2 Pedro 1
1
Xrankíxixín nixja Pedro
1Janhan Simón Pedro, tꞌa̱ha̱ ixra̱ Jesucristo. Mé ikjian ti xroon í tsꞌayéhéra kixin ó tinkachónkira Ìnchéni éxi tinkáchónkini kixin imá jína Díos la ko Jesucristo, ti nkexro tsaáxini. 2Díos sintañaora la ko tsjajon chꞌan kjuaxróxin kixin ó choxínra nkexrín itjen Díos la ko Ìnchéni Jesús.
Jína chrókꞌuejó ti sin tinkáchónki Jesús
3Díos kjuajon kjuachaxin tsochóntani kaín ti nkehe tichánxi̱hini kixin chrókꞌuejóni jína éxi tjinkaon chꞌan. Kjuajon chꞌan kaín tíha ti ó kjuako chꞌan nkexrín itjen ti nkexro kꞌuéye̱he̱ ti jeheni kixin tsꞌejókoni chꞌan ti itjen ti kjuachaxin ijié chónta chꞌan. 4Mé xi̱kaha kjuajon chꞌan kaín ti nkehe imá tjetoan la ko imá tjete, kixin chrókꞌuayehéra kjuachaxin la chrókꞌuejora jína éxi jehe chꞌan la ko chrókui̱to̱héra ti nkehe jínahña siín chjasintajni. 5Méxra̱ tinkachónkira Ìnchéni la chrókjuéyára kixin chrókꞌuejora jína; ndá ti tjejora nkojína ndá chrókónohara nkexrín itjen Díos; 6ndá ti chrókónohara ndá chrókjuachara chrókjuénka̱yáxinra jína la ko jína chrókꞌue̱tue̱hén a̱sánra; a̱ndá ti tjénka̱yáxinra jína ndá chrókjuachara chrókónínkákonhñara tjoka; a̱ndá ti tónínkákonhñara tjoka ndá chrókjuachara chrókjui̱nchexiteyéhéra Díos; 7a̱ndá ti chaxín nchexiteyéhéra Díos la chrókjuachara chrótjue̱héra kichuara; ndá ti tjue̱héra kichuara la chrókjuachara chrótjue̱héra kaín chojni.
8A̱ndá ti xi̱kaha tjejochꞌera la tinkákꞌánkí ti kjuaxrexinkaon kuèntára, la jehya ó chónkó kuitekáonra Ìnchéni Jesucristo. 9A̱ndá ti nkexro tjejónchexiteyáhya tíha la éxi ijnko chojni tꞌikonhña o̱ ijnko chojni tꞌikonhña ikjín, kixin ó kꞌuitjáñehen sin kixin Ìnchéni la ó kjuínchetjóá chꞌan ti ijie̱ kꞌuéchónta sin. 10Méxra̱ kíchóni, nkojína chrókꞌuejora ndá chaxín tso̱nohara kixin Díos tsíkjeyá ti jahara la ko tsíkꞌéya̱ha̱ra chꞌan. Ti xi̱kaha tjáko̱xinra la xitjahya tsꞌitsinkara. 11La Díos tso̱tjáhara kjuachaxin tsꞌixe̱hénra ti itjen Ìnchéni Jesucristo tꞌe̱to̱an nkochríxín, jehe chꞌan mé ti nkexro kjuínchekaá ti jeheni.
12Méxra̱ janhan ti̱to̱a̱hya nta̱xráxinkaonra kaín tíhi, kjónté ó nohara ti nkehe chaxín, la ko jína tjejora éxi ti nkehe xráko̱hara senó. 13Ndáxrja̱n kixin jína chrókjui̱ntaxráxinkaonra kaín ti nkehe í, ti na̱xa̱ itjén ntihi chjasintajni, 14kixin Ìnchéni Jesucristo kjuínchenona kixin í séhya ndá itsꞌén janhan. 15Méxra̱ nta̱xráxinkaonra kaín tíhi kixin ti ó itsꞌén la tsoxraxinkáonra nkochríxín kaín ti nkehe kjuákohára.
Ti sin kꞌuíkon ti kjuachaxin kuènté Cristo
16Ti nkehe kjuákohára kuènté ti kjuachaxin ijié chónta Ìnchéni Jesucristo la ko ti nkexrín tsokjan chꞌan la jehya ijnko cuento kjui̱tꞌána kixin chrókjuitꞌayaxínra. Náhí. Ikua̱n kꞌuíko̱nxian Ìnchéni la ko ti kjuachaxin ijié chónta chꞌan. 17#Mt. 17:1-5; Mr. 9:2-7; Lc. 9:28-35.*Kꞌuíkua̱n tíha ti ó Itꞌéni Díos kjuíkosáyehe chꞌan ti Xje̱en chꞌan, la kui̱ha̱n nixja Díos itjen nkaya nka̱jní ndáchro: “Tíhi mé xja̱na imá tjua̱ha̱ la ko chàna kixin itjen chꞌan.” 18Mé xi̱kaha kui̱ha̱n ti itén Díos kui̱xi̱n nkaya nka̱jní ti ó kjuakꞌéki̱a̱n Ìnchéni chritaón ti ijna̱ tjóá.
19Mé xi̱kaha nonaxian kixin chaxín ndoá ti nkehe tsíchronka ti sin tsíkjin itén Díos ósé. Méxra̱ chrókuihínra jína ti nkehe kꞌuéndáchro sin kixin ti itan mé éxi ijnko xrohi tsꞌinkaséñaxín ti sítie hasta tsjixrakájña ti ña̱o tsꞌinkaséña ti ó itsi ti konotsé tꞌinkaséñaxín ti nchítjen la tíha tsꞌinkaséñaxín a̱sánra. 20Méxra̱ imá tjetoan kixin chrókónohara tíhi: kixin ninkehó ti xroon itén Díos tsíkꞌóna, la jehó chojni chrókjuacha chróchronkaxín ti tan i. 21Náhí. Ti nkexro kꞌuéchronka itén Díos la nixjahya sin ti nkehe jehó sin kjuénka̱yáxin sin. Náhí. Jehe sin imá kuitekaon sin Díos a̱ndá ti Ncha̱kuén Díos mé kjuínki̱tsa nixja sin ti itén chꞌan.
Currently Selected:
2 Pedro 1: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
