Romanos 11
11
Thuꞌa ni Israel kjan inaa chujni narua
1Mexinxin jai jaꞌan danchiangi: ¿A Ndo Dio ibinaoꞌa chujnii, chujni Israel? ¡Naꞌi!, ixin jaꞌan kai naa chujni Israel na. Ixin ni nia bachrjeninxin na̱ chujnii Benjamin ko Benjamin kai bachrjeninxin chujnii Abraham. 2Ndo Dio ndachroꞌa ixin ijuinaoꞌa chujni Israel, chujnii jeꞌe, chujni batsuan saꞌo. ¿A nuaꞌa ra thi ndachro Xruen Ndo Dio are Elías nichjayee ndo ko kjuangi ngain ndo thi bincheꞌe chujni Israel? Ko ndachro: 3“Chujni Israel naguenxon na̱ kain ni bagayee juajnaa ko ndakunxanthe na̱ kain xro thi bachetaxin kuxiigo bakusayaxin Suixin. Ko jeꞌo jaꞌan bithuna, aro jeꞌe na̱ rinao na̱ nasuenxon na na̱ kai.” 4Aro Ndo Dio ndachro: “Jaꞌan bantsjenda yaato no̱ xii xra juinchesayeꞌa diuchjan diꞌin Baal.” 5Ko xrajeꞌo jituꞌen jai kai. Ndo Dio kuinchieꞌe inchin chujni Israel ixin Ndo Dio anto jian ndo. 6Jaꞌan ndachrjan jiꞌi ixin Ndo Dio kuinchieꞌe ndo na̱ ixin jian ndo ko anto thjueꞌe ndo na̱. Ko jeꞌa ixin ndua runcheꞌe na̱ thi jian ixin ja̱ jian runcheꞌe na̱, nduaxin thi anto thjueꞌe ndo na̱ xruꞌin rukurenthe ko ixruꞌin runchetjañeꞌe ndo na̱.
7¿Mee jai keꞌe kuꞌen? Chujni Israel bithjaꞌa na̱ thi kjuee na̱, aro chujni Ndo Dio kuinchieꞌe, ni mee ni bithja thi jian chunda ndo. Ko ni icha banchecha na̱ anseen na̱. 8Inchin ndachro ngain Xruen Ndo Dio: “Ndo Dio banchecha anseen na̱, ko makon na̱ idikonꞌa ko ndatsjuen na̱ xruꞌin thiꞌin, ko xra jiꞌi tuꞌen na̱ jai.” 9Kai David ndachro:
Ko thi kiai nchechjian na̱
rukjan xraa naa thi rukjatjabeꞌo na̱ xraa nunchaꞌa,
o xraa xro tsunthengixin na̱ ko setan na̱ tangi.
10Ko makon na̱ tsunaxiꞌin xeꞌe ixin isikonꞌa na̱,
ko anto tangi sathuꞌe na̱
ko sakji na̱ xraa chujni anto ye jiyama.
Chujni jeꞌa judío nchao rukjan inaa chujni narua
11Jai jaꞌan danchiangi: Chujni judío betsinga, ¿a ko singathjenꞌa na̱ inaa? Aro ixin bithikaonꞌa ni judío, jai chujni jeꞌa judío nchao rukjan na̱ inaa chujni narua. Ko ni Israel tsunchjiigo na̱ ko jañaa rukjan na̱ tsjee na̱ Ndo Dio. 12Ko ixin chujni judío bithikaonꞌa, kain chujni ngataꞌa nunthe Ndo Dio kjuengijna na̱, ko ixin bithikaonꞌa ni judío icha jian kjuiꞌi ni jeꞌa judío, ¡ko icha jian tsjiꞌi ni sithikaon Ndo Dio are ni judío rukjan na̱ sithikaon na̱ inaa!
13Aro jaꞌan rinaꞌo rundathjo ra jaꞌa ra xro jeꞌa judío ra: Ixin Ndo Dio chjana xra ixin tsjiꞌan juajnee Jesucristo ngain chujni jeꞌa judío, mexinxin jaꞌan chaꞌna nthaꞌa xra jiꞌi, ko anto renthe xra. 14Ko kai rinaꞌo ixin xra jiꞌi kanxion ni chujnina, ni judío, tsunchjiigo na̱ ixin jaꞌa ra, ko sinao na̱ rukjan na̱ inaa chujni narua. 15Ko ixin Ndo Dio kuinthuꞌe ni judío, jañaa bayéxin ndo chujni jeꞌa judío. Mexinxin, ¿keꞌe tsuꞌen are Ndo Dio sayée chujni judío inaa? Yaa ruchro ixin chujni xraa ndadigeꞌen na̱ ixin thi jianꞌa bincheꞌe na̱, aro jai xraa xechon na̱ inaa. 16Ja̱ naa chujni nchekininxin ngain Ndo Dio rioꞌo nchue niuthja dikunchaon, kai nguii ncho bithuꞌe dikunchaon ncho. Kai ja̱ naa nuꞌe nthaa dikunchaon, kai kain chaan ntha udikunchaon.
17Jai nua ná jian ixin thuꞌa chaan ntha olivo najni ndachrijin, ko jaꞌa ra xraa naa ntha olivo duanka ngataon jngi, Ndo Dio juinthatsenito ra ngain thi chrijinxin ntha olivo najni, ko jai techunxin ra jinda thjinxin ngain nueꞌe ntha olivo najni. 18Aro xraxaonꞌa ra ixin icha jian ra ke chaan ntha bechundaxon ntha. Ja̱ taꞌin ñao ra, xraxaon ra jian ixin jeꞌa jaꞌa ra thi dajon ra thi jichunxin nueꞌe ntha olivo najni, ixin nueꞌe ntha olivo najni techunxin ra jaꞌa ra.
19Ja̱ rundachro ra: “Chrijin kanxion chaan ntha ixin Ndo Dio juinthatsenito ná.” 20Ko ndua jiꞌi kuꞌen ixin jeꞌe na̱ bachrjenda na̱ ko bithikaonꞌa na̱ Ndo Dio, aro jaꞌa ra te ra ngain ndo jeꞌo ixin chunthia ra ndo. Mexinxin tainꞌa ñao ra ko tsjeꞌe ra kexreen dakji ra. 21Ja̱ Ndo Dio binchetjañeꞌa chujni judío, thi kjui inchin naa chaan ntha olivo najni, kai jaꞌa ra sinthatjañaꞌa ra ja̱ sithikaonꞌa ra ngain Jesucristo. 22Thiꞌin ra, Ndo Dio anto jian ndo, aro kai rinao ndo ixin sithikaon ra kain thi ndachro ndo. Jeꞌe ndo nchegetan ndo tangi thi ni bithikaonꞌa, aro jeꞌe ndo anto jian ndo ngajin ra. Aro rugunda ixin jaꞌa ra sithikaon ra ngain ndo kain nchaꞌon. Ja̱ sithikaonꞌa ra kai ruchrijin ra inchin chaan ntha olivo najni. 23Ko kai chujni judío, ja̱ rukjan na̱ sithikaon na̱ inaa, Ndo Dio sinchetsexin na̱ xraa naa chaan ntha olivo ixin Ndo Dio chunda ndo juachaxin sinchetsexin na̱ inaa. 24Ixin jaꞌa ra xro jeꞌa judío ra, kjui ra xraa naa chaan ntha olivo duanka ngataon jngi, aro Ndo Dio juinthatsexin ra nganito ntha olivo najni. Ko chujni judío icha tangiꞌa rutsexin na̱ inaa ixin yaa chrijinxin na̱.
Ndo Dio tsjengijna chujni Israel
25Kain ra xro dithikaon ra Jesucristo, jaꞌan rinaꞌo ixin jaꞌa ra tsunuꞌa ra thi bema are usee, aro jai rinaꞌo tsunuꞌa ra mee ixin jañaa tsainꞌa ñao ra. Ko mee ruchro: Tsjé chujni judío dithikaonꞌa na̱ Jesucristo jai, ko xra jañaa sincheꞌe na̱, sithikaunja tsjé chujni jeꞌa judío. 26Kuthimejan kainxin chujni Israel rukjan na̱ inaa chujni narua, inchin ndachro ngain Xruen Ndo Dio:
Thi tsjengijna na̱ tsixin rajna Sión,
ko sinchetjaneꞌe kain thi jianꞌa bincheꞌe rajna Israel.
27Ko jiꞌi thi kjuauthexin ixin sinthaꞌa,
are jaꞌan sinthatjañaa na̱ kain thi jianꞌa bincheꞌe na̱.
28Chujni judío dithikaonꞌa na̱ thi jian juajnee Jesucristo, mexinxin Ndo Dio xraa ningakuꞌen ni teꞌi. Aro ixin ni teꞌi dithikaonꞌa na̱, jaꞌa ra xranchao sithikaon ra thi jian juajnee Jesucristo. Aro Ndo Dio xra thjueꞌe chujni judío ixin kuinchieꞌe ndo ni xranchjeꞌen na̱. 29Ko thi dajon Ndo Dio jeꞌe ndo xruꞌin nchaꞌon rukjan sanchia ndo, ko rutjañeꞌa ndo chujnii ndo, chujni kuinchieꞌe ndo. 30Are icha saꞌo jaꞌa ra kai bagithikaonꞌa ra Ndo Dio, aro jai ixin chujni judío bithikaonꞌa na̱ ndo, mexinxin kuiakunuaꞌa ra ndo. 31Ko jañaa inchin jaꞌa ra bithikaonꞌa ra, jai jeꞌe na̱ kai dithikaonꞌa na̱, aro inchin kuiakunuaꞌa ra Ndo Dio, jamee tsiakunueꞌe ndo na̱ kai. 32Ixin Ndo Dio kuanchrjanda ndo ixin kain na̱ bithikaonꞌa na̱ ngain ndo, ixin jañaa nchao kuiakunueꞌe ndo kain na̱.
33¡Anto jié ko renthe thi nuꞌe Ndo Dio ko thi chunxin ndo! Xruꞌin kensen nchao rundachro thi rinao ndo sincheꞌe ndo; kai xruꞌin kensen tsinxin nthiee ndo. 34Inchin jitaxin ngain Xruen Ndo Dio: “¿Kensen kuinxin thi xraxaon Ndo Dio? ¿Ko kensen rundache Ndo Dio thi sincheꞌe ndo? 35¿Ko kensen saꞌo bajon chrujan ngain Ndo Dio ixin jeꞌe ndo kai rukjan ndo sajon ndo inaa?” 36Ixin kainxin thi jii, Ndo Dio binchechjian, ko kain kunchjian ixin jeꞌe ndo ko kain thi jii sinchesayeꞌe ndo. ¡Mexinxin kain ná sinthusayeꞌe ná ndo kainxin nchaꞌon! Jañaa tsuꞌen.
© 2017, Wycliffe Bible Translators, Inc. All rights reserved.