Salmos 104
104
Díos kjuíchꞌéna chꞌan kaín nkehe siín
1Kaín a̱séni tsjikosáyahani, jaha Itꞌéni Díos.
Ti kjuachaxin kuèntá la imá ijié,
tꞌinkaséñaxín nkonda̱tjen ti jaha.
2Kuenté nkonda̱tjen jaha tꞌinkaséñaxín ijnko xrohi
la jaha kjuéndoá ti nka̱jní éxi ijnko ika manta.
3Chrítaón ti itji̱ tjiá ìnta̱, jaha kjui̱chꞌéna ti ndo̱a.
A̱ndá ti itji̱ la kjui̱chꞌéna éxi carreta kuèntá, la ko jaha xritaoan ti xri̱nto̱ a.
4 #
He. 1:7. *Ti xri̱nto̱ la ichꞌe ti ixra̱ kuèntá
la ko ti xroiñeñe la tꞌaha ixra̱.
5Kjuaké ti xránkíxixín chjasintajni
kixin tsꞌinkihya.
6A̱ndá ti nda̱ñao imá ni̱nka la kjua̱vá ti inche éxi ijnko ika kꞌuinka̱ya,
mé ti ìnta̱ la kuíkja̱jian ti chritaón ijna̱.
7Jaha kuétue̱hén ti ìnta̱ ndá tjoka sákjuí;
ti ìnta̱ kuíhin éxi kjónta ti níxja jaha la tuénxín sákjuí.
8Chrìin ti ìnta̱ chritaón ti ijna̱ ndá kꞌuinkajin chritaón ti nonte yóxin,
a̱ndá sákjuí ti ìnta̱ ti tsíkétue̱hén jaha.
9Jaha kuétue̱hén ti ìnta̱ nketí chrókuikia
kixin í tsokjanhña ti chritaón ti chjasintajni ínaá.
10Jaha kuétue̱hén ti ìnta̱ tꞌaxrje
kixin tso̱kaónxin kaín ti nda̱río tsꞌatsínka ti ijna̱.
11Ti ìnta̱ i mé itsꞌi ti iko jie̱he siín nte̱je̱
la ko itsꞌi ti kolócho siín nte̱je̱ kixin tsꞌenxínhña va nta̱.
12Ti chrínta nda̱río siín inta tsꞌixité koxroxe
la tsotsje va chríkꞌá ti inta yoa a.
13Jaha mé nchekꞌaniá ichrin chritaón ti ijna̱
ndesi ti itjen jaha ti nka̱jní noi.
Ti ìnta̱ ichrꞌan jaha tsꞌónaxín kaín nkehe ti nonte a.
14Jaha kjui̱nchekꞌánkiá ti kaxi kixin sinie ti iko
la ko kja̱xin nchekꞌánkiá ti nkehe tꞌe̱nka̱ chojni
kixin tsꞌóna nkehe sinie sin,
15mé ti nio̱tja̱ la tjejóchónxin chojni
la ko ti vino nchechéhe̱ chojni
la ti aceite nchetjaki̱ni chojni.
16Ti inta yoa la ko ti inta cedro siín ti ijna̱ Líbano
tsíkjénka̱xian jaha mé tꞌáyéhe̱ yeé ìnta̱.
17A̱ndá chríkꞌá ti inta yoa ntiha chꞌéna ti koxroxe ka̱ké.
A̱ndá ti ntachicha la ntiha tjejó ti kocigüeña.
18Ti ijna̱ noi la mé xrinie ti kotèntso̱ nte̱je̱.
Ti itjo̱ ntiha tꞌóna tòyé kolótse̱n.
19Jaha Díos kjui̱chꞌéna ti nitjó kixin tsochronkaxín nkekja̱ín ña̱o siín,
la ko kjuákohé ti ña̱o nkehora tsjiátaón.
20A̱ndá ti tsjiátaón ña̱o la itsi ti sítie
la tsꞌaxrje kaín ti iko siín nte̱je̱.
21A̱ndá ti koxra̱ la tójna̱ va xritjeyá va nkehe sinie va,
la ko tjanchehe va Díos kixin tsjajon nkehe chrókjonie va.
22A̱ndá ti ó tsji̱to̱n ña̱o la
sátsjikꞌixehen va ti itjue̱é va ínaá.
23A̱ndá ti tꞌinkaséña la ti chojni sátsjikjichꞌe ixra̱,
a̱ndá ti tso̱jín xíkjan sin ínaá tso̱kꞌéhe sin.
24Nchónhña nkehe tsíkji̱chꞌéna, jaha Itꞌéni Díos;
tsíkji̱chꞌéna kaín nkehe kixin imá noha;
nkuíxín chjasintajni siín ti nkehe tsíkji̱chꞌéna, jaha Díos.
25Ntiha mé itjen ti nda̱ñao imá iton la ko ijié.
Ntiha siín nchónhña iko la xitjahya chrókꞌuekini va,
iko ijié la ko iko ntsíntsí siín.
26 #
Job 41:1; Sal. 74:14; Is. 27:1. *Ntiha ixri ti ntabarco la ko ntiha ikjí ti iko
imá ijié itꞌin Leviatán.
Jaha kjui̱chꞌéna tíha kixin tsotsítànkí ti nda̱ñao.
27Kaín va síchóhen va
kixin jaha chróchje̱hé va nkehe sinie va ti ó tsixraká ti hora.
28Jaha tjánjua nkehe sinie va la jehe va takja va.
Jaha tjánjua itsjé nkehe kixin tso̱kje̱he va jína.
29A̱ndá ti chrókjuínki̱tsehya va la tsochrakon va,
la ko ti tsakítsjehé ti ncha̱kuén va
la itsꞌen va, tsꞌóna va inche ínaá.
30A̱ndá jaha ichrꞌan ti Ncha̱kuán
la tꞌáyéhe̱ kjuachón kaín nkehe siín chjasintajni.
31Ti kjuachaxin kuèntá jaha Itꞌéni Díos, mé itjen nkochríxín
la ko jaha mé cháha kixin ti nkehe tsíkji̱chꞌéna.
32A̱ndá ti tsokomá jaha ti chjasintajni la síxrànka̱ tíha
la ti tsotsé jaha ti ijna̱ ndá sítꞌaxrje ihnchi.
33Ti na̱xa̱ tjechóni la tsotsjeni himno kuèntá, Itꞌéni Díos,
tsotsjeni tsjikosáyahani hasta ti ña̱o itsꞌeni.
34Tjinkaoni kixin jaha Itꞌéni Díos
chrókóxríhan ti nkehe tjenka̱yáxini
kixin jahuá Díos mé kꞌuitjaxíni kaín ti kjuachéhe̱.
35Chrokꞌuen ti chojni siín chjasintajni chónta ijie̱,
chrókꞌuejóhya ti sin tjenka̱yáxin nkehe jínahña.
A̱ndá jeheni la kaín a̱séni chrókjuikosáyexiáni, Itꞌéni Díos.
Mé xi̱kaha chrókjuikosáyeheni ti jaha Itꞌéni.
Currently Selected:
Salmos 104: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
