1 Juan 4

Ti Ncha̱kuén Díos la ko ti nkexro nínkakohen Cristo

1Kíchóni, chrókuitekákuenhñara kaín ti nkexro ndáchro kixin chaxín chónta ti Ncha̱kuén Díos. Náhí. Ícha jína chrótsjehéra ti nkehe ichꞌe sin ndá chrókónohara á chaxín chónta sin ti Ncha̱kuén Díos o̱ náhí. Kixin ti chjasintajni la siín itsjé chojni xrichꞌia, ndáchro kixin nixja sin itén Díos. 2Mé xi̱kihi chrókónoaxinra kixin á chaxín chónta sin Ncha̱kuén Díos: kaín ti nkexro tsondáchro kixin Jesucristo mé chaxín ikui kꞌóna éxi ijnko chojni chjasintajni, mé tíha la chaxín chónta Ncha̱kuén Díos. 3A̱ndá ti nkexro tsondáchro kixin chaxínhña ikui Jesús, la ti nkexro a la chóntahya ti Ncha̱kuén Díos. La jehe sin mé chónta sin ncha̱kuén jínahña, ti nkexro nínkakohen Cristo. Jahara ó kuihínra kixin itsi ti ncha̱kuén jínahña, a̱ndá ijie ó ixri ntihi chjasintajni.

4Xje̱eni, jahara la ó xje̱en Díos, la ó kjuachehéra ti nkexro xrichꞌia, kixin ti Ncha̱kuén Díos chóntani la a̱ntsí chónta kjuachaxin ke ti Jínahña tꞌe̱to̱an ntihi chjasintajni. 5Jehe sin la chojni tjasin ijie̱, méxra̱ nixja sin ti nkehe kuènté chjasintajni. La kaín ti chojni chónta ijie̱ siín chjasintajni la tihin ti nkehe nixja sin xrichꞌia sin. 6A̱ndá jeheni la xje̱en Díos la kaín ti nkexro chóxin Díos la tihin sin ti nkehe chrónkani. A̱ndá ti nkexro jehya kuènté Díos mé tjinkakonhña sin tsihin sin ti nkehe chrónkani. Mé xi̱kaha tónoexíni nkexro ti chaxín chónta Ncha̱kuén Díos la ko ti nkexro chónta ncha̱kuén ti jínahña xrichꞌia.

Díos mé tjue̱he ti jeheni

7Kíchóni, chrótjue̱heni kíchóni, kixin ti tjue̱heni kíchóni la ti̱xi̱n ti itjen Díos. Kaín ti nkexro tjue̱he kícho mé xje̱en Díos, la ko chóxin Díos. 8Ti nkexro tjue̱hya kícho, la chóxinhña Díos kixin Díos la tjue̱he chojni. 9Díos la ó kjua̱ko̱xi̱n kixin chaxín tjue̱he ti jeheni kixin ichrꞌán chꞌan ti nkoko̱axón Xje̱en chꞌan ntihi chjasintajni kixin tsochóntaxíni ti kjuachón nkochríxín ti tsitekaoni ti xje̱en chꞌan. 10Ti tjue̱heni Díos la mé xi̱kihi: jehya jeheni kótjue̱heni Díos sa̱o. Náhí. Díos mé sa̱o kotjue̱he ti jeheni, la ichrꞌán chꞌan ti xje̱en chꞌan kꞌuenyákohe̱n ti jeheni kixin tso̱tjuáxin ti ijie̱ chóntani.

11Méxra̱, kíchóni, Díos la ó kjua̱ko̱xi̱n kixin imá tjue̱he ti jeheni, la kja̱xin jeheni chrótjue̱heni kíchóni kaín a̱séni. 12#Jn. 1:18.*Díos la ninkexró kꞌuíkonhña. A̱ndá ti jeheni tjue̱heni kíchóni la Díos tjejókoni, ndá tsjinki̱tsa chꞌan kixin chaxín tso̱tjue̱heni kíchóni. 13¿Xá nkexrín tso̱noexíni kixin tjejókoni Díos la ko jehe chꞌan itjen chꞌan ti tjejóni? Kixin jehe chꞌan la kjuajon chꞌan ti Ncha̱kuén chꞌan chóntani. 14A̱ndá jeheni la kꞌuíkoni la ko chrónkani kixin Itꞌéni Díos ichrꞌán chꞌan ti Xje̱en chꞌan kixin tsaáxin kaín ti chojni siín chjasintajni. 15Kaín ti nkexro tsitekaon kixin Jesús mé Xje̱en Díos la tjeko Díos la ko Díos itjen ti tjejó sin.

16Ndá xi̱kaha noheni la ko titekaoni kixin Díos la tjue̱he ti jeheni. Díos la nkochríxín tjue̱he chojni, la kaín ti nkexro tjue̱he kícho la tjejóko sin Díos la ko Díos tjeko ti jehe sin. 17Ndá xi̱kaha jeheni, ti chaxín tjue̱heni kíchóni la ko tjue̱heni Díos, la ti ó itsi ti ña̱o tsjixixín la tsochrakonhñani kixin kꞌuéjoni ntihi chjasintajni éxi kjuákꞌe Ìnchéni Jesucristo la ti xi̱kaha la kohya ninkehó kjuachrakon. 18Ti chaxín tjue̱heni Díos la kohya ninkehó kjuachrakon. Ti tjue̱heni Díos la tíha tsakítsje kaín ti kjuachrakon, kixin ti kjuachrakon la tjasótexín chojni. Méxra̱ ti nkojín chojni chrakon la chaxínhña kaín a̱sén tjue̱he Díos.

19Jeheni la tjue̱heni kíchóni la ko Díos kixin sa̱o Díos kjua̱ko̱xi̱n kixin tjue̱he ti jeheni. 20Ti nkojín nkexro ndáchro: “Janhan la tjua̱ha̱ Díos”, a̱ndá na̱xa̱ nínkakohen ti kícho, mé tíha la ijnko chojni chꞌia. Kixin ti nkexro tjue̱hya ti kícho kjónté tꞌikon, la nkexrín chrótjue̱hé sin Díos ti nunca kꞌuíkonhña sin. 21La Ìnchéni Jesucristo kꞌue̱to̱an kixin ti nkexro tjue̱he Díos la kja̱xin chrótjue̱hé sin kícho sin.

Currently Selected:

1 Juan 4: poeNTplus

Highlight

Copy