1 Juan 3

Ti sin xje̱en Díos

1 # Jn. 1:12. *Tsjehéra kixin Itꞌéni Díos la imá tjue̱he ti jeheni, la kjuajon chꞌan kjuachaxin itsꞌini xje̱en chꞌan, la chaxín tíha. La xi̱kaha ti chojni chjasintajni la chónhña ti jeheni kixin na̱xa̱ chónhña sin Díos. 2Mé xi̱kaha kíchóni, ó kꞌónani xje̱en Díos, kjánchó na̱xa̱ noehñani nkexrín tsꞌejóni ti ña̱o tsjixixín. Kjánchó noheni kixin ti ó itsi Ìnchéni Jesucristo la tso̱yóhe̱ni ti jehe chꞌan, kixin ti ña̱o a, la tsꞌikoni nkexrín itjen chꞌan. 3Kaín ti nkexro tjejóchóhen itsi Ìnchéni la chaxín chrókuíto̱he sin ti iji̱é sin kixin chrókótjóá sin éxi tjuáxin Ìnchéni.

4Kaín ti nkexro tjasin ijie̱ la nchexiteyáhya ti nkehe kꞌue̱to̱an Díos, kixin ti ijie̱ la ti sinchexiteyáhyani ti nkehe kꞌue̱to̱an chꞌan. 5#Jn. 1:29.*Kjánchó jahara ó nohara kixin Jesucristo la ikui kixin tsjatsìin ti iji̱éni, kixin jehe chꞌan la chóntahya chꞌan ninkehó ijie̱. 6Méxra̱ kaín ti nkexro tjejóko Díos la í tjasinhña sin ijie̱; a̱ndá kaín ti nkexro na̱xa̱ tjasin ijie̱ la chónhña sin Díos la ko tꞌikonhña sin chꞌan. 7Méxra̱ xje̱eni, chrókui̱to̱éhyara kixin ninkexró chrókjuitꞌayahara; kixin ti nkexro tja̱ko̱xi̱n ti nkehe jína la chojni jína tíha, kixin Ìnchéni la jína chꞌan. 8A̱ndá ti nkexro tjasin ijie̱ la mé kuènté ti Jínahña; kixin ti Jínahña la xráxín tjasin ijie̱ ndesi xránkíxixín chjasintajni. Méxra̱ ti Xje̱en Díos la ikui kixin sinchekꞌitjáña kaín ti ixra̱ kuènté ti Jínahña.

9Nijnko ti nkexro kꞌóna xje̱en Díos na̱xa̱ tjasin ijie̱, kixin ó chónta sin ti kjuachón kjuajon Díos; la í xrokjuahya tsjasin sin ijie̱ kixin jehe sin la ó xje̱en Díos. 10La xi̱kaha tjatso̱anxíni nkexro ti xje̱en Díos la ko nkexro ti xje̱en ti Jínahña, kixin ti nkexro nchexiteyáhya ti nkehe jína la ko tjue̱hya kícho mé jehya xje̱en Díos tíha.

Chrotjue̱heni kíchóni

11 # Jn. 13:34. *Tíhi ti itan kuihínra ndesi xránkíxixín, kixin nkojnkoni la chrótjue̱heni kíchóni. 12#Gn. 4:8.*Chrokꞌónahñani éxi Caín, kixin jehe chꞌan la kuènté ti Jínahña, kixin kꞌóñá chꞌan ti kícho chꞌan, Abel. Ndá, ¿nkekuènté kixin kꞌóñá chꞌan? Kixin ti nkehe kjuíchꞌe Caín la jínahña, a̱ndá kaín ti nkehe kjuíchꞌe Abel, la nkehe jína tíha.

13Kíchóni, chrókóxakuanhñara ti ó tso̱nínkakohanra ti chojni chjasintajni. 14#Jn. 5:24.*Jeheni la ó noheni kixin ó kjuixin kꞌuatsínkaxíni ti kjuachꞌén, la ó chóntani kjuachón, la noexíni tíha kixin ó tjue̱heni kíchóni. A̱ndá ti nkexro tjue̱hya kícho la na̱xa̱ tjejó éxi tsíkꞌen xi̱kaha. 15Kaín ti nkexro nínkakohen kícho la mé éxi ijnko chojni tsíkjàya, ndá jahara ó nohara kixin ti chojni tjàya la xrokjuahya tsochónta ti kjuachón nkochríxín. 16A̱ndá jeheni ó noheni nkexrín chrótjue̱heni kíchóni, kixin Ìnchéni Jesucristo la kjua̱ko̱xi̱n tíha, kjuajon chꞌan a̱sén chꞌan kꞌuenyákohe̱n chꞌan ti jeheni; la xi̱kaha kja̱xini ticháxi̱n tso̱tjue̱heni kíchóni kjónté chrókꞌuenyákohe̱ni ti jehe sin. 17Ti ijnko nkexro chónta itsjé nkehe, ndá tꞌikon kixin ijnko nkexro chóntahya ninkehó, la ndá tsi̱konòehña la, ¿nkexrín chróndáchro kixin tjue̱he Díos kaín a̱sén? 18Xje̱eni, jehya irꞌuani ó chróndáchro kixin tjue̱heni kíchóni ndá chaxínhña. Náhí. Ticháxi̱n chrókjua̱ko̱xi̱ni kixin chaxín jína tjue̱heni sin la ko tsjinki̱tsani sin.

19Mé xi̱kaha tso̱noexíni kixin chaxín tinkáchónkini Díos, la ko tónoheni kixin chaxín tjejókoni chꞌan. 20A̱ndá ti a̱séni na̱xa̱ tjanchia ijie̱, la noheni kixin Díos la a̱ntsí chónta kjuachaxin ke ti a̱séni kixin jehe chꞌan la nohe chꞌan kaín nkehe. 21Mé xi̱kaha kíchóni, ti a̱séni tjanchahya ijie̱, la chaxín jína tso̱chjinani ti itjen Díos, 22la Díos tsjajon kaín ti nkehe tjancheheni, kixin nchexiteyáni ti nkehe kꞌue̱to̱an chꞌan la ko tjejóchꞌeni ti nkehe tóxríhi̱n chꞌan. 23#Jn. 13:34; 15:12, 17.*Ndá tíhi ti nkehe kꞌue̱to̱an chꞌan: kixin chrókuitekaoni ti Xje̱en chꞌan Jesucristo, la ko chrótjue̱heni kíchóni éxi kjuako chꞌan. 24Ti nkexro nchexiteyá ti nkehe kꞌue̱to̱an Díos mé tjejóko sin chꞌan, la ko jehe chꞌan tjejóko chꞌan ti jehe sin. Mé xi̱kaha noheni kixin tjejókoni chꞌan kixin ti Ncha̱kuén chꞌan kꞌuáyéhe̱ni.

Currently Selected:

1 Juan 3: poeNTplus

Highlight

Copy