Apocalipsis 3

Ti tan kꞌuáyéhe̱ ti ni̱nko itjen Sardis

1’Ikjian ti xroon tsꞌáyéhe̱ ti ángel tꞌayakohen ti ni̱nko itjen chjasin Sardis: “Ti nkexro chónta ti yato Ncha̱kuén Díos la ko chónta ti yato konotsé mé ndáchro xi̱kihi: Janhan nona kaín ti ixra̱ tjejochꞌera la ko nona kixin jahara la ijnko chojni tsíkꞌen kjónté ihnkera kixin tetsjehéra ichrora, kjánchó tsíkꞌenra. 2Tꞌàyara la tꞌayakohénra ti nkehe kuíto̱he kjónté í tsjéhya kixin ó chjina itsꞌen kja̱xin. Kixin ó kꞌuíkua̱n kixin ti ixra̱ ichꞌera la kanhñó jína tꞌikon Díos. 3#Mt. 24:43, 44; Lc. 12:39, 40; Ap. 16:15.*Xráxinkaonra ti nkehe xráko̱hara la ko kuihínra la chrókjui̱nchexiteyára la ko chrókjanra chróxraxinkáonra Díos. A̱ndá ti náhí la tsjasán éxi ijnko xíche̱e la tso̱noahñara nkesá tso̱hen tíha. 4Kjánchó na̱xa̱ tjejó iso sin ti chjasin Sardis na̱xa̱ kjuínchekji̱ta̱hya sin ti iké sin mé jehe sin tsꞌájiki̱a̱n sin la tsochónta sin ika tjóá kixin jehe sin la jína ti ixra̱ kjuíchꞌe sin. 5#Ex. 32:32, 33; Sal. 69:28; Ap. 20:12; Mt. 10:32; Lc. 12:8.*Ti nkexro tsjacha sinchexiteyá mé tsꞌinkáya sin ika tjóá la ko tsoxikahya ti ihni̱é sin tjejónixín ti xroon sínixín ihni̱é ti sin tsochónta kjuachón la ko janhan tso̱xrja̱nka kixin choxián sin nkayakon Tꞌaná la ko nkayakon ti sin ángel kuènté chꞌan. 6Ti nkexro jína tihin la chrókuihin ti nkehe nixje̱he̱ Ncha̱kuén Díos ti ni̱nko.”

Ti tan kꞌuáyéhe̱ ti ni̱nko itjen Filadelfia

7 # Is. 22:22; Job 12:14. *’Ikjian ti xroon tsꞌáyéhe̱ ti ángel tꞌayakohen ti ni̱nko itjen Filadelfia: “Xi̱kihi ichro ti nkexro tjóá la ko chaxín, ti nkexro chónta ti llave kuènté rey David, ti nkexro tsakitje̱he̱ ti puerta la ninkexró tsjachahya tsꞌekjehe̱, a̱ndá ti tsꞌekjehe̱ chꞌan la ninkexró tsjachahya tsakitje̱he̱. 8Janhan nona kaín ti nkehe tjejochꞌera. Méxra̱ kjuaké ijnko puerta tjexrjankehe̱ la ninkexró xitjahya tsꞌikjehe̱, kixin kjónté kanhñó fuertera la kjui̱nchexiteyára ti nkehe kjuàkua la ko kjui̱nchemáhñara ti janhan. 9#Is. 49:23; 60:14; Is. 43:4.*Méxra̱ tsꞌikonra ti nkehe si̱tꞌaha̱ ti sin ni̱nkué Satanás xrichꞌia sin ndáchro kixin judío sin ichro sin, a̱ndá chaxínhña. Janhan tsꞌétua̱ha̱n sin kixin tsꞌejóxin tochꞌin sin nkayakonra ndá tso̱nohe sin kixin tjua̱ha̱ra. 10Jahara kuitekáonra ti nkehe kuétua̱hanra la kꞌóxrjéhyara méxra̱ jína tsꞌejora, la janhan tsꞌayakoha̱n ti jahara ti ó itsi ti nkehe náxrjónhña tso̱hen kuenté chjasintajni kixin xi̱kaha tsotsjaha̱ á tsjacha ti chojni chjasintajni tsꞌatsínka tíha. 11Janhan la í séhya ndá tsokjan. Méxra̱ tꞌayakohénra ti nkehe chontara kixin ninkexró chrókuakítsjahyara ti corona. 12#Ap. 21:2; Is. 62:2; 65:15.*Ti nkexro tsjacha sinchexiteyá mé si̱tꞌána ijnko muro kuènté ni̱nkué Díos la í sátsjixinhña sin ntiha. La janhan tsokjian ti cuerpoé sin ti ihni̱é Díos la ko ti ihni̱é chjasén Díos, ti Jerusalén ni̱xin tsi̱xi̱n nkaya nka̱jní ti itjen Díos. La kja̱xin tsokjian ti ni̱ná ni̱xin tsochónta ntiha. 13Ti nkexro jína tihin la chrókuihin ti nkehe nixje̱he̱ Ncha̱kuén Díos ti ni̱nko.”

Ti tan kꞌuáyéhe̱ ti ni̱nko itjen Laodicea

14 # Pr. 8:22. *’Ikjian ti xroon tsꞌáyéhe̱ ti ángel tꞌayakohen ti ni̱nko itjen Laodicea: “Xi̱kihi ichro ti nkexro nchexiteyá kaín nkehe, ti nkexro chronka kaín nkehe ndoá la ko chaxín. Ti nkexro kjuíchꞌénaxín Díos kaín ti nkehe siín, mé xi̱kihi ichro: 15Janhan nona kaín ti ixra̱ tjejochꞌera. Nóna kixin jahara la ní jehya ikin o̱ sóara. Kjá a̱ntsí jína ti chrókókinra o̱ chrókósóara. 16Kjánchó jehó yásóra la jehya ikinra la ni jehya sóara. La ti itsꞌiá janhan la tsꞌokjan ti jahara. 17Kixin jahara ndáchrora kixin rikóra la ó chontara kaín nkehe la í ticháxia̱nhñara ninkehó. Kjánchó noahñara kixin chontahyara kjuachéhe̱ la ko jehya jína tjejora, nóara, ntakótánra#3:17 ntakótánra tꞌikohña sin ciegos la ko tjóchínra. 18Méxra̱ nta̱xráxinkaonra kixin tsꞌènara ti oro náxrjón tsíkꞌaxrjexín itja̱ chonta janhan ndá chaxín tso̱rikóra. La tsꞌènara ti ika tjóá kixin tsꞌínka̱yára ndá í tso̱suàhyara kixin tjóchínra. La ko janhan tsjánjua ti xro̱a̱n colirio tsjiánkí ikonra kixin jína tsꞌikonra. 19#Pr. 3:12; He. 12:6.*Janhan tjéntuáha̱ kaín ti nkexro tjua̱ha̱. Méxra̱ ikjanra tinkachónkira Díos. 20Janhan itjén ndója nchia, tjétꞌe̱ya̱. Ti nkojín nkexro chrókuihin taná ndá chrókuakitje̱he̱ ti ndo̱e la chrókꞌuíxa̱ha̱n ntiha la chrókjoniéki̱a̱n ti jehe sin la ko janhan. 21Ti nkexro tsjacha sinchexiteyá la tsjánjua kjuachaxin tsꞌejótja̱xi̱ko sin ti janhan ti této̱anxián éxi janhan kjuácha, ndá Tꞌaná kjuajon kjuachaxin tétja̱xian ti itjen chꞌan tꞌe̱to̱an chꞌan. 22Ti nkexro jína tihin la chrókuihin ti nkehe nixje̱he̱ Ncha̱kuén Díos ti ni̱nko.”

Currently Selected:

Apocalipsis 3: poeNTplus

Highlight

Copy