Roma Uram 5
5
Er Imtamnyi biryi nunda malyi dinyi kuramoubwe nang ati, “Niryi lebdeiboka Ni mabwe nermabwe kibdeibkwan,” tenen dobdobmasou deyok aryi, nun kanya kilkil weik kusurur uram
5:1-11
1Ati, Er Imtamnyi biryi nunda malyi kuramoubwe nang ati, “Niryi lebdeiboka ni mabwe nermabwe kibdeibkwan,” tenen dobdobmasou ara nunci nun Du Yesus bisi dib tenebmoubwe biriman aryi nunsi dobdobmasou. Ura, nun Nai biryi nunsi dobdobmasou deyok aryi, nunda Er Imtamnyi ab antanibdeibsou nang kunub. Ara, nun Du Yesus Kristus biryi nunsi lebdeibmasou deyok aryi, nunda nun Nai ab antanibdeibsou nang kunub ati ebman. 2Nunda Er Imtamnyi dam kun kum nang kuramoubwe ani, nun Du Yesus biryi nunsi lebdeibmasou uca, Er Imtamnyi dam kun nang sirya kibmoubwe. Ati, nunci nun Du Yesus bisi dib tenenub biriman aryi, Er Imtamnyi biryi nunti tikeiboka, “Ni mabwe nermabwe,” tenen kisal dangsurur. Uca, nunci, “Nunda Er Imtamnyi biryi kisal dangsina nang kunub,” tenen bingdaramibiryok, katabum eboka dib tenen kanya bonub. Katabum eboka dib tenenub cok, nunci ilil asa kum uca kilkil kanya bonub cok, ato eboka lak enub. “Er Imtamnyi biryi nunsi erebdeiboka iya kam kun dinyi karebkwansir ati dibde bunub,” eboka lak enub. 3Tonda, ninyi aryi nunsi mambul kimdeirisingnyi ababyi nunci ilil kuna kum kanya boboka Er Imtamnyi bisi, “Ei nun Nai,” enub. Ati, nunci, “Ninyi aryi nunsi mambul kimdeirisingnyi uca, nunci katabum ebtabakoka nun Du Yesus bisi milirmurunub,” tenen bingnub cok, ilil kuna kum kanya tuba-tuba bonub. 4Tonda, nunci katabum eboka nun Du Yesus bisi milirmurunub uca, nunda tanglona kum uca dib tenen nang kunub. Tonda, nunda tanglona kum uca dib tenen nang kunub uca, nunda “Er Imtamnyi biryi ebdeibsou to diboka kunubkwansir,” tenen dibde bunub. 5Er Imtamnyi biryi, “Erebdeiboka iya kam kun dinyi karebkwansin,” eboka ebdeibsou to dibde bunub ara talyi ati kum ebdeibsou. Eda, nun Nai biryi a ebdeibsou to diboka kunubkwansir ati ebman. Er Imtamnyi biryi Er Imtamnyi Kanya Roh Kudus biriman aryi Er boukwe tenen dinyi nun kanya dam langdeiboka karebmasou. Er Imtamnyi boukwe tenen dinyi nun kanya dam kusurur deyok aryi, nunci, “Nun dibde bunub dinyi ara nun Nai biryi diboka kunubkwansir,” tenen diboka bingnub.
6Nunda minob ura Er Imtamnyi urasintam aryi malyi dinyi akwe kuramaburyi, Er Imtamnyi Uram kunubmanto kum kuramoubwe. Ato kuramoubwe ani, nun Nai Imtamnyi biryi teleb teneamwe uki tum berekmou ura, nun Du Yesus Kristus biryi, “Lebkwan,” tenen Erdamnyi karebdandoka nunda Er Imtamnyi biti, “Nun li,” teneramoubwe nang ati dibmasou. 7Nunda tukwetam nang ara malyi kun nang ati, “Lebdeibkwayeb,” tenen, “Nunci unubdeiboka wenen dinyi dobdobibiryok, dibkwayeb,” tenen kum kunub. Ba, ninyi tentok-tentok ara teleb kunanyi biti, “Anyi bira deyok kum kurur ati, weneboka obingnyei,” tenen, “Niryi unubdeiboka wenen dinyi dobdobniryok, dibkwan,” tenebting. 8Ba, nun Nai Imtamnyi biryi nunda malyi kuramoubwe nang ati, “Iya boukwe weik kunun,” tenen ato kuboka lak kibdeibsou. Nunda malyi dinyi kuramoubwe ababyi nun Nai biryi karebmou uca, nun Du Yesus Kristus biryi Erdamnyi karebdandoka nunti dibmasou.
9Nun Du Er ining nunti diksakmou deyok aryi, Er Imtamnyi biryi nunti, “Ni mabwe nermabwe,” tenen dobdobmasou. Ura, nunda Er Imtamnyi biryi dobdobmasou nang sirya kimnub ati, nun Du Yesus biryi nunsi aminda aryi taklobkwansir do? Ato tenen kum. Eda, Erci nunsi tabakdongoboka lebkwansir. Ara, Er Imtamnyi biryi aminda aryi sun malyi dinyi kurmurun nang asi weneboka iya mambul dinyi karebkwande ba, nun Nai biryi nunda dib tenen nang asi lebdeibkwansir. Ara, nun Du Yesus biriman aryi lebdeibkwansir uca, nunci wenen dinyi kum dobdobkwayeb. 10Minob ura nunda malyi dinyi akwe kunuramuburyok, Er Imtamnyi biti, “Nun li,” tenen mar ordana nang ato kuramoubwe. Ato kuramoubwe ababyi Er Imtamnyi biryi karebmou uca, Er Mi biryi Erdamnyi nunti dibmasou uca, Er Imtamnyi ab antanibdeibsou. Ani, ukuryok ara malyi dinyi kurmurun nang tuba kum kunub. Eda, Er Imtamnyi ab antanibdeibsou nang sirya kunub deyok aryi, Er Imtamnyi biryi tabakdongoboka, “Diboka lebde binkwan,” tenesurur. Tonda, Er Imtamnyi biryi nunsi lebdeibsou ara Er Mi dibmou biriman aryi lebdeibsou. Ani, nun Nai biryi nunsi aminda lebde binkwansir ara nun Du Yesus kam bukoka iya kam kururnyi biriman aryi lebdeibkwansir. A deyok aryi, nunci tabakdongoboka, “Er Imtamnyi biryi nunsi diboka lebde binkwansir,” tenen bingnub. 11Ura, nunci, “Er Imtamnyi biryi nunsi iya kam kun dinyi karebkwansir,” tenen kilkil kanya bonub cok, nunci nun Nai Imtamnyi biti, “Ei nun Nai,” tenen kilkil kanya bonub. Ara, nun Du Yesus Kristus biriman aryi nunci, “Ei nun Nai,” enub. Tonda, “Nun Du Yesus Kristus Er ining diksakmou deyok aryi, nun Nai Imtamnyi biryi nun ab Er ab antanibdeibsou,” tenen deyok ababyi nun kanya kilkil weik kusurur.
Nun abwe Adam deyok ab nun Du Yesus Kristus deyok ab eterebmou uram
5:12-21
12Yuma kobdob talak ara nun abwe Adam tentok aryi deyok kouboka Er Imtamnyi urasintam aryi malyi kun dinyi kubmou. Malyi dinyi kubmou uca, nun tukwetam nang nirya aryi malyi kun dinyi akwe kubde baramoubwe ani, ukuryok ababyi malyi dinyi tuba kunub. Ura, nun abwe biryi malyi kun dinyi kubmou ati, erda din dinyi dobdobmouci, Er Imtamnyi dam kuramunyi tuba kum kuramwe. Nunda im dangna tukwe dangna nang nirya ara Er Imtamnyi urasintam aryi malyi dinyi kunub deyok aryi, nun nirya ara din dinyi doronubci, Er Imtamnyi dam kun nang tuba kum kunub. 13Yuma kobdob talak ara Musa kum kuramwe talak aryi Er Imtamnyi biryi, “Ukubdarur-Ukuna mem,” eboka lak kum kimnamwe. A talak ababyi ninyi aryi Er Imtamnyi urasintam aryi malyi dinyi kuramiryi, sunci, “Ukubdarur-Ukuna mem,” en uram kum kekebmai ati, a uram deici aryi tatab-tatab ebman kum kuramnyi. 14Musa Uram deib aryi tatab-tatab ena kum kuramiryok, sun yuma kobdob talak kubde baramnyi nang nirya ababyi din dinyi dororamiryi, Er Imtamnyi dam kun nang kum kuramnyi. Din dinyi ara mikib weik kuboka ninyi nirya asi taleramwe ati ebman. Ara, nun abwe Adam biryi deyok kouboka Er Imtamnyi urasintam aryi malyi kuamwe ani, Musa biryi, “Ukubdarur-Ukuna mem,” en uram lak kum kibmou bok, ninyi nirya ara din dinyi dororamnyi. Nun abwe Adam bira Er Imtamnyi Uram bingnamuryok, erci Er Imtamnyi urasintam aryi iya malyi kubmou uca, din dinyi dobdobmou. Ba, sun minob kubde baramnyi nang yuk nang ara, “Ukubdarur-Ukuna mem,” en uram kum bingnamiryok, sunbabyi Er Imtamnyi urasintam aryi malyi dinyi kuramnyi uca, din dinyi dororamnyi. Nun abwe Adam bira kikliboka nun Du Yesus Kristus biti lak kibdeibmounyi bitonyi kuramwe ati ebman. Ara, nun abwe bira malyi dinyi talena deyoknyi kuramwe to, nun Du Yesus bira ninyi lemsina deyoknyi kurur.
15Ba, nun abwe Adam biryi malyi dinyi koubsou ara yuk. Nun Du biryi lemsina dinyi koubsou ara yuk. Nun abwe Adam biryi Er Imtamnyi Uram yan yanibmou uca, ninyi ilinto din dinyi dororamnyi ani, ukuryok tuba din dinyi doronub. Ba, nun Nai Imtamnyi biryi, “Ni mabwe nermabwe kibdeibkwan,” tenen dobdobmasou ara erebkaboka ninyi ilinto dobdobde basurur. Ara, nun Du Yesus Kristus biryi Erdamnyi nunti karebdanmou biriman aryi Er Imtamnyi biryi langdeiboka ninyi ilinto dobdobmasou. 16Nun abwe Adam biryi deyok kouboka malyi kun dinyi tentok asi kunubmou uca, ninyi nirya ara din dinyi dororamnyi ani, ukuryok ababyi din dinyi doronub. Ba, Er Imtamnyi biryi lemsina boyasin dinyi ara yuk. A lemsina boyasin dinyi ara malyi kun dinyi tentok akwe kilina kum kurur. Eda, malyi kun dinyi ilinto kilisirur. Ara, nun Adam yala nang nirya aryi malyi kun dinyi ilinto tabakoka kuramoubwe ati, Er Imtamnyi biryi malyi kun dinyi ilinto kilibdeibmuryok, ninyi ilinto ati, “Ni mabwe nermabwe,” tenen dobdobmasou. 17Nun abwe Adam tentok aryi deyok kouboka Er Imtamnyi Uram yan yanibmou uca, ninyi nirya ara din dinyi dororamiryi, Er Imtamnyi dam kun nang kum kunub. Ara, nun abwe malyi kubmou biriman aryi ninyi dirdeirisin dinyi mikib weik kuboka taleransou ani, ukuryok ababyi mikib weik kuboka taleransir uca, din dinyi dororamib. Ura, Er Imtamnyi biryi nunti, “Ni mabwe nermabwe,” tenen dobdobmasou ba, nun Er Imtamnyi kisal dangna dinyi ab kam kun dinyi ab langdeiboka dobdobmoubwe. Nunda kam kun dinyi dobdobmoubwe nang ara nun Du Yesus Kristus mikib biriman aryi weik sien nang ato kuboka mikib kuboka kalikwayeb. Ara, ninyi dirdeirisin dinyi minob ura mikib weik kuransou ato, nunda erebkaboka iya mikib kuboka kalikwayeb.
18Ati, nun abwe Adam tentok aryi deyok kouboka Er Imtamnyi urasintam aryi malyi kun dinyi kubmou deyok aryi, Er Imtamnyi biryi ninyi nirya asi, “Sun nirya ara din dinyi dobdobkwandarur,” eboka wenebsou. Ura, Du Yesus Kristus neiktoto Er tentok aryi deyok kouboka Er Imtamnyi urasintam aryi teleb dinyi kunuramwe deyok aryi, Er Imtamnyi biryi ninyi ilinto ati, “Ni mabwe nermabwe,” eboka iya kam kun dinyi karesurur. 19Ara, nun abwe tentok aryi malyi kubmou uca, ninyi nirya asi malyi kun nang kibmoubwe to, nun Du Yesus tentok aryi Er Imtamnyi Uram diboka kunubmou deyok aryi, Er Imtamnyi biryi ninyi ilinto asi, “Ni mabwe nermabwe,” tenen dobdobmasou. 20Ura, Er Imtamnyi biryi imtam tukwetam kiknibmou ura, Erci, “Ukubdarur-Ukuna mem,” en uram anmalakoka kum karebmou. Eda, yuma kobdob kubde baramnyi nang kubde baramnyi ani, nun Nai biryi Musa biriman aryi, “Ukubdarur-Ukuna mem,” en uram aminda aryi lak kibdeibmou. Ura, ninyi aryi busul kuboka, “Er Imtamnyi Uram kunubtibyi,” tenen ingkiringnamiryok, sunci malyi kun dinyi tabakoka Er Imtamnyi Uram yan yaniramnyi. Ura, nun malyi kun dinyi tabakoka langdeiriransou to, Er Imtamnyi biryi, “Ni mabwe nermabwe,” tenen dobdobmasou dinyi ara erebkaboka iya langdeirisurur. 21Ati, minob ura malyi kun dinyi mikib weik kuboka taleransouci, ninyi dirdeirisin dinyi boyansou. Ura, ukuryok ara nun Nai biryi nunsi kisal dangsurur ara neiktoto mikib weik kuboka kisal dangsurur. Ara, “Ni mabwe nermabwe kibdeibkwan,” tenen dobdobde basurur uca, nun Nai biryi nun Du Yesus Kristus biriman aryi nunsi iya kam kun dinyi karebkwansir.
Currently Selected:
Roma Uram 5: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
