Salmos 107
107
Xroon nꞌóxin
(Sal. 107—150)
Díos tjinki̱tsa ti sin tꞌává
1 #
1Cr. 16:34; 2Cr. 5:13; 7:3; Esd. 3:11; Sal. 100:5; 106:1; 118:1; 136:1; Jer. 33:11. *Tsochjéheni kjuasáya Itꞌéni Díos
kixin jehe chꞌan la imá jína chꞌan.
Nkochríxín imá tjue̱he Díos ti jeheni.
2Ti sin kuaá chróchenka íso chojni ti nkehe kjuíchꞌe Itꞌéni Díos
kixin ti sin a la kjuínchekaá chꞌan ndá kjuachahya ti kjuachaxin kuènté ti sin nínkaon.
3Itꞌéni Díos kjuínchenkotsé ti sin
tsíkji̱xi̱n nkuíxín chjasintajni,
ti tji̱to̱nxin ña̱o la ko ti tjiatóxin ña̱o, ti norte la ko ti sur.
4Mé kuékꞌajichròe sin ti nte̱je̱ la kꞌuitjahya sin nijnko nti̱a
la kꞌuitjahya sin nijnko chjasin chrókꞌuejó sin.
5Kꞌuénxin sin kjinta la ko kꞌuénxin sin ìnta̱
la kꞌuejó sin éxi chrókꞌuen sin.
6A̱ndá chrónoéhe̱ sin Díos kixin tꞌává sin
la Díos kjuínki̱tsa chꞌan ti jehe sin
la kjua̱tse̱n chꞌan ti kjuatꞌává chónta sin.
7Kjuajon Díos ijnko nti̱a jína
kixin tsjiji sin ijnko chjasin ijié tsꞌejó sin.
8Chrochje̱héra kjuasáya Itꞌéni Díos
kixin imá tjue̱he chꞌan ti jeheni
la ko tja̱ko̱xi̱n chꞌan itsjé kjuaxroan ijié
kixin xi̱kaha tjinki̱tsa chꞌan chojni.
9Kixin Díos mé tjajon chꞌan nkehe itsꞌi
ti chojni tꞌenxín ìnta̱
la ko tjajon chꞌan nkehe sinie ti chojni
tꞌenxín kjinta la tókje̱he sin.
10Iso ti sin kꞌuaxrjeníxini la kuékꞌéjó sin ti sítie.
Kꞌuejóchjina sin la kꞌuává sin kꞌuejóchroèxin sin cadena.
11Xi̱kaha kóhen sin kixin kuítekakonhña sin
ti nkehe tsíndáchro Díos itjen nkaya nka̱jní,
la ko kuítekakonhña sin ti nkehe tsíkꞌe̱to̱an chꞌan.
12Mé xi̱kaha Díos kjuajon kjuachaxin
kixin itsjé ixra̱ chrókuítuehen sin,
la í kjuínki̱tsahya chꞌan ti jehe sin.
13A̱ndá chrónoéhe̱ sin Díos kixin kꞌuává sin
la jehe chꞌan kjuínki̱tsa chꞌan ti jehe sin
la kjua̱tse̱n chꞌan ti kjuatꞌává chónta sin.
14Díos mé kuakitsjexín ti jehe sin ti sítie
la kꞌóchríjin chꞌan ti cadena kꞌuejóchroèxin sin.
15Méxra̱ chróchjéheni kjuasáya Itꞌéni Díos
kixin imá tjue̱he chꞌan ti jeheni
la ko tja̱ko̱xi̱n chꞌan itsjé kjuaxroan ijié,
kixin tjinki̱tsa chꞌan chojni.
16Díos mé kjuínchekuen ti puerta chika
la ko kjuínchekuen chꞌan ti chika tꞌikjèxín ndo̱echjiso.
17A̱ndá ti iji̱é sin mé kóníexín sin
la í nduáhya kjuénka̱yáxin sin
la imá kjuasóte sin kixin ti ijie̱ kjuasin sin.
18La ninkehó nkehe xrokjuahya kjónie sin
kixin ó chjina itsꞌen sin.
19Imá kꞌuává sin ndá chrónoéhe̱ sin Itꞌéni Díos
landá jehe chꞌan kjuínki̱tsa chꞌan sin
la kjua̱tse̱n chꞌan ti kjuatꞌává kꞌuéchónta sin.
20A̱ndá níxjó Díos la kuito̱he sin jína
la sákjuíhya sin ti siín kjuachꞌén.
21Chrochjéheni kjuasáya Itꞌéni Díos
kixin imá tjue̱he chꞌan ti jeheni
la ko tja̱ko̱xi̱n chꞌan itsjé kjuaxroan ijié
kixin tjinki̱tsa chꞌan chojni.
22Tjikosayehéra Díos,
tocháha̱ra chro̱nkara ti ixra̱ kjuíchꞌe chꞌan.
23Ti sin xriko ntabarco chritaón nda̱ñao
kjuíchꞌéna sin nti̱a kixin sátsjikꞌe̱na sin nkehe.
24Jehe sin mé kꞌuíkon sin ti ixra̱ kuènté Itꞌéni Díos
la ko ti kjuaxroan ijié chritaón nda̱ñao.
25Níxja Díos, a̱ndá
imá tji̱a̱n chjéhe xri̱nto̱ la síchriká nda̱ñao.
26Ti ntabarco chrìin noi
la ko xíkjan kꞌuitsínkankí ìnta̱.
A̱ndá imá chrakon ti sin kꞌuejó ntiha.
27Síxrànka̱ sin tinkántákán sin éxi tsékoan sin,
la í chóntahya sin kjuaxrexinkaon jína.
28Ndá chrónoéhe̱ sin Díos kixin kꞌuejó sin kjuaxikaon
la Díos kjuínki̱tsa
la kjua̱tse̱n chꞌan ti kjuatꞌává chónta sin,
29la kꞌuíxitá ti imá tji̱a̱n chjéhe xri̱nto̱,
la ko ti síchriká ìnta̱ la kꞌuíxitá.
30A̱ndá tuénxín kóchéhe̱ sin
kixin kꞌuíxitá la í síchrikáhya ti ìnta̱.
A̱ndá xi̱kaha kjuínki̱tsa Díos ti jehe sin
kixin sátsji sin ti tjinkaon sin tsjiji sin.
31Chrochjéheni kjuasáya Itꞌéni Díos
kixin imá tjue̱he chꞌan ti jeheni
la ko tja̱ko̱xi̱n chꞌan itsjé kjuaxroan ijié
kixin tjinki̱tsa chꞌan chojni.
32Chrokjuíkosáyehéra Díos ti siín chojni tsíkónkotsé.
Chrokjuíkosáyehéra Itꞌéni Díos
ti tsíkónkotsé ti sin titaón nti̱a kuènté ni̱nko.
33Itꞌéni Díos kjuíchꞌéna chꞌan nte̱je̱
ti nda̱río la ko ti tꞌaxrje ìnta̱.
34A̱ndá ti inche jína la kꞌóna inche xíjnta
kixin ti ijie̱ kuènté ti sin siín ti nonte a.
35Ti nte̱je̱ xámá la kjuíchꞌéna chꞌan nonte tjiá ìnta̱
la ko ti nonte xámá la kꞌue̱to̱an chꞌan tsꞌaxrje ìnta̱.
36A̱ndá ntiha kꞌuejó ti sin kꞌuéchóntahya nkehe sinie
kixin sichꞌéna sin chjasén sin ntiha.
37A̱ndá ti nonte ntiha la kjue̱nka̱xin sin inta to uva
la jína kꞌónehe sin.
38Mé xi̱kaha Díos kjuíncheñao chꞌan ti jehe sin
la kótsjé sin la ko kótsjé ti iko chónta sin.
39Kjánchó imá kjuasóte sin kixin ti íso nación kjuajo̱nko sin
la ikꞌuén itsjé sin la í tsjéhya sin kuíto̱he.
40Kjánchó Díos la kjuínchekjasóte ti sin jínahña kuékꞌe̱to̱an
la kjuajon chꞌan kjuachaxin nte̱je̱ ó
tsꞌaji sin ti kohya nti̱a.
41A̱ndá ti chojni nóa la kjua̱tse̱n Díos
ti kjuatꞌává kꞌuéchónta sin,
la kjuajon chꞌan kjuachaxin kixin nchónhña ixjan
tsochónta sin éxi ti itsjé kolélo chónta sin.
42Ti chojni jína la tsꞌikon sin tíhi la tso̱chéhe̱ sin.
A̱ndá ti chojni nduáhya ixri la tsotání sin,
tsonixjahya sin ninkehó.
43Ti nkexro nohe la chrókuihin
la ko chrókienxín ti nkehe ndáxrja̱n
la chrókjuénka̱yáxin sin nkexrín tjue̱he Díos chojni.
Currently Selected:
Salmos 107: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
