Hebreos 11

Ti sin kjua̱ko̱xi̱n kixin titekaon Díos

1Ti titekaoni Díos la mé noexíni kixin chaxín tsꞌáyéhe̱ni ti nkehe tjejóchóheni, la ko noexíni kixin chaxín tjejó ti nkehe, kjónté tꞌikonhñani tíha. 2Díos ndáchro kixin jína kꞌuejó ti sin kꞌuaxrjeníxini ósé kixin kuitekaon sin chꞌan.

3 # Gn. 1:1; Sal. 33:6, 9; Jn. 1:3. *La jeheni titekaoni kixin Díos tsíkjichꞌéna kaín nkehe siín chjasintajni la ko nka̱jní kjuachaxin ti nixja chꞌan, la ko noexíni kixin ti nkehe tꞌikoni mé tsíkꞌónaxín ti nkehe xitjahya tꞌikoni.

4 # Gn. 4:3-10. *Abel mé kuitekaon Díos la mé xi̱kaha kꞌóñá chꞌan ijnko kolélo náxrjón kꞌuáyéhe̱ Díos. Tíha mé ijnko nkehe a̱ntsí jína kjuajon chꞌan, a̱ndá ti nkehe tsíkjajon Caín la náhí. Méxra̱ Díos kóxríhi̱n ti nkehe kjuajon Abel, ndá ndáchro Díos kixin jína ti nkexro a. Kjónté ó ikꞌuén Abel la ti nkehe tsíkjajon chꞌan na̱xa̱ tja̱ko̱xi̱n kixin jína kuinkáchónki chꞌan Díos.

5 # Gn. 5:21-24. *Enoc la kuitekaon Díos, méxra̱ kꞌuénhña chꞌan kixin Díos sátsíkji̱ko chꞌan, landá kjueyá sin chꞌan la kꞌuitjahya sin. Ndáchro xroon itén Díos kixin ti na̱xa̱ itjen chꞌan ntihi la jína kuitekaon chꞌan la xi̱kaha kóchéhe̱ Díos. 6Méxra̱ Díos la tóxriènhña ti tsitekakuenhñani chꞌan, kixin ti tjinkaoni tso̱chjineheni Díos la ticháxi̱n tsitekaoni kixin itjen chꞌan la ko tsitekaoni kixin jehe chꞌan tsje̱nke̱he chꞌan ti nkexro tjeyá ti jehe chꞌan.

7 # Gn. 6:13-22. *A̱ndá Noé kuitekaon Díos, la mé Díos nixje̱he̱ ti jehe chꞌan kixin tso̱hen ijnko nkehe na̱xa̱ kꞌuíkonhña chꞌan, la kuitekaon chꞌan kjuíchꞌéna chꞌan ijnko ntabarco kixin tsaáxin chꞌan la ko ti sin ndo̱e chꞌan. Kuitekaon chꞌan la mé xi̱kaha kjua̱ko̱xi̱n chꞌan kixin ti íso chojni chjasintajni la tsjasóte sin. La Díos kjuíncheñao Noé kixin xi̱kaha kuitekaon chꞌan.

8 # Gn. 12:1-5. *A̱ndá Abraham kuitekaon Díos, la ti kꞌue̱to̱an Díos kixin tsꞌaxrjexín chꞌan ti chjasén chꞌan la kuitekaon chꞌan sákjuí chꞌan ti nonte kjuajon Díos tsꞌáyéhe̱ chꞌan, kjónté noehña chꞌan nketí nó sátsji chꞌan. 9#Gn. 35:27.*Kixin ti kuitekaon chꞌan, la kjuákꞌe chꞌan ti nonte kjuajon Díos éxi ijnko chojni jehya no̱nte̱e. La kjuíchꞌéna chꞌan nchia kamanta ó, la ko kja̱xin nkokón nchia kꞌuéchónta Isaac la ko Jacob, la kja̱xin jehe sin kꞌuáyéhe̱ sin ti nkehe tsíndáchro Díos. 10Mé xi̱kaha Abraham kuitekaon kixin ijnko ña̱o tsꞌikon chꞌan ti chjasin tsíkjichꞌéna Díos tsꞌitjáñahña.

11 # Gn. 18:11-14; 21:2. *Méxra̱ Abraham kuitekaon chꞌan Díos, la kjónté tjan Sara ichjién chꞌan xrokjuahya tsochónta tjan ijnko xjan la ko ó nána tjan, la Díos kjuajon ijnko xjan kixin Abraham kuitekaon kixin Díos la sinchexiteyá ti nkehe tsíndáchro chꞌan. 12#Gn. 15:5; 22:17; 32:12.*Mé xi̱kaha kóhen, la Abraham, kjónté ó mero chrókꞌuen chꞌan kixin ó táda chꞌan, la kꞌuaxrjeníxin chꞌan nchónhña chojni éxi konotsé siín nka̱jní xi̱kaha la ko éxi nchesen siín chrínta nda̱ñao mé xi̱kaha xitjahya tsꞌekini.

13 # Gn. 23:4; 1Cr. 29:15; Sal. 39:12. *Mé kaín ti sin a, ikꞌuén sin, la kꞌuáyèhya sin ti nkehe tsíndáchro Díos kixin chrókꞌuáyéhe̱ sin, kjánchó kuitekaon sin Díos, la kjónté jehó kꞌuíkonxín sin ti nkehe itsi, la kóchéhe̱ sin. Mé xi̱kaha kꞌuéchronka sin kixin jehe sin la éxi ijnko chojni kjuixin ókjé chjasin kꞌuatsínkó sin ntihi chjasintajni kixin jehya nkochríxín tsꞌejó sin ntihi. 14La mé xi̱kaha kꞌuénixja sin la ko kjua̱ko̱xi̱n sin kixin na̱xa̱ xritjeyá sin nketí chrókꞌóna chjasén sin. 15A̱ndá ti nkoya̱xón chróxraxinkaon sin ti chjasin tsíkꞌaxrjexín sin la kjá jína chrókjan sin ntiha ínaá. 16Méxra̱ jehe sin tjinkaon sin ijnko chjasin a̱ntsí jína chrókꞌuejó sin, tíha mé chjasin nkaya nka̱jní. Méxra̱ Díos la tósuèhya kixin chróndáchro sin kixin jehe chꞌan ti Díos tinkáchónki sin kixin ó kjuíchꞌéna chꞌan ijnko chjasin tsꞌejó sin.

17 # Gn. 22:1-14. *A̱ndá Abraham kuitekaon Díos, mé ti ó Díos tjinkaon tso̱nohe chꞌan á chaxín tsitekaon Abraham la kjuanchia Díos ti xje̱en chꞌan Isaac, la Abraham la kuitekaon kjui̱ka̱o chꞌan ti ixjan la chrókꞌóñá chꞌan, chrókjuajon chꞌan kixin chrókꞌuáyéhe̱ Díos, kjónté nkoko̱axón xje̱en chꞌan tsíkjajon Díos, 18#Gn. 21:12.*la kjónté tsíndáchro Díos: “Ti xjan mé tsꞌaxrjeníxin nchónhña chojni.” 19Mé xi̱kaha Abraham kuitekaon kixin Díos imá chónta kjuachaxin, la kjónté chojni tsíkꞌen tsoxechón ínaá, la éxi yóhe̱ chrókꞌuen ti xje̱en chꞌan ndá kꞌuáyéhe̱ chꞌan ínaá.

20 # Gn. 27:27-29, 39, 40. *A̱ndá chꞌin Isaac kuitekaon Díos, la kjuíncheñao ti xje̱en chꞌan Jacob la ko Esaú, kixin jína tsꞌejó sin chrꞌéxi̱n. 21#Gn. 48:1-20; Gn. 47:31.*A̱ndá Jacob kuitekaon chꞌan Díos, la ti ó chjina itsꞌen chꞌan, kjuíncheñao chꞌan nkojnko ti xje̱en José, la ko ti inta tjixín chꞌan la kjuisóji̱xi̱n chꞌan nixje̱he̱ chꞌan Díos. 22#Gn. 50:24, 25; Ex. 13:19.*A̱ndá chꞌin José kuitekaon Díos, la ti ó chjina itsꞌen, ndáchro chꞌan kixin ti sin israelita la chrꞌéxi̱n tsꞌaxrjexín sin chjasin Egipto, la kꞌue̱to̱an chꞌan kixin ti ó sátsji̱ sin la sátsjiko sin ti huéso̱e chꞌan.

23 # Ex. 2:2; Ex. 1:22. *A̱ndá ti itꞌé la ko ìñé Moisés kuitekaon sin Díos la ti ó kokjíhi Moisés mé kjua̱kꞌe̱ma̱ sin ti xjan iní nitjó kixin kꞌuíkon sin kixin ti xjan la imá náxrjón itjen xjan, la ko chrákonhña sin kjónté tsíkꞌe̱to̱an ti rey kixin chrókꞌuen kaín ti xjan ndoa israelita. 24#Ex. 2:10-12.*A̱ndá kja̱xin Moisés kuitekaon Díos, la mé ti ó kꞌuánkí chꞌan la kóxriènhña chꞌan itsꞌin chꞌan xje̱en ti tjan xje̱en ti chꞌin faraón. 25La mé tjinkaon chꞌan kixin chrókjuasóteko chꞌan ti sin tinkáchónki Díos, la tjinkakonhña chꞌan jína chrókjuákꞌe chꞌan, kjónté náxrjón ti siín ti sin tꞌe̱to̱an kixin ntiha la imá siín ijie̱. 26Kjuenka̱yáxin chꞌan kixin a̱ntsí tjetoan chrókjuasótexín chꞌan ti Cristo itsi chrꞌéxi̱n, a̱ndá kanhñó tjetoan chróchónta chꞌan kaín nkehe tjete siín chjasin Egipto. Tjinkaon chꞌan kixin chrókꞌuáyéhe̱ chꞌan ti nkehe náxrjón tsjajon Díos chrꞌéxi̱n. 27A̱ndá jehe chꞌan kuitekaon chꞌan Díos, la sákjuixin chꞌan ti chjasin Egipto, la chrákonhña chꞌan kjónté kónínkaon ti chꞌin rey, a̱ndá kuíto̱ehya chꞌan ti tinkáchónki chꞌan Díos kixin éxi chaxín tꞌikon chꞌan ti Díos ninkexró tꞌikonhña.

28 # Ex. 12:21-30. *A̱ndá kja̱xin Moisés kuitekaon Díos, la kjuasin chꞌan ti kia Pascua, kꞌue̱to̱an chꞌan kixin tsjasikjanjin sin ijni̱ ti puerta, kixin ti ángel tꞌóñá chojni la chrókjuincheníehña nijnko ti xjan sa̱o kuènté ti sin Israel. 29#Ex. 14:21-31.*A̱ndá ti sin israelita la kuitekakohen sin Díos, la kꞌuatsínka sin ti Nda̱ñao Kjátse éxi nonte xámá, la ti sin Egipto tjinkaon sin chróchréhe̱ sin xi̱kaha la kjuachahya sin chréhe̱ la kjuatjoá sin.

30 # Jos. 6:12-21. *A̱ndá ti sin israelita kuitekaon sin Díos, la xítjen ti tja̱tꞌo̱ tjenkákuèxín ti chjasin Jericó, ti ó kjuixin kꞌuinkatjènta̱ sin yato ña̱o ti chjasin a. 31#Jos. 6:22-25; Jos. 2:1-21.*A̱ndá ti tjan Rahab kuitekaon tjan Díos, la mé kjónté ijnko chojnichjin kꞌuéchónta nchónhña chojnindoa, la kꞌuénhña tjan ti ó ikꞌuén kaín ti sin kuítekakonhña, kixin jína kjuínki̱tsa tjan ti sin israelita kjuíjitsàya sin ti chjasin Jericó.

32 # Jue. 6:11—8:32; Jue. 4:6—5:31; Jue. 13:2—16:31; Jue. 11:1—12:7; 1Sam. 16:1—1Rs. 2:11; 1Sam. 1:1—25:1. *¿Nkehe na̱xa̱ chróndáxrja̱n? Í tjachahya tsokjian nkexrín kuitekaon Díos Gedeón, Barac, Sansón, Jefté, David, Samuel, la ko ti sin profeta. 33#Dn. 6:1-27.*Kixin ti kuitekaon sin Díos, la kjuacha sin kꞌóna no̱nte̱e sin ti nonte kuènté íso chojni, la jína kꞌue̱to̱an sin, la kꞌuáyéhe̱ sin ti nkehe tsíndáchro Díos tsjajon, la kꞌuekjehe̱ sin irꞌua koxra̱, 34#Dn. 3:1-30.*la kokꞌanka sin ti xrohi síche, la ko kjuachahya ti espada chrókꞌuenxín sin. A̱ndá ti sin chrákon la kófuerte sin, la kꞌóna sin chojni tse̱he̱ kjuacha sin kjuajo̱nko sin ti sin soldado tsíkji̱xi̱n ókjé chjasin. 35#1Rs. 17:17-24; 2Rs. 4:25-37.*Kja̱xin nkojín ti chojnichjin kuitekaon Díos la ti sin tsíkꞌen na̱xa̱ kjéhya sin la xechón ínaá.

A̱ndá íso sin la kjuasóte sin, ikꞌuén sin kixin kjuínchemáhña sin kixin kuinkáchónki sin Díos kixin ó nohe sin kixin na̱xa̱ tsoxechón sin la a̱ntsí kjuaxróxin tsꞌejó sin. 36#1Rs. 22:26, 27; 2Cr. 18:25, 26; Jer. 20:2; 37:15; 38:6.*A̱ndá íso sin kjuasóte sin la nchónhña chojni kjuanoá ti jehe sin, la ko kꞌuekon sin la ko kja̱xin cadena kontetoxín sin kꞌuejóchjina sin. 37#2Cr. 24:21.*La ko íso sin la ixro̱ kꞌuénxin sin, la íso sin la sierre chriji̱nxi̱n sin, la íso sin la nchónhña nkehe kjuasótexín sin, la íso sin la kꞌuénxin sin espada, la ko íso sin kꞌuáji sin nte̱je̱ kꞌuinkáya sin tjo̱é kolélo la ko tjo̱é kotèntso̱ kixin imá nóa sin, kjuasóte sin, la kjuaxróxinhña kꞌuejó sin. 38A̱ndá ti chojni kuinkáchónkihya Díos la kjuikosáyehya ti sin a la kꞌuínkíté sin, la ti sin a la chóntahya sin chjasén sin la sákjui̱ sin nó nte̱je̱, la ko ijna̱, la nkaxehen itjo̱ la ko tòye̱ síxrja chrínkí nonte. 39A̱ndá kaín ti sin a la kjua̱ko̱xi̱n sin kixin chaxín kuitekaon sin Díos, la kjónté xi̱kaha kꞌuáyèhya sin ti nkehe tsíndáchro Díos tsjajon 40kixin Díos kjuénka̱yáxin ijnko nkehe a̱ntsí jína kixin jehe sin la ko jeheni kaíni nkoko̱a tsꞌejóni tsꞌáyéhe̱ni ti nkehe tsjajon chꞌan.

Currently Selected:

Hebreos 11: poeNTplus

Highlight

Copy