Romanos 14

Tjóntahyara kichuara

1 # Col. 2:16. *Ti ijnko chojni kanhñó titekaon Ìnchéni tso̱nkotséko̱ara la nkojína chrónixjehéra kjónté nduáhya tjenka̱yáxin sin. 2Kixin nkojín sin la ndáchro sin kixin jína sinie sin kaín nkehe. A̱ndá ti íso sin kanhñó titekaon Ìnchéni la ndáchro sin kixin jehó kayoa ó chrókjonie sin, ichro sin. 3Méxra̱ ti nkexro inie kaín nkehe la chrókjuanoáhña ti nkexro niehña kaín nkehe. A̱ndá ti sin niehña kaín nkehe, la chrókjóntahya ti sin inie kaín nkehe kixin kjónté xi̱kaha la Díos kꞌuáyéhe̱ ti sin a. 4¿Xá nkexro ti jaha kixin chrókjónta ti nkexro chꞌehe ixra̱ íjnko nkexro? Tíha la ixra̱ kuènté ti làmoé chꞌan tsondáchro á jína kjuíchꞌe chꞌan ixra̱ o̱ náhí. La kjá tsjakꞌe chꞌan jína kixin Ìnchéni chónta kjuachaxin tsjinki̱tsa ti jehe chꞌan.

5Iso sin la tjenka̱yáxin sin kixin imá tjetoan ijnko ña̱o, a̱ndá íjnko ña̱o la náhí, la íso sin ndáchro sin kixin kaín ña̱o la ó nkokón. Méxra̱ nkojnko chojni chrókónohe nkehe ti titekaon sin. 6Méxra̱ ti sin xráxinkaon nkojín ña̱o la xi̱kaha tjikosáyehe sin Ìnchéni, la kja̱xin ti sin titekakonhña tíha la tjikosáyehe sin Ìnchéni, kjónté tjikosayéhya sin ti ña̱o a. Kja̱xin ti sin inie kaín nkehe la inie sin kixin xi̱kaha tjikosáyehe sin Ìnchéni, la kja̱xin chjéhe sin kjuasáya Díos. A̱ndá kja̱xin ti sin niehña kaín nkehe la xi̱kaha tjikosayéxin sin Ìnchéni la kja̱xin chjéhe sin kjuasáya Díos.

7Nijnkoni chrókꞌuejóni éxi jehóni tꞌe̱tue̱hen a̱séni la ko nijnkoni itsꞌeni éxi tjinkaoni. 8Ti tjejóchóni la tjejóni kixin sichꞌeheni ixra̱ Ìnchéni la ko ti itsꞌeni la xi̱kaha tjikosayéxini Ìnchéni. Méxra̱, kjónté chrókꞌuejóchóni o̱ chrókꞌueni la kuènté Ìnchéni ti jeheni. 9Mé xi̱kaha Cristo la ikꞌuén la ko xechón ínaá kixin kꞌóna chꞌan Ìnché ti sin tsíkꞌen la ko ti sin tjejóchón.

10 # 2Co. 5:10. *A̱ndá jahara la, ¿nkekuènté tjóntara ti kichuara o̱ nkekuènté chontehyara kaín sin kjuasàya? Kixin kaíni tso̱chjinani ti itjen Cristo kixin tsondáchro Cristo á jína ixra̱ kjuíchꞌeni o̱ náhí. 11#Is. 45:23.*Ndáchro xroon itén Díos:

Méxra̱ ndáchro Ìnchéni: “Chaxín ndáxrja̱n, kixin ti itjén la tsꞌejóxin tochꞌin kaín chojni,

kixin kaín chojni tsondáchro kixin janhan mé ti Díos kuènté sin.”

12Mé xi̱kaha nkojnkoni ticháxi̱n tsochenkani Díos nkexrín ti ixra̱ kjuíchꞌeni ntihi chjasintajni.

Tjachróehyara kichuara

13Méxra̱ ícha jína chrókjóntahyara kichuara. Ícha jína ninkehó nkehe chrókjui̱chꞌehyara kixin chrókjuasin ijie̱ nkojín kichuara la chrókuíto̱he sin ti tinkáchónki sin Ìnchéni. 14Janhan tinkachónkia Ìnchéni Jesús la xi̱kaha ó nona kixin jína sinieni kaín nkehe. A̱ndá kjónté xi̱kaha, la ti tjenka̱yáxin ijnko chojni kixin jehya jína tíha, ndá chaxín jehya jína chrókjonie ti nkexro a ti nkehe a kixin xi̱kaha tjenka̱yáxin sin. 15Ti tjenka̱yáxin ti kichuara kixin ti nkehe intera la nduáhya, ndá ti na̱xa̱ intera tíha, la í tjuèhyara ti kichuara. Kixin jehya ti nkehe chrókjontera chrókjui̱nchekꞌitjáñaxinra ti kichuara kixin Cristo kꞌuenyákohe̱n ti nkexro a kja̱xin. 16Ti̱toéhyara kixin iso sin chrókꞌuándaxín sin kixin ti nkehe jína ichꞌera. 17Kixin ti kjuachaxin kuènté Díos la jehya kixin ti nkehe chrókjonieni o̱ ti nkehe chrókꞌuini. Náhí. Ti kjuachaxin kuènté Díos la tꞌe̱to̱an kixin chrókꞌuejóni nkojína la kjuaxróxin chrókꞌuejóni la ko chrókóchéhe̱ni, mé kaín tíhi la tjajon ti Ncha̱kuén Díos. 18Ti nkexro jína chꞌehe ixra̱ Cristo mé nchexiteyá ti nkehe tóxríhi̱n Díos la ko kja̱xin kaín chojni tso̱xríhi̱n.

19Mé xi̱kaha chrókjueyáni kaín ti nkehe tji̱ka̱o kjuaxróxin kixin tsjinki̱tsani kaín ti sin kíchóni kixin ndá kja̱xin sin a̱ntsí chrókuinkáchónki sin Ìnchéni. 20Chrokjui̱nchekꞌitjáñahñara ti ixra̱ kuènté Díos kixin ti nkehe chrókjontera ó. Kixin kaín ti nkehe chrókjontera la ó tsíkjinchetjóá Díos, kjánchó jehya jína ti chrókjonieni nkojín nkehe ndá ijnko chojni la chrókꞌuitsinkaxín. 21Méxra̱ ícha jína chrókjontehyara into la ko chrókꞌuihyara ixran la ko ninkehó nkehe chrókjui̱chꞌehyara ti xi̱kaha tsꞌitsínkaxín nkojín kichuara. 22Ti titekáonra Díos la Díos tjetsjehe tíha. Náxrjón chéhe̱ ti nkexro tjanchahya ijie̱ a̱sén kixin ti nkehe ichꞌe, kixin á ndoá o̱ náhí. 23A̱ndá ti nkexro inie nkehe la tjenka̱yáxin kixin ijie̱ tíha, la chaxín xi̱kaha tso̱hen, kixin kaínhña a̱sén sin kjónie sin ti nkehe. La xi̱kaha ó kjuasin sin ijie̱.

Currently Selected:

Romanos 14: poeNTplus

Highlight

Copy