Romanos 15

1A̱ndá jeheni a̱ntsí titekaoni Ìnchéni, la chrókjuinki̱tsani ti sin kanhñó nohe la chrókjuichꞌehyani ti nkehe jehóni tjinkaoni. 2Kja̱xin kaíni chrókjuíchꞌeni ti nkehe jína kixin chrókjuinki̱tsani ti sin kíchóni kixin xi̱kaha a̱ntsí chrókuitekaon sin Ìnchéni. 3#Sal. 69:9.*Kixin kja̱xin Cristo kjuíchꞌehya ti nkehe chrókóchèxin jehó. Náhí. Kjuinchexiteyá chꞌan éxi ndáchro ti xroon itén Díos: “Ti kjuanínkaon kuènté ti sin nínkakohan mé kuamá janhan.” 4Kaín ti nkehe chrónka itén Díos senó la chrókjuinki̱tsa ti jeheni kixin jína chrókꞌuejóchóheni ti nkehe jína itsi la chrókónínkakonhñani, kjónté tsꞌatsínkani ichrén nkehe náxrjónhña, la ti itén Díos chrókꞌuitjaxini ti kjuachéhe̱. 5Díos, mé ti nkexro nchechéhe̱ ti jeheni la ko tjinki̱tsa kixin chrókónínkakonhñani, la kja̱xin tsjinki̱tsa ti jahara kixin chrókꞌuejora jína la ko nkokón chrókjuénka̱yáxinkoára kichuara éxi kjua̱ko̱xi̱n Cristo Jesús. 6Kixin kaíni nkoko̱a chrónixje̱he̱ni Itꞌéni Díos la ko chrókjuikosáyeheni chꞌan, kixin jehe chꞌan mé Itꞌé Ìnchéni Jesucristo.

Ti itan jína xráko̱he̱ ti sin jehya judío

7Mé xi̱kaha nkojína chrónixjehéra kaín chojni la ko chrókjuínki̱tsara kichuara kixin xi̱kaha Cristo kjuínki̱tsa ti jeheni kixin xi̱kaha kja̱xin jeheni jína chrókjuikosáyeheni Díos. 8Janhan ndáxrja̱n kixin Cristo ikui kixin tsjinki̱tsa ti sin judío kixin tsoxiteyá ti nkehe tsíndáche Díos ti sin tsíkꞌaxrjeníxini ósé, kixin xi̱kaha tsja̱ko̱xi̱n kixin Díos la jína chꞌan la sinchexiteyá chꞌan ti nkehe tsíndáchro chꞌan. 9#2Sam. 22:50; Sal. 18:49.*La kja̱xin ikui Cristo kixin kja̱xin ti sin jehya judío la chróchjéhe sin kjuasáya Díos kixin kui̱konoéhe̱ Cristo ti jehe sin éxi chrónka ti xroon itén Díos:

Janhan la ko ti sin tjejó kaín nación mé tsochjéheni kjuasáya jaha Díos

la ko tsotsjeni kixin tsjikosáyeheni ti ihni̱á. 10#Dt. 32:43.*Kja̱xin ndáchro ti itén Díos:

Tócháha̱ra kaínra tjejora kaín nación ko kaín chojni tinkáchónki Ìnchéni. 11#Sal. 117:1.*Kja̱xin ndáchro:

Tjikosayehéra Díos kaínra tjejora kaín nación

la ko kaínra tsondáchrora kixin imá ijié ti kjuachaxin chónta Díos.

12 # Is. 11:10. *Kja̱xin Isaías tsíkjin ndáchro:

Tsꞌaxrjeníxin Isaí ijnko nkexro

la ti nkexro a tsꞌe̱tue̱hen kaín ti sin tjejó kaín nación,

a̱ndá jehe sin tsinkáchónki sin ti nkexro a, la tsaá sin.

13Díos, mé ti nkexro tjajon kjuachaxin tjejóchóheni ti nkehe jína itsi, mé tsjajon chꞌan ti kjuachéhe̱ la ko ti kjuaxróxin chróchontara kixin titekáonra ti jehe chꞌan, ndá a̱ntsí chrókꞌuánkí ti kjuachéhe̱ chontara kixin ti kjuachaxíen Ncha̱kuén Díos.

Ti ixra̱ ichꞌe Pablo

14Kíchóni, chaxín nona kixin jahara la jína tjejora la kaín kjuaxrexinkaon jína tjénka̱yáxinra la ko ó nohara tjákohéra kichuara. 15La kjónté ó jína tjejora la tjínka̱oan ikjian ti xroon i chrꞌahánra, xrja̱nká kaín ti nkehe kixin chrókꞌuitjáñahñara chróxraxinkáonra kaín tíha. Mé xi̱kaha itꞌa̱ ti ixra̱ kixin kui̱konoána Díos la kjuajon chꞌan tíha, 16kixin si̱tꞌaha̱ ixra̱ Jesucristo tsondátjan ti sin jehya judío ti itén Díos. Ti ixra̱ itꞌa̱ mé tjàkua ti itan jína tsaáxin chojni kixin janhan tsjánjua ti sin jehya judío éxi ijnko ofrenda tsꞌáyéhe̱ Díos kixin tíha mé ijnko nkehe tso̱xríhi̱n Díos kixin Ncha̱kuén Díos tsíkótjuáxin sin.

17Janhan mé ijnko chojni tinkáchónki Cristo Jesús la xi̱kaha siín kjuachaxin tso̱chàna kixin tꞌa̱ha̱ ixra̱ Díos. 18Kixin xrokuahya tsondáxrja̱n íjnko nkehe. Jehó tso̱xrja̱nka nkexrín ti kjuachaxin kjuajon Cristo kꞌuayáha̱ kixin tsondátjan ti sin jehya judío ti itén Cristo kixin tsitekaon sin Díos. Ndá xi̱kaha kuitekaon sin kixin ti itan kjuàkua la jehya táhó, kja̱xin kꞌuíkon sin nkexrín kjuáko̱xia̱n janhan, 19la ko nkexrín kjuásian kjuaxroan kjuachaxíen Ncha̱kuén Díos. Mé xi̱kaha kjuintaxíxi̱n kjuàkua ti itan jína kuènté Cristo tsaáxin chojni, xránkíxixín chjasin Jerusalén la nkuíxín chjinaxón ntiha la ko ti nonte Ilírico. 20Méxra̱ tjínka̱oan tsjíkjàkua ti itan tsaáxini ti chjasin na̱xa̱ tienhñé sin ihni̱é Cristo kixin janhan tjínka̱konhña tsjíxrónkáxian ti ixra̱ tsíkjichꞌe ókjé chojni. 21#Is. 52:15.*Ícha jína éxi ndáchro xroon itén Díos:

Chrokuihin ti sin na̱xa̱ tienhñé ti itan kuènté Díos

la ko chrókienxín ti sin na̱xa̱ tienxínhña.

Pablo tjenka̱yáxin itsji Roma

22 # Ro. 1:13. *Nchónhña tjénka̱yáxian chrókjuasántsjahára, kjánchó na̱xa̱ xitjahya kjuasán ntiha kixin ti ixra̱ itꞌa̱. 23Kjánchó ijie la ó kjuixina ti ixra̱ ntihi. Kixin ndesi itsjé nánó tjínka̱oan chrókjuasántsjahára, 24a̱ndá ijie tsꞌatsínka tsonixjahara ti sátsjia España. Ndá tso̱chàna tsꞌíkua̱n ti jahara, ndá chrꞌéxi̱n tjínka̱oan kixin tsjínki̱tsara ti janhan ti ó sátsjia. 25#1Co. 16:1-4.*A̱ndá ijie la sátsji̱á Jerusalén, sátsjiki̱a̱n ti chichaon tsjinki̱tsa ti sin kíchóni tjejó ntiha. 26Kixin ti sin jehya judío tinkáchónki Jesús chjasin Macedonia la ko Acaya kjuénka̱yáxin sin tsjejo sin chichaon kixin tsochrꞌéhen sin ti sin kíchóni nóa tjejó Jerusalén. 27#1Co. 9:11.*Jehe sin la kóxríhi̱n sin tsjinki̱tsa sin kixin ti sin judío tinkáchónki Cristo kjuínki̱tsa ti jehe sin jehya sin judío kixin tso̱nohe sin itén Díos. Ndá ijie la jehe sin chrókjuinki̱tsa sin ínaá chrókjuajon sin iso ti nkehe chónta sin chrókꞌuáyéhe̱ ti sin judío tinkáchónki Ìnchéni. 28Méxra̱ ti ó tsjixin ti ixra̱ la tsꞌáyéhe̱ sin ti chichaon, ndá janhan sátsjia España la ó tsꞌatsínka tsonixjahára. 29Ó nona kixin ti ó tsjasán la Cristo imá sincheñao kaíni kixin janhan tso̱xrja̱nka ti itén chꞌan.

30Kíchóni, xrja̱noáhára kjuachaxin kuènté Ìnchéni Jesucristo kixin Ncha̱kuén Díos tjajon kjuachaxin tso̱tjue̱heni kíchóni, kixin nkoko̱a chrókꞌuejóni chrókjuíchꞌeni ixra̱ la ko chrónixjehéra Díos kixin ti janhan. 31Tjanchehéra Díos kixin kohya nkehe tso̱na kixin nínkaon kaín ti sin titekakonhña Díos siín Judea, la ko chrókjuinki̱tsa Díos kixin jína sátsjiki̱a̱n ti nkehe tsjinki̱tsa ti sin kíchóni tjejó Jerusalén kixin jína chrókꞌuáyéhe̱ sin tíha. 32Ndá ti xi̱kaha tjinkaon Díos la tso̱chàna tsjasán ti tjejora la kjuaxróxin tsjakꞌé ti ó tsjasán. 33Ti Díos tjajon kjuaxróxin mé tsꞌejoko̱ara kaínra. Mé xi̱kaha tso̱hen.

Currently Selected:

Romanos 15: poeNTplus

Highlight

Copy