2 Pedro 3

Ti ña̱o tsokjan Ìnchéni la í séhya

1Kíchóni imá tjua̱hára, la tíhi ti xroon yóxin ikjian tsꞌayéhéra. Yóí ti xroon la nta̱xráxinkaonra kixin jína chrókjuénka̱yáxinra. 2Xráxinkaonra ti nkehe tsíchronka ti sin kꞌuéchronka itén Díos ósé la ko ti nkehe kꞌue̱to̱an Ìnchéni, ti nkexro tsaáxini, kjuako ti sin tsíkjeyá chꞌan.

3 # Jud. 1:18. *Tjínka̱oan chrókónohara kixin ti ña̱o tsjixixín la itsi chojni tsjanoá ti itan jína kuènté Ìnchéni, la sichꞌe sin kaín ti nkehe jínahña ndáchro a̱sén sin. 4La tsondáchro sin: “¿Nkehe kóhen ti ndáchro Cristo kixin tsokjan chꞌan? Kixin ndesi ikꞌuén ti sin kꞌuaxrjeníxini la na̱xa̱ xi̱kahó sítóhen éxi ndesi ti kꞌóna chjasintajni”, tsixro sin. 5#Gn. 1:6-9.*Ti chojni a la titekakonhña sin kixin ósé jehó nixja Díos la kꞌóna ti nka̱jní la ko chjasintajni, la sákjuí ti ìnta̱ ókjé ndá kuíto̱he nonte xámá. 6#Gn. 7:11.*A̱ndá kꞌuaniá ichrin tsa̱nka̱ ndá ti ìnta̱ mé kꞌuitjáñaxín chjasintajni la kjuatjoá sin. 7A̱ndá ti nka̱jní la ko ti chjasintajni chóxini ijie, mé tjejóchóhen tsochexín ti xrohi ti ña̱o tsjixixín kixin xi̱kaha kꞌue̱to̱an Díos, ti ó tsito̱exín iji̱é chojni la ko kaín ti sin jínahña tsjasóte sin.

8 # Sal. 90:4. *Méxra̱, kíchóni, chrókꞌuitjáñahñara kixin Ìnchéni la ijnko ña̱o la tꞌikon chꞌan éxi mil nánó la ko mil nánó mé tꞌikon chꞌan éxi ijnko ña̱o ó. 9Ìnchéni la í séhya ndá sinchexiteyá chꞌan ti nkehe tsíndáchro chꞌan, la jehya éxi tjenka̱yáxin chojni ndáchro kixin ó imá isé tjejóchóhen sin. Náhí. Tjechóhen chꞌan kixin ninkexró chrókꞌuitjáñahña, kixin tjinkaon chꞌan kixin kaín chojni chrókjan sin chrókuitekaon sin Díos.

10 # Mt. 24:43; Lc. 12:39; 1Ts. 5:2; Ap. 16:15. *Kjánchó ti ña̱o tsokjan Chꞌan la tso̱hen éxi ti ña̱o itji ijnko xíche̱e xi̱kaha. A̱ndá ti nka̱jní la tsꞌitjáña, la nchónhña kjuachrakon tsꞌixin, tsꞌixin kjonta nka̱jní la kaín ti nkehe siín nka̱jní la tsꞌitjáña, tsoche la ko ti chjasintajni la tsoche la ko tsoche kaín ti nkehe siín ntihi.

11Méxra̱ ti xi̱kaha tso̱hen tsꞌitjáña kaín nkehe, la jahara a̱ntsí jína chrókꞌuejora chrókuinkachónkira Díos. 12Chrokꞌuejochohénra ti ña̱o itsi Díos la chrókóxakohanra chrókꞌuejora jína chrókjui̱chꞌera ixra̱ kuènté Ìnchéni kixin tjoka chrókui chꞌan. Ti ña̱o a la tsoche ti nka̱jní, la tsꞌitjáña, la ko kaín nkehe siín chjasintajni la tsatanka kixin tsoche. 13#Is. 65:17; 66:22; Ap. 21:1.*Kjánchó jeheni la tꞌejóchóheni ti nka̱jní ni̱xin la ko ti nonte ni̱xin éxi tsíndáchro Díos tsjajon. Ntiha la imá náxrjón la ko kjuaxróxin tsꞌejóni.

14Méxra̱, kíchóni, ti na̱xa̱ tjejocho̱hénra kixin itsi ti ña̱o a, la kaín a̱sánra nkojína chrókꞌuejora kixin tsꞌikon Díos kixin kjuaxróxin tjejora, chontahyara ninkehó ijie̱. 15Chrokónohara kixin na̱xa̱ tjechóhen Ìnchéni, tjokahya itsi chꞌan kixin na̱xa̱ íso chojni chrókuitekaon ti jehe chꞌan. Kja̱xin xi̱kaha tsíkjin kíchóni Pablo ti xroon chrꞌahánra chꞌan éxi ti kjuachaxíen Díos kꞌuáyéhe̱ chꞌan. 16Kaín ti xroon tsíkjin chꞌan la nixja xi̱kaha, kjánchó iso tíhi la imá ixra̱ tienxíni. A̱ndá ti sin noehña la ko ti sin chaxínhña titekaon Ìnchéni la tienxínhña sin, ndá nduáhya tjako sin nkehe tꞌaxrjexín ti nixja ti xroon tsíkjin chꞌan, la ko kja̱xin nduáhya tjako sin íso nkehe nixja xroon itén Díos. Ndá xi̱kaha jehó sin tjeyá sin ti nkehe tsꞌitjáñaxín sin.

17Méxra̱ kíchóni, ti ó nohara tíhi, ndá chrókóxakohanra kixin chrókjuachròehyara ti kjuachꞌia xriko ti sin jínahña, la chrókui̱to̱éhyara ti nkehe jína tinkachónkira. 18Ícha jína a̱ntsí chróchoxínra Ìnchéni Jesucristo, ti nkexro tsaáxini la ko a̱ntsí chrókꞌuánkí ti tjue̱héra kichuara. Méxra̱ tsjikosáyeheni chꞌan ijie la ko nkochríxín. Mé xi̱kaha tso̱hen.

Currently Selected:

2 Pedro 3: poeNTplus

Highlight

Copy