2Nasamweli 2
2
Nadaudi anoohikiya makhura ukhalha amwene o Yuda
1Wamalheke uvira yoyo mwaha uyo, Nadaudi ahaakoha Apwiiya Nlhuku wo wiira, “Chani kihokolhieke kirwee iwani imoka yo Uyuda?”
Apwiiya Nlhuku nkayeerelha, “Nrweeke.”
Nadaudi nkaathepa ukoha, “Nirweeke iwani yaani?”
Apwiiya Nlhuku nkaakhulha, “Nrweeke Uhebroni.” 2Paahi Nadaudi ahorwaa Uhebroni vamoka ni manyaahanu aya elhi, Ahinamu o Uyezreeli, ni Abigaili, nankhwelhi a Nanaabali, o ukhuma iwani yo Ukarmeli. 3Ahaattukana ni attu aya ni manyaasikari, kila ntu aattukanaka ashilhoko awe, nkaamakacha nipuro mmawani, nchereshere mwoolhoko wo Uhebroni.
4Yamalheke, attu o Uyuda ahaarwehelha Nadaudi Uhebroni uwo ni waahika makhura akhalhe amwene aya.
Nadaudi veewilhe aya wiira attu o Uyabesh Gileadi phi avithilhe Nasauli, 5ahaaruma attu wowo Uyabesh Gileadi uwo urweeha nttenga eera, “Apwiiya Nlhuku ovaherekeni ibarakha mwaatti, ukhalhawaya mwahooniha cheera inyu wo waarumelhelha Nasauli, ni waavitha. 6Vano, Apwiiya Nlhuku o ushungererekeni, ni ulhohani. Ni mii kinoupangelhani ntheko woombone ukhalhawaya ahopanga moombone. 7Mwiilhipiheke ni o machiri! Amwene inyu Nasauli ahokhwa, ni attu o Uyuda ahokithanlha wo ukihelha makhura kikhalhe mwene aya.”
Nashboshethi anoovariya nchina wo umwene o Israeli
8Naabneri anaaya Nanaeri, nholhelhi a manyaasikari a Nasauli aari anakunshe Nashboshethi anaaya Nasauli ni waarweeha Umahanaimu. 9Wowo, Naabneri ahaavara nchina Naishboshethi ukhalha amwene o ilhapo yo Ugileadi, Uashuru, Uyezreeli, Uefraimu, Ubenyamini ni Uisraeli wonkhaye.
10Naishboshethi aari o iyaakha makhumi ncheshe vaachokhonlhe aya utawara Uisraeli, nkayaatawara wo iyaakha piilhi.
Nansho nikosho wo Uyuda anotawariya ni Nadaudi. 11Ni ayo ahotawara nikosho ni Nayuda iyaakha saba ni nusu, ni iwani yaakhalha aya yaari Uhebroni.
Ikhoto ya attu o Uyuda ni o Israeli
12Naabneri anaaya Nanaeri vamoka ni manyaaholhelhi a Nashboshethi, anaaya Nasauli, ahothamacha Umahanaimu nkaarwaa Ugibeoni. 13Nayoabu anaaya Naseruya ni akarumiya akina a Nadaudi, ni ayo ahokhuma ni ukumaana ni Naabneri ni attu aarina aya nthapwi wo Ugibeoni uwo. Mphingo mmoka mpata wo mwoolhoko ni nkina mpata nkina.
14Naabneri nkayeerelha Nayoabu, “Mwaahiyeke ashimirawo alha aatakaneke umihoolho wihu.”
Nayoabu nkaakhulha, “Eiyo, aye.”
15Vavawo ashimirawo khumi ni elhi a Naishboshethi ni o nikosho ni Nabenyamini, ahaatakana ni ashimirawo khumi ni elhi o nikosho ni Nadaudi. 16Kila mmoka nkammara mmalhaponi waatakana awe vamuruni, nkankhapa uphanga mpararini. Paahi elhi onkhaye ahowulhuwacha vathi, nkayaakhwacha. Paahi etu, vavawo vakittu vawo waheehaniya Uhelkathi Hazurimu, maana aya “Imata cho ukhapaniya uphanga.”
17Paahi ikhoto yo uthepa chinene yahotharammwa nenno nihuku nno. Naabneri ni attu o Uisraeli ahokottolhiya ni attu a Nadaudi. 18Achishaana ashilhopwana araru a Naseruya; Nayoabu, Naabishai ni Naasaheli aari wowo. Naasaheli aari o wooria uttawa thoko nachoro. 19Naasaheli nkayaatoporaniha Naabneri wo uhiittuwa, wala wo uhirukunuwa wiimonono mena wiimushi. 20Naabneri vaarukunuwilhe aya uweha utulhi, nkayoona Naasaheli, nkayeerelha, “Chani, phi inyuva Naasaheli?”
Ni ayo nkaakhulha, “Eiyo phi mii.”
21Naabneri nkeera, “Nkihiyeke mii. Nrukunuweke, muntoporeke mmirawo nkina, mwammaraka munthurulheke ikerero chirinawe.” Nansho Naasaheli khayewelhenlhe, nkaathepa waatoporaniha. 22Naabneri nkayeerelha Naasaheli tho, “Nhiyeke ukitopora. Chani kuwiivekeni wo nlhattu waani? Kinohalha uwehana chani ni onninyu Nayoabu?” 23Nansho Naasaheli nkaakhota. Paahi, Naabneri nkayaahoma Naasaheli nivaka vanthunkwani utulhitulhi, ni ukhumelhelha vathanani u Naasaheli. Ni ayo nkayaawulhuwa vathi ni ukhwa vavawo vavawo. Ni attu onkhaye vaphiilhe vavawo vakittu vawo, aheemelha shiriri.
24Nansho Nayoabu ni Naabishai nkayaattwara Naabneri. Nchuwa veenlhe aya, ahophiya umwaakoni wo amma, urii unoshelha nchuwa Unagiya, urii iphiro yo ukelha uthako wo Ugibeoni. 25Attu o nikosho ni Nabenyamini nkayaakhalha nkhukulhu mmoka ni Naabneri, nkayaathothokaniha mphingo mmoka, nkayeemelhacha vachulhu umwaakoni. 26Yamalhekeru Naabneri nkeehana Nayoabu, “Chani, ninowaatakana mahuku onkhaye? Chani, khannoona wiira umalhelha waya khunrera? Chani, khanchuwenlhe wiira hii ashilhoko inyu? Ni vavawo iyaakhani vanohalha inyu waalhiha attu inyu wiira ahiwe uttwarattwara?”
27Nayoabu nkayaakhulha, “Kinolhupelha wa Nlhuku ri nkumi wiira, yakaari khamwolhumanche chiicho, manyaasikari aka anthepa waattwara manyaasikari inyu mpaka meelho wichishu.” 28Paahi etu, Nayoabu ahoopa nipalhapata, ni attu nkayaahiyacha waattwarelhelha attu o Israeli, ni ikhoto nkayaahiya.
29Naabneri ni manyaasikari aya nkayaavira u nikoote wo Uaraba, wo ushelhelhiha uhiyu wonkhaye. Waashelhe waya nkayaalhapuwa mwoolhoko wo Uyorodani, nkayeetta uthana wonkhaye ni uphiya Umahanaimu.
30Nayoabu vaahilhe aya waatoporaniha Naabneri, ahohokolhia ni waathothokaniha manyaasikari aya onkhaye, ni woona wiira vamoka ni Naasaheli, manyaasikari a Nadaudi khumi ni tisa Khaawo, aheeviya ukhotoni. 31Nansho manyaasikari a Nadaudi aari neevilhe attu imia ttaru ni makhumi sita o nikosho ni Nabenyamini vamoka ni attu nikosho ni Naabneri. 32Nayoabu ni manyaasikari aya ahokusha iruttu i Naasaheli, ni uvitha unihiyeni wa athumwanaya, naari Ubethlehemu. Yamalhekeru, Nayoabu ni attu aya aheeta uhiyu wonkhaye, ni waashelhe waya ahophiyacha uwani Uhebroni.
The Bible Version in Makua @The Word for The World International and Makua Language translators. All rights reserved.