Apocalipsis 2

Ti tan kꞌuáyéhe̱ ti yato ni̱nko: Ti tan kꞌuáyéhe̱ ni̱nko itjen Éfeso

1’Ikjian ti xroon tsꞌáyéhe̱ ti ángel tꞌayakohen ti ni̱nko itjen Éfeso: “Xi̱kihi ichro ti nkexro chónta ti yato konotsé ti itja chjina la ko xritjakꞌe nko̱siñe ti yato candelero tsíkꞌónaxín oro: 2Janhan choxián kaín ti ixra̱ tjejochꞌera kjónté imá ixra̱ la tónínkákonhñara kjónté siín ti sin ichꞌe nkehe jínahña. Kja̱xin nona kixin titekákuénhñara ti sin ndáchro kixin apóstol, kjánchó chaxínhña, xrichꞌia sin. 3Nchónhña kjuasótiara la kóninkákonhñara la jína kjui̱chꞌera ti ixra̱ kuénta̱na la kꞌóxrjéhyara. 4Kjánchó tóxrína̱hña ijnko nkehe ichꞌera kixin í tjue̱hyara ti janhan éxi ti na̱ntá kjuankíxinra. 5Méxra̱ xráxinkaonra nkexrín kuekꞌejora la ikjanra tinkachónkira Díos. Ti̱to̱héra ti nkehe jínahña ichꞌera la ikjanra tinkachónkira chꞌan éxi ti xránkíxixín. A̱ndá ti náhí, la tjoka tsjasán la tsakjìan ti candelero kuèntára ti tsjínkíhyara ti nkehe nduáhya tjénka̱yáxinra. 6Kjánchó chàna kixin tóxríanhñara ti nkehe ichꞌe ti sin nicolaítas kixin kja̱xin janhan tóxri̱nahña tíha. 7#Gn. 2:9; Ap. 22:2; Ez. 28:13; 31:8.*Ti nkexro jína tihin la chrókuihin ti nkehe nixje̱he̱ Ncha̱kuén Díos ti ni̱nko: Ti nkexro tsjacha sinchexiteyá la tsotjahá kjuachaxin sinie sin ti ito tꞌóna ti inta tjajon kjuachón nkochríxín itjen ti itjen Díos.”

Ti tan kꞌuáyéhe̱ ti ni̱nko itjen Esmirna

8 # Is. 44:6; 48:12; Ap. 1:17; 22:13. *’Ikjian ti xroon tsꞌáyéhe̱ ti ángel tꞌayakohen ti ni̱nko itjen Esmirna: “Ti nkexro itjen xránkíxixín la ko tsjixixín, ti nkexro ikꞌuén la xechón ínaá mé ndáchro: 9Janhan nona kaín ti nkehe tjejochꞌera. Nona nkexrín tjejotjasótera la ko nóara, kjánchó ti chaxín la rikóra. La nona kixin tꞌándaxíhanra ti sin ndáchro kixin judío, kjánchó chaxínhña, kixin jehe sin mé ti ni̱nkué Satanás. 10Méxra̱ chrakonhñara, kjónté tsjasótiara kixin ti Jínahña la tsochrꞌáxehen nkojín ti jahara ndo̱echjiso kixin tsotsjehe nkexrín ti jahara la tichánxi̱n tsjasótiara ite ña̱o. Kjánchó titekáonra ti janhan hasta itsꞌenra, ndá janhan tso̱tja̱hára ti corona kuenté kjuachón nkochríxín. 11#Ap. 20:14; 21:8.*Ti nkexro jína tihin la chrókuihin ti nkehe nixje̱he̱ Ncha̱kuén Díos ti ni̱nko: Ti nkexro tsjacha sinchexiteyá la í tsjasótehya sin ti yaáxin itsꞌen chojni.”

Ti tan kꞌuáyéhe̱ ti ni̱nko itjen Pérgamo

12’Ikjian ti xroon tsꞌáyéhe̱ ti ángel tꞌayakohen ti ni̱nko itjen Pérgamo: “Mé xi̱kihi ichro ti nkexro chónta ti chika espada ijnó ñájín taté: 13Janhan nona kaín ti nkehe tjejochꞌera la ko nona kixin tjejora ti tꞌe̱to̱an Satanás, la kjónté xi̱kaha la tꞌitjáñahñara ti janhan la ko ti nkehe tjejochohénra itsi chrꞌéxi̱n. Kjónté ti ña̱o ikꞌuén chꞌin Antipas, ti nkexro jína kjuínchexiteyéhe ti janhan la kꞌóñáxin sin chꞌan ti tjejora, ti tꞌe̱to̱axín Satanás la kui̱to̱ehyara kuitekáonra ti janhan. 14#Nm. 22:5, 7; 31:16; Dt. 23:4; Nm. 25:1-3.*Kjánchó tóxrìnahña iso ti nkehe nduáhya tjénka̱yáxinra kixin tjinkákonhñara tsi̱to̱héra ti nkehe kjuako Balaam, ti nkexro kꞌue̱tue̱hen Balac kixin chrókjuasin ijie̱ ti sin israelita chrókjonie ti nkehe tsíchroxi̱hi̱ sin ti nkehe tsíkjano̱ña la ko chróchónta sin chojnichjin ókjé, jehya ichjién sin. 15Kja̱xin ntiha tjejó iso ti sin tjinkakonhña tsíto̱he ti nkehe tjako ti sin nicolaítas, ti sin tjínka̱konhña. 16Méxra̱ chrókjanra chrókuinkachónkira Díos. A̱ndá ti náhí, la tjoka tsjasán ti tjejora la tsjájo̱nkia̱nxinra ti espada tꞌaxrjexín irꞌua̱. 17#Ex. 16:14, 15; 16:33, 34; Jn. 6:48-50; Is. 62:2; 65:15.*Ti nkexro tjinkaon tsihin la chrókuihin ti nkehe nixje̱he̱ Ncha̱kuén Díos ti ni̱nko: Ti nkexro tsjacha sinchexiteyá la tsotjahá kjuachaxin sinie sin ti maná ómó itjen la ko tsotjahá sin ijnko ixro̱ tjóá la ti ixro̱ mé tjenkáni ti ihni̱é sin ni̱xin ninkexró noehña. Jehó ti nkexro tsꞌáyéhe̱ tíha mé tso̱nohe.”

Ti tan kꞌuáyéhe̱ ti ni̱nko itjen Tiatira

18’Ikjian ti xroon tsꞌáyéhe̱ ti ángel tꞌayakohen ti ni̱nko itjen Tiatira: “Mé xi̱kihi ichro ti Xje̱en Díos, ti nkexro chónta ikon éxi xrohi síchrꞌákjen la ko chónta to̱té éxi chika sinie tjáki̱ni tsjehe. 19Janhan nona kaín ti nkehe tjejochꞌera la ko nona nkexrín tjue̱héra ti janhan la ko jína tinkachónkira ti janhan la ko ti ixra̱ tjejochꞌera la ko ti̱toéhyara ti janhan kjónté tꞌatsínkara nkehe náxrjónhña. La nona kixin ijie la a̱ntsí ichꞌera ixra̱ kuénta̱na ke ti xránkíxixín. 20#1Rs. 16:31; 2Rs. 9:22, 30.*Kjánchó tóxrìnahña ijnko ijie̱ chontara kixin tjájonra kjuachaxin tjako ti tjan Jezabel, ti nkexro ndáchro kixin nixja itén Díos, kjánchó jehó chꞌiyehe tjan ti sin kuénta̱na kixin chrókjuasinko sin ijie̱ chojnichjin ókjé jehya ichjién sin, la chrókjonie sin ti nkehe tsíchroxi̱hi̱ sin ti nkehe tsíkjano̱ña. 21Janhan kui̱to̱ha̱ tjan intsí kixin chrókjuinkí tjan ti nkehe nduáhya tjenka̱yáxin tjan, kjánchó tjinkakonhña tjan tsíto̱he tjan ti ijie̱ tjasiko tjan chojnindoa. 22Méxra̱ ijie la si̱ntaníha̱ tjan la tsjakꞌetsínka tjan ijnko cama, la kaín ti nkexro tsjasiko tjan ijie̱ la tsjasóte sin ti tsíto̱ehya sin ti nkehe kjuako tjan. 23#Sal. 7:9; Jer. 17:10; Sal. 62:12.*La janhan tsꞌóñá ti xje̱en tjan. Ndá xi̱kaha kaín ni̱nko tso̱nohe kixin janhan choxián ti nkehe tjenka̱yáxin sin la ko ti nkehe tóhen a̱sén kaín chojni, la janhan tsjénka̱ha̱ nkojnko nkexro éxi ti ixra̱ kjui̱chꞌe. 24Kjánchó ti ísora tjejora chjasin Tiatira chréhyara ti nkehe nduáhya tjako sin la kochoxínhñara ti nkehe nchekꞌin sin ti nkehe ómó kuènté Satanás la janhan í tsotjáhyara íjnko ixra̱. 25Méxra̱ ti nkehe chontara la ti̱toéhyara hasta tsokjanjña janhan. 26#Sal. 2:8, 9.*A̱ndá ti nkexro tsjacha sinchexiteyá kaín ti nkehe kjuàkua hasta tsjixin la janhan tsotjahá sin kjuachaxin tsꞌe̱tue̱hen sin kaín nación. 27Tꞌaná mé kjuajon kjuachaxin tséto̱an. La xi̱kaha jehe sin tsꞌe̱tue̱hen sin ti nación éxi chróchónta sin ijnko ntavara tsíkꞌónaxín chika kixin chróchjéhe sin ti nación la éxi ichi̱ tsíkꞌónaxín nche̱tje̱ mé xi̱kaha tso̱kuen. 28La kja̱xin tsotjahá sin ti konotsé itji nchítjen. 29Ti nkexro jína tihin la chrókuihin ti nkehe nixje̱he̱ Ncha̱kuén Díos ti ni̱nko.”

Currently Selected:

Apocalipsis 2: poeNTplus

Highlight

Copy