Romanos 10
10
1Jaꞌa ra xro choo ná, jaꞌan nthatsaan ñao Ndo Dio ko rinaꞌo ixin kainxin chujni Israel sitjañeꞌe na̱ thi jianꞌa bincheꞌe na̱ ko rukjan na̱ inaa chujni narua ko xruꞌin nchaꞌon tsjexin. 2Ko jaꞌan nchao rundachrjan ixin jeꞌe na̱ anto rinao na̱ sinchesayeꞌe Ndo Dio, aro nueꞌa na̱ kexreen. 3Ixin jeꞌe na̱ juinaoꞌa na̱ bithikaon na̱ kexreen Ndo Dio nchetjañeꞌe ndo chujni. Jeꞌo na̱ kjuee na̱ kexreen sitjañenxin na̱ ngathexin kon ndo, ko bithikaonꞌa na̱ thi bincheꞌe ndo ixin rugitjañenxin na̱. 4Ko Cristo juii ixin jeꞌe bincheꞌe kain thi thetuꞌan ley ko jañaa xethja ley. Ko jai ixin jeꞌo dithikaon ni jian ngain Cristo te ná ngathexin kon Ndo Dio.
5Ko Moisés dikji̱n ixin kexreen chujni runcheꞌe thi ndachro ley: “Chujni sithikaon kain thi ndachro ley sinthechon na̱ kainxin nchaꞌon.” 6Aro jaꞌan ná kjan ná jian chujni ngathexin kon Ndo Dio ixin chunthia ná ngain ndo, ko juajnee ndo ndachro jaꞌin: “Ndachroꞌa ngathe ansean: ¿Kensen tsajiin ngajni? —jiꞌi ruchro ixin sinchexinkajin ra Jesucristo—; 7ko kai ndachroꞌa ra: ¿Kensen ruxinkajin ngain thi te ni ndadigeꞌen?” —jiꞌi ruchro ixin sinchekajiin ra Cristo ngayee ni ndadigeꞌen. 8¿Keꞌe ruchro jiꞌi? “Jiꞌi ruchro ixin Thee Ndo Dio chiaon jii ngajin ixin ujii ngain ruꞌa ko ngain ansean.” Ko juajna jiꞌi thi chunthia ná ko nichja ná. 9Ja̱ rundachro kunixin ruꞌa ixin Jesucristo Nchaa ko ngain ansean sithikaon ixin Ndo Dio binchexechon Jesucristo ngayee ni ndadigeꞌen, jamee jaꞌa rukjan inaa chujni narua. 10Ixin anseen ni dithikaunxin ni ixin Ndo Dio nchekjan ni jian chujni, aro ixin ruꞌa ni rundachruxin ni ixin batsuan ni Jesucristo, ixin jañaa rukjan ni inaa chujni narua.
11Ngain Xruen Ndo Dio ndachro: “Chujni chunthia ngain Jesucristo, jeꞌe tsajandaꞌa satho na̱ juasuaxin.” 12Ixin ni judío ko ni jeꞌa judío xrajeꞌo renthe na̱ ngathexin kon Ndo Dio ixin nakua Nchaa ná kain ná, ko anto nchenchaon ndo kain ni nichjayee ndo. 13Ixin jaꞌin ndachro ngain Xruen Ndo Dio: “Kainxin chujni runichjayee Nchaa ná Jesús sitjanꞌa na̱.” 14Aro, ¿kexreen chujni nchao runichjayee na̱ Nchaa ná Jesús ja̱ xra dithikaonꞌa na̱ ngain? ¿Ko kexreen nchao sithikaon na̱ ngain Nchaa ná Jesús ja̱ xra xruꞌin kuiꞌin na̱ ixin jeꞌe? ¿Ko kexreen tsiꞌin na̱, ja̱ xruꞌin chujni nichja juajnee Jesucristo? 15¿Ko kexreen tsji chujni sindache icha chujni juajna jiꞌi, ja̱ xruꞌin kensen ruaꞌan na̱? Inchin jitaxin ngain Xruen Ndo Dio: “¡Anto chrjuin dikon ni are thii thi chujni thiaꞌo juajnee Ndo Dio!”
16Aro kainxinꞌa chujni bithikaon thi jian juajna nchekjan ni inaa chujni narua. Inchin ndachro profeta Isaías: “¿Kensen kuiꞌin ko bithikaon juajna kuekin ná?” 17Mexinxin chujni chunthia ngain Ndo Dio ixin thiꞌin na̱ juajnee Jesucristo.
18Aro jaꞌon danchiangi ngathe ansenna: ¿Anduaxin chujni Israel kuinꞌa na̱ juajnee Jesucristo? ¡Jaan ndua, kuiꞌin na̱! Ixin ngain xruen Ndo Dio ndachro:
Juajna jiꞌi kuiꞌin na̱ nguixin ngataꞌa nunthe,
ko juajna jiꞌi biji thi thjexinxin nunthe.
19Aro jaꞌan xradanchiangi inaa: ¿A chujni Israel kuinxinꞌa na̱ juajna jiꞌi? Ixin are saꞌo Ndo Dio nichjaxin thee Moisés ko ndachro ndo:
Jaꞌan sinthakunchjiigo ra ixin naa rajnanchjan rentheꞌa;
ko jaꞌan sinthaꞌa ixin suñao ra ngain naa rajna thinxinꞌa.
20Kuthimejan Ndo Dio nichjaxin thee profeta Isaías ko ndachro ndo:
Chujni kjueꞌa na̱ jaꞌan, chujni mee ni bithja na;
ko jaꞌan xraago na ngain chujni banchiangiꞌa ixin jaꞌan.
21Ko Ndo Dio nichja inaa ixin thee Isaías ko ndachro ndo ixin Israel: “Nguixin nchaꞌon binaꞌo rukjengijna rajna Israel, thi rajna dithikaonꞌa ko thinxinꞌa.”
© 2017, Wycliffe Bible Translators, Inc. All rights reserved.