Salmos 103
103
Tja̱ha̱ Díos kjuasáya kixin imá kjuíncheñao chꞌan ti jeheni
Salmo kuènté David
1Kaín a̱séni chrókjuikosáyeheni Itꞌéni Díos.
Chrokjuikosáyexíni ti ihni̱é chꞌan.
2Kaín a̱séni chrókjuikosáyeheni Itꞌéni Díos.
Chrokꞌuitjáñehñani ninkehó ti ixra̱
kjuíchꞌe chꞌan kixin kjuínki̱tsa chꞌan ti jeheni.
3Kixin Díos mé tꞌóxika kaín ti ijie̱ tjasini,
la ko tsja̱tse̱n chꞌan kaín ti kjuatjoté chóntani.
4Díos mé sinchekaá a̱séni
kixin chrókꞌuitsínkayáhyani ti tòye̱ chrókꞌuenxíni.
Kjuasáye Díos kixin tjue̱he chꞌan ti jeheni la ko kui̱konoéhe̱ chꞌan ti jeheni.
5Díos la kaín nkehe jína kjuajon chꞌan.
Jehe chꞌan tjajon chꞌan fuerza ni̱xin tsochóntani
éxi ti fuerza chónta ti kotjua̱nhnko.
6Díos mé jína sinchekito̱exín
ijie̱ la ko tsjinki̱tsa kaín ti sin tjejótjasóte.
7Jehe chꞌan mé kjua̱ko̱he̱ chꞌan Moisés ti nti̱a kuènté chꞌan
la ko kjua̱ko̱he̱ chꞌan ti xje̱en Israel ti ixra̱ kuènté chꞌan.
8 #
Stg. 5:11. *Itꞌéni Díos la imá jína la ko ti̱konoéhe̱ chꞌan chojni.
Tjokahya tónínkaon Díos, imá tjue̱he chꞌan kaín chojni.
9Jehya nkoya̱xón tjenduéhe Díos ti jeheni
la ko jehya nkochríxín tso̱nínkakohen chꞌan ti jeheni.
10Kjuínchekjasótehya Díos ti jeheni kixin ti ijie̱
kjuasini chrókjuasótexíni.
11Éxi ti noixín ti nka̱jní xi̱kaha
tjue̱he Díos ti sin tjikosáyehe ti jehe chꞌan.
12Éxi kjínxi̱n ti tji̱to̱xi̱n ña̱o la ko ti tjiatóxin ña̱o
mé xi̱kaha ti kjínxi̱n kuíto̱he Díos ti ijie̱ kjuasini.
13Éxi ijnko itꞌé xjan ti̱konoéhe̱ ti xje̱en
mé xi̱kaha Itꞌéni Díos la ti̱konoéhe̱
ti sin tjikosáyehe ti jehe chꞌan.
14Kixin Díos nohe nkehe tsíkꞌónaxíni,
la ó nohe chꞌan kixin inche tsíkꞌónaxíni.
15Ti ña̱o tsjakꞌe ijnko chojni la éxi ti kayoa ó.
Jeheni tꞌánkíni éxi katsjo siín nonte tsoxró itsjo,
16a̱ndá ti ó tsꞌatsínka ti xri̱nto̱ ndá tsꞌitjáña,
la í tso̱noxínhña nketí kjuákꞌe ti itsjo.
17A̱ndá Itꞌéni Díos la nkochríxín tso̱tjue̱he kaín ti sin
tjikosáyehe ti jehe chꞌan
la ko tsjinki̱tsa chꞌan ti sin tsꞌaxrjeníxin ti jehe sin la ko ti xje̱en sin,
18mé ti sin tjikosáyehe ti nkehe tsíndáchro chꞌan
la ko ti sin xráxinkaon ti nkehe
tsíkꞌe̱to̱an chꞌan la nchexiteyá sin tíha.
19Díos itjen nka̱jní,
la ntiha tꞌe̱to̱an chꞌan.
Jehe chꞌan mé Ìnché kaín ti nkehe siín.
20Jahara sin ángel chontara kjuachaxin
la ko nchexiteyéhéra nkojnko ti nkehe tꞌe̱to̱an Díos,
jahara chrókjuíkosáyehéra Itꞌéni Díos.
21Kaínra sin ángel chrókjuíkosáyehéra Itꞌéni Díos.
Nchexiteyára ti nkehe tꞌe̱to̱an chꞌan.
22Kaín nkehe kjuíchꞌéna Díos chrókjuikosáyehe ti jehe chꞌan,
nkuíxín ti tꞌe̱to̱an chꞌan.
¡Kaín a̱séni chrókjuikosáyeheni Itꞌéni Díos!
Currently Selected:
Salmos 103: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
