Roma Uram 8

Er Imtamnyi Kanya Roh Kudus ara nun kanya dam aryi kusururnyi biriman aryi nunci Er Imtamnyi urasintam aryi teleb dinyi kunubde banub uram

8:1-17

1Er Imtamnyi biryi nunda nun Du Yesus Kristus dam kun nang ati, “Ni mabwe nermabwe,” tenen dobdobmasou deyok aryi, nun Nai biryi nun malyi kuramoubwe to teneina kum uca, nunsi weik wenesin dinyi kum karebkwansir. 2Nunda malyi kun dinyi ab dirdeisin dinyi ab aryi tabwe demnansou nang kuramoubwe asi nun Du Yesus Kristus biryi lebdeibsou uca, Er Imtamnyi Kanya Roh Kudus ara ninyi kanya kam kurdeirisururnyi mikib biriman aryi nunda malyi kun dinyi ab dirdeirisin dinyi ab aryi tabwe demsina nang tuba kum kunub. A deyok aryi, Er Imtamnyi biryi nunsi weik wenesin dinyi kum karebkwansir. 3Nunda malyi dinyi akwe tenen kuramoubwe deyok aryi, Er Imtamnyi biryi Musa biriman aryi arukdeibmasou uram ara lemsina ati mitang kiboka nunsi kum lebdeibmasou. Musa biriman aryi arukdeibmasou uram ara nunsi lemdeirisina ati mikib kum kuramwe bok, nun Nai Imtamnyi biryi nunsi lemdeirisina ati mikib dinyi karebmasou. Ati, nun Nai Imtamnyi biryi Er Mi kobdoba bokwetebsou ura, Erda malyi kun dinyi kum kuramuryok, nun tonyi kiboka ninyi kibmou. Ara, nun malyi kun dinyi kilibkwansou ati nun Du Yesus bira Erdamnyi karebdanmou ba, dibmou. Ato kuboka nun Du Yesus bira, “Malyi kanya bon nang aryi malyi kun dinyi ara Er Imtamnyi biryi wenen dinyi kurur,” tenen lak kibdeibmou. 4Nun Du biryi Erdamnyi karebdanmou ara, “Sun dib tenen nang ara Ni mikib deib aryi Er Imtamnyi biryi arungdeirisina uram Teleb Uram asi diboka kunubde binkwanung,” tenen Erdamnyi karebdanmou. Ara, nunda nun kanya dam aryi malyi tenen dinyi tuba kum kubmurubde ban nang ati ato ebman. Nunda Er Imtamnyi Kanya Roh Kudus aryi teleb tenesurur to, kunubde banub nang ati ato ebman.

5Sun kanya dam aryi malyi tenen dinyi kubmurubde ban nang ara sun kanya dam aryi malyi kun dinyi akwe tenebde baraming. Bok, nunda Er Imtamnyi Kanya Roh Kudus aryi teleb tenesurur dinyi kunubde ban nang ara Er Imtamnyi Kanya Roh Kudus aryi teleb tenesurur to akwe tenebde banub. 6Sun kanya dam aryi malyi dinyi tenen dinyi kubmurubde baramingnyi nang ara dirdeirisin dinyi doronung. Bok, nunda Er Imtamnyi Kanya Roh Kudus aryi teleb tenesurur to milibde banub nang ara kam kun dinyi ton, kilkil kanya bon dinyi ton doronung. 7Ara, nun kanya dam aryi malyi tenen dinyi tenen kunubde baramibyi uca, nunda Er Imtamnyi biti ordana nang ato kunub. Sun ato kuramingnyi nang ara Er Imtamnyi arungdeirisina uram ati, “Nun li,” tenen kunubde kum kununung. A nang ara Er Imtamnyi arungdeirisin uram asi kunubman kum kunung ati ebman. 8Sun mining kanya aryi malyi tenen dinyi akwe kuramingnyi nang ati Er Imtamnyi biryi, “Ni mabwe nermabwe, Ni kanya teleb kimdeirinunung” kum tenerur.

9Ura, ni kwit yabwe. Ato ebman bok, sunda dib tenen nang ara sun kanya aryi kuboka malyi tenen dinyi aryi tabwe demsina nang kum kurandum. Eda, sunda Er Imtamnyi Kanya Roh Kudus aryi teleb tenesurur to kunubde barandum ati ebman. Ara, Roh Kudus aryi sun kanya dam kuransici nang ati ato ebman. Bok, Roh Kudus aryi sun kanya dam asi kum kuransici uca, sunda nun Du Yesus Kristus dam kun nang kum kurandum ati ebman. 10Nun Du Kristus bira sun kanya dam kuransici uca, sunci sun kanya dam kam kurdeirisin dinyi dobdobmarum. Ara, sun nong ara malyi kun dinyi deyok aryi, dibmar dinyi ato kurur. Bok, Er Imtamnyi biryi sunti, “Ni mabwe nermabwe,” tenen dobdobmasou deyok aryi, sunci sun kanya dam aryi Er Imtamnyi Kanya Roh Kudus ara kam kurdeirisururnyi dobdobmarum. 11Er Imtamnyi biryi Er Kanya Roh Kudus biriman aryi nun Du Yesus bisi kam bukeibmou. Ura, Roh Kudus sun kanya dam kubsici uca, Er Imtamnyi biryi neiktoto sunbabyi Er Kanya Roh Kudus biriman aryi kam kubdeibkwansir. Ara, sun nong ara ukuryok tuba dibde barandum dinyi ababyi kam bukeibkwansir ati ebman.

12A deyok aryi, ni kwit yabwe, nunda Er Imtamnyi Kanya Roh Kudus aryi arukdeibsici tok kunubde binkwayeb. Ba, nun mining kanya aryi anaranci malyi tenen dinyi aryi tabwe demsina nang tuba kubibyei. Nunci a dinyi kubmurubde bibyei. 13Ara, sunci sun mining kanya aryi malyi tenen dinyi kubmurubde baramunyi uca, sunci iya din dinyi dobdobkwandum. Ba, sunci Er Imtamnyi Kanya Roh Kudus mikib biriman aryi sun kanya aryi malyi tenen dinyi singibkweteboka dibdeibdamunyi uca, kam kurdeirin dinyi dobdobkwandum. 14Er Imtamnyi Kanya Roh Kudus aryi etereboka taruk taleboka bobde baransir nang ara Er Imtamnyi mabwe nermabwe kunub ati ato ebman. 15Er Imtamnyi biryi sun kanya dam asi Er Imtamnyi Kanya Roh Kudus karebsou. Ara, “Malyi kun dinyi aryi tabwe demna nang tuba kubmurubting,” tenen Erci Roh Kudus kum karebsou. Tonda, “Ilil tenen kanya bormururanting,” tenen Erci Roh Kudus kum karebsou. Eda, sunci, “Nunda Er Imtamnyi mabwe nermabwe kunub,” tenen bikdankwandum ati, nun Nai biryi Roh Kudus asi karebmasou. Ati, Er Imtamnyi Kanya Roh Kudus biriman aryi nun yuk-yuk aryi Er Imtamnyi bisi, “Abba, nun Nai,” eboka namnub. A deyok aryi, sunda Er Imtamnyi mabwe nermabwe kurandum ati ebman. 16Nunda dib tenen nang ara nun kanya dam aryi, “Nunda Er Imtamnyi mabwe nermabwe kunub,” tenen bingdanub ba, Er Imtamnyi Kanya Roh Kudus ababyi, “Sunda Er Imtamnyi mabwe nermabwe kurandum,” eboka nun kanya dam aryi lak kimsurur. 17Ura, nunda Er Imtamnyi mabwe nermabwe kunub ati, nunda Er Imtamnyi biryi ebdeibsou iya kisal dangsin dinyi dobdobkwayeb. Ara, nun Nai Imtamnyi biryi nun Du Yesus bisi, “Iya erebdeibkwankin,” ebdeibmou to karebkwande to, Erci nunbabyi neik dinyi karebkwansir cok, nunda nun Du Yesus dam kun nang ababyi Er ab tonkwa erebdeibkwansir. Ati, nunci nun Du Yesus mambul dinyi boramunyi bisi miliramib deyok aryi, mambul dinyi boramibyi uca, Er Imtamnyi biryi nunsi nun Du Yesus erebdeibmounyi ab tonkwa erebdeibkwansir ati ebman.

Er Imtamnyi biryi aminda aryi erebdeibkwansir uram

8:18-27

18Nunda dib tenen nang ukuryok kubde banub ara nun Du Yesus bisi milinub deyok aryi, mambul dinyi yuk-yuk boramibyi ani, Er Imtamnyi biryi nunsi aminda aryi dekeiboka iya erebdeibkwansir. Ukuryok ara mambul weik dinyi boramibyi ani, aminda ara utotoa nirya asi bisibkaboka iya ererdeirisin dinyi dobdobkwayeb. Niryi kankana kum uca ato dib tenenun. 19Im dangna tukwe dangna dinyi ara Er Imtamnyi biryi kiknibmou dinyi nirya ara mambul weik tuba kurande ati ebman. Ninyi atikwe ato kum ebman. Eda, mutuk kon, me kwan, bisam, kam, maka nirya ati ato ebman. A dinyi nirya ababyi dirdeirin dinyi aryi tabwe debmou dinyi aryi, “Lebdeibsute,” tenen dibde buraming. Ara, “Er Imtamnyi biryi Er mabwe nermabwe erebdeibdiryok, dirdeirisin dinyi nirya asi kum daneibsute,” tenen dibde buraming. 20Im dangna tukwe dangna dinyi ara Er Imtamnyi biryi kiknibmou dinyi nirya ara ninyi malyi kun dinyi deyok aryi, mambul kurdeirin dinyi yuk-yuk tuba boraming. Ara, “Mambul dinyi ur bobkwayeb,” tenena deyok aryi, mambul kurdeirin dinyi kum boraming. Eda, Er Imtamnyi biryi, “Malyi kun dinyi deyok aryi, mambul dinyi bobting,” tenena deyok aryi, mambul dinyi boraming. A dinyi nirya mambul weik kurandiryok, “Er Imtamnyi biryi din dinyi nirya asi kum daneibsute,” tenen dibde buraming. 21Ara, im dangna tukwe dangna dinyi nirya ara, “Dirdeirisin dinyi aryi tabwe debsou ati lebdeibsute,” tenen dibde buraming. Tonda, “Er Imtamnyi biryi Er mabwe nermabwe lebdeiboka iya erebdeibkwande ba, Erci im dangna tukwe dangna dinyi nirya ababyi nisintum lebdeibsute,” tenen dibde bunung.

22Im dangna tukwe dangna dinyi ara Er Imtamnyi biryi kiknibmou dinyi nirya ara nun dirdeirisin dinyi deyok aryi, mambul weik kurur ati nun bingnub. Mi deibkwanci ner ara mi deyok aryi, mambul weik kurande to, im dangna tukwe dangna dinyi nirya ara mambul weik kuboka engena weik ato kurur. Ara, minob talak aryi kuboka engena weik ato kuramwe ani, ukuryok ababyi engena weik tuba kurur. 23A dinyi atikwe engena kum kurande. Eda, nunda dib tenen nang ara Er Imtamnyi Kanya Roh Kudus aryi deyok kouboka du moubdeibsou dinyi dobdobmoubwe nang ababyi engen weik kanya boramib. Ati, nunci, “Er Imtamnyi biryi nun nong ababyi minola kam bukeibsiryok, Erci nunti, ‘Ni mabwe, nermabwe,’ eboka erebdeibsute,” tenen dibde bunub. 24Er Imtamnyi biryi nunsi lebdeibsou ara Erci, “Aminda aryi lebmurubde binkwan dinyi asi dibde bukting,” tenen lebdeibsou. Sirya kunubmasici dinyi asi tuba dibde buktibyi do? Ato tenen kum. Eda, nun dibde bunub dinyi ara kum kunubdeibmasici dinyi akwe dibde bunub ati ebman. 25Ati, Er Imtamnyi biryi a dinyi kum kunubmasir bok, nunci dakeiam kanya boboka, “Aminda aryi diboka kunubkwansir,” tenen dibde bunub.

26Tonda, nunda mitang nang kuramib asi Er Imtamnyi Kanya Roh Kudus aryi ebmuruboka milisurur. Ati, nunci, “Una eboka Er Imtamnyi bisi molobkwayeb do?” tenen bita kum bingnub bok, Er Imtamnyi Kanya Roh Kudus aryi nunti molormilisurur ati ebman. Ara, Er Imtamnyi Kanya Roh Kudus aryi iya engermilin kanya weik boboka tukwetam nang aryi ebman kum uram eboka nun Nai Imtamnyi bisi molormilisurur. 27Ura, nun Nai Imtamnyi ninyi kanya dibliliboka bingsururnyi biryi Er Imtamnyi Kanya Roh Kudus tenesurur to ababyi diboka bingdur. Ba, Er Imtamnyi Kanya Roh Kudus ara Er Imtamnyi biryi teleb tenesurur to bikoka erur cok, Erci nunda Er Imtamnyi dam kun nang ati molormilisurur. Ati, Er Imtamnyi biryi Roh Kudus aryi molormilisina uram asi kunubdeibkwansir.

“Er Imtamnyi biryi erebdeibsici uca, nunda dib tenen nang ara muna kimdongona nang ato kibkwayeb,” eboka eterebmou uram

8:28-39

28Nunda Er Imtamnyi bisi boukwe weik kimnub nang asi Er Imtamnyi biryi diboka teleb kubdeiboka lebdeibkwansir ati nun bingnub. Ara, teleb dinyi dobdobibyi ababyi, mambul dinyi nun dam yasici ababyi, Er Imtamnyi biryi nunti, “Teleb kubdeibkwan,” tenen nunsi milisurur. Ara, Er Imtamnyi biryi teleb tenebsou to nabdeibsou nang asi Er Imtamnyi biryi tuba-tuba milisurur ati ebman. 29Ura, Er Imtamnyi biryi nunda dib tenen nang asi yuma kobdob talak aryi bikamuryok, Erci nunsi, “Ni Mi kobdoba kurur to kibdeibkwan,” tenen wibdeibsou. Ara, nunda dib tenen nang ninyi ilinto Er weit yabwe malnerabwe ato kunub bok, nun Du Yesus bira nun kankan aryi dunyi bitonyi kurur. Er Imtamnyi biryi minob ura ato tenen nunsi wibdeibsou. 30Ura, Er Imtamnyi biryi yuma kobdob talak aryi wibdeibsou nang ati Erci aminda aryi nabdeibsou. Ara, “Sun malyi kun dinyi taklobmunci nisi milibnindarur,” eboka nabdeibsou. Ura, Er Imtamnyi biryi nabdeibsou nang ati Erci, “Ni mabwe nermabwe,” tenen dobdobmasou. Tonda, nun Nai Imtamnyi biryi nunsi dobdobmasou ani, Erci nunsi erebdeibkwansir.

31Ati, nunci a dinyi nirya liliboka kekebmab ati unato dinyi ebkwayeb do? Er Imtamnyi biryi nunsi tuba-tuba milibde basurur ati, unanyi-unaner aryi bisik sekoka nunsi malyi kiknibminiksute do? Ninyi tentok ababyi nunsi malyi kum kiknibminiksute ati ebman. 32Nun Nai Imtamnyi biryi Er Mi kobdob ati, “Lebkwan,” kum tenebmou cok, Erci Er Mi bisi nunti karebmasou. Er Mi kobdoba karebmasou ati, Erci nunsi yuk dinyi-yuk dinyi tabakoka kum karebkwansir do? Ato tenen kum. Nun Nai biryi kisal dakoka yuk dinyi-yuk dinyi ababyi tabakoka karebkwansir ati ebman. 33Nunda Er Imtamnyi biryi wibdeibsou nang kunub ati, unanyi-unaner aryi nunsi tatab-tatab ebsute do? Ninyi tentok ababyi nunsi tatab-tatab ebman kum kubsute ati ebman. Er Imtamnyi biryi nunti, “Ni mabwe nermabwe kunung ati kum wenebkwan,” tenen milisurur ati ato ebman. 34Unanyi-unaner aryi, “Malyi nang kurandum, se,” eboka wenebdeibsute do? Nun Du Kristus Yesus bitikwa malyi nang wenerurnyi kururcok, Erci nunsi kum wenebkwansir ati ebman. Nun Du biryi nunti dibmasou deyok aryi, ninyi aryi nunsi tatab-tatab ebmasin kum kusurur. Nun Du bira kam bukokmou ani, Er Imtamnyi siriktam aryi bururnyi bira nunti molormilisurur. 35Unanyi-unaner aryi nun kan nun Du Yesus Kristus boukwe weik kimsurur kan tikoka bisik seksute do? Ninyi tentok ababyi bisik kum seksute. Mambul dinyi nun dam yangasici uca bisik seksute uca, nun Du Yesus biryi nunsi boukwe tuba kum kubsute do? Ato tenen kum. Ninyi aryi, “Obtibyi,” tenen domkiringnansingnyi uca, nun Du Yesus biryi nunsi boukwe tuba kum kubsute do? Ato tenen kum. Kwaning ataransici dinyi bisik seksute uca, nun Du Yesus biryi nunsi boukwe tuba kum kubsute do? Ato tenen kum. Ongon aling kum ongoramibyi dinyi bisik seksute do? Ato tenen kum. “Obsicei,” tenen dinyi kankan kuramibyi ura, ato dinyi bisik seksute do? Ato tenen kum. Ninyi aryi on ya biriman aryi obsingnyi uca, nun Du Yesus biryi nunsi boukwe tuba kum kubsute do? Ato tenen kum. 36A dinyi nirya nun dam yangasici dinyi ati Er Imtamnyi Uram umbura aryi ato eboka kerek sekeibmou,

“Nunda kanda Imtamnyi bisi milibde banub nang kunub deyok aryi, ninyi aryi nunti tuba-tuba, ‘Obkwayeb,’ tenen mar moun yibde basunung.

Mar moun yibde basunung cok, sunci nunti, ‘Oyibkwana domba ato kunung ati obkwayeb,’ tenesunung.” (Mazmur 44:23)

37“Obtibyi,” tenesunung dinyi ton mambul dinyi yuk dinyi-yuk dinyi nun dam yangasici ababyi nunda dib tenen nang ara mikib kuboka muna kimdongona nang ato kunub. Ara, nun Du Yesus biryi nunsi iya boukwe weik kusururnyi mikib biriman aryi nunci iya muna kimdongona nang ato kunub ati ebman. 38Niryi kankana kum uca ato tenen dib tenenun. Nun Du biryi nunsi tuba-tuba boukwe weik kusurur ba, din dinyi ababyi kam kun dinyi ababyi nunsi bisik kum seksute ati ni dib tenenun. Er Imtamnyi Uram eryuryangan nang ababyi nunsi bisik kum seksute. Tonda, isa nang weik sienyi ab Er amwetam nang ababyi bisik kum seksute. Weik sien nang yuk nang ababyi bisik kum seksute. Ukuryok kubde baraming dinyi ton aminda aryi kubde binkwaming dinyi ababyi bisik kum seksute. Er Imtamnyi biryi nunsi tanglona kum uca boukwe weik kusurur ati ebman. 39Iya erebdob dinyi aryi bisik kum seksute. Tonda, iya amwetam dinyi ababyi bisik kum seksute. Imtam tukwetam aryi kuranci dinyi tentok ababyi bisik kum seksute. A dinyi nirya ara nun kan Er Imtamnyi biryi boukwe kusurur kan tikoka bisik kum seksute ati ebman. Er Imtamnyi biryi nunsi boukwe weik kusurur ara nun Du Yesus Kristus biriman aryi nunsi iya boukwe weik kusurur ati, bokdanman kum kunub ati ebman.

Currently Selected:

Roma Uram 8: MTG

Highlight

Copy