Hebreos 12

Jehó Cristo chrókuinkáchónkini

1Mé xi̱kaha nchónhña chojni kuékꞌejó senó la tsíka̱ntatjen sin ti jeheni, mé ti sin a kjua̱ko̱xi̱n kixin kaín a̱sén sin kuinkáchónki sin Díos, méxra̱ chrókuíto̱heni ndáha ti ijie̱ chrókꞌue̱tue̱hen a̱séni la ko kaín ti nkehe tꞌinkákonhe̱n, la chrókóxakoheni kixin chrókjuachani chróchréhe̱ni Ìnchéni nkochríxín. 2Chrokóxakoheni chaxín chróxraxinkaoni Ìnchéni Jesús kixin jehe chꞌan mé kjuínki̱tsa chꞌan kixin chaxín kuinkáchónkini chꞌan la ko na̱xa̱ tsjinki̱tsa chꞌan kixin a̱ntsí jína tsitekaoni. Méxra̱ jehe chꞌan kjuacha chꞌan kjónté kjuasótexín chꞌan ti ntacruz, la ko kósuèhya chꞌan kjónté náxrjónhña kꞌuénxin chꞌan, kixin nohe chꞌan kixin tsjixin tsjasóte chꞌan ndá chrókóchéhe̱ chꞌan, landá ijie la tjetja̱xi̱n chꞌan ti itja chjina kuènté Díos tꞌe̱to̱an.

3Méxra̱ chrókjuénka̱yáxinra nkexrín kjua̱ko̱xi̱n Ìnchéni Jesús. Ti sin chónta ijie̱ imá kjuínchekjasóte sin ti jehe chꞌan, la kjónté la jína kjuacha chꞌan; méxra̱ jahara chrókꞌóxrjéhyara la chrókui̱to̱éhyara chrókuinkachónkira chꞌan, 4kixin jahara la na̱xa̱ tjajo̱nkoára ti ijie̱ la na̱xa̱ kꞌuénxi̱nhñara éxi jehe chꞌan ikꞌuén chꞌan. 5#Job 5:17; Pr. 3:11, 12.*¿Á kꞌuitjáñahanra ti nkehe nta̱xráxinkaonra Díos kixin éxi xje̱en chꞌan tꞌikon chꞌan ti jahara? Éxi ndáchro xroon itén Díos:

Xje̱eni, chrókónínkakonhña kixin ti nkehe tꞌe̱to̱an Ìnchéni,

la ko chrókꞌóxrjéhya ti chrónixja̱ha chꞌan.

6Kixin Ìnchéni mé nixje̱he̱ ti nkexro tjue̱he kixin sichꞌehya ti nkehe nduáhya

la ko nchekjasóte chꞌan kaín ti sin kꞌóna xje̱en chꞌan.

7Ti ijie tjejotjasotíára la ó nohara kixin Díos tjua̱hára la ko tꞌikon ti jahara éxi xje̱en chꞌan. ¿Á siín ijnko itꞌé xjan chrókjuenduéhya ti xje̱en ní? 8Ti chrókjuenduéhya Díos ti jahara éxi tjenduéhe chꞌan ti sin chaxín xje̱en chꞌan, a̱ndá kjá jahara la chaxínhña xje̱en chꞌan, kjá ijnko chojni tsíkꞌónamá ó ti jahara.

9Ti na̱xa̱ kꞌuéchájani, la mé itꞌéni ntihi chjasintajni kjuenduéhe chꞌan ti jeheni, la jeheni kjuíkosáyeheni ti jehe chꞌan. A̱ndá xi̱kaha a̱ntsí chrókjuinchexiteyéheni Itꞌéni itjen nkaya nka̱jní kixin xi̱kaha mé tsochóntaxíni kjuachón. 10Mé ti Itꞌéni ntihi chjasintajni kjuenduéhe chꞌan ti jeheni ti na̱xa̱ chájani, kixin tjinkaon chꞌan kixin jína chrókꞌuejóni; a̱ndá ijie la Itꞌéni Díos tjenduéhe chꞌan ti jeheni kixin ndoá chrókꞌuejóni, kixin chrókjuinchetjóá chꞌan ti jeheni kixin jehe chꞌan la tjóá chꞌan. 11Kjá chaxín ninkehó chrókóxríe̱nhñani ti ó chrókjuinchekjasóte Díos ti jeheni kixin imá tjoté tíha. A̱ndá ti chrókjuachani tsꞌatsínkani kaín tíha, landá a̱ntsí tsꞌitjaxíni sichꞌeni ti nkehe jína, la ko kjuaxróxin tsꞌejóni.

Ti sin tjanoá ti itén Díos

12 # Is. 35:3. *Méxra̱ ti tsíkꞌóxrjé ti itjára la chrókjuisójira, la ko ti tóchꞌinra tsíkꞌóxrjé, chrókuákjá ni̱xién fuerza, 13#Pr. 4:26.*la ko chrókjuéyára ti nti̱a jína. A̱ndá ti níhi ti to̱tára xitjahya itjira, mé chrókuito̱he jína la ko í chrókóníehña ínaá.

14Chrokóxakohanra kjuaxróxin chrókꞌuejokoára kaín chojni, la jína la ko tjóá chrókꞌuejora. Kixin ti nkexro tjuáhya tjejó la xitjahya tsꞌikon Ìnchéni. 15#Dt. 29:18.*Chrokóxakohanra kixin nijnkora chrókui̱to̱éhyara ti tjua̱hára Díos, la ko nijnkora chrókónínkakuénhñara kichuara kixin chrókꞌónahñara éxi ijnko nuèé inta itsjá chrókóníexín ti íso chojni. 16#Gn. 25:29-34.*La nijnkora chrókjuásikoáhyara ijie̱ ijnko chojnichjin jehya ichjiánra, la ko jehya chróchontehyara kjuasàya ti nkehe tjóá éxi kjuíchꞌe Esaú, kixin ijnko plato nkehe chrókjonie chꞌan la kjuinkí chꞌan ti nkehe chróchónta chꞌan kixin jehe chꞌan ti ixjan sa̱o. 17#Gn. 27:30-40.*Jahara la ó nohara kixin chrꞌéxi̱n, ti ó tjinkaon chꞌan kixin ti itꞌé chꞌan chrókjuincheñao ti jehe chꞌan, la í xitjahya tso̱ñao chꞌan, kjónté imá tsjánka chꞌan kixin kohya íjnko nkexrín tsꞌixitoxi̱n ti nkehe tsíkjichꞌe chꞌan.

18 # Ex. 19:16-22; 20:18-21; Dt. 4:11, 12; 5:22-27. *Jahara la kóchjinehñara ti ijna̱ Sinaí jína tsotsé chojni, ti ijna̱ síchrꞌákjen xrohi, sítié la ko siín itji̱ tié, la ko tji̱a̱n chjéhe xri̱nto̱. 19La ko kiénhñara ti tsíndáchro trompeta, la ko ti itén Díos nixja. A̱ndá ti sin tsíkihin ti nixja Díos la mé chrónòa sin kixin í chrónixjahya chꞌan ínaá, 20#Ex. 19:12, 13.*mé xi̱kaha ichro sin kixin tsjachahya sin sinchexiteyá sin ti nkehe kꞌue̱to̱an Díos kixin ndáchro: “Ti nkexro tsjakꞌe ijnko to̱té ti ijna̱ la mé tsꞌenxín ixro̱ o̱ chika lanza, la kjónté ijnko iko tsinkátja ti ijna̱ la itsꞌen va.” 21#Dt. 9:19.*Ti nkehe kꞌuíkon sin ntiha la ijnko kjuachrakon imá ijié. Méxra̱ Moisés kja̱xin ndáchro kixin chrákon, síxrànka̱ chꞌan kixin jehe chꞌan tsíkꞌikon chꞌan ti kjuachrakon ijié.

22A̱ndá jahara tsíkóchjinehéra ti ijna̱ Sión, ti chjasén Díos tjechón, mé ti Jerusalén itjen nkaya nka̱jní, la ko nchónhña miles ti sin ángel chjéhe sin Díos kjuasáya 23la ko ti sin tsíkónkotsé, sa̱oxín tsíkꞌóna xje̱en Díos, sínixín ihni̱é nkaya nka̱jní. Jahara tsíkóchjinehéra Díos, mé ti Juez sinchekito̱exín iji̱é kaín chojni, la ko tsíkóchjinehéra ti sin jína tsíkjinchetjóá Díos, 24#Gn. 4:10.*la tsíkóchjinehéra Ìnchéni Jesús, ti nkexro nixja̱xi̱n ti kjuachaxin ni̱xin kixin ti ijni̱é chꞌan kꞌuitjí tsꞌíjmáxín ti iji̱éni. Méxra̱ a̱ntsí jína ti ijni̱é Jesús kixin tsjìixín ijie̱, a̱ndá ti ijni̱é Abel la náhí.

25 # Ex. 20:22. *Méxra̱ chrókóxakoheni chrókuitekaoni ti nkehe nixja Díos kixin ti sin kjuanoá Díos ti ó kjuínchexraxinkaon chꞌan ti jehe sin ti ntihi chjasintajni la kuaáhya sin; méxra̱ kjá a̱ntsí xrokjuahya chrókuaáni ti chrókuitekakuenhñani ti nkexro nchexraxinkaon ti jeheni itjen nkaya nka̱jní. 26#Hag. 2:6.*Ti nixja Díos ti ña̱o ósé la mé kꞌuínki nonte. A̱ndá ijie ndáchro chꞌan: “A̱ndá ijie la ínaá xi̱kaha tso̱hen, kjánchó jehya nonte ó si̱ntakꞌinkía. Náhí. Kja̱xin ti nka̱jní a”, ichro chꞌan. 27A̱ndá ti tsíndáchro chꞌan kixin “ínaá xi̱kaha tso̱hen”, mé tienxíni kixin ijie tsjakjìin chꞌan ti nkehe jína tsꞌinki kjuíchꞌéna chꞌan, a̱ndá jehó tsíto̱he ti nkehe xitjahya tsꞌinki. 28A̱ndá ti kjuachaxin itjen nkaya nka̱jní tsjajon Díos la xitjahya tsꞌinki tíha. Méxra̱ chróchjéheni Díos kjuasáya la chróxraxinkaoni chꞌan la ko chrókjuikosáyeheni chꞌan éxi tóxríhi̱n chꞌan 29#Dt. 4:24.*kixin ti Díos kuènténi mé éxi ijnko xrohi tsjacha sinchekꞌitjáña kaín nkehe.

Currently Selected:

Hebreos 12: poeNTplus

Highlight

Copy