1 Juan 5

Ti titekaoni Díos la tsjachahya ti chjasintajni

1Kaín ti nkexro titekaon kixin Jesús mé ti Cristo, la jehe sin mé xje̱en Díos; la kaín ti nkexro tjue̱he ti itꞌé chꞌan mé kja̱xin tjue̱he ti xje̱en Díos. 2A̱ndá xi̱kaha ti tjue̱heni Díos la ko nchexiteyáni ti nkehe kꞌue̱to̱an chꞌan, la noheni kixin kja̱xin tjue̱heni ti nkexro kꞌóna xje̱en chꞌan. 3#Jn. 14:15.*Ti tjue̱heni Díos la ticháxi̱n sinchexiteyáni ti nkehe kꞌue̱to̱an chꞌan, a̱ndá ti nkehe kꞌue̱to̱an chꞌan la jehya ijnko nkehe imá ixra̱. 4Kixin kaín ti nkexro kꞌóna xje̱en Díos la tsjacha sin kixin tsjachròehya ti nkehe kuènté chjasintajni ti jehe sin. Ti tinkáchónkini Ìnchéni mé tsjachani kixin tsjachròehya ti jeheni ti nkehe kuènté chjasintajni. 5¿Xá nkexro tsjacha tsíto̱he ti nkehe kuènté chjasintajni, á jehya ti nkexro chaxín titekaon kixin Jesús mé Xje̱en Díos ní?

Ti nkehe chrónkaxín ncha̱kuén Díos

6Ti ó ikui Ìnchéni Jesucristo la kuikitexín chꞌan ìnta̱ la ti ó ikꞌuén chꞌan la kꞌuitjí ti ijni̱é chꞌan. A̱ndá ti ncha̱kuén Díos mé chronka tíhi la kaín ti nkehe chronka ti ncha̱kuén chꞌan la chaxín ndoa. 7Nkaya nka̱jní la iní nkexro tsochronka kixin chaxín tíhi: Itꞌéni Díos, ti itan, la ko ti Ncha̱kuén Díos, la ti iní sin la nkoko̱a nkexro tíha. 8La iní sin mé chronka ntihi chjasintajni kixin chaxín tíha: ti Ncha̱kuén Díos, ti ìnta̱ la ko ti ijni̱; iní tíhi mé nkokón chronka. 9Titekaoni ti nkehe chronka chojni, kjánchó a̱ntsí tjetoan ti nkehe chronka Díos, kixin tíha la chaxín Díos chrónka nkexrín itjen ti Xje̱en chꞌan. 10Ti nkexro titekaon ti Xje̱en Díos la titekaon sin ti nkehe chrónka chꞌan. A̱ndá ti nkexro titekakonhña Díos, la chꞌéna sin Díos éxi ijnko nkexro chꞌia, kixin titekakonhña sin ti nkehe chrónka Díos kuènté ti Xje̱en chꞌan. 11#Jn. 3:36.*A̱ndá tíhi ti nkehe chrónka Díos kixin tsjajon chꞌan ti kjuachón nkochríxín, a̱ndá ti kjuachón mé chónta ti Xje̱en chꞌan. 12Ti nkexro chónta ti Xje̱en Díos mé chónta ti kjuachón; a̱ndá ti nkexro chóntahya ti Xje̱en Díos la chóntahya ti kjuachón.

Chrónkaxín chꞌan kuènté ti kjuachón

13Kjinhara tíhi kixin tsitekáonra ti Xje̱en Díos, kixin tso̱nohara kixin chontara ti kjuachón nkochríxín.

14Tíhi chóxixíni Díos kixin ti nkehe tjancheheni chꞌan éxi tjinkaon chꞌan, la jehe chꞌan tjetihin chꞌan. 15A̱ndá ti chaxín noheni kixin Díos la tihin ti nixje̱he̱ni chꞌan, la kja̱xin noheni kixin chóntani ti nkehe kjuanchiani.

16Ti nkojinra, tsꞌikonra kixin ijnko kíchóni tjasin ijie̱ jehya chrókꞌuenxín chꞌan, la nixjehéra Díos kixin tsochjéhe chꞌan kjuachón ti kíchóni a. Chaxín siín ijie̱ tsꞌenxín chojni, la tíha la tjáncháhya kixin chrónixjehéra Díos kixin ti nkexro a. 17Kaín ti nkehe jínahña tjenka̱yáxin chojni la ijie̱ tíha, kjánchó jehya kaín ijie̱ tsꞌenxín chojni.

18Noheni kixin ti nkexro titekaon Díos la í tjenka̱yáxinhña ti nkehe nduáhya, kixin ti Xje̱en Díos, Jesucristo, la tsjinki̱tsa ti jehe sin, la ti Jínahña la í tsjachahya tsjachròe ti jehe sin.

19Kja̱xin noheni kixin ó kꞌónani xje̱en Díos, la kaín ti chojni siín chjasintajni la ti Jínahña tꞌe̱tue̱hen.

20La noheni kixin ti Xje̱en Díos la ikui chjasintajni, la nchenohe ti jeheni nkexrín tsochóxini ti Díos chaxín. La ijie tjejókoni ti nkexro chaxín, ti xje̱en chꞌan, Jesucristo. Mé tíha ti Díos chaxín la ko ti kjuachón nkochríxín. 21Xje̱eni, tinkachónkihyara ti nkehe tsíkjano̱ña, la xráxinkaonra ti Díos chaxín. Mé xi̱kaha tso̱hen. Ó tjen.

Currently Selected:

1 Juan 5: poeNTplus

Highlight

Copy