Salmos 38
38
Jaha Díos tsjinki̱tsani
Salmo kuènté David
1Itꞌéni Díos, tónínkákuénhñani.
Nchekjasótexínhñani ti kjuanínkaon kuèntá.
2Ti flecha kuèntá la ó tsíkjiatꞌóni
la ko ti itjá tsíkji̱nchekjasótexiáni.
3Kuenté nto̱eni la níhi kixin nínkaoan,
la kjuaxróxinhña itjeni kixin tjoté ti huéso̱eni
kixin ti ijie̱ chóntani.
4Ti ijie̱ chóntani mé tjasótexíni.
Tíha la éxi ijnko nkehe iye tsjachahyani tsamáni.
5Ti tsíchritꞌo̱ ti nto̱eni la tinkáchrꞌenka la tinkákókaxra
kixin ti nkehe jínahña kjuíchꞌeni.
6Kaín ti ña̱o xritjakꞌeni la imá tꞌáváni
la tinkáni̱ani kixin ti ijie̱ chóntani.
7Ntachꞌuéni la éxi xrohi síchrꞌákjen
la tsjachahyani tjotéténi kixin kuenté ti nto̱eni la níhi.
8Kuenté ti nto̱eni la éxi tsíkótsinká, í chóntahyani fuerza.
La itsen tꞌéyani kixin ti kjuaxikaon chónta ti a̱séni.
9Itꞌéni Díos, jaha la ó noha kaín ti nkehe tjenka̱yáxini.
Ti nkehe tjinkaoni la jehya imó kixin jaha la ó noha.
10A̱séni la imá chrika kixin í chóntahya fuerza.
La hasta í tꞌikonxínhñani jína ti ikoni.
11Ti sin chóxini la ko ti sin itjoni jína
mé kuíto̱he sin ti jeheni;
ti chojni kjéhyani la kókjín sin
kixin ti ichin chóntani.
12Ti sin xritjeyá ti jeheni tjinkaon sin tsꞌóñá sin ti jeheni,
la tjasin sin nkehe tsꞌenxíni.
Kaín ña̱o nixja sin nkehe jínahña,
la nkochríxín tjenka̱yáxin sin sichꞌe sin ti nkehe jínahña.
13A̱ndá jeheni la éxi ijnko chojni tienhña,
la ko éxi ijnko chojni nósin itjeni.
14Jeheni mé éxi ijnko chojni tienhña
la ko éxi ijnko chojni xitjahya nixja
kixin kjuáte̱hyani ti nkehe ichro sin.
15Jeheni mé tjechóheni ti jaha,
Itꞌéni Díos, tjínki̱tsani.
Jaha, Díos kuènténi, tjáte̱hé.
16Nkoko̱a nkehe tjáncháhá Itꞌéni
kixin chrókjuanoáhña sin ti jeheni,
la ti chrókꞌuitsínkani la chrókóchèhya sin.
17Chaxín a̱ntsíkoá ndá chrókꞌuitsínkani
kixin ti kjuatjoté la nkochríxín chóntani.
18Méxra̱ ijie tsochenkani Díos ti ijie̱ chóntani
kixin kjuaxróxinhña itjeni
kixin ti nkehe jínahña kjuíchꞌeni.
19Ti sin nínkaon la sítinkákótsjé sin,
la nchónhña ijie̱ tꞌeka sin ti jeheni.
20Ti nkehe jína kjuíchꞌeheni sin, la jehe sin kjuíchꞌehe sin
ijnko nkehe jínahña ti jeheni.
Nínkakohen sin ti jeheni kixin tjeyáni ti nkehe jína sichꞌeni.
21Itꞌéni Díos, ti̱to̱éhyani jehóni;
Díos kuènténi, ti̱to̱éhyani ikjín.
22Tjoka xrákia, tjínki̱tsani,
jaha mé ti nkexro tsaáxini.
Currently Selected:
Salmos 38: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
