Hebreos 9

Ti ni̱nko chjasin Jerusalén

1Ti kjuachaxin xrájon sa̱oxín mé chrónka nkexrín chróxraxinkakonxíni Díos ti ni̱nko ntihi chjasintajni. 2#Ex. 26:1-30; Ex. 25:31-40; Ex. 25:23-30.*Ti ni̱nko kjuíchꞌéna sin kꞌuékjakꞌe ósé la ti cuarto sa̱oxín mé kjuínchekꞌin sin ti cuarto Tjóá, ti kjuákꞌe ti candelero oro la ko ti mesa tjejókjen ti nio̱tja̱ kjuajon sin tsꞌáyéhe̱ Díos. 3#Ex. 26:31-33.*La itjen ijnko ika tjenkákuèxi̱n la nóton tíha mé itjen ti yaáxin cuarto kjuínchekꞌin sin ti cuarto a̱ntsí Tjóá. 4#Ex. 30:1-6; Ex. 25:10-16; Ex. 16:33; Nm. 17:8-10; Ex. 25:16; Dt. 10:3-5.*La ntiha kjuákꞌe ti altar tsíkꞌónaxín oro tjakaxín sin ti chi̱nko̱ la ko kꞌuékjakꞌe ti ntacajón tsíkjindajin oro ti itjen ti kjuachaxin kuènté Díos. Nkaxehen ti ntacajón kꞌuékjakꞌe ijnko nchísén tsíkꞌónaxín oro tjinká maná, la ko ti inta kꞌuékjixín Aarón kóyoa la kꞌuaña ntahnte̱, la ko ntiha kjuákꞌe ti ixro̱ tjenixín ti ite nkehe kꞌue̱to̱an Díos. 5#Ex. 25:18-22.*Chrítaón ti ntacajón mé kuékꞌejó yaá ángel tsíkjichꞌénaxín itja sin, mé tíha tꞌaxrjexín ti itjen kjuachaxin kuènté Díos, la ko ntiha kꞌuékjìinxín ti iji̱é chojni, kjánchó í xrokjuahya tsondáxrja̱n iso nkehe kuènté tíha ijie.

6 # Nm. 18:2-6. *Mé xi̱kaha kꞌuejó ti nkehe, la ti sin ncha̱tꞌá la kaín ña̱o tꞌixehen sin ti cuarto sa̱oxín kuènté ni̱nko kixin ti ixra̱ tjejóchꞌe sin. 7#Lv. 16:2-34.*A̱ndá ti yaáxin cuarto mé jehó ti ncha̱tꞌá tꞌe̱to̱an tꞌixehen nkoko̱a ña̱o ti nánó; la ticháxi̱n tsꞌixenko chꞌan ijni̱é iko kixin tsochronoèxín chꞌan Díos kixin tso̱tjuáxin ti iji̱é chꞌan la ko iji̱é kaín ti chojni siín ti chjasin. 8A̱ndá Ncha̱kuén Díos nchenoheni tíhi kixin ti na̱xa̱ kjuákꞌe ti cuarto sa̱oxín, la na̱xa̱ tjexránkèhya kixin chrókꞌuixehen chojni ti cuarto a̱ntsí Tjóá kixin kohya kjuachaxin. 9Kaín tíha tja̱ko̱xi̱n ijnko nkehe chrókónoexíni ijie, kixin ti nkehe chjéhe sin Díos la ko ti iko kꞌóñá sin la xrokjuahya tso̱tjuáxin ti iji̱é sin, kjónté xi̱kaha tjikosáyehe sin Díos. 10A̱ndá tíha jehó tꞌe̱to̱an kuènté ti nkehe chrókjonie sin, ti nkehe chrókꞌui sin la ko ti chrókꞌónti sin kixin chrókótjuáxin iji̱é sin; kaín tíha mé kꞌuítuehen sin kuènté ti cuerpo ó, la jehya kuènté a̱sén sin, la jehó chónta kjuachaxin ti na̱xa̱ tꞌe̱tua̱nhña Díos íjnko nkehe.

Ti nkehe kjuajon Cristo chaxín kjuíchꞌe ixra̱

11Ti ó ikui Cristo, la jehe chꞌan ti ncha̱tꞌá tꞌe̱to̱an kuènté ti nkehe a̱ntsí jína. La ti ni̱nko itjen chꞌan la a̱ntsí jína la ko a̱ntsí ndoá, tsíkꞌónaxínhña itja chojni kixin jehya chjasintajni itjen. 12Ti ó kꞌuíxehen chꞌan ti cuarto Tjóá, la jehya kjuajon chꞌan ijni̱é kotèntso̱ o̱ ijni̱é koxintáxjan. Náhí. Ijni̱é chꞌan kjuajon chꞌan, la ijnko ña̱okoá kꞌuíxehen chꞌan ntiha, la xi̱kaha kjue̱nka̱ chꞌan kixin tsochóntani ti kjuachón nkochríxín. 13#Lv. 16:15, 16; Nm. 19:9, 17-19.*Kixin ti ijni̱é koxinta la ko ijni̱é kotèntso̱ o̱ ti nteso kuènté koxintáxjan tsíchexín ti altar, ti tjasikjajin sin ti sin tjuáhya, la tíha chónta kjuachaxin tso̱tjuáxin ti chritaón ó. 14Ndá ti xi̱kaha, la a̱ntsí chónta kjuachaxin ti ijni̱é Cristo. Kixin ti kjuachaxin ncha̱kuén Díos itjen nkochríxín, la Cristo kjuajon a̱sén, ikꞌuén, kꞌuáyéhe̱ Díos, la ninkehó ijie̱ chóntahya chꞌan. La ti ijni̱é chꞌan tso̱tjuáxin ti ijie̱ kjuasini chrókꞌuenxíni, ndá jína chrókjuichꞌeheni ixra̱ ti Díos tjechón.

15Méxra̱ Cristo nixjayákohe̱n ti jeheni ti kjuachaxin ni̱xin kjuajon Díos. Mé xi̱kaha kꞌuenyákohe̱n chꞌan ti jeheni, ndá tso̱tjuáxin ti ijie̱ kjuasini kixin kjuínchexiteyáhyani ti nkehe kꞌuítueheni ósé. Kixin ti sin kꞌuéye̱he̱ Díos la jína chrókꞌuáyéhe̱ sin ti nkehe tsjeje̱hya, tsíchronka chꞌan tsjajon chꞌan. 16Kixin ti siín ijnko nkehe tsíkjin ijnko chojni na̱ntá ikꞌuén, la ticháxi̱n tso̱nohe sin á chaxín tsíkꞌen ti nkexro tsíkjin ti xroon, ndá jína tsꞌáyéhe̱ sin ti nkehe kuíto̱he chꞌan. 17Ndá ti na̱xa̱ tjetsjehe ti nkexro tsíkjin tíha la na̱xa̱ sínkíhya tíha; jehó ti ó itsꞌen chꞌan mé sínkí. 18Mé xi̱kaha ti kjuachaxin xránkíxixín kꞌue̱to̱an Díos, la kjuankíxin kjuíchꞌe ixra̱ ti ó kꞌuitjí ti ijni̱é itsjé iko. 19#Ex. 24:6-8.*Méxra̱ Moisés ti ó kjuixin kjuínchekuáxin kaín ti nkehe chónta ti ley kuíhin kaín chojni, ndá kuákja chꞌan ichjo̱én kolélo kjátse la koí iso inta hisopo, ndá kjuínchekjataxín chꞌan ìnta̱ la ko ijni̱é koxintáxjan la ko kotèntso̱, ndá kuikjajin chꞌan ti libro chónta ti ley la ko kuikjajin chꞌan kaín ti chojni chjasin. 20Ndáchro chꞌan: “Tíhi ti ijni̱ tsoxiteyáxin ti kjuachaxin kꞌue̱to̱an Díos si̱nchexiteyára.” 21#Lv. 8:15.*La xi̱kaha kuikjajin chꞌan ti ijni̱ ti ni̱nko la ko kaín ti nkehe kjuíchꞌe xra̱ nkaxehen ni̱nko. 22#Lv. 17:11.*Kixin xi̱kaha ndáchro ti ley kixin kaín nkehe la chrókótjuáxin ti ijni̱ la ko kja̱xin tso̱tjuáxin ti ijie̱; a̱ndá xitjahya chrókótjóá ti ijie̱ ti chrókꞌuitjíhya ti ijni̱.

Ti ikꞌuén Cristo mé tsjìinxín iji̱éni

23Mé xi̱kaha kuékichánxi̱n kuékꞌén iko kixin kótjuáxin kaín ti nkehe, kjónté tíha la tóyóhó ti nkehe siín nkaya nka̱jní; a̱ndá ti nkehe chaxín siín nkaya nka̱jní, la ticháxi̱n ijnko nkehe a̱ntsí jína chrókꞌuen. 24Kixin Cristo la kꞌuixenhña ti ni̱nko tsíkjichꞌénaxín chojni itja, tóyóhó ti ni̱nko chaxín itjen nkaya nka̱jní. Náhí, jehe chꞌan la sákjui̱ chꞌan nkaya nka̱jní, la ntiha tjenixjayákohe̱n chꞌan kaín chojni. 25La jehya nkoya̱xón kꞌuíxehen chꞌan ntiha kꞌuenyákohe̱n chꞌan chojni éxi ichꞌe ti ncha̱tꞌá tꞌe̱to̱an, tꞌixehen sin ti cuarto Tjóá nkojnko nánó kixin tsjajon sin ijni̱é iko. 26Kixin ti xi̱kaha chrókóhen, la Cristo la ticháxi̱n nkoya̱xón chrókꞌuen chꞌan ndesi ti kꞌóna chjasintajni. A̱ndá ijie ó chjina tsjeje̱ chjasintajni, la ikui Cristo la nkoko̱axón ikꞌuén chꞌan kixin tsjìinxín ti iji̱é kaín ti chojni siín chjasintajni. 27La xi̱kaha tjenixín kixin kaín chojni la ó nkoko̱axón itsꞌen sin, ndá chrꞌéxi̱n tsito̱exín ti iji̱é sin. 28#Is. 53:12.*Mé xi̱kaha Cristo la ó nkoko̱axón ikꞌuén chꞌan kixin tsjìinxín ti ijie̱ chónta kaín chojni. Ndá chrꞌéxi̱n itsi chꞌan, la í jehya na̱xa̱ tsja̱tse̱n chꞌan iji̱é chojni. Náhí. Ti itsi chꞌan la sinchekaá chꞌan ti chojni ó tjejóchóhen ti ó tsokjan chꞌan.

Currently Selected:

Hebreos 9: poeNTplus

Highlight

Copy