Roma Uram 6

Nunda nun Du Yesus Kristus biryi lebdeibsou nang ara malyi kun dinyi kununa aryi dibdeibdanmoubwe nang ato kunub ati, “Malyi dinyi taklobkwayeb,” tenena akwe kunub

6:1-14

1Ati, nunci unato ebdankwayeb do? “Nunda malyi kun dinyi aryi tabwe debsou nang kubmurubde binkwayeb,” ebdankwayeb do? Ato tenen kum. Ura, nunci, “Malyi dinyi kunubtabakde bibyi uca, Er Imtamnyi biryi tabakoka lebdeiboka kisal dakeibsute,” tenebkwayeb do? 2Ato tenen kum. Nunda nun Du Yesus biryi lebdeibsou nang ara malyi dinyi kununa ati dibdeibdanmoubwe nang ato kunubci, “Malyi dinyi kununa nun li,” tenena akwe kunub ati ebman. Ati, nunci teneiboka, “Malyi kun dinyi ur kunubmurubde binkwayeb,” tenena kubkwayeb do? Ato tenen kum. 3Nunda nun Du Yesus bisi dib tenen nang ara nun Du Yesus dibmounyi si deib aryi me dongobmasei. Me dongobmasei ara, “Nun Du dibmounyi dam kun nang kibmai uca, malyi kun dinyi kununa ati dibdeibdanmai nang ato kunung,” tenebmai cok, me dongobmasei. 4Me dongobmasei biriman aryi nunda nun Du Yesus Kristus ab tonkwa dibmoubwe nang ato kibmaburyok, Er ab tonkwa tukwe dongobmasei nang ato kibmoubwe. Ati, nunci, “Ukuryok kanya boboka Er Imtamnyi urasintam aryi teleb dinyi kunubkwayeb,” tenen me dongona biriman aryi nun Du Yesus ab tonkwa dibmoubwe nang ato kibmoubwe. Ara, nunci, “Nun Nai Iya Erebdobnyi biryi nun Du Yesus dibmounyi bisi kam bukeibmou to, nunbabyi neiktoto kam bukeibsici uca, Er Imtamnyi urasintam aryi teleb dinyi kunubde binkwayeb,” tenebmoubwe asi me dongobmasei.

5Ati, nunda nun Du Yesus dibmounyi dam kun nang kuboka, “Malyi kun dinyi nun li,” tenen nang kuramibyi ura, nunda nun Du Yesus kam bukokmounyi dam kun nang kuramibiryok, Er Imtamnyi urasintam aryi teleb dinyi kunubde binkwayeb ati ebman. 6Nun minob, “Malyi dinyi kunubde binkwayeb,” tenen kanya boramoubwe asi nun Du Yesus Kristus biryi doboka co lase deiboka dibdeibsou ati bingnub. Ara, nunda malyi tenen dinyi aryi tabwe debsou nang tuba kum kubkwamoubwe ati, nun Du Yesus biryi a malyi tenen dinyi dibdeibsou. Nun a dinyi bingnub. 7Ara, unanyi-unaner malyi kun dinyi kununa ati dibdeibdamingnyi ura, malyi kun dinyi aryi tabwe deamwe nang tuba kum kunung. 8Nunda nun Du Yesus Kristus ab tonkwa dibmoubwe deyok aryi, nunda neiktoto nun Du Yesus ab tonkwa iya kam kubkwayeb ati nun dib tenenub. 9Nun Nai Imtamnyi biryi nun Du Yesus Kristus dibmou asi kam bukeibmou ati, Erda dina kum uca iya kam kubkwande ati nun bingnub. Nun Du dibmou ara dirdeirin dinyi aryi tabwe debmunyi tiya kubmou ani, Erda dirdeirin dinyi aryi tabwe demnanyi tuba kum kurur ati ebman. 10Nun Du sirya dibmou ara nun malyi kun dinyi nirya kum daneibkwansou ati, liki tentok akwe nunti dibmasou. Ura, kam bukokmou ani, Erda, “Er Imtamnyi teleb tenenurur to kunubkwan,” tenen kurur. 11Ura, sunbabyi neiktoto sun damnyi ati ato tenebdankwandarur. “Nunda malyi dinyi kununa ati dibdeibdanmoubwe nang ato kunub.” Tonda, “Nun Du Kristus Yesus biriman aryi nunda Er Imtamnyi teleb tenesurur to kunubkwayeb,” tenebdarur.

12Ati, sunda tukwetam aryi tiya akwe kam kurandum nang kurandum cok, malyi kun dinyi aryi tabwe demna nang ato tuba kum kubdarur. Ara, sunci sun kanya dam aryi anaranci, “Malyi dinyi kunubkwayeb,” tenen dinyi tuba kubmunyei. 13Tonda, sunci sun kanya ab sun yan taruk biriman aryi malyi dinyi kubmunyei. Ara, sunci sun nong kanya nirya asi malyi dinyi kuna ati ya kibdamunyei. Eda, sunci sun kanya ab sun yan taruk nong nirya ababyi karebdandoka Er Imtamnyi biti ya ato kibdandarur. Ara, “Er Imtamnyi biryi nunda malyi kun dinyi deyok aryi, din nang kuramoubwe asi kam bukeibsou,” tenen sunci sun damnyi karebdandoka Er Imtamnyi biryi teleb tenesurur to kunubdarur. 14Sunda Musa biryi wenesina uram aryi tabwe demsina nang tuba kum kurandum ati, malyi kun dinyi ababyi sunsi tamuboka tabwe debsicei. Eda, Er Imtamnyi biryi sunti, “Ni mabwe nermabwe,” tenen dobdobmasou ati, sunda Er Imtamnyi amwetam bun nang kurandum.

Er Imtamnyi biryi nunsi dobdobmasou ati nunda Er Imtamnyi arungdeirisin nang kibibiryok “Er Imtamnyi urasintam aryi teleb dinyi akwe kunub,” tenenub uram

6:15-23

15Ati, nunci nun damnyi ati unato dinyi ebdankwayeb do? Nunda Musa wenesina uram aryi tabwe demsina nang tuba kum kunub ati, nunci malyi kun dinyi ur kubkwayeb do? Ato tenen kum. Tonda, Er Imtamnyi biryi nunsi dobdobmasouci, nunda Er Imtamnyi amwetam bun nang kibmoubwe ati, nunci malyi kun dinyi tamuboka kubmurubde binkwayeb do? Ato tenen kum. 16Nunda tukwetam kun nang nirya ara ikin wa bon nang ato akwe kunub ati ebman. Ton nang ara sun damnyi karebdandoka malyi kun dinyi kubde baraming. Ba, yuk nang ara sun damnyi karebdandoka Er Imtamnyi biryi arungdeirisin dinyi kunuraming. Ati, sun malyi kun dinyi kunun nang babyi sun teleb dinyi kunun nang babyi ara ikin wa bon nang ato akwe kunub ati ebman. Sunci a dinyi bikmarum do? Ura, sun malyi kun dinyi asi kubde ban nang ara wenen dinyi ara din dinyi asi dobdobkwaming. Ba, sun Er Imtamnyi bisi arungna nang ara Er Imtamnyi Uram kunuraming uca, Er Imtamnyi biryi sunti, “Ni mabwe nermabwe,” tenen dobdobkwande. 17Ni kwit yabwe. Sunda minob ura malyi kun dinyi aryi tabwe deansou nang kurandau cok, malyi kun dinyi akwe kurandau. Ani, Teleb Uram lak eteren nang aryi nun Du Yesus uram Teleb Uram eterebmurubmasei ba, sunci sun kanya dam aryi, “A uram ara dib en uram akwe,” tenen kunurandau ani, ukuryok tuba kunurandum. A deyok aryi, niryi nun Nai Imtamnyi bisi, “Ei ni Nai,” enun. 18Nun Du biryi sunsi lebdeibmasou ara, “Malyi kun dinyi tuba kunubmurubingnyei,” tenen lebdeibmasou. Ati, sunci malyi kun dinyi aryi tabwe debsou tuba kum kurandum. Eda, sunda Er Imtamnyi amwetam bun nang kibmandauci, Er Imtamnyi urasintam aryi teleb dinyi akwe kunurandum.

19Ura, sunci sun kanya dam aryi dib en uram minola kum bikdobmarum ati, niryi tukwetam nang bikmanto kiklina uram ton doboka eterebmasin. Ara, sunci minob ura sun yan taruk nong nirya asi karebdandoka, malyi kun dinyi aryi tabwe deansou nang ato kurandau. Kurandau cok, sunci Er Imtamnyi biryi, “Ni li,” tenen dinyi kunurandau cok, malyi kun dinyi tabakoka kubde barandau. Ani, ukuryok ara sunci danguboka sun yan taruk nong nirya asi Er Imtamnyi bisi karebdandarur. Ati, sunci, “Nunda Er Imtamnyi biryi arungdeirisurur nang kunub,” tenebdandoka Er Imtamnyi urasintam aryi teleb dinyi akwe kunubdarur. Ato kunubmunyi uca, sunci Er Imtamnyi urasintam aryi kilibdob kanya bobkwandum.

20Sunda minob ura malyi dinyi aryi tabwe debsou nang ato kurandauci, Er Imtamnyi amwetam bun nang kum kurandauci, Er Imtamnyi arungdeirisina uram kum kunurandau. 21Minob ura malyi dinyi akwe kunurandau ati, a dinyi ara sunsi teleb dinyi ton boyangaransou do? Ato tenen kum. A malyi kurandau dinyi ati sunci alyi weik kuboka, “Iya malyi kun dinyi kuramoubwe se,” tenerandum. Malyi kun dinyi kunurandau ara teleb dinyi tentok ababyi sun dam kum boyangaransou. Eda, dirdeirisin dinyi akwe boyangaransou. 22Ura, ukuryok ara nun Du Yesus biryi sunsi lebdeibsou ara malyi dinyi tuba kum kunurmururandum. Malyi kun dinyi aryi tabwe debsou nang tuba kum kuramuncok, Er Imtamnyi amwetam bun nang akwe kurandum. Ato kurandum cok, sunci Er Imtamnyi urasintam aryi kilibdob kanya boramunyi uca, iya kam kun dinyi dobdobkwandum. 23Ara, unanyi-unaner ara malyi dinyi kunubtingnyi uca, a nang ara dirdeirisin dinyi dobdobkwaming. Ba, Er Imtamnyi biryi Er amwetam bun nang asi muna karen dinyi karebkwansir. Ara, nun Du Yesus Kristus biriman aryi iya kam kun dinyi karebkwansir.

Currently Selected:

Roma Uram 6: MTG

Highlight

Copy