Salmos 90
90
Xroon noóxin
(Sal. 90—106)
Díos la nkochríxín itjen la chojni la kanhñó isé tsꞌejó
Salmo kuènté Moisés
1Itꞌéni Díos, jaha mé tsaáxini
ijie la ko nkochríxín.
2Ti na̱xa̱ tꞌónahña ijna̱
la ko chjasintajni,
ndesi ósé la ko nkochríxín
la jaha mé Díos.
3A̱ndá tsꞌóna chojni inche ínaá
ti tsondáchrua: “Jahara chojni tsꞌónara inche ínaá.”
4 #
2Pe. 3:8. *Kixin ti mil nánó
la tꞌíkua̱n jaha éxi ti ijnko ña̱o ó kꞌuatsínka,
o̱ éxi iso hora ti tie kꞌuatsínka.
5Jaha titàya̱ nchekꞌitjáña chojni
éxi tsꞌátjoáko chojni ìnta̱,
o̱ éxi ijnko kotáchrin chónta chojni ó.
6Jeheni la éxi kajnto tsíkꞌánkí ti nchítjen.
Ti nchítjen tsꞌaña ti ika la tsoxró itsjo,
a̱ndá ti tso̱jín mé tsochrijin, tsoxámá la itsꞌen.
7Jeheni tsꞌitjáñaxíni ti kjuanínkaon kuèntá;
imá tóxakoheni kixin nínkaoan jaha.
8Ti ijie̱ chóntani la jaha la noha,
la ko ti ijie̱ ninkexró noehña la jaha la tꞌíkuan kaín tíha.
9Chaxín ti tso̱nínkaoan la í tsjéhya ña̱o tsꞌejóni.
Ti nánó kuènténi la tjoka tꞌatsínka éxi ijnko nkehe
chrókjuénka̱yáxini xi̱kahó.
10Ti nánó tsochónta chojni kjuachón la setenta nánó,
a̱ndá ti sin imá icha la tsjacha sin tsochónta sin ochenta nánó.
Kaín ti sin nchehnke kixin nchónhña nánó tsꞌejó sin,
la jehó kjuatjoté tsochónta sin la kjuaxróxinhña tsꞌejó sin.
A̱ndá ti nánó la tjoka tsꞌatsínka, mé kja̱xin xi̱kaha ti jeheni.
11¿Xá nkexro chrókienxín ti kjuanínkaon kuèntá?
¿Xá nkexro chrókónohe nkexrín chróchrakohan?
12Tjákohéni tsꞌekini jína ti ña̱o kuènténi,
kixin chrókjuacha a̱séni chróchónta kjuaxrexinkaon jína.
13Itꞌéni ikjan jaha ínaá, tjínki̱tsa ti jeheni;
¿Xá nkesá chrókjan jaha?
Ti̱konoéhé ti jeheni kixin tꞌahani ixra̱.
14Nchechéhéni, ti̱konoéhéni ti nchítjen
la ndá xi̱kaha chrótsjeni,
chrókóchéhe̱ni kaín ti ña̱o na̱xa̱ tsꞌejóni.
15Nchechéhéni kaín ña̱o
éxi ti nchónhña nánó kjuaxróxinhña kuékꞌejóni,
éxi ti nánó náxrjónhña kꞌuatsínkani.
16Jaha chrókjuánjua kjuachaxin
kixin ti nkexro kjuítꞌaha ixra̱ chrókꞌuikon ti ixra̱ kuèntá
la ko kja̱xin ti nkexro tsꞌaxrjeníxin sin.
17Itꞌéni Díos kuènténi, tjáko̱xián ti kjuachaxin kuèntá,
la tsjínki̱tsa ti jeheni.
Itꞌéni Díos, chrókjuinki̱tsani
kixin jína chrókóhen ti ixra̱ tjejóchꞌeni.
Currently Selected:
Salmos 90: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
