Salmos 37
37
Ti nti̱a kuènté ti sin jínahña
Salmo kuènté David
1Tónínkákonhña kixin ti chojni ixri ti nti̱a nduáhya
la ko tóchji̱no̱xiánhña ti nkehe ichꞌe ti chojni jínahña,
2kixin tjoka tsꞌitjáña sin éxi ti kayoa tꞌóchrijini,
la éxi ti kayoa tjoka tsoxámá sin.
3Méxra̱ tinkachónkia Itꞌéni Díos la ichꞌe ti nkehe jína.
Jaha jína tjakꞌe chjasintajni, la ti̱toéhya ti nkehe chaxín.
4Tócháha̱, xraxinkaoan Itꞌéni Díos
la jehe chꞌan tsjajon chꞌan kaín ti nkehe a̱ntsí tjinkaoan.
5Tjanchehé Itꞌéni Díos tsjinki̱tsa ti nti̱a tsꞌájia.
Kaín a̱sán tinkachónkia Díos,
la jehe chꞌan tsjinki̱tsa chꞌan ti jaha.
6Díos sinchekꞌinkaséña ti nkehe jína tjechꞌe
éxi ijnko xrohi,
la ti nkehe ndoá ichꞌe la éxi chonkíxin
xi̱kaha imá tsꞌinkaséña.
7Chrokjuakꞌe chrókuihín ti nkehe tsondáchro Díos
la chrókóxakuanhya kixin Díos mé tsjinki̱tsa ti jaha.
Chrókónínkákonhña kixin ichꞌe chojni ti nkehe jínahña.
8Chrokui̱to̱hé ti kjuanínkaon, chrókjui̱nchekꞌitjáña tíha.
Tónínkákonhña kixin ti tso̱nínkaoan la a̱ntsí tsꞌixin kjuanínkaon.
9Kixin ti sin tjenka̱yáxin nkehe jínahña la tsꞌitjáña sin.
A̱ndá ti nkexro titekaon Itꞌéni Díos
la tsꞌáyéhe̱ sin ti nonte tsjajon chꞌan.
10Í séhya ndá í tso̱kohya ti chojni
tjenka̱yáxin ti nkehe jínahña;
kjónté tsꞌajikjeyáni sin, la í tsꞌitjahyani sin.
11 #
Mt. 5:5. *A̱ndá ti chojni jína mé tsꞌáyéhe̱ sin
ti nonte tsjajon Itꞌéni Díos,
la ntiha tso̱chéhe̱ sin tsꞌejó sin kjuaxróxin.
12Ti chojni ixri ti nti̱a nduáhya mé tjinkaon
chrókjuíchꞌehe nkehe jínahña ti chojni jína,
la nínkaon sin la ñetaón ñeno sin.
13Ndá Itꞌéni Díos la tjano chꞌan
kixin ó ikui ti ña̱o tsꞌitjáña ti sin jínahña.
14Ti sin tjenka̱yáxin nkehe jínahña mé
ó tsíkakítsje sin ti espada
la tjakꞌeyóxin sin ti arco chónta sin
kixin sincheníhi sin ti chojni nóa
la ko ti sin chóntahya nkehe sinie
la ko tjinkaon sin tsꞌóñá sin ti chojni jína.
15Kjánchó ti espada kuènté sin ó tsꞌenxín sin,
la ti arco kuènté sin mé tsochjejin.
16Ícha jína, kjónté tsjéhya nkehe chónta ti sin jína,
a̱ndá ti itsjé nkehe chróchónta sin
ndá nduáhya tsꞌejó sin la ó chónkó tíha.
17Itꞌéni Díos mé sinchekjasóte ti chojni nduáhya ixri,
a̱ndá ti chojni jína la tsꞌayakohen chꞌan.
18Itꞌéni Díos mé nohe nkexrín tjejó ti sin jína
la tsjajon chꞌan ti nkehe tsꞌitjáñahña nkochríxín tsꞌáyéhe̱ sin.
19Kjónté itsi ti ña̱o náxrjónhña la tso̱suèhya sin,
la ti ó tso̱kjinta la tsochónta sin nkehe sinie sin.
20A̱ndá ti chojni tjenka̱yáxinhña jína la tsꞌitjáña sin,
la ko ti sin nínkakohen Itꞌéni Díos la tsoche sin
éxi kaxi tsíxámá;
la éxi ihnchi tsꞌitjáñakoá sin.
21Ti sin tjenka̱yáxin nkehe jínahña la itjen sin chichaon
la í tꞌókjanhña sin,
a̱ndá ti chojni jína la ti̱konoéhe̱ sin chojni la a̱ntsí tjajon sin.
22Kaín ti sin kjueyá kixin Díos sincheñao ti jehe sin la tsꞌáyéhe̱ sin ti nonte,
a̱ndá ti chojni nínkakohen Díos la tsꞌitjáña sin.
23Itꞌéni Díos mé tꞌe̱to̱an chꞌan nkexrín tsꞌaji ti chojni jína,
ti chaxín tꞌikon Díos kixin jína tjejó sin.
24A̱ndá ti tsꞌitsínka ti nkexro a, la tsíto̱ehya ntahó,
kixin Itꞌéni Díos tsotsé itja ti nkexro a.
25Jeheni kꞌuéndasoáni, ndá ijie ó tádani,
la kꞌuíkonhñani kixin Díos kuíto̱he ti chojni jína,
la ti sin kꞌuaxrjeníxin sin la kꞌuájihya sin kjuanchakꞌá sin nio̱tja̱ sinie sin.
26Kaín ña̱o ti sin jína la ti̱konoéhe̱ sin chojni
la nchekjen kícho sin chichaon,
a̱ndá ti xje̱en sin la Itꞌéni Díos ncheñao kja̱xin.
27Ti̱to̱hé ti nkehe jínahña la nchexiteyá ti nkehe jína,
la xi̱kaha nkochríxín kjuaxróxin tsjakꞌe.
28Kixin Itꞌéni Díos la tjue̱he ti nkexro jína
la títo̱ehya chꞌan ti jehe sin.
A̱ndá ti chojni tꞌaxrjeníxin ti sin nduáhya tjenka̱yáxin,
la tsꞌitjáña sin.
29Ti chojni jína la tsi̱to̱nhe̱n sin ti nonte,
la nkochríxín tsꞌejó sin ntiha.
30Ti chojni jína mé nixja kjuaxrexinkaon jína,
la ti nkehe nixja sin mé ijnko nkehe ndoá.
31Ti nkehe tsíkꞌe̱to̱an Díos
mé itjen a̱sén ti nkexro jína;
méxra̱ tsoxrátóxinhña ti to̱té sin.
32Ti chojni tjenka̱yáxin nkehe jínahña
mé xritsàya ti chojni jína
kixin tjinkaon sin chrókꞌóñá sin.
33Kjánchó Itꞌéni Díos mé tsíto̱ehya
kixin tsꞌánótje̱ñá sin itja ti sin jínahña,
la ko tsíto̱ehya Díos kixin ti sin jínahña
sinchekjasóte ti sin jína.
34Jaha chrókjuíkosáyehé Díos
la chrókuitekákohén chꞌan
a̱ndá Díos mé tsi̱konoáha la sintaki̱to̱nhan chꞌan ti nonte
la tsꞌikuan ti ó tsꞌitjáña ti sin ixri ti nti̱a nduáhya.
35Kꞌuikoni ti chojni tjenka̱yáxin ti nkehe jínahña
la imá nchehnke sin
la sítinkákꞌánkí sin éxi chaon inta yoa.
36Kjánchó sákjuí sin la í kohya sin,
sákjuikjeyáni sin la í kꞌuitjahyani sin.
37Tsjehé nkexrín tjejó ti chojni jína,
kixin chrꞌéxi̱n la náxrjón tsꞌejó sin.
38A̱ndá ti chojni ixri ti nti̱a nduáhya
mé kaín sin tsꞌitjáña sin.
Ti ó tsjixraká ti ña̱o la Díos sinchekꞌitjáña ti jehe sin.
39Itꞌéni Díos mé sinchekaá ti chojni jína
la tsjinki̱tsa chꞌan sin ti ó tsochónta sin kjuaxikaon.
40Itꞌéni Díos mé tsjinki̱tsa ti sin jína
la ko sinchekaá chꞌan sin kixin tsjachahya ti sin jínahña tsjachròe ti jehe sin,
kixin ti sin jína mé tinkáchónki sin Díos.
Currently Selected:
Salmos 37: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
