2 Pedro 2

Ti sin tjako ti nkehe nduáhya

(Jud. 4-13)

1Kja̱xin ósé kuékꞌíxin chojni nduáhya kꞌuéchronka itén Díos ti chjasin Israel, éxi ijie tsꞌixin maestro sitꞌayahara. Jehe sin tsochrꞌákjehe̱n sin nkehe nduáhya tsꞌitjáñaxín ti nkehe chaxín nohara, la xi̱kaha tsitekákonhñara Ìnchéni ti nkexro tsaáxinra. Tíha mé tsjixin ti tsꞌitjáñaxín sin. 2Nchónhña chojni tsochréhe̱ ti nkehe jínahña tsja̱ko̱xi̱n sin la xi̱kaha tsꞌándaxíe̱nxín chojni ti nti̱a ndoá kuènté Ìnchéni. 3Jehe sin imá tso̱xríhi̱n sin tsochónta sin itsjé chichaon, la xi̱kaha tsjanchahara sin chichaon kixin ti nkehe nduáhya tsjako sin. Kjánchó ti nkehe tsꞌitjáñaxín sin la ósé tjechóhen la kohya nkexrín tsaá sin.

4Méxra̱ Díos, la kjónté ti sin ángel ti ó kjuasin ijie̱ la kui̱konoéhña chꞌan, la kꞌue̱to̱an chꞌan kixin tsjasóte sin, la sákjuí sin ti sítie tsꞌejóchjina sin, la ntiha tjejóchrexin sin cadena tsjixrakájña ti ña̱o tsito̱exín iji̱é sin. 5#Gn. 6:1—7:24.*La ko kui̱konoéhña Díos ti sin kꞌuejó chjasintajni ósé la ichrꞌán chꞌan ichrin la kui̱te̱e ìnta̱ ti sin jínahña, la jehó kjuínchekaá chꞌan Noé, ti nkexro kjuako ti itan jína la ko yato chojni ó. 6#Gn. 19:24.*Kja̱xin kjuínchekꞌitjáña Díos ti chjasin Sodoma la ko Gomorra, iche hasta kꞌóna nteso, kixin xi̱kaha chrókónohe kaín ti chojni jínahña tsꞌejó chrꞌéxi̱n kixin kja̱xin sin tsjasóte sin. 7#Gn. 19:1-16.*Kjánchó Díos kjuínchekaá ti chꞌin Lot, ijnko chojni jína, la kóxakohen chꞌan ti kꞌuíkon chꞌan ti ijie̱ kjuasin ti sin jínahña. 8Chꞌin Lot, ti nkexro jína a̱sén, mé kjuákꞌe chꞌan ti siín ti sin jínahña la kaín ña̱o kꞌuává a̱sén chꞌan kixin kꞌuíkon chꞌan la ko kuíhin chꞌan ti nkehe jínahña ichꞌe sin. 9Méxra̱ Ìnchéni la nohe nchekaá ti sin kaín a̱sén titekaon ti jehe chꞌan, kjónté nchónhña nkehe náxrjónhña tsꞌatsínka sin. A̱ndá ti sin jínahña la sinchekjasóte chꞌan ti ña̱o tsito̱exín iji̱é kaín chojni.

10Díos sinchekjasóte ti sin nchexiteyéhe ti nkehe jínahña ndáchro a̱sén sin, a̱ndá nchexiteyéhya sin ti nkehe tꞌe̱to̱an Ìnchéni. Titekakonhña sin la ko chrakonhña sin tꞌándaxíhi̱n sin ti sin ángel chónta kjuachaxin. 11A̱ndá ti sin ángel, kjónté imá tse̱he̱ sin la ko chónta sin kjuachaxin, la tjanchehya sin Ìnchéni kixin sinchekjasóte ti sin jínahña.

12A̱ndá ti chojni a, la éxi iko tjenka̱yáxinhña sin la nchexiteyéhe sin ti nkehe ndáchro a̱sén sin, la ó kꞌokjíexién sin kixin sichꞌe sin ti nkehe jínahña, a̱ndá íso chojni tsotsé ti jehe sin la tsꞌóñá sin, éxi ijnko iko xi̱kaha. 13Mé xi̱kaha tsjasóte sin kixin jehe sin kjuínchekjasóte sin íso chojni, la tóxrínhi̱n sin sichꞌe sin ti nkehe ndáchro a̱sén sin kjónté tꞌikon kaín chojni. Ijnko kjuatosuéhe̱ kixin tjejontaxínra ntekoara sin ti kia, la kjónté xi̱kaha, na̱xa̱ tjasin sin ijie̱.

14Ti ó tꞌikon sin nkojín chojnichjin la tjinkaon sin chrókjuasinko sin ijie̱. Chꞌiyehe sin ti sin noehña la imá tjinkaon sin tsochónta sin kaín ti nkehe ndáchro a̱sén sin. La xi̱kaha imá tjasin sin ijie̱, méxra̱ chaxín tsjasóte sin. 15#Nm. 22:4-35.*Kuíto̱he sin ti nti̱a ndoá la chréhe̱ sin ti nti̱a kuènté Balaam, xje̱en chꞌin Beor, kixin kóxríhi̱n chꞌan chrókjuacha chꞌan nchónhña chichaon kixin ti nkehe jínahña kꞌuékjichꞌe chꞌan. 16Ndá ijnko kolócho chjin xitjahya nixja la nixjaxin itén chojni la xrenduéhe ti chꞌin Balaam kixin ti ijie̱ chónta chꞌan, ndá kuíto̱he chꞌan ti kjualo̱nti̱ chrókjuíchꞌe chꞌan.

17Ti chojni nduáhya tjako i la éxi ijnko tòye̱ tjiáhya ìnta̱ la ko éxi itji̱ sátjiko xri̱nto̱ ó. Ó kjuixin kuito̱exín kixin sátsji sin ti a̱ntsí sítie, tsjasóte sin nkochríxín. 18Kixin nixja sin kaín nkehe jínahña la ko sínkíhya, imá tjasin sin ijie̱ la tóxríhi̱n sin chojnichjin ókjé, ndá xi̱kaha tjachròexín sin ti sin na̱ntá tjinkaon chrókuíto̱he ti nkehe nduáhya. 19Chrónka sin kixin chónta chojni kjuachaxin sichꞌe kaín nkehe, kjánchó jehe sin jehó nchexiteyéhe sin ti nkehe jínahña; méxra̱ ti nkexro xitjahya tsíto̱he ti ijie̱ la ti ijie̱ mé tꞌe̱tue̱hen ti jehe sin. 20Ti nkexro ó chóxin Ìnchéni Jesucristo ndá kuíto̱he sin ti nkehe chrókꞌuitjáñaxín sin chroxi chjasintajni, a̱ndá chrꞌéxi̱n chrókuákja sin ti nti̱a jínahña ínaá, la chrókjuacha ti jínahña chrókjuachròe ti jehe sin, ndá a̱ntsí náxrjónhña chrókóhen sin ke ti senó. 21Ícha jína chróchóxinhña sin ti nti̱a jína, ke ti ó nohe sin ndá tsíto̱he sin ti nkehe kꞌue̱to̱an Díos. 22#Pr. 26:11.*Ti xi̱kaha la jehe sin ichꞌe sin éxi ti nkehe ndáchro chojni: “Ti koni̱a̱ tꞌókjan la xíkjan inie ti nkehe tꞌókjan, la ko ti kochíno na̱ntá tsíkꞌónti, ikjan tikíankí nche̱tꞌo̱.”

Currently Selected:

2 Pedro 2: poeNTplus

Highlight

Copy