Roma Uram 7

“Ner dobmarinyi sirya dibmaci ura, er ner sulyi ner asi yuknyi biryi ur dobkwande,” eboka kiklina uram ton eterebmou

7:1-6

1Ura, ni kwit yabwe. Kekebdarur. Sunbabyi Musa biryi, “Ukubdarur-Ukuna mem,” en uram bingna nang kurandum ati, niryi sunti, “Ni kwit yabwe,” ebmasin. Ura, niryi sunsi Musa biryi arungdeirisin uram deyok ati eterebkwinsin. Musa biryi, “Ukubdarur-Ukuna mem,” en uram ebdeibsou asi nunci barwetam kum deibtibyi. Eda, nunda a uram aryi tabwe demsina nang ato kunub. Ani, nun sirya dibmabyi ura, a arungdeirisin uram aryi nunsi tuba kum arungdeirisurur. 2Ura, niryi kiklina uram ton doboka eterebkwinsin. Ara, sal aryi ner dobmaci ura, sun nang bitinyi ara tabwe deboka iya dordaranding nang ato kururung. Ati, ner dobmarinyi kam tuba kuranci ba, er ner ara er akenyi ab tonkwa iya kurantiring ba, yuknyi biryi ersi dobcei. Ba, ner dobmarinyi sirya dibmaci ura, tabwe loblobmar ati, yuknyi biryi a ner asi ur dobkwande. 3Ati, er akenyi kam tuba kuranci ba, yuknyi biryi a ner asi dobmaci ura, a ner ara talyi yon ner ato kubkwande. Ba, er akenyi sirya dibmaci ura, tabwe sirya loblobmar ati, yuknyi biryi a ner ara sulyi ner asi ur dobkwande. Ara, yuknyi biryi sulyi ner asi dobci ura, a ner ara talyi yon ner ato kum kurante.

4Ati, ni kwit yabwe dib tenen nang. Sunbabyi neiktoto tabwe lobdeibsou nang ato kurandum. Ara, nun Du Yesus Kristus Er ining sunti diksaksou deyok aryi, sunda Musa biryi arungsina uram aryi tabwe demsina nang tuba kum kurandum. Eda, sunda nun Du Yesus Kristus amwetam bun nang sirya kibmarum. Ati, Er Imtamnyi urasintam aryi du moubkwansir ati, sunda nun Du Yesus Er Imtamnyi biryi kam bukeibmounyi dam kun nang ato kibmarum. 5Nunda minob ura malyi kun dinyi aryi tabwe deiboka arungnansou nang ato kuramoubwe. Ato kuramaburyok, nun kanya dam aryi, “Malyi kubtibyi,” tenen dinyi yuk-yuk anaransou tok, nunci nun yan taruk nong biriman aryi malyi dinyi akwe kuramoubwe. Musa Uram aryi nunsi tabwe demnansou bok, nunci, “Er Imtamnyi Uram kununa nun li,” tabakoka teneramoubwe uca, du kum mouriransou. Eda, malyi kun dinyi akwe kuramoubwe ati, din dinyi akwe dororamoubwe. 6Musa Uram aryi nunsi minob ura tabwe deboka arungnansou ani, nun Du Yesus biryi nunsi lebdeibsou ura, Musa Uram tabwe deboka arungsina nang tuba kum kunub. Musa Uram aryi nunsi minob ura tabwe deboka arungnansou ba, nunda Musa biryi, “Ukubdarur-Ukuna mem,” eboka kerek sengna deib aryi Er Imtamnyi Uram kunurderamoubwe. Ba, nun Du Yesus biryi nunsi lebdeibsou ura, nunda ukuryok kanya boboka Er Imtamnyi Kanya Roh Kudus biriman aryi Er Imtamnyi Uram asi kunubde banub.

Nun Du biryi nunsi lebdeibsou bok, “Malyi dinyi kunubtibyi,” tenen dinyi ton nun kanya dam tuba anaransir uram

7:7-26

7Ati, nunci unato dinyi ebkwayeb do? Musa Uram deib aryi ninyi aryi malyi kun dinyi tabakoka kunuramoubwe ati, nunci, “Musa Uram ara malyi dinyi akwe kurur,” ebtibyi do? Ato tenen kum. Musa Uram kum kekebtibyi ura, nunci, “Nira malyi dinyi kunanyi,” tenen kum bikdatibyi. Musa Uram aryi, “ ‘Yuk nang dinyi dobdobtinyi,’ tenena mem,” ebdeibsou ati, nunci, “Yuk nang dinyi dobdobtinyi,” tenena ara malyi dinyi kurur tenen bingnub. Musa Uram kum kekebtibyi ura, nunci ato tenen kum bikdatibyi. 8Ba, Musa Uram aryi, “Ukubdarur-Ukuna mem,” ebdeibsou bok, nunci nun kanya dam aryi, “Nun li,” teneramuburyi, malyi kun dinyi yuk-yuk tabakoka kunuramoubwe. “Ukubdarur-Ukuna mem,” en uram kum kubmate ura, malyi kun dinyi ababyi kum kurante ati ebman. 9Niryi minob ura “Ukubdarur-Ukuna mem,” en uram kum kekebmasiryok, kam kurandanyi bitonyi tuba kuranse. Ba, aminda aryi “Ukubdarur-Ukuna mem,” en uram sirya kekebmase ura, niryi ni kanya dam, niryi ni kanya dam aryi, “Ni li,” tenen malyi kun dinyi tabakoka kunuranse. Malyi dinyi akwe kunuranse deyok aryi, nira dina anyi atonyi kuranse. 10Ati, Musa biryi, “Ukubdarur-Ukuna mem,” en uram ebdeibsou ara, “A uram deib aryi kam kun dinyi dobdobting,” tenen ebdeibsou. Ato tenen ebdeibsou bok, a uram ara kam kun dinyi kum boyangaransou. Eda, din dinyi akwe boyangaranou ati ebman. 11Ara, Musa biryi, “Ukubdarur-Ukuna mem,” ebdeibsou bok, ni kanya dam aryi, “Ni li,” tenen dinyi anabnou uca, malyi kun dinyi kunuranse. Ni kanya dam aryi anaranou malyi kun dinyi ara nisi bowanikminikoka obminiknou. Ara, Musa Uram aryi malyi kun dinyi ati sokon loubdeibmou ura, a malyi kun dinyi nisi bowanikminikoka obminiknou.

12Ati, ni kwit yabwe. Niryi, ato ebmasin bok, nunci, “Musa Uram ara malyi dinyi,” kum ebtibyi. Eda, Er Imtamnyi biryi, “Ukubdarur-Ukuna mem,” en uram ara tatab-tatab ebman kum uram kurur. A uram ara, “Er Imtamnyi urasintam aryi teleb dinyi akwe kunubdarur,” eboka arungdeirisurur. Tonda, a uram ara Teleb Uram akwe kurur. 13Ati, Musa Uram ara teleb dinyi kurur ati nisi obminikmanou do? Ato tenen kum. Eda, Musa Uram deib aryi ni malyi kun dinyi lak kibnou uca, a malyi kun dinyi nisi obminiknou. Ara, Musa Uram ara Teleb Uram kuramuryok, malyi kun dinyi sokon loubdeibmou uca, nunsi din dinyi boyanganmasou. Ara, malyi kun dinyi lak kibdeibkwansou ati, Musa Uram aryi din dinyi boyangansou. Ara, Musa Uram aryi lak kibdeibsou uca, nunci malyi kun dinyi ati, “Er Imtamnyi urasintam aryi iya malyi kurur,” tenen bingnub.

14“Ukubdarur-Ukuna mem,” en uram ara Er Imtamnyi biryi ebdeibsou uram kurur ati iya teleb dinyi kurur ati ebman. Ba, nira, “Malyi dinyi kunubtinyi,” tenenanyi kunun ati, malyi kun dinyi aryi tabwe debnounyi kunun. Ara, nun Du Yesus biryi nisi lebdeibnou bok, ni kanya dam yuk aryi malyi tenen dinyi tuba anarande. 15Ni kanya ara wiliboka-wiliboka kuranir ati, ni kanya ara kankana kuranir. Niryi, “Teleb dinyi kunubkwan,” teneran cok, malyi kun dinyi tuba kubde banun. Ba, niryi, “Malyi dinyi kuna ni li,” teneran cok, malyi kun dinyi tuba kubde banun. Ati, niryi, “Ato kunubkwan,” tenen dinyi kum kunuran cok, “Ukuna ni li,” tenen dinyi tuba kubde baran. 16Ati, niryi, “Malyi dinyi kuna ni li,” tenenun ati, niryi Musa Uram ati, “Teleb Uram akwe,” tenenun. Ati, niryi Musa Uram tuba yan yaniran cok, niryi a uram ati, “A uram ara Teleb Uram ati niryi kunubtinyi,” tenenun. 17Ura, niryi, “Malyi dinyi kuna ni li,” tenenun ati, a malyi kubde ban dinyi ni yuk aryi tuba kum kubde banun. Eda, ni kanya dam aryi malyi tenen dinyi aryi nisi mikib kuboka tabwe tuba demnurur ati, niryi, “Ni li,” tenenun cok, a malyi kun dinyi tuba kubmilibde banun. 18Ni kanya dam yuk ara, “Teleb dinyi kunubkwan,” tenen dinyi ton kum anaranir ati ebman. Ara, ni kanya dam aryi minob tukwetam nang tenen kanya ati ato ebman. Ati, niryi, “Er Imtamnyi urasintam aryi teleb dinyi kunubtinyi,” tenenun cok, a teleb dinyi diboka kununa ati mikib kum kunun. 19Ati, niryi, “Teleb dinyi kunubkwan,” tenenun cok, teleb dinyi kum kubde banun. Ba, “Malyi kun dinyi kubnyei,” tenenun cok, malyi kun dinyi tuba kubde banun. Ati, niryi, “Kunubtinyi,” tenen dinyi ara yuk, niryi kubde baran dinyi ara yuk. 20Ati, niryi, “Malyi kun dinyi kubnyei,” tenenun ati, ni yuk aryi a malyi kun dinyi tuba kubde kum banun. Eda, ni kanya dam aryi anaranir malyi tenen dinyi nisi tabwe tuba demnurur uca, niryi, “Ni li,” tenenun cok, malyi kun dinyi kubmilibde banun.

21Ati, ni kanya umbura tenen dinyi ara bisik sengna kum uca ato kuranir. Niryi, “Teleb dinyi kunubkwan,” tenebde banun cok, “Malyi dinyi kubkwan,” tenen dinyi anaboka anmalakoka bisik sengnanir. 22Ura, niryi ni kanya dam aryi, “Teleb dinyi kunubtinyi,” teneibde banun ati, niryi Er Imtamnyi biryi arukdeibsou uram ati, “Teleb Uram akwe,” tenenun. 23Ura, niryi ni kanya dam aryi Er Imtamnyi arungdeirisin uram ati, “Teleb Uram,” teneibde banun bok, malyi tenen dinyi ara ni kanya dam anaboka ni kanya ab ni nong ababyi tabwe demnurur ati ebman. A malyi tenen dinyi ara ni kanya dam aryi teleb teneibde banun dinyi ati, “Bisik sektinyi,” tenen orminingyangaranir. A malyi tenen dinyi ara ni kanya ab ni nong ab asi tabwe demnurur uca, niryi malyi kun dinyi tuba kubde banun ati ebman. 24Nibabyi sunbabyi malyi kun dinyi aryi tabwe demsina nang tuba kunub ati, nun mambul weik kun nang tuba kunub se. Nun nong kanya ara malyi tenen dinyi aryi tabwe demnansir ati, unanyi biryi nunsi lebdeibkwansir do? 25Nun Du Yesus Kristus lebdeibsounyi biryi nunsi iya lebdeibkwansir ati ebman. A deyok aryi, niryi nisi, “Ei nun Nai,” enun. 26Ati, niryi ni kanya dam ukuryok kanya aryi Er Imtamnyi biryi arungdeirisin uram kunubde banun cok, ni kanya dam minob kanya aryi malyi tenen dinyi aryi tabwe demninanyi tuba kunun.

Currently Selected:

Roma Uram 7: MTG

Highlight

Copy