Romanos 9
9
Ndo Dio thi kuinchieꞌe chujni Israel
1Jaꞌan rindachrjan thi ndua ko xruꞌin rinthaaya ixin ngathe ansenna Espíritu Santo jindachjejin na ixin jiꞌi jaan ndua. 2Ko anto jié juachjaon chunda ngain ansenna kainxin nchaꞌon. 3Ko jaꞌan rujinaꞌo rugetsingataꞌa na thi jianꞌa ko rugariꞌa ngain Jesucristo ja̱ mee nchao rukjengijna kain ni judío ixin ruginthe na̱ ngain Ndo Dio. 4Chujni bachrjeninxin Israel, Ndo Dio bayée chujni teꞌi xraa xeꞌen ndo, ko anto chrjuin ixin jeꞌe ndo bengayee ndo na̱ kunixin kain juachaxiin ndo, ko jeꞌe ndo kjuauthexin ndo na̱, ko bajon ndo ley, ko bajon ndo juachaxin ixin jeꞌe na̱ runchesayeꞌe na̱ ndo ko bajon ndo juachaxin sayée na̱ kain thi ndachro ndo rugajon ndo. 5Ko kain chujni Israel bachrjeninxin na̱ ni ndo dachriꞌa ná xrachrjen. Ko kai Cristo bachrjeninxin ni teꞌi are jeꞌe guan ngataꞌa nunthe jiꞌi, ko jeꞌe Dio kai ixin thetuꞌan kainxin thi dukon ná, mexinxin jeꞌe jikininxin tsusayeꞌe kainxin nchaꞌon. Jañaa tsuꞌen.
6Ko rindachrjanꞌa ixin ibayeꞌa na̱ thi ndachro ndo rugajon ndo ngain na̱, ixin jeꞌa kainxin chujni bachrjeninxin chujni Israel nduaxin chujnii Israel. 7Kai kainxinꞌa chujni bachrjeninxin Abraham nduaxin kjui chujnii Abraham, ixin Ndo Dio undachro ndo ngain Abraham: “Ngain xaꞌan Isaac sachrjeninxin chujnia.” 8Ko jiꞌi tjagua ná ke jeꞌa ixin sachrjeninxinja ná Abraham rukjan ná xeꞌen Ndo Dio; jeꞌo chujni dithikaon thi ndachro ndo, ni mee xeꞌen ndo ixin jañaa ndachro ndo ngain Abraham. 9Ko ndachro ndo ixin jaꞌin rugikuꞌen ngain Abraham: “Nthiꞌi nano rukjan na inaa ko nchrichriꞌa Sara ruchunda nchra naa chjan.”
10Ko jeoꞌa jiꞌi. Kayui xeꞌen Rebeca chunda xan nakua ndudee xan, ko ndudee xan, diꞌin Isaac ko kjui ndo xrachrjeꞌan ná. 11Ko are xraduanꞌa kayui xan ko xraxruꞌin thi jian ko thi jianꞌa binthencheꞌe xan, Ndo Dio xraago ixin chunda ndo juachaxin thinchieꞌe ndo chujni rinao ndo, 12ko thinchieꞌa ndo chujni ixin thi ncheꞌe na̱. Jeꞌe ndo thinchieꞌe ndo thi ni jeꞌe ndo rinao ndo. Ko jeꞌe ndo ndachro ndo ngain Rebeca: “Thi xan saꞌo suan, rukjan xan ni ncheꞌe xree xan yuxin suan.” 13Ko jaꞌin ndachro ngain Xruen Ndo Dio: “Jaꞌan kuinchiaa Jacob ko jeꞌa Esaú.”
14Mexinxin ¿keꞌe rundachro ná? ¿A rundachro ná ixin Ndo Dio ncheꞌa inchin jikininxin? ¡Naꞌi! 15Ixin Ndo Dio ndachro ngain Moisés: “Jaꞌan tsiakunuaa chujni jaꞌan rinaꞌo, ko tsjengijna chujni jaꞌan rinaꞌo.” 16Mexinxin Ndo Dio tsiakunueꞌa chujni xraxaon ixin anto jian ncheꞌe. Jeꞌe ndo thiakunueꞌe ndo thi chujni jeꞌe ndo rinao ndo. 17Inchin jitaxin thi ndachro Ndo Dio ngain Faraón: “Jaꞌan chjaꞌa juachaxin kjan rey ixin tsjaago juachaxin chunda jaꞌan ixin jañaa kainxin chujni jii ngataꞌa nunthe tsunuꞌe na̱ thi jaꞌan nthaꞌa.” 18Mexinxin Ndo Dio tsiakunueꞌe chujni jeꞌe ndo rinao ndo ko jeꞌe ndo sinchecha ndo anseen chujni jeꞌe ndo rinao ndo.
19Aro jaꞌa rundachjejin na: “¿Unda Ndo Dio xradankataꞌa chujni thi jianꞌa ncheꞌe na̱? ko ¿kensen nchao rukayakuen ndo ixin sincheꞌe ndo thi jeꞌe ndo rinao ndo?” 20Aro, ¿kensen jaꞌa ixin danchiangiꞌi Ndo Dio ixin thi ncheꞌe ndo? ¿A naa chi nchao rundachro chi ngain thi binchechjian chi: “Unda jaꞌa jañaa binchechjian na”? 21Ixin thi nchechjian chi kunixin nchethjaꞌo chunda juachaxin sincheꞌe inchin jeꞌe rinao. Jeꞌe nchao sundeꞌe xrajeꞌo nchethjaꞌo sinchechjianxin naa chi chrjuin ko inaa chi chrjuinꞌa.
22Ko Ndo Dio binao rukjaago kexreen duñao ndo ko kexreen ncheꞌe ndo jie̱, ko rukjaago thi jié juachaxin chunda ndo, aro jeꞌe ndo anto kuixiꞌin ndo ngain chujni jianꞌa, thi chujni bikininxin rugueꞌen jie̱ ko rukji ngathe xruꞌi. 23Ko jiꞌi bincheꞌe ndo ixin kjuaguxin ndo thi anto chrjuin jii thi jii ndo, ko jeꞌe ndo kuiakunua ná ndo ko kuinchiaa ná ndo ko binthakjan ná ndo chujni narua ixin sunthe ná ngain ndo. 24Ko Ndo Dio baya̱a ná ndo jaꞌan ná, xro judío ná, kunixin jaꞌa ra xro jeꞌa judío ra. 25Inchin ndachro ngain Xruen Ndo Dio thi dikji̱n Oseas:
Rajna jeꞌa rajnana sinthagiꞌin rajnana,
ko rajna bathjuaꞌa, ruthjuaa rajna.
26Ko ngain rajna ndachrjan: “Jaꞌa ra jeꞌa chujnina ra”,
nthi̱ꞌa̱ sinxin ra xeꞌen Ndo Dio, ndo jichon.
27Ko profeta Isaías ndachro ixin chujni Israel: “Maski chujni bachrjeninxin Israel tsutsjé na̱ inchin nchiise jii ngandeꞌe ndachaon, aro jeꞌo thuꞌa na̱ rukjan na̱ inaa chujni narua ngain Ndo Dio, 28ixin Ndo Dio sincheꞌe ndo jie̱ nguixin ngataꞌa nunthe inchin undachro ndo.” 29Ko inchin ndachro Isaías are saꞌo ngain Xruen Ndo Dio:
Ja̱ Ndo Dio, thi chunda kain juachaxin, rukanchrjanda rugeꞌen kain chujni Israel, jaꞌan ná rugunthe ná xraa rajna Sodoma ko Gomorra.
Chujni judío bithikaonꞌa na̱ thi jian juajna
30Mexinxin, ¿keꞌe icha rundachro ná? Rundachro ná ixin chujni jeꞌa judío kjueꞌa na̱ kexreen ruginthe na̱ jian ngathexin kon Ndo Dio. Aro Ndo Dio baye̱e na̱ inchin chujni jian jeꞌo ixin bithikaon na̱ ngain ndo. 31Aro chujni Israel binao na̱ ruginthe na̱ jian ngathexin kon Ndo Dio ixin jeꞌo binao na̱ rugithikaon na̱ ley aro chroꞌa bincheꞌe na̱ thi thetuꞌan ley, mexinxin Ndo Dio bayéꞌa na̱. 32¿Unda chroꞌa binthe na̱ jian ngathexin kon Ndo Dio? Ixin jeꞌe na̱ chunthiaꞌa na̱ ngain Ndo Dio ko jeꞌo chunthia na̱ ngain thi bancheꞌe na̱. “Mexinxin jeꞌe na̱ kunthengixin na̱ xro, ko xro mee Cristo” 33inchin jitaxin ngain Xruen Ndo Dio:
Jaꞌan tsiin ngain rajna Jerusalén naa xro tsunthengixin chujni, ko xro jiꞌi tsunthengixin na̱ ko setsjinga na̱;
ko kain chujni sithikaon ngain jeꞌe, xruꞌin nchaꞌon satho na̱ juasuaxin.
© 2017, Wycliffe Bible Translators, Inc. All rights reserved.