Romanos 13

1Kaín chojni ticháxi̱n sinchexiteyéhe sin ti sin gobierno kixin ti kjuachaxin chónta ti sin a la Díos tsíkjajon, kixin kohya nijnko gobierno chrókꞌuejó ti jehya kjuachaxíen Díos. 2Mé xi̱kaha ti sin titekakuenhña ti sin tꞌe̱to̱an ijnko chjasin la kja̱xin titekakuenhña sin ti nkehe kꞌue̱to̱an Díos. A̱ndá ti sin xi̱kaha titekakonhña, la tsjasóte sin. 3A̱ndá ti sin gobierno tꞌe̱to̱an la jehya tjejó sin kixin sinchechrákon sin ti nkexro titekaon, tjejóchꞌe nkehe jína. Náhí. Sinchechrákon sin ti nkexro ichꞌe ti nkehe nduáhya. ¿Á tjinkáonra tso̱nínkakuanhñara ti sin tꞌe̱to̱an ní? Ti xi̱kaha la chrókꞌuejora nkojína, ndá chrókꞌuikon sin xi̱kaha la kohya nkehe chróchro sin. 4Kixin Díos la kjuajon ti ixra̱ tjejóchꞌe ti sin gobierno kixin kjuaxróxin chrókꞌuejó kaín chojni. A̱ndá ti chrókjui̱chꞌera ti nkehe jínahña la chróchrakonra kixin jehya chónkó tjejó ti sin gobierno. Náhí. Chónta sin kjuachaxin sinchekjasótiara sin kixin jehe sin la Díos kjuajon ti ixra̱ tjejóchꞌe sin. 5Mé xi̱kaha ticháxi̱n si̱nchexiteyéhéra ti sin tꞌe̱to̱an, la jehya jehó kixin chróchrakonra kixin chrókjuinchekjasotiara sin. Náhí. Chroxraxinkáonra kixin ticháxi̱n si̱nchexiteyéhéra sin. 6#Mt. 22:21; Mr. 12:17; Lc. 20:25.*La kja̱xin jehya táhó. Náhí. Ticháxi̱n chrókjuénke̱héra gobierno ti chichaon tjanchia sin kixin ti gobierno la Díos kꞌue̱to̱an tjejó sin tꞌe̱to̱an sin.

7Kja̱xin jahara chrókjuénke̱héra kaín chojni tjásikéhéra. Ti nkexro síká kuènté nonte la chrókjue̱nka̱ sin kuènté ti nonte, la ko ti nkexro síká kuènté ichrén nkehe nchekji, la chrókjue̱nka̱, la kja̱xin ti chrókjuíkosáyehéra chojni, la chaxín tjikosayehéra sin. 8Kja̱xin chrókjuásikéhyara ninkexró. Nkoko̱a nkehe tjasikára jehó ti chrótjue̱héra kichuara kixin ti nkexro tjue̱he kícho la xi̱kaha nchexiteyá ti nkehe tꞌe̱to̱an ley. 9#Ex. 20:14; Dt. 5:18; Ex. 20:13; Dt. 5:17; Ex. 20:15; Dt. 5:19; Ex. 20:17; Dt. 5:21; Lv. 19:18.*Kixin ndáchro ti nkehe tsíkꞌe̱to̱an Díos: “Tjakéhyara a̱sánra íjnko chojnichjin ókjé ti jehya ichjiánra, tꞌoñáhñara kichuara, te̱ehyara, nixjahyara kjuachꞌia kuènté íjnko chojni la ko tjakéhya a̱sánra ti nkehe chónta kichuara.” Kaín tíha la ko íso nkehe kꞌue̱to̱an Díos mé tꞌóna nkoko̱a: “Chrotjue̱heni kíchóni éxi tju̱éxini a̱séni.” 10Ti chojni tjue̱he kícho la ninkehó nkehe jínahña chꞌehya kícho. Méxra̱ chrótjue̱héra kichuara la xi̱kaha chróxiteyá kaín ti nkehe nixja ti ley.

11Kaín tíha ticháxi̱n sichꞌeni ijie kixin ó ikui ti ña̱o chrókꞌuejótsjeheni, chrókꞌuajuahyani. Kixin ijie la a̱ntsí séhya itsi ti ña̱o tsjixixín tsaáxini ke ti kjuankíxin kuitekaoni Díos. 12Ijie la ti sítie la í séhya tsjakꞌe kixin ó itsi ti tꞌinkaséña, la chrókuíto̱heni ti nkehe nduáhya kuènté ti sítie la chróchóntani kjuachaxin kuènté Ncha̱kuén Díos kixin tíha mé tsjinki̱tsa tsꞌajini ti tꞌinkaséña. Méxra̱ tsꞌónani éxi ijnko soldado tꞌinkáyate ika tsíkꞌóna chika kixin kohya nkehe tso̱heni. 13Chrokꞌuejóni nkojína kixin chrókꞌuájini ti tꞌinkaséña. Chrokꞌuájihyani kia ti tókoan chojni la tjajo̱n chojni, la chrókjuasinkohyani ijie̱ íjnko chojnichjin, la chrókjuénka̱yáxinhñani ti nkehe ndáchro a̱séni, la chrókjueyáhyani kjuanínkaon la ko chrókóchji̱no̱xíenhñani. 14Náhí. Jahara tákjára ti kjuachaxin kuènté Ìnchéni Jesucristo tsjínki̱tsara éxi ijnko nkehe tsíkꞌóna chika chrókꞌuinka̱yára la ko chrókjuénka̱yáxinhñara ti nkehe jínahña ndáchro a̱sánra.

Currently Selected:

Romanos 13: poeNTplus

Highlight

Copy