Roma Uram 3

“Yahudi yala nang ton nang ara nun Du Yesus uram Teleb Uram dib kum teneraming bok, Er Imtamnyi biryi sun Israel yala nang nirya asi kum dokdonokmou,” eboka eterebmou uram

3:1-8

1Ati, Er Imtamnyi biryi sun Yahudi yala nang asi den bama sengna deib aryi, “Ni mabwe nermabwe,” tenen kum dororur ati nun sirya kekebmab. Ati, nunci, “Er Imtamnyi biryi sun Yahudi yala nang asi kum wibdeibmouci, kisal dangna dinyi ton kum kareramwe,” ebtibyi do? Tonda, nunci, “Den bama sengna dinyi ara talyi dinyi akwe kurur,” ebtibyi do? 2Ato tenen kum. Er Imtamnyi biryi sun Yahudi yala nang asi diboka kisal dangna dinyi ilinto kareramwe ani, ukuryok ababyi tuba karerur ati ebman. Er Imtamnyi biryi sun Yahudi yala nang asi Er ebdeibmou uram dib en uram yuk-yuk asi kareramwe. Er Imtamnyi Uram ara kisal dangna dinyi iya u dikum tenen dinyi kurur asi Erci sunsi minob karebmou. Ara, Er Imtamnyi biryi minob ura sun Yahudi yala nang abwe yabwe asi Er Uram lak etereramwe ani, ukuryok ababyi sun Yahudi yala nang a uram asi tuba taleraming. Ura, kisal dangna dinyi yuk dinyi ilinto ababyi Erci sun Yahudi yala nang asi minob uca kareramwe ani, ukuryok ababyi karerur. 3Sun Yahudi yala nang kankan kuboka ton nang ara nun Du Yesus bisi dib tenenung bok, yuk nang aryi nun Du Yesus bisi dib kum tenenung. Sun Yahudi yala nang kankan kuboka ton nang ara dib kum tenenung deyok aryi, Er Imtamnyi biryi sun Yahudi yala nang nirya asi taklobkwande do? 4Ato tenen kum. Ton nang aryi, “Dib tenena nun li,” teneraming bok, Er Imtamnyi biryi, “Sun Yahudi yala nang nirya asi taklobkwan,” tenena kum kurur. Er Imtamnyi bira dib en uram erurunyi kurur ati Erci minob ebdeibmou uram diboka kunubkwande ati ebman. Er Imtamnyi Uram umbura aryi a deyok ati ato esurur,

“Kanda Imtamnyi biryi uram ton lak eraminyi uca, ninyi nirya aryi, ‘Dib en uram akwe ebmasir,’ tenen bikwanking. Ba, ninyi ton nang ara tola uram eboka kanda Imtamnyi biti, ‘Malyi kun dinyi kubmar,’ ebtingnyi ababyi, kanci kandamnyi libdandoka, ‘Teleb dinyi akwe kunun,’ eboka lak kibdeibdatum. Ato kuboka kanda Imtamnyi biryi sun kansi tatab-tatab ebkitingnyi nang asi uram kilikeibtum.” (Mazmur 51:6b)

Er Imtamnyi biryi ato esurur uram deib aryi nunci, “Er Imtamnyi bira dib en uram esururnyi kurur ba, nunda tukwetam nang nirya ara tola uram en nang akwe kunub,” tenen bingnub.

5Bok, nun tukwe nang ara Er Imtamnyi urasintam aryi malyi dinyi kunub. A deyok Er Imtamnyi biryi, “Ni tikwa kikiman dinyi deib aryi malyi dinyi lilinunyi kunun,” tenen tabakoka lak kimdeirisurur. Ati, tukwe nang aryi eranting to nunbabyi ebtibyi do? Ara, “Er Imtamnyi biryi, ‘Ni tikwa kikiman dinyi deib aryi malyi dinyi lilinunyi kunun ati lak kibdeibkwan,’ tenerurci, nun malyi kun dinyi asi wenesurur ara kikiman kum dinyi deib aryi wenesurur,” ebtibyi do? 6Ato tenen kum. Er Imtamnyi bira kikiman dinyi deib aryi sun im dangna tukwe dangna nang malyi kun dinyi nirya lilirdeirisurur. Kikiman kum dinyi deib aryi malyi kun dinyi lilibmasute ura, Erda im dangna tukwe dangna nang malyi kun dinyi lilisururnyi kum kurante. 7Ton nang ara ato ebting. “Nira tola uram ebtinyi uca, Er Imtamnyi tentok ara dib en uram erurunyi kurur ati lak kibkwande. Ati, niryi tola uram ebtinyi uca, yuk nang aryi bikoka sunci, ‘Er Imtamnyi bikwa dib en uram enanyi kurur,’ eboka Er Imtamnyi si weik ebkwaming. Ati, unato ati Er Imtamnyi biryi niti, ‘Tola enanyi,’ eboka wenebnute do?” Ninyi ton nang ara ato uram ebting bok, ato en uram ara malyi uram akwe kurur ati ebman. 8Tonda, yuk nang ara tola ati nunda nun Du Yesus Kristus milin nang asi talyi ati eboka tatab-tatab eransing. “Malyi dinyi ur kunubibyi uca, teleb dinyi du moubkwansir,” eboka etereraming. Ara, “ ‘Er Imtamnyi tentok iya telebnyi kurur ati lak kibkwayeb,’ tenen malyi dinyi ur kunubkwayeb.” Ato eboka tatab-tatab eransing bok, nunci ato uram kum eterenub. Tonda, ato dinyi nun kum kunub. Er Imtamnyi biryi a tola en nang asi wenebkwande ara kikib.

“Ninyi tentok ababyi Er Imtamnyi urasintam aryi teleb kunanyi kurur,” ebmou uram

3:9-20

9Ati, nunci una ebkwayeb do? Nunda Yahudi yala nang ara teleb nang kunub bok, sun Yahudi kum yala nang ara malyi nang kunung do? Ato tenen kum. Nunda Yahudi yala nang ab Yahudi yala kum nang ab neiktoto ara malyi kun dinyi aryi tabwe deansou nang ato kunub ati, malyi kun dinyi kununub. Ato sirya ebman. 10A dinyi ara Er Imtamnyi Uram umbura aryi kerek sekeibmou to kurur,

“Ninyi tentok ababyi ara Er Imtamnyi urasintam aryi teleb kunanyi kum kurur.

11Ninyi tentok ababyi ara Er Imtamnyi biti bikdob tenen kanya kum borur.

Ninyi tentok ara, ‘Er Imtamnyi bisi milibkwan,’ tenen ingkiringna kum kurur.

12Ninyi nirya ara Er Imtamnyi biti, ‘Nun li,’ tenen taklobmang.

Malyi dinyi akwe kununung.

Ninyi tentok ababyi ara teleb kunanyi kum kurur.” (Mazmur 14:1-3; 53:1-3)

13“Ninyi nirya ara malyi uram akwe enung.

Kwatima silalum akwe kunungcok, tola uram enung.

Tonda, sunci, ‘Malyi kibminiktibyi,’ tenen malyi uram akwe eraming.” (Mamzur 5:10; 140:2)

14“Ninyi nirya ara, ‘Dibting,’ tenen yuk nang asi sumnaming.

Tonda, yu uram akwe eraming.” (Mazmur 10:7)

15“ ‘Ninyi obkwayeb,’ tenen minola kunuraming.

16A nang aryi kunuraming to ara yuk nang asi mambul weik kurdeiriraming.

17Yuk nang ab antanirdeirirdana ara kum kuraming.” (Yesaya 59:7-8)

18“Ilil kuna kum uca, sunci, ‘Er Imtamnyi biryi weneboka obsicei,’ tenen kanya kum boraming.” (Mazmur 36:1)

19Ura, Er Imtamnyi biryi, “Ukubdarur-Ukuna mem,” en uram ebdeiamwe ara Erci sun, “Ukubdarur-Ukuna mem,” en uram keken nang asi ebdeiamwe ati nun bingnub. Ati, sun Yahudi yala nang asi a uram asi ebdeibmou. Ati, nun Nai biryi, “Ninyi tentok ababyi Er Imtamnyi urasintam aryi teleb dinyi kum kunurur,” ebmou ara Erci sun Yahudi yala nang ababyi wenebmou. Ara, im dangna tukwe dangna nang nirya kankan aryi ninyi tentok ababyi, “Er Imtamnyi urasintam aryi teleb dinyi kunun,” kum ebdankwamwe ati, nun Nai biryi sun Yahudi yala nang ababyi ato eboka wenebmou. 20Ati, nun nirya ara malyi nang kunub ati, nunci, “Ukubdarur-Ukuna mem,” en uram kunubman kum kunub. Kunubman kum kunub ati, ninyi tentok ababyi, “Ukubdarur-Ukuna mem,” en uram kununa deib aryi Er Imtamnyi dam kunanyi kum kibkwante. Eda, “Ukubdarur-Ukuna mem,” en uram deib aryi nunci, “Malyi nang kunub,” tenen bingdardanub.

“Er Imtamnyi biryi ninyi dorosurur ara nun Du Yesus Kristus bisi dib tenena biriman aryi Erci nun malyi kun dinyi kiliboka ninyi dosurur,” eterebmou uram

3:21-31

21Ani, ukuryok ara Er Imtamnyi biryi, “Niryi sun malyi kun dinyi kilibniryok, ‘Ni urasintam aryi teleb dinyi kun nang,’ tenen dobdobkwansin,” eboka lak kimsurur. Ara, “Ukubdarur-Ukuna mem,” en uram kununa deib aryi Erci nunsi kum dosurur. “Ur dobdobkwan,” en uram ara ukuryok uram kuma. Minob Musa Uram umbura aryi kerek sekamwe to ababyi neik dinyi eboka lak kimnamwe. Tonda, Er Imtamnyi ebdeibmou tok bobaramnyi nang yuk-yuk aryi minob kerek sekamnyi to ababyi neik dinyi eboka lak kimnamnyi. 22Ati, nunci nun Du Yesus Kristus bisi dib tenebibyi biriman aryi nun Nai biryi nunsi dosurur. Sun nun Du Yesus bisi dib tenen nang nirya asi Er Imtamnyi biryi, “Ni mabwe nermabwe,” tenen, “Ni urasintam aryi teleb kun nang” tenen dosurur. Yahudi yala nang kankan kuboka dib tenen nang ton, Yahudi kum yala kum nang kankan kuboka dib tenen nang ababyi nun Nai biryi dosurur. Nun Nai biryi, “A yala wibdeibkwan, o yala donokwan,” kum tenesurur. Eda, Erci nunda dib tenen nang nirya asi dosurur. 23Ninyi nirya ara Er Imtamnyi urasintam aryi malyi dinyi kununub cok, Er Imtamnyi Iya Erebdobnyi urasintam aryi sungloramib. A deyok aryi, Er Imtamnyi biryi, “A yala wibdeibkwan, o yala dokdonokwan,” kum tenesurur. 24Ura, Er Imtamnyi biryi sun Yahudi yala nang ab, sun Yahudi yala kum nang ababyi nun malyi kun dinyi kilibsiryok, muna karen dinyi karebsiryi, Erci nun nirya ati, “Ni mabwe nermabwe kibdeibkwan,” tenen dorosurur. Ara, nun Du Yesus Kristus nunsi lebdeibsou deyok aryi, nunsi dosurur. 25Ati, nun Du Yesus biryi Erdamnyi karebdandoka dibmou ati, Er Imtamnyi biryi, “Sunglona kum uca ninyi dama deibmou ati ninyi ab antanibdeibdankwayeb,” eboka lak kibdeibsou. Ara, nunci, “Nun Du Er ining diksakmou deyok aryi, Er Imtamnyi biryi nun malyi kun dinyi diboka kilibmasou,” tenenub ati, nun Nai biryi nunsi dorosurur. Nun Nai Imtamnyi biryi, “Nira malyi kun dinyi kikibto wenenunyi kunun tenen bikting,” tenen Erci nun Du Yesus bira nun malyi kun dinyi boramunyi bisi weik wenen dinyi karebmou. Minob ura ninyi aryi malyi dinyi kuramnyi asi, Er Imtamnyi biryi diboka kum weneramwe. Ani, ukuryok ara Erci nun malyi kun dinyi diba ati wenebmou. 26Ati, ukuryok ara nun Nai biryi Erdamnyi ati, “Nira malyi kun dinyi kikibto wenenunyi kunun,” eboka lak kimsurur. Tonda, Erci, “Sun Ni Mi Yesus bisi dib tenebingnyi nang ara malyi dinyi kunuramnyi bok, niryi kiliboka, ‘Ni mabwe nermabwe,’ tenen doronun,” eboka lak kimsurur.

27“Ukubdarur-Ukuna mem,” en uram kununa deici aryi Er Imtamnyi biryi nunsi kum dorosurur. Ati, im dangna tukwe dangna nang nirya kankan asi unanyi-unaner aryi, “Nira telebnyi, ni teleb ner,” eboka erdamnyi erebdeibdankwante do? “Ukubdarur-Ukuna mem,” en uram kununa deici aryi ninyi tentok ababyi erdamnyi kum erebdeibdankwante ati ebman. Nun Du Yesus bisi dib tenena deici aryi nun Nai biryi nunsi dosurur ati nunci nun damnyi erebdeibdanman kum kunub. 28Ati, nunci ato tenen lak eramib. Er Imtamnyi biryi nunsi dorosurur ara nun Du Yesus bisi dib tenena deib aryi dorosurur. “Ukubdarur-Ukuna mem,” en uram kununa deici Erci kum dosurur.

29Ura, nun Nai Imtamnyi bira nunda Yahudi yala nang Molonubnyi akwe kurur do, sun Yahudi yala kum nang Molonungnyi ababyi kurur do? Nun Nai bira sun Yahudi yala kum nang aryi Molonungnyi ababyi kurur ati ebman. 30Nun Molonubnyi tentoknyi akwe kurur ati, Erci ninyi nirya asi dib tenena biriman aryi dorosurur. Ara, sun den bama sengna nang kankan kuboka dib tenen nang aryi Erci dib tenena biriman aryi dorosurur. Tonda, sun den bama sengna kum nang kankan kuboka dib tenen nang ababyi nun Nai biryi dib tenena biriman aryi dosurur. 31Dib tenena uram ara, “Ukubdarur-Ukuna mem,” en uram minob uram asi bisik sekoka kum daneibmar do? Ato tenen kum. Eda, dib tenena uram ara, “Ukubdarur-Ukuna mem,” en uram ati, “Dib en uram aca,” eboka lak kimsurur.

Currently Selected:

Roma Uram 3: MTG

Highlight

Copy