, Nayoabu ni attu vakani a Nadaudi ahohokolhia ukhuma waakelhelha, nkaaawiha nhakhu mwinchi. Nansho Naabneri khayaariwo wowo Uhebroni uwo vamoka ni Nadaudi, ukhalhawaya Nadaudi aari anaalhenhe wiira arweeke, ni ayo ahothama wo mpuha. 23Paahi Nayoabu vaahokolhelhe aya anari ni manyaasikari aya onkhaye, Ahoreeriya wiira Naabneri mwaana a Nanaeri, ahowa uwoonani amwene Nadaudi, ni ayo ahaalheha wiira arweeke, nkayaathama wo mpuha. 24Nayoabu nkaarwaa wa amwene ni weerelha, “Mpangilheni etu? Nkoonani, Chani Naabneri ahowa uwannyu, woonaka nhaahiya arwee? 25Chani, nhochuwelha wiira Naabneri mwaana o Nanaeri aawilhe uthepiachani, achuwelhe manyaasikari inyu ni alhe nnopanga inyu.”
26Athameke wa Nadaudi, Nayoabu aholhehera attu aakushe Naabneri ni waawiha. Ni ayo nkayaaphwanya anari valhushi u Nasira ahohokolhosha, nansho Nadaudi ahichuwelhaka. 27Paahi Naabneri ahokolhieke Uhebroni, Nayoabu ahaakusha ni waarweha nhina ichuumba vaari nlhako muulhupalhe, eepangaka thoko anothanana waarerihana wo faraga. Vavawo Nayoabu ahaahoma vanthunkwani ukhalhawaya Naabneri aheeva Naasaheli ahimaaya Nayoabu, Naabneri nkaakhwa. 28Yamalheke Nadaudi veewilhe aya yoyo mwaha uyo nkeera, “Apwiiya Nlhuku, ahochuwelha wiira mii ni ashilhoko aka khanirina nlhattu wo umihoolho waya, unaacha ukhwa u Naabneri mwaana a Nanaeri. 29Nlhattu wo ukhwa waya wonkhaye akhalheke vachulhu va muru u Nayoabu ni ashilhoko a athumwanaya onkhaye! Mahuku onkhaye, ashilhoko a Nayoabu anokhalha ntu o wereyachiya uretta, ama o makutulha, ama ntu neeta wo ntonto, ama nohalha ukhwa wo uphanga, ama o uhikhalha ni yolhia.” 30Nayoabu ni ahimaaya Naabishai aheeva Naabneri, wo nlhattu wo weeva Naasaheli ikatema yo ikhoto Ugibeoni.
Naabneri anoovithiya
31Yamalhekeru, amwene Nadaudi nkeerelha Nayoabu ni attu onkhaye aari vamoka ni ayo wiira aahulheke ikuwo chaya, awareke ikuwo cho majuniya wiira oonihe ichuku yo wunlhelha Naabneri. Ni nihuku naavithiya aya Naabneri, amwene Nadaudi aatwanre utulhi ikori yaakunshe ntembo iyo. 32Naabneri nkaavithiya Uhebroni uwo, ni amwene ahokhuwelha ni wunlhelha aneemenlhe vachereshere nihiye, ni attu akina onkhaye ahopanga chiichammo etu.
33Amwene Nadaudi nkayonlhelha Naabneri yeeraka,
“Chani yaari chani mpaka Naabneri nakakhwaa thoko ntu o uhikhalha ni marumbo?
34Miono chaya khachaattukiye,
ni mieto chaya khachaattukiye nikongwa,
Mena, eeviye ni attu o uhilhoka!”
Attu nkayonlhelha tho.
35Yamalhekeru, uthana woothe attu ahorwaa ni waapepecha Nadaudi wiira alhie, nansho Nadaudi nkayaalhupelha wo wiira, “Nlhuku akiiveke, yakhalhaka kinoolhia ittu iriyoothe nchuwa nihinaaya wiilha.” 36Attu onkhaye nkayoonacha yoyo mwaha uyo, nkeera kila ittu anopanga amwene yorera. 37Paahi etu, attu o Israeli onkhaye nkayaachuwelha wiira amwene Nadaudi khaari ni nlhattu uriyoothe vachulhu nookhwa a Naabneri, anaaya Nanaeri. 38Amwene Nadaudi nkayeerelha akarumiya aya, “Chaani nhochuwelha wiira lhelho ntu muulhupalhe ni ochuwania hokhwa Uisraeli? 39Ni mii lhelho kihothommwa, ata kinawaaka uhikiya makhura kivariye umwene, ni yayo achishaana a Naseruya ayo, ahokhalha o uhilhoka uwannyaka. Paahi Apwiiya Nlhuku aatwarusheke wo ulhikaana ni uhilhoka waya uwo.”
The Bible Version in Makua @The Word for The World International and Makua Language translators. All rights reserved.