Hebreos 10

Ti ley sa̱oxín la í chꞌehya ixra̱

1Ti ley kuékꞌe̱to̱an Moisés la mé éxi ijnko itsꞌuan tja̱ko̱xi̱n ti nkehe jína chrókui chrꞌéxi̱n, kjánchó tíha la jehya ti nkehe chaxín. Méxra̱ ti ley xitjahya sinchetjóá ti sin tóchjinehe Díos tji̱ka̱o iko itsꞌen nkojnko nánó. 2A̱ndá ti chrókjuacha ti ley chrókjuinchetjóá ti iji̱é chojni, ndá chrókjuénka̱yáxinhña sin kixin na̱xa̱ chónta sin ijie̱, la í chrókjuajonhña sin ti iko itsꞌen. 3A̱ndá ti iko tꞌóñá sin nkojnko nánó la jehó nchexraxinkakonxín sin ti ijie̱ chónta sin 4kixin ti ijni̱é koxinta la ko kotèntso̱ la xrokjuahya tsjìinxín iji̱é chojni.

Cristo kjuasótexín ti iji̱éni

5 # Sal. 40:6-8. *A̱ndá ti ó ikui Cristo chjasintajni la ndáche chꞌan Díos, Itꞌé chꞌan:

Jaha la tjinkákonhña ti iko itsꞌen

la ko tjinkákonhña ninkehó nkehe chrókꞌuayehé.

Náhí.

Jaha mé kjuánjua ijnko cuerpo tsochonta janhan.

6Jaha tóxriànhña iko tsíchján la ko ti íso nkehe chrókꞌuayehé kixin chrókuakjìixian ti ijie̱.

7A̱ndá janhan ndáxrja̱n: “Ijie la ntihi itjén janhan éxi tjenixín ti xroon itén Díos kixin si̱ntaxiteyá ti nkehe tóxrínhan jaha.”

8Mé senó ndáchro xroon itén Díos kixin Díos la tjinkakonhña la ko tóxriènhña iko itsꞌen chrókjuajoni, la ko ninkehó nkehe tsíchján tóxrìe̱nhña chꞌan chrókjuajoni kixin chrókjuìinxín ti iji̱éni. Náhí, tjinkakonhña Díos tíha, kjónté ti ley kꞌue̱to̱an kixin xi̱kaha chrókóhen. 9A̱ndá chrꞌéxi̱n ndáchro Cristo: “Ntihi kꞌuinka janhan kixin si̱ntaxiteyá ti nkehe éxi tóxríhan jaha Díos.” Mé xi̱kaha kjua̱tse̱n Díos ti iko kuékꞌóñá sin ósé, a̱ndá Cristo kjuajon a̱sén tsja̱ko̱xi̱n ijnko nkehe ni̱xin. 10Díos kjuínchetjóá ti jeheni kixin Jesucristo mé kjuínchexiteyá chꞌan éxi tóxríhi̱n Díos kixin kjuajon chꞌan ti cuerpo kuènté chꞌan ikꞌuén nkoko̱axón, la mé tíha ichꞌe ixra̱ nkochríxín.

11 # Ex. 29:38. *Mé kaín ti ncha̱tꞌá judío chꞌehe Díos ixra̱ kaín ña̱o la na̱xa̱ tjajon sin iko itsꞌen, kjánchó tíha la xitjahya tsjìinxín iji̱é chojni. 12#Sal. 110:1.*A̱ndá Jesucristo la ó nkoko̱axón kꞌuenyákohe̱n ti jeheni kixin tso̱tjuáxini la tíha mé nkochríxín sichꞌe ixra̱. Landá ti ó kjuixin tíha, ndá sákjui̱ chꞌan kjuákꞌetja̱xi̱n ti itja chjina kuènté Díos. 13La mé ntiha tjechóhen chꞌan hasta tsjixinjña tsꞌejótꞌo̱xi̱n kaín ti sin kꞌuénínkakonhen sin chꞌan, chrínkí to̱té chꞌan kixin í tsꞌe̱to̱anhña sin. 14Mé xi̱kaha nkoko̱axón kjuajon Cristo cuerpoé chꞌan kꞌuáyéhe̱ Díos kixin jína tsꞌejó ti sin ó tsíkótjóá. 15La ti Ncha̱kuén Díos nchenohe ti jeheni tíhi kixin senó tsíndáchro chꞌan:

16 # Jer. 31:33. *Ti kjuachaxin tso̱tja̱ha̱ ti jehe sin ti ó tsꞌatsínka ti ña̱o a mé tíhi, ichro Ìnchéni:

Si̱ntaxráxinka̱oan a̱sén sin ti ley tséto̱an,

la ti kjuaxrexinkaon kuènté sin tsokjian ti nkehe tjínka̱oan.

17 # Jer. 31:34. *La chrꞌéxi̱n ndáchro:

Í tsoxraxinka̱konhña ínaá ti iji̱é sin la ko ti nkehe jínahña kjuíchꞌe sin.

18Mé xi̱kaha ti ó kótjóá ti iji̱éni la í ticháxi̱nhña íso nkehe chrókjuajoni chrókótjuáxini, la í náhí.

Ticháxi̱n tso̱chjineheni Díos

19Méxra̱ kíchóni, í kohya kjuachrakon tsꞌixeheni ti cuarto a̱ntsí Tjóá ti itjen Díos kixin kjuachaxíen ijni̱é Jesucristo; 20mé chréhe̱ni ti nti̱a ni̱xin mé ti nti̱a tjechón kixin éxi kjuatsìin chꞌan ti ika tjenkákóhe̱n, kixin kjuajon chꞌan ti cuerpo kuènté chꞌan. 21Jehe chꞌan mé ti ncha̱tꞌá tjetoan kuènténi mé tꞌe̱to̱an ti ndo̱e Díos itjen nkaya nka̱jní. 22#Lv. 8:30; Ez. 36:25.*Méxra̱ ticháxi̱n chrókóchjineheni Díos kaín a̱séni chrókuinkáchónkini chꞌan, kixin jehe chꞌan tsíkjinchetjóá chꞌan a̱séni kixin ti nkehe nduáhya kꞌuekjenka̱yáxini mé éxi ìnta̱ tjóá kꞌuíjmáxini. 23La chrókuíto̱ehyani chrókꞌuejóchóheni ti nkehe tinkáchónkini kixin Díos la chaxín sinchexiteyá ti nkehe tsíndáchro chꞌan. 24La ko kja̱xin chrókjueyáni nkexrín chrókjuinki̱tsani kíchóni kixin chaxín chrótjue̱hé sin kícho sin la chrókjuénka̱yáxin sin ti nkehe jína. 25La chrókuíto̱ehyani chrókónkotséni la chrókuankíehyani éxi ti sin tóchjinahña. Náhí. Ticháxi̱n a̱ntsí chrókóchéhe̱ni chrókjuinchexraxinkaoni kíchóni kixin ó noheni kixin í séhya tsokjan Ìnchéni.

26A̱ndá ti na̱xa̱ tjenka̱yáxini chrókjuasini ijie̱ ti ó noheni ti nkehe chaxín, la kohya íjnko nkexro chrókjuenka̱yákohe̱n ti jeheni kixin chrókótjuáxin ti iji̱éni. 27#Is. 26:11.*Mé jehó itjen ti kjuachrakon ijié tsito̱exín ijie̱ la ko ti xrohi síchrꞌákjen tsꞌitjáñaxín ti sin nínkakohen Díos. 28#Dt. 17:6; 19:15.*A̱ndá ti nkojín nkexro titekakonhña ti ley kꞌue̱to̱an Moisés, la tso̱noxín yaá o̱ iyꞌá ti sin tsíkꞌikon kixin tsochronka sin ti ijie̱ tsíkjasin ti nkexro a, ndá ti ijie̱ tsꞌenxín ti chojni la kohya nkexro tsi̱konoéhe̱ ti nkexro a. 29#Ex. 24:8.*Méxra̱, ¿á tjénka̱yáxinhñara kixin a̱ntsí chrókjuasóte ti sin kuitekakuenhña ti Xje̱en Díos, la tꞌándaxíhi̱n sin ti Ncha̱kuén Díos tjue̱he ti jehe sin, la ko chóntahya sin kjuasáye sin ti ijni̱é Cristo mé ti ijni̱ chrónkaxín ti kjuachaxin ni̱xin, mé ti ijni̱ kótjuáxini? 30#Dt. 32:35; Dt. 32:36.*Ó noheni kixin tsíndáchro Ìnchéni: “Janhan mé si̱ntaki̱to̱axian ti iji̱é kaín chojni la ko tsjénka̱ha̱ sin kixin ti nkehe jínahña kjuíchꞌe sin.” 31Méxra̱ ijnko kjuachrakon imá ijié ti chrókꞌuánótje̱xi̱ni ti itja Díos tjechón.

32Méxra̱ chróxraxinkáonra kaín ti nkehe náxrjónhña tsíkóhen ósé ti jahara na̱ntá tsíkꞌayéhéra ti xrohi kuènté Díos tꞌinkaséñaxín ti jahara kixin kuitekáonra chꞌan, kjánchó kjuachara kjónté nchónhña nkehe tsíkꞌatsínkara. 33Mé nkojín ti jahara la kꞌuándaxíha̱nra sin la ko kjuatiara sin nkayakuen nchónhña chojni tsíkónkotsé, a̱ndá ísora la kꞌuejontaxínra kjuínki̱tsara ti sin tsíkꞌekon. 34Kja̱xin jahara kui̱konoéhéra ti sin tjejóchjina, la ko jahara kóninkákonhñara kjónté kuakitsjahara sin kaín ti nkehe kꞌuéchontara, kixin ó nohara kixin nkaya nka̱jní chontara ti nkehe a̱ntsí jína nunca tsjeje̱hya. 35Chrokui̱to̱éhyara ti nkehe tinkachónkira kixin ó nohara kixin ndá xi̱kaha tsꞌayéhéra ti nkehe tsjajon Díos chrꞌéxi̱n. 36Kja̱xin jahara ticháxi̱n chrókꞌuejochohénra chrókónínkákonhñara, kjónté ichrén nkehe chrókóhanra, kixin si̱nchexiteyára ti nkehe tjinkaon Díos, kixin ndá xi̱kaha chrókꞌuayéhéra ti nkehe tsíndáchro chꞌan. 37#Hab. 2:3, 4.*Mé xi̱kaha ndáchro ti xroon itén Díos:

Í kanhñó isé ndá

itsi ti nkexro ticháxi̱n itsi,

í sinchexrjenhña chꞌan.

38Ndá ti sin kótjóá a̱sén mé tjejóchón sin kixin tinkáchónki sin ti janhan;

a̱ndá ti sin tsíto̱he ti janhan la tso̱xrínahña.

39Kjánchó jeheni jehya xi̱kaha chrókuíto̱heni chrókuinkáchónkini Díos kixin ndá chrókjuasini ijie̱ chrókjuasótexíni. Náhí. Tinkáchónkini Díos la tíha mé tsaáxini.

Currently Selected:

Hebreos 10: poeNTplus

Highlight

Copy

Compare

Want to have your highlights saved across all your devices? Sign up or sign in

Learn More About El Nuevo Testamento, Salmos y Proverbios

Hebreos 10

Popular Bible Verses from Hebreos 10

Popular Bible Verses from
Hebreos 10