Salmos 89
89
Ti nkehe tsíndáche Díos ti chꞌin David
1Itꞌéni Díos, nkochríxín tsotsjeni tsjikosáyeheni ti jaha
kixin kjuasáya jaha la kui̱konoéhéni.
Kaín chojni tjejó ijie la ko ti chojni itsi
chrꞌéxi̱n la tsihin sin
kixin jaha imá jína kjuínki̱tsani.
2Tsochrónkani kixin ti tjue̱héni la nkochríxín tíha
la ko ti jína nixja jaha la nkochríxín tsjakꞌe éxi nkochríxín itjen ti nka̱jní.
3Mé jaha Díos la tsíndáche chꞌin David
mé ti nkexro tꞌaha ixra̱ tsíkjéyá, mé tsíndáchroa:
4 #
2Sam. 7:12-16; 1Cr. 17:11-14; Sal. 132:11; Hch. 2:30. *“Tso̱tja̱ha̱ kjuachaxin ti nkexro tsꞌaxrjéníxian
kixin tsꞌe̱to̱an ti nkexro nkochríxín éxi kjuákꞌe kuéto̱an jaha.”
5Itꞌéni Díos,
kaín ti sin tjejó nka̱jní
la tsjikosáyaha sin kixin tsíkꞌikon sin ti kjuachaxin ijié kuèntá.
Kaín ti sin jína tsíkónkotsé mé tsjikosáyaha sin.
6Nijnko nkexro itjen nkaya nka̱jní
chrókóyóhe̱ ti jaha, Itꞌéni Díos.
¿Xá nkexro chrókóyóhe̱ ti jaha Díos kuènténi?
7Jaha mé ijnko Díos imá tꞌe̱to̱an
la ijnko kjuachrakon ijié tíha
kixin nkonda̱tjen ti jaha la siín nchónhña ángel.
8Itꞌéni Díos, jaha mé chonta kaín kjuachaxin.
¿Xá nkexro chrókóyóhe̱ ti jaha?
Kixin kaín kjuachaxin mé kuèntá
la ko jaha nchexiteyá ti nkehe chaxín.
9Ti tso̱jie̱he ti nda̱ñao la jaha této̱an
kixin tsꞌixratá,
la ko ti tsochrika ti ìnta̱ la jaha mé ndáche tsꞌixitán.
10Jaha mé kꞌoñá ti monstruo kuènté nda̱ñao
la jaha kjui̱nchekꞌitjáñaxián ti chojni nínkakohan
kixin ti kjuachaxin chónta ti itjá.
11Ti nka̱jní la ko ti chjasintajni mé kuèntá.
Jaha mé kjui̱chꞌéna ti chjasintajni la ko kaín ti nkehe siín.
12Jaha mé kjui̱chꞌéna ti norte la ko ti sur,
la ti ijna̱ Tabor la ko ti ijna̱ Hermón
tso̱chéhe̱ tso̱tsje̱xi̱n ti ihni̱á jaha.
13Ti cháoan mé chónta kjuachaxin
la ko ti itjá chjina la tétua̱nxián.
14Jaha jína nchekito̱exián la jína tjénka̱yáxian
la mé xi̱kaha jína této̱an
la ko jaha tjáko̱xián kixin imá tjue̱héni la ko nchexiteyá ti nkehe chaxín.
15Náxrjón ti sin nohe tsjikosáyaha sin, jaha Díos kuènténi.
Kaín nti̱a tꞌaji sin mé tꞌinkaséñaxín ti xrohi kuèntá.
16Ti ihni̱á mé tso̱chèxin sin kaín ña̱o
la ko tso̱chéhe̱ sin kixin chaxín ndoá tjénka̱yáxian jaha,
17kixin ti kjuachaxin ijié chonta jaha mé nchefuerte ti jehe sin.
Jaha mé nchekꞌánkía ti kjuachaxin chóntani kixin jína jaha.
18Kixin jaha mé Díos kuènténi tsaáxini
la ko jaha mé ti Rey kuènténi la ko ti nkexro tjóá
tjikosáyehe ti sin Israel.
19A̱ndá ijnko ña̱o jaha níxjehé ti sin tinkáchónki ti jaha
la tsíndáche sin:
“Jína kjuínki̱tsa janhan ijnko nkexro chrakonhña,
mé janhan kjuéyá ijnko nkexro itjen ti chjasin kuénta̱na.
20 #
1Sam. 13:14; Hch. 13:22;
1Sam. 16:12. *Kꞌuitjá David ti nkexro sitꞌána ixra̱,
la janhan kuéto̱an kui̱ki̱te sin aceite ikja chꞌan
kixin xi̱kaha kꞌuáyéhe̱ chꞌan kjuachaxin tsꞌe̱to̱an chꞌan.
21Ti tjaná nkochríxín tsjakꞌe tsjinki̱tsa David.
Ti kjuachaxin kuénta̱na mé tsjinki̱tsaxián ti jehe chꞌan.
22Tsjachahya ti sin nínkakohen ti jehe chꞌan
la ko tsjachahya ti sin nduáhya tꞌaji.
23Janhan si̱ntakꞌitjáña ti kjuachaxin kuènté ti sin nínkakohen David
la ko si̱ntaníha̱ ti sin tjinkakonhña ti jehe chꞌan.
24Jehe chꞌan mé tso̱nohe kixin janhan tjua̱ha̱ chꞌan
la ko tsjínki̱tsa chꞌan
kixin janhan si̱ntakꞌánkía ti kjuachaxin kuènté chꞌan kixin ti kjuachaxin chonta janhan.
25Janhan mé kjuánjua kjuachaxin tsꞌe̱to̱an chꞌan
ti chrínta nda̱ñao Mediterráneo la ko ti chrínta nda̱río Éufrates.
26Jehe chꞌan mé tsꞌéya̱na tsondáchro chꞌan:
Jaha mé itꞌéni
la ko Díos kuènténi.
Jaha mé tsaáxini.
27 #
Ap. 1:5. *Ko janhan Díos mé tsjánjua kjuachaxin tsꞌóna chꞌan xja̱na sa̱o.
Jehe chꞌan mé tsꞌe̱tue̱hen chꞌan ti sin rey
kuènté chjasintajni.
28Janhan nkochríxín tsꞌayakoha̱n chꞌan la ko tso̱tjua̱ha̱ chꞌan.
Ti nkehe ndátjan chꞌan la si̱ntaxiteyá janhan.
29Ti sin tsꞌaxrjeníxin chꞌan mé tsꞌe̱to̱an sin ti nonte
kuékꞌe̱to̱anxín chꞌan nkochríxín
ti na̱xa̱ itjen ti nka̱jní.
30Kjánchó ti chrókuíto̱he sin ti ley kuétua̱ha̱n sin
la ti chrókꞌuájihya sin éxi kꞌuítuehen sin
31landá ti chrókjuinchexiteyáhya sin ti ley kuénta̱na
la chrókuitekakonhña sin ti nkehe kuéto̱an janhan,
32a̱ndá ti xi̱kaha la janhan si̱ntakjasótexián sin ntasé
kixin kuítekakonhña sin la jie̱he sin,
kjuíchꞌe sin ti nkehe jínahña.
33Kjánchó tsi̱to̱a̱hya tso̱tjua̱ha David
la ko tsꞌitjáñanahña tsjínki̱tsa chꞌan.
34Tsꞌitjáñanahña ti nkehe ndátjan David
la ko si̱ntaxiteyá ti nkehe tsíndáxrja̱n.
35A̱ndá nkonaá ndátjan chꞌin David,
jína ti janhan la xitjahya sitꞌayaha.
36Méxra̱ ti nkexro tsꞌaxrjéníxian jaha nkochríxín tsꞌe̱to̱an
éxi nkochríxín itjen ti ña̱o tꞌinkaséñaxín la í tsjeje̱hya ti tꞌe̱to̱axín chꞌan nkochríxín.
37Ndoá chrókjuákꞌe ti tꞌe̱to̱an chꞌan nkochríxín
éxi ti nitjó itjen nka̱jní nkochríxín.”
38A̱ndá ti xi̱kaha tsíndáchrua la, ¿nkekuènté kui̱to̱hé ndáha
ti nkexro rey tsíkjéyá jaha Díos?
¿Nkekuènté kóninkákohén ti rey?
39Jaha kuakítsje ti kjuachaxin tsíchje̱hé ti nkexro
kjuítꞌaha ixra̱ la kjui̱nchexiteyáhya ti nkehe tsíndáche chꞌan.
Jaha kjuatsían ti corona chónta chꞌan la kjuaké nonte.
40Kꞌoxika ti tja̱tꞌo̱ tsíkꞌóna nkonda̱tjen chjasin Jerusalén,
la xi̱kaha kꞌóna nte̱je̱ ti chjasin ijié.
41Kaín chojni tꞌatsínka ti nti̱a ntiha la teé sin
ti nkehe tóxríhi̱n sin,
la kaín ti chjasin chjinaxón ntiha tjanoá sin ti rey.
42Jaha kjuínki̱tsa ti sin nínkakohen ti rey,
la jehe sin imá chéhe̱ sin kixin kjuacha sin.
43A̱ndá jaha mé kjuatsén ti tatéxin ti espada kuènté ti rey,
la í kjuínki̱tsehya chꞌan ti sákjuí chꞌan guerra.
44Jaha kuakítsjehé ti rey ti kjuachaxin kꞌuéchónta chꞌan,
ko kꞌoxítjen ti kuékꞌe̱to̱anxín ti rey ntiha.
45Kuakítsjaha̱ ti nánó chrókjuákꞌe ti rey,
ndá imá kósuéhe̱ chꞌan.
46Itꞌéni Díos,
¿xá hasta nkesá tsjakꞌèma jaha?
¿Á nkochríxín tso̱nínkaoan éxi ijnko xrohi ní?
47Itꞌéni Díos xráxinkaoan kixin ti kjuachón kjuánjua
chóntani la séhya.
Jaha la kjui̱chꞌéna ti chojni
la kjuájonhña itsjé nánó tsꞌejó sin.
48¿Xá nkexro chrókjuákꞌe chrókꞌuénhña?
¿Xá nkexro chrókuaá kixin chrókꞌuenxínhña ti kjuachaxin
kuènté ti kjuachꞌén?
49Itꞌéni Díos, ¿nkekuènté kixin jaha na̱xa̱ ti̱konoéhñani
kixin xi̱kaha ó tsíndáche David kixin tsjínki̱tsa ti jehe chꞌan?
50Itꞌéni Díos, xráxinkaoan ti sin tꞌaha ixra̱
kixin siín nchónhña chojni nínkakohen sin ti sin a la ko tjanoá sin,
mé xi̱kaha tꞌáváni la tjoté a̱séni.
51Itꞌéni Díos,
tꞌándaxín ti sin nínkakohan.
Kaín ña̱o tꞌándaxíhi̱n sin ti nkexro tsíkjéyá tsꞌóna rey.
52A̱ndá imá jína jaha, Itꞌéni Díos, nkochríxín.
Mé xi̱kaha tsoxiteyá.
Currently Selected:
Salmos 89: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
