1 Juan 2

Cristo tsonixjayákohe̱n ti jeheni

1Xje̱eni, ikjian ti xroon i, tsꞌayéhéra kixin chrókjuásinhñara ijie̱. A̱ndá ti nkojín nkexro kjuasin ijie̱ la chóntani ijnko nkexro tsonixjayákohe̱n ti jeheni nkayakon Díos, tíha mé Jesucristo, ti nkexro chaxín jína la ko ndoá. 2Jesucristo mé kꞌuenyákohe̱n chꞌan ti jeheni kixin ijni̱é chꞌan mé tsjìixín ti iji̱éni; la jehya jehó ti iji̱éni. Náhí. Kja̱xin iji̱é kaín ti chojni siín chjasintajni.

3Ti tsitekaoni ti nkehe kꞌue̱to̱an Díos, ndá chaxín tso̱noheni kixin chóxini ti jehe chꞌan. 4A̱ndá ti nkojín nkexro tsondáchro: “Janhan la choxián Díos”, a̱ndá ti titekakonhña ti nkehe kꞌue̱to̱an Díos, la mé chꞌia la ko noehña ti nkehe chaxín. 5A̱ndá ti nkexro nchexiteyá ti nkehe kꞌue̱to̱an Díos la chaxín tjue̱he Díos; mé xi̱kaha noheni kixin chaxín nkoko̱a tjejókoni chꞌan. 6Ti nkexro ndáchro kixin chaxín tinkáchónki Díos la chrókjuákꞌe éxi kjuákꞌe Jesucristo.

Ti nkehe ni̱xin kꞌue̱to̱an Díos

7 # Jn. 13:34. *Kíchóni, ti nkehe ikjian, la jehya ijnko nkehe ni̱xin. Náhí. Tíhi mé ti itan kuihínra ndesi kjuankíxixínra kuinkachónkira Ìnchéni. Ti nkehe kꞌue̱to̱an Díos i, la ó xráxín itjen, mé ti nkehe ó xráxín kuihínra. 8Kjánchó ti nkehe ikjian la éxi ijnko nkehe ni̱xin. Tíhi la chaxín kjua̱ko̱xi̱n Cristo, la ko kja̱xinra tjáko̱xinra tíhi kixin ti sítie la ó tinkákꞌatsínka, kixin ijie la ti xrohi chaxín mé tꞌinkaséñaxín.

9Ti nkexro ndáchro kixin ixri ti tꞌinkaséña, ndá na̱xa̱ nínkakohen kícho, la na̱xa̱ ixri ti sítie. 10Ti nkexro tjue̱he kícho mé itjen ti tꞌinkaséña, la í kohya nkehe chrókjuasixín ijie̱. 11A̱ndá ti nkexro nínkakohen kícho mé na̱xa̱ ixri ti sítie, la noehña nketí sátsji kixin ti sítie la tjajonhña kjuachaxin tsꞌikon.

12Jahara chájan, kjinhara ti xroon i kixin tso̱nohara kixin Díos la ó kꞌóxika ti iji̱ára kixin Ìnchéni Jesucristo kꞌuenyákohe̱n ti jeheni. 13Jahara itꞌé xjan, kjinhara ti xroon i kixin jahara ó choxínra ti nkexro itjen ti xránkíxixín. Kjinhara tíhi, jahara ntasoíra, kixin kaín a̱sánra kjuachehéra ti Jínahña la í kjuachahya kꞌue̱tua̱hanra.

Ikjian ti xroon i tsꞌayéhéra, jahara chájan, kixin choxínra Itꞌéni Díos. 14Ikjian ti xroon i tsihínra jahara itꞌé xjan, kixin ó choxínra ti nkexro xráxín kꞌuékjakꞌe ti na̱xa̱ kꞌónahña chjasintajni. Ikjian ti xroon i tsihínra jahara na̱xa̱ ntasoara kixin na̱xa̱ fuertera la ko titekáonra ti itén Díos, la ko kaín a̱sánra ó kjuachara, kjui̱nchexiteyéhyara ti Jínahña.

15Chrotjue̱hyara ti chjasintajni la ko ti nkehe chónta. Ti nkojín nkexro na̱xa̱ tjinkaon ti nkehe siín chjasintajni, la na̱xa̱ chaxínhña tjue̱he sin Itꞌéni Díos. 16Kixin ninkehó ti nkehe chroxi chjasintajni la kui̱xi̱nhña ti itjen Díos. Ti nkehe kuènté chjasintajni mé tíhi; ti nkehe jínahña tjenka̱yáxin chojni, ti tjakꞌe chojni a̱sén ti nkehe tꞌikon, la ko ti kjuahnke chónta chojni kixin chónta itsjé nkehe tjete. 17Ti chjasintajni la tsinkákjeje̱ la ko ti nkehe jínahña chroxi; a̱ndá ti nkexro nchexiteyá ti nkehe tjinkaon Díos mé tsjakꞌe nkochríxín.

Ti chojni xrichꞌia ndáchro kixin jehe mé Cristo

18Xje̱eni, ó kuichjina ti ña̱o tsjixixín, la ó kuihínra kixin itsi ijnko chojni jínahña tsondáchro kixin jehe mé ti Cristo. A̱ndá ijie la ó sítinkáki nchónhña ti chojni nínkakohen Cristo, mé xi̱kaha noexíni kixin ó kuichjina ti ña̱o tsjixixín. 19Jehe sin mé kꞌuaxrjekjaxín sin ti jeheni; la chaxínhña kuinkáchónki sin Ìnchéni. Kixin ti chrókóchaxín chrókuinkáchónki sin ti nkexro tinkáchónkini la kjá chrókꞌuaxrjekjanxínhña sin ti jeheni, la na̱xa̱ chrókꞌuejókoni sin nkoko̱a. A̱ndá xi̱kaha kjua̱ko̱xi̱n sin kixin jehe sin la jehya chojni chaxín tinkáchónki Ìnchéni.

20A̱ndá jahara, la Cristo tjáhara ti Ncha̱kuén chꞌan, la kaínra nohara ti nkehe chaxín jína. 21Jehya ikjian ti xroon i tsihínra kixin noahñara. Náhí, jahara la ó nohara ti nkehe chaxín la nohara kixin nijnko kjuachꞌia ti̱xi̱nhña ti nkehe chaxín jína.

22¿Xá nkexro ti chꞌia? ¿Xá jehya ti nkexro titekakonhña kixin Jesús mé Cristo ní? Mé tíha la ti nkexro nínkakohen Cristo, ti nkexro titekakuenhña Itꞌéni Díos la ko ti Xje̱en. 23Kaín ti nkexro titekakonhña ti Xje̱en Díos la chóntahya sin Itꞌéni Díos, a̱ndá ti nkexro chronka kixin tíha mé chaxín Xje̱en Díos la kja̱xin chónta sin Itꞌéni Díos.

24Méxra̱ kaín a̱sánra chrókuitekáonra ti itan kuihínra ti xránkíxixín, la chrókꞌuitjáñahñara tíha nkochríxín. Kixin ti kaín a̱sánra titekáonra ti nkehe kuihínra la chaxín nkoko̱a tjejoko̱ara ti Xje̱en Díos la ko ti Itꞌé chꞌan. 25Kixin Ìnchéni Jesucristo ndáchro kixin tsjajon ti kjuachón nkochríxín tsꞌáyéhe̱ni.

26Mé xi̱kaha ikjian ti xroon i kixin chrókónohara kuènté ti sin tjenka̱yáxin sitꞌayahara. 27A̱ndá jahara la ó chontara ti Ncha̱kuén Díos kjuajon Jesucristo, ndá xi̱kaha í ticháxi̱nhña íjnko chojni chrókjuákohara, kixin ti Ncha̱kuén Díos mé tsja̱ko̱hara kaín nkehe, la ko tíha tjako ti nkehe chaxín jína la jehya kjuachꞌia. Méxra̱ ti̱toéhyara Cristo tꞌejoko̱ara chꞌan nkoko̱a éxi tjako ti Ncha̱kuén chꞌan.

28A̱ndá ijie, xje̱eni, ti̱toéhyara Ìnchéni, tꞌejoko̱ara chꞌan nkoko̱a, kixin ti ó itsi chꞌan la chrókósuèhyani chrókóchjineheni chꞌan kixin chaxín chóxini chꞌan. 29Ti nohara kixin Jesucristo mé ijnko nkexro imá jína, la xi̱kaha chrókónohara kixin kaín ti nkexro nchexiteyá ti nkehe jína mé xje̱en Díos tíha.

Currently Selected:

1 Juan 2: poeNTplus

Highlight

Copy