Roma Uram 4

Nun abwe Abraham dib teneramwe biriman aryi Er Imtamnyi biryi erti, “Ni mi,” tenen dobdobmou uram

4:1-25

1Ura, nunci nunda Yahudi yala nang nun abwe Abraham deyok ati una ebkwayeb do? Er Imtamnyi biryi nun abwe bisi dobdobmou ara una deyok aryi dobdobmou do? Nun abwe bira Er Imtamnyi urasintam aryi teleb kuramwe deyok aryi, Er Imtamnyi biryi ersi dobdobmou do? Ato tenen kum. Nun abwe bira Er Imtamnyi urasintam aryi teleb dinyi kunuramwe bok, Er Imtamnyi biryi ersi a deyok ati kum dobdobmou. 2Nun abwe biryi teleb dinyi kunuramwe deib aryi Er Imtamnyi dam kunanyi kibmote uca, erci erdamnyi ati erebdandoka, “Nira teleb kunanyi kunun ati, Er Imtamnyi biryi nisi dobdobmanir,” ebdanmote. Ato kuboka erdamnyi erebdeibdanmote ura, tukwetam nang aryi nun abwe bisi kisal dakting bok, Er Imtamnyi biryi nun abwe biti kisal kum dakmote. 3Ati, Er Imtamnyi Uram una eteresur do? Er Imtamnyi Uram ara ato eboka eteresur.

“Nun abwe Abraham bira Er Imtamnyi bisi dib teneramwe deyok aryi, Er Imtamnyi biryi erti, ‘Ni mi, Ni urasintam aryi teleb kunanyi kibdeibman,’ tenen muna dobdobmou.” (Kejadian 15:6)

4Nunda tukwetam nang aryi nun wa ibibyi uca, nun wa karesunung nang ara wa in dengna karenub. A wa in dengna dinyi ara muna karen dinyi kuma. Eda, wa in dengna dinyi kurur. 5Ura, Er Imtamnyi biryi nun abwe bisi dobdobmou ara, “Busul kuboka Ni wa iramwe ati dengna dinyi ato karebkwan,” tenen kum dobdobmou. Eda, nun abwe biryi Er Imtamnyi bisi er kanya deiriramwe ati, Er Imtamnyi biryi nun abwe bisi muna dobdobmou. Ara, nun abwe biryi, “Er Imtamnyi bira ni malyi kun dinyi kilinurur cok, nira malyi dinyi kunanyi dorosurur,” teneramwe. Ato teneramwe uca, Er Imtamnyi biryi, “Ni mi,” tenen nun abwe bisi muna dobdobmou. Nun abwe bisi muna dobdobmou to, nun Nai biryi nun abwe bito tenen kun nang nirya asi muna dorosurur ati ebman. 6Ura, nun abwe Daud bibabyi neik en uram akwe ebmou cok, Er Imtamnyi bisi dib tenen nang asi kisal dakmou. Ati, erci a nang ara, “ ‘Ukubdarur-Ukuna mem,’ en uram kunubibyi deib aryi Er Imtamnyi biryi nunsi kum dobdobkwansir,” tenen nang ati ato ebmou.

7“Sun malyi kun dinyi kilibmasou nang asi Er Imtamnyi biryi kisal dangsurur.

A nang ara Er Imtamnyi Uram yan yaniramnyi asi Er Imtamnyi biryi, ‘Tuba kum teneibkwan,’ tenerur ati kisal dangna nang ato kunung.

8Malyi dinyi kuramnyi bok, Er Imtamnyi biryi, ‘Malyi dinyi kubmoumwe,’ eboka tatab-tatab ena kum kubkwande ati, kisal dangna nang ato kunung.” (Mazmur 32:1-2)

9Ura, a uram deib aryi sun Yahudi yala nang ara den bama sengna nang akwe kisal dangna dinyi dororaming do? Sun Yahudi yala kum nang ara den bama sengna kum nang ababyi kisal dangna dinyi dororaming do? Nun lilibmab to ara, nun abwe Abraham Er Imtamnyi bisi dib teneramwe deyok aryi, Er Imtamnyi biryi erti, “Ni mi,” tenen dobdobmou. Ati, sun Yahudi yala nang ab Yahudi kum yala nang kankan aryi dib teneramingnyi nang ab aryi kisal dangna dinyi dororaming ati Er Imtamnyi Uram aryi ato ebmou. 10Nun abwe Abraham bira unato anyi kuramwe ba, aryi Er Imtamnyi biryi ersi, “Ni mi,” tenen dobdobmou do? Nun abwe bira den bama sirya sengnamunyi bisi dobdobmou do? Ato tenen kum. Den bama sengna kumnyi tuba kuramwe ba, dobdobmou do? Diba. Nun abwe Abraham den bama sengna kumnyi tuba kuramwe ba, Er Imtamnyi biryi ersi, “Ni mi,” tenen dobdobmou. 11Ati, nun abwe Abraham biryi Er Imtamnyi bisi dib tenebkalibmou ani, Er Imtamnyi biryi ersi, “Den bama dekdarum,” eboka aminda aryi ebdeibmou. A den bama sengna dinyi ara, “Abraham bira Er Imtamnyi bisi dib tenerur ati, Er Imtamnyi urasintam aryi teleb kunanyi bitonyi kurur,” tenen lak kimna dinyi kuramwe. Ati, nun abwe Abraham bira kikliboka sun Yahudi yala kum nang kankan kuboka dib tenen nang asi sun abwe kuramwe. Ara, Er Imtamnyi biryi a nang ababyi dobdobkwamwe ati, Abraham bira sun abwe kuramwe. 12Tonda, nunda Yahudi yala nang ara den bama sengsina nang kankan kuboka dib tenen nang ababyi nun abwe kuramwe. Ara, nun abwe den bama sengna kum uca minob dib teneramwe to nunbabyi dib tenenub ati, Abraham bira nun abwe bibabyi kuramwe.

13Er Imtamnyi biryi nun abwe Abraham ab er yala nang ab asi, “Im dangna tukwe dangna mutuk nirya karebkwansin,” ebdeibmou ara, “Ukubdarur-Ukuna mem,” en uram kunuramwe deib aryi ato eboka kum ebdeibmou. Eda, Abraham biryi, “Er Imtamnyi biryi ebdeibsou to diboka kunubkwansir,” tenebmou deyok aryi, Er Imtamnyi biryi nun abwe biti, “Ni urasintam aryi teleb kunanyi,” teneramwe deyok aryi, Erci ato eboka ebdeibmou. 14Sun dib tenena kum uca, “Ukubdarur-Ukuna mem,” en uram kunun nang ara Er Imtamnyi biryi kisal dangna dinyi muna karen dinyi kum doronung ati ebman. Ato kubmote ura, dib tenen dinyi ton, Er Imtamnyi muna erdeirin dinyi ton, ara talyi dinyi akwe kurante. 15“Ukubdarur-Ukuna mem,” en uram ara ninyi kum lebkwansute. Eda, a uram ara nun malyi kun dinyi lak kibdeiboka wenesin dinyi akwe boyangansou. “Ukubdarur-Ukuna mem,” en uram kum kubmote ura, “Ukubdarur-Ukuna mem,” en uram ati yan yanina lak kimna dinyi ababyi kum kurante.

16Abraham biryi, “Ukubdarur-Ukuna mem,” en uram kunuramwe deyok aryi, Er Imtamnyi biryi ersi, “Kisal dangna dinyi karebkwansin,” eboka kum ebdeibmou. Eda, Abraham biryi, “Diboka kunubkwansir,” tenen Er Imtamnyi bisi dib teneramwe deyok aryi, Er Imtamnyi biryi ersi kisal dangna dinyi ebdeibmou. Ara, dib tenena biriman aryi kisal dangna dinyi muna doronub deyok aryi, ninyi ilinto aryi muna karen dinyi doronub. Den bama sengna nang babyi den bama sengna kum nang babyi nun abwe Abraham yala nang kunub ati, nunci Er Imtamnyi biryi ebdeibsou kisal dangsina dinyi asi dib tenena biriman aryi doronub. 17Er Imtamnyi Uram umbura aryi nun abwe Abraham biti ato erur.

“Nira Imtamnyi karebkinyi uca, kanda yala ilinto ati sun abwe kibkwandim.” (Kejadian 17:5)

Abraham bira Er Imtamnyi urasintam aryi nun abwe kurur ati ebman. Ara, nun abwe bira Er Imtamnyi bisi dib teneramwe deyok aryi, Erda nunda dib tenen nang nirya asi nun abwe bitonyi kunub. Nun abwe bira Er Imtamnyi biti, “Erda mikibnyi biryi sun din nang ababyi kam bukeibkwande,” tenen dib teneramwe. Tonda, erci, “Ukuryok kum kurande dinyi kiknina ababyi er mikib kurur,” tenen dib teneramwe.

18Nun abwe Abraham bira Er Imtamnyi biryi ebdeibmou to dibde buramuryok, kununa asi asing kum eiriramuryi, erci Er Imtamnyi bisi dib tenermururamwe. Dibde bukoka dib tenermururamuryi, Er Imtamnyi biryi Er ebdeibmou to kunubmou uca, Abraham bira yala ilinto ati sun abwe kuramwe. Ara, Er Imtamnyi biryi,

“Niryi karebkinyi uca, kan yala nang ara ilinto kubkwaming,” ebmou to, sirya kunubmou. (Kejadian 15:5)

19Ara, nun abwe wise dandobmouci, mi kum deibmou bok, erci tanglona kum uca Er Imtamnyi bisi dib teneramwe. Ati, erci kwalina seratus baryi kwaleamuryi, er mi deibte talak sirya bisibmou bok, nun abwe bira Er Imtamnyi bisi dib teneramwe. Tonda, nun abwe ner si Sara bibabyi iya wise dandobmou ba, er mi deibte talak sirya bisibmou bok, nun abwe biryi tanglona kum uca dib teneboka, “Er Imtamnyi biryi karebsici uca, mi deibkwanim,” teneramwe. 20Ato kuboka nun abwe bira bintinin kanya bona kum uca Er Imtamnyi bisi dib tenermururamwe. Ba, er dib tenena ara er kanya asi katabum erdeiriramwe. Katabum erdeiriramwe ba, nun abwe biryi Er Imtamnyi si weik eramwe. 21Ati, nun abwe bira ato teneramwe. “Er Imtamnyi bira iya mikibnyi kurur ati, Erci ebdeibmanou to diboka kunubkwanir.” 22Nun abwe biryi er kanya asi Er Imtamnyi biti deibmou deyok aryi, Er Imtamnyi biryi nun abwe biti, “Ni mi, Ni urasintam aryi teleb kunanyi,” teneramwe. 23A uram ara, “ ‘Ni mi, Ni urasintam aryi teleb kunanyi,’ teneramwe,” ara nun abwe Abraham biti kerek sekdeiamwe ara nun abwe bikwa ati kum kerek sekdeiamwe. 24Eda, nunda ukuryok kubde baramib Er Imtamnyi bisi dib tenenub nang ababyi ato eboka kerek sekdeiamwe. Ati, nunci Er Imtamnyi biti, “Nun Du Yesus dibmou asi kam bukeibmou,” tenen dib tenenub deyok aryi, Er Imtamnyi biryi nunbabyi neiktoto, “Ni mabwe nermabwe, Ni urasintam aryi teleb kun nang,” tenesurur. 25Nun malyi kun dinyi deyok aryi, nun Nai biryi karebmou uca, ninyi aryi nun Du Yesus bisi taleboka obmai. Ba, Er Imtamnyi biryi nunda malyi kuramoubwe nang ati, “Ni mi aryi lebci uca, Ni urasintam aryi teleb dinyi kunun nang kibdeibkwan,” teneransou deyok aryi, Erci nun Du Yesus dibmou asi kam tubto bukeibmou.

Currently Selected:

Roma Uram 4: MTG

Highlight

Copy