Romanos 12

Nkexrín tsꞌejó ti chojni tinkáchónki Díos

1Méxra̱ jahara kíchóni, xrja̱noáhára kixin jahara chrókóchjinehéra Díos, chróchje̱héra chꞌan ti cuerpo kuèntára éxi ti nkehe tjechón la ko tjóá tsꞌáyéhe̱ Díos kixin xi̱kaha tóxríhi̱n Díos kixin jehe chꞌan kui̱konoáhara chꞌan. Tíhi mé ijnko nkehe chaxín ndoá chróchje̱héra Díos kixin xi̱kaha tsjíkosáyehéra chꞌan. 2Méxra̱ í chrókjanhñara chróxraxinkáonra ti nkehe siín chjasintajni. Náhí. Chrokui̱to̱héra ti nkehe nduáhya tjénka̱yáxinra kixin ndá jína chrókꞌuejora. Ndá xi̱kaha chrókónohara ti nkehe tjinkaon Díos kixin ndoá la ko jína chrókꞌuejora éxi tóxríhi̱n chꞌan.

3Kjuasáye Díos kjuajon ti ixra̱ tjétꞌa̱, la nixjahára kaínra kixin chrókjuénka̱yáxinhñara kixin imá tjetoanra. Náhí. Chrokjuénka̱yáxinra jína éxi ti kjuachaxin tjáhara Díos éxi nkexrín tinkachónkira Cristo. 4#1Co. 12:12.*Mé xi̱kaha ijnko cuerpoé chojni la nchónhña ti síkjoxixín chónta, kjánchó nkokónhña ixra̱ ichꞌe. 5Mé xi̱kaha ti jeheni, kjónté nchóhñani la tsꞌónani éxi nkoko̱a cuerpo kuènté Cristo. Mé xi̱kaha nkoko̱a chrókjuénka̱yáxini kixin ó kꞌónani nkoko̱a cuerpo.

6 # 1Co. 12:4-11. *Díos kjuajon nchónhña ti ixra̱ éxi tjinkaon chꞌan chróchjéhe chꞌan nkojnko chojni la ticháxi̱n chrókjuíchꞌeni ti ixra̱ kjuajon chꞌan. Ti kjuajon Díos kjuachaxin kixin tsochronkaxíni ti itan kuènté chꞌan ndá ticháxi̱n sichꞌeni ti ixra̱ éxi nkexrín titekaoni Cristo. 7Ti kjuajon Díos kixin chrókjuiki̱tsani íjnko nkexro la ticháxi̱n jína sichꞌeni ti ixra̱. A̱ndá ti nkexro tsíkꞌayéhe̱ kjuachaxin tsjako la ticháxi̱n jína chrókjuako. 8Ti nkexro tsíkꞌayéhe̱ kjuachaxin nchexraxinkaon íjnko nkexro ti nkehe jína la kaín a̱sén chꞌan chrókjuíchꞌe chꞌan ti ixra̱ a. A̱ndá ti nkexro tsjajon ichrén nkehe la nkojína chrókjuajon sin. A̱ndá ti nkexro tꞌe̱to̱an la jína chrókjuíchꞌe ti ixra̱ a la ko ti nkexro chrókjuinki̱tsa ti sin chóntahya la chrókóchéhe̱ sin chrókjuinki̱tsa sin.

Ti nkehe sichꞌe ti sin tinkáchónki Cristo

9Kaín a̱sánra chrótjue̱héra kichuara. Chrokui̱to̱héra ti nkehe nduáhya tjénka̱yáxinra la chrókjuénka̱yáxinra kaín ti nkehe jína. 10Chrotjue̱héra kichuara kixin tinkachónkira Ìnchéni la ko chaxín chrókjuíkosáyehéra kichuara.

11Chrokꞌóxrjéhyara, la ko chrókósáhyara, chrókjui̱chꞌehéra ti ixra̱ kuènté Ìnchéni kaín a̱sánra.

12Chrókócháhara kixin tjejocho̱hénra ti nkehe náxrjón itsi, la ko chrókónínkákonhñara kjónté chrókui ijnko nkehe chrókjuasótexínra la ko chrókui̱to̱éhyara chrónixjehéra Díos.

13Chrokjuínki̱tsara ti sin tinkáchónki Ìnchéni ti tichánxi̱hin sin nkojín nkehe. Nkojína chje̱héra kjuachaxin tsꞌejó ti sin tsjinixja̱hara.

14 # Mt. 5:44; Lc. 6:28. *Tjanchehéra Díos kixin sincheñao chꞌan ti sin nínkakohanra la ko tsjinki̱tsa chꞌan ti jehe sin la tjáncháhyara kixin tsjasóte sin.

15Tócháha̱ra kja̱xin ti tjejó ti sin chéhe̱ la ko ti tjejótsjánka sin la kja̱xinra tsja̱nkara.

16 # Pr. 3:7. *Kjuaxróxin chrókꞌuejora. Chrokjui̱nchenkehyara. Náhí. Ícha jína chrókóyóha̱ra éxi ti sin nchenkehya la ko chróndáchrohyara kixin jahara imá nohara.

17Chrokjui̱chꞌehyara ijnko nkehe jínahña ti sin kjuitꞌahara ichrén nkehe jínahña. Ícha jína chrókjuáko̱xinra ti nkehe jína kixin xi̱kaha chrókꞌuikon kaín chojni. 18Chrokjuéyára nkojína chrókꞌuejora. Ti chrókjuachara, la kjuaxróxin chrókꞌuejora kaínra. 19#Dt. 32:35.*Jahara kíchóni, chrókjui̱nchekjasótehyara ti sin ichrén nkehe kjuitꞌahara. Ti̱to̱héra kixin Díos sinchekjasóte ti sin a. Ndáchro ti xroon itén Díos kixin: “Janhan si̱ntaki̱to̱axian ti iji̱é chojni la ko tsjénka̱ha̱ sin, mé xi̱kaha ichro Díos.” 20#Pr. 25:21, 22.*Kja̱xin ndáchro: “Ti sin nínkakohanra la, ti ikꞌuén sin kjinta la chróchje̱héra sin nkehe chrókjonie sin, la ko ti ikꞌuén sin ìnta̱, la chróchje̱héra sin nkehe chrókꞌui sin. Ndá ti xi̱kaha si̱chꞌera, la jehó sin sinchesuéhe̱ sin a̱sén sin kixin ti nkehe nduáhya kjuitꞌahara sin.” 21Chrokui̱to̱éhyara kixin chrókjuacha ti nkehe jínahña chrókꞌue̱tua̱hanra. Náhí. Ícha jína chrókjui̱chꞌera ti nkehe jína kixin chrókjuachahya ti jínahña chrókjuitꞌayahara.

Currently Selected:

Romanos 12: poeNTplus

Highlight

Copy