Salmos 106
106
Ti sin israelita la kuítekakonhña sin
1 #
1Cr. 16:34; 2Cr. 5:13; 7:3; Esd. 3:11; Sal. 100:5; 107:1; 118:1; 136:1; Jer. 33:11. *Chrokjuíkosáyehéra Itꞌéni Díos.
Chrokjuíkosáyehéra Díos kixin imá jína chꞌan
kixin nkochríxín ti̱konoéhe̱ chꞌan chojni.
2¿Xá nkexro chrókjuacha chróchronkaxín
ti kjuaxroan kjua̱ko̱xi̱n Díos?
¿Xá nkexro chrókjuacha chrókjuajon ti kjuasáya chrókꞌuáyéhe̱ Díos?
3Náxrjón tjejó ti sin tjenka̱yáxin ti nkehe jína
la ko nkochríxín jína tjejó sin.
4Jaha Itꞌéni Díos, xráxinkaoan ti jeheni
ti ó ncheñaoan ti sin chjasin kuèntá,
ti ó chrókꞌuinka jaha chrókjui̱nchekaáni.
5Tjánjua kjuachaxin kixin tsotjahani kjuasáya
ti tjejó kaín ti sin tsíkjéyá jaha tjiko̱sáyaha sin,
mé xi̱kaha chrókóchéhe̱ni kixin chéhe̱ ti sin kuèntá.
6Kjuasini ijie̱ éxi kjuíchꞌe ti itꞌéni la ko tꞌáchri̱ini,
la nduáhya kjuíchꞌeni kixin kjuénka̱yáxini nkehe jínahña.
7 #
Ex. 14:10-12. *Ti sin kꞌuaxrjeníxini kꞌuejó sin Egipto
la kuáhya sin kuentá ti kjuaxroan imá ijié tsíkjáko̱xián.
Tsíkꞌitjáñehen sin kixin imá kꞌuétjue̱hé sin.
A̱ndá chjinaxón Nda̱ñao kjátse
la kónínkaon sin, kuitekakuenhña sin ti jaha.
8Kjánchó jaha kjui̱nchekaá ti jehe sin
kixin tjue̱hé sin
la tjinkaoan tsjáko̱xian ti kjuachaxin kuèntá.
9 #
Ex. 14:21-31. *Jaha kuétue̱hén ti Nda̱ñao kjátse
kixin tsꞌóna nti̱a nko̱siñe
kixin jína tsꞌatsínkaxín sin ti tsa̱ka ni̱nka ntiha
éxi chrókꞌuatsínka sin ijnko nte̱je̱.
10Mé xi̱kaha kuakítsjexián sin ti kꞌuejó ti sin
kꞌuénínkakohen ti jehe sin,
la ko xi̱kaha kjui̱nchekaá ti sin kꞌuékjasóte.
11Ndá kꞌuátjoá ti sin kꞌuénínkakohen ti jehe sin,
la nijnko ti sin kꞌuékónínkaon kuaáhya sin.
12 #
Ex. 15:1-21. *A̱ndá ti sin kuaá, kuitekaon sin ti nkehe tsíndáchro Díos
la itsje sin kjuíkosáyehe sin Díos.
13Kjánchó imá tjoka kꞌuitjáñehen sin ti ixra̱ kjuíchꞌe Díos.
Chuénhña sin tso̱nohe sin nkehe tjinkaon Díos
la ko kuítekakonhña sin ti nkehe kꞌue̱to̱an chꞌan.
14 #
Nm. 11:4-34. *A̱ndá ti nte̱je̱ ntiha mé kjuanchia sin
kixin tsja̱ko̱xi̱n Díos
kixin á chaxín tsjajon chꞌan ti nkehe tjinkaon sin.
15La Díos kjuajon ti nkehe kjuanchia sin
la ko kja̱xin ichrꞌán chꞌan ijnko ichin
chrókjuacha chrókꞌuitjáñaxín sin.
16 #
Nm. 16:1-35. *Ti kuékꞌejó sin ntiha la kónínkakohen sin chꞌin Moisés
la ko kja̱xin kónínkakohen sin chꞌin Aarón,
mé ti nkexro tsíkjeyá Itꞌéni Díos tsꞌóna ncha̱tꞌá.
17Ndá xitje̱he̱ ti nonte la kꞌuìnka̱ chꞌin Datán
la ko kja̱xin kꞌuìnka̱ ti sin kuékꞌajiko chꞌin Abiram.
18Kja̱xin ikui xrohi chexín ti sin kjuénka̱yáxin ti nkehe jínahña,
la ko xrohi ñeñe chexín kaín sin.
19 #
Ex. 32:1-14. *A̱ndá chritaón ti ijna̱ Horeb
mé kjuíchꞌéna sin ijnko koxintáxjan,
mé ijnko nkehe tsíkjano̱ña tsíkꞌóna oro
ndá kjuíkosáyehe sin tíha.
20Mé xi̱kaha kuíto̱he sin ti Díos chónta kjuachaxin,
a̱ndá kjuíchꞌéna sin ijnko koxinta inie kayoa la tíha kjuíkosáyehe sin.
21Mé xi̱kaha kꞌuitjáñehen sin ti Díos tsaáxin sin,
la ko ti itsjé kjuaxroan kjua̱ko̱xi̱n Díos ti chjasin Egipto,
22la ko ti kjuaxroan ijié tsíkjasinxín chꞌan
ti chjasin kuènté Cam
la ko ti nkehe tsíkóhen ti Nda̱ñao Kjátse.
23Méxra̱ Díos ndáchro kixin chrókjuinchekꞌitjáña chꞌan ti sin a.
A̱ndá chꞌin Moisés, ti nkexro tsíkjéyá Díos, la chrónòa chꞌan
ndá kóntá ti kjuanínkaon kuènté Díos
la kjuínchekjasótehya Díos ti jehe sin.
24 #
Nm. 14:1-35. *A̱ndá chrꞌéxi̱n chrohya sin tsꞌixehen sin ti nonte náxrjón
kixin kuítekakonhña sin ti tsíndáchro Díos kixin tsjajon chꞌan tíha.
25Nkaxehen ti ndo̱e sin kꞌuándaxíhi̱n sin Itꞌéni Díos,
la ko kuítekakonhña sin ti nkehe kꞌue̱to̱an chꞌan.
26A̱ndá Díos la kónínkaon chꞌan
la ndáchro chꞌan kixin nte̱je̱ ó tsꞌenxín sin
27 #
Lv. 26:33. *la ko kja̱xin itsꞌen ti sin tsꞌaxrjeníxin sin
la ko tsoxika sin sátsji sin ti nación ti tjejó ti sin tinkáchónkihya Díos.
28 #
Nm. 25:1-13. *Ndá kjuankíxin kuinkáchónki sin
ti nkehe tsíkjano̱ña Baal chritaón ti ijna̱ Peor
la ko kjónie sin ti nkehe kjo̱ke̱he̱ sin
ti díos chóntahya kjuachón.
29Ti nkehe jínahña kjuíchꞌe sin
kjuínchekónínkaon sin Díos,
Ndá ichrꞌán Díos ijnko ichin la kóníhi sin.
30A̱ndá ti chꞌin Finees kꞌuínkatjen
la kꞌóñá chꞌan ti sin chónta ijie̱
a̱ndá ti ichin la kjuìin, sákjuí.
31Ndá kꞌuíkon Díos kixin jína kjuíchꞌe ti nkexro a
la xi̱kaha kaín chojni nkochríxín tsoxraxinkaon
kixin jína kjuíchꞌe ti chꞌin Finees.
32 #
Nm. 20:2-13. *Ndá kja̱xin kjuínchekónínkaon sin Díos
chjinaxón ti ìnta̱ Meriba
la kjuaxróxinhña kjuákꞌe chꞌin Moisés kixin ti iji̱é ti sin israelita.
33Kjuínchekꞌává sin chꞌin Moisés
ndá chji̱ñé níxja chꞌan.
34 #
Jue. 2:1-3; 3:5, 6. *Landá ti sin israelita la kjuínchekꞌitjáñahña sin ti chjasin
kꞌue̱to̱an Itꞌéni Díos
kixin chrókjuinchekꞌitjáña sin.
35A̱ndá kjónté kꞌuíto sin ti sin tjejó ti chjasin kuítekakonhña Díos
ndá kꞌuitja sin nkexrín tjenka̱yáxin ti sin a
36la kjuankíxin tinkáchónki sin ti nkehe tsíkjano̱ña
la kuíto̱he sin Díos kuènté sin.
37 #
2Rs. 17:17. *Kjuajon sin ti xje̱en sin ndoa
la ko ti xje̱en sin ichjin kixin itsꞌen la tsꞌáyéhe̱ ti jínahña.
38 #
Nm. 35:33. *Kꞌuikjajin sin ijni̱é chájan na̱xa̱ chóntahya ijie̱,
chjéhe sin ti díos kuènté Canaán,
a̱ndá ti ijni̱ la kókji̱ta̱xin ti nonte.
39Mé xi̱kaha kjuasixín sin ijie̱,
kixin kaín nkehe jínahña kjuíchꞌe sin.
40 #
Jue. 2:14-18. *A̱ndá Itꞌéni Díos kónínkakohen
ti chjasin kuènté chꞌan,
la kóxríe̱nhña chꞌan ti jehe sin kjónté sin chjasén chꞌan.
41Kuíto̱he Díos ti jehe sin kixin
sátsjiko ti sin tinkáchónkihya Díos.
A̱ndá ti sin kónínkakohen ti sin a la kjuacha sin kꞌue̱tue̱hen sin.
42A̱ndá ti sin kꞌuénínkaon la
kjuacha sin kuakitsjehe sin ti kjuachaxin kuènté ti sin israelita.
43Díos la kjuínki̱tsa sin nkoya̱xón,
kjánchó jehe sin la kjuénka̱yáxinhña sin jína,
la na̱xa̱ kjuasin sin ijie̱.
44A̱ndá ti ó kꞌuíkon Díos kixin tꞌává sin
la kuíhin chꞌan kixin tꞌéya sin,
45ndá xráxinkaon chꞌan ti nkehe tsíndáche chꞌan sin,
ndá kuíto̱he chꞌan ti kónínkakohen chꞌan sin
kixin imá tjue̱he chꞌan ti jehe sin.
46A̱ndá kjónté ti sin kꞌuékónínkakohen ti jehe sin
la ikjan sin kotjue̱he sin ti chojni a.
47 #
1Cr. 16:35, 36. *Nchekaáni, jaha Itꞌéni Díos kuènténi.
Tjínki̱tsa ti jeheni tjejóni ti chjasin ókjé
kixin chrókjani nkoko̱a chrókꞌuejóni
chrókuinkáchónkini ti ihni̱á imá tjóá
la ko chrókóchéhe̱ni chrókjuikosáyeheni ti jaha.
48Nkochríxín tsjikosáyeheni ti jaha,
Itꞌéni Díos kuènté ti sin Israel.
Kaín chojni tsondáchro kixin mé xi̱kaha tso̱hen.
¡Tsjikosáyeheni jaha Itꞌéni Díos!
Currently Selected:
Salmos 106: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
