Filipenses 2

Kexreen bithikaon ko kusayeꞌe Jesucristo

1Ja̱ Cristo chjaa ra thi chrjuin tunuꞌa ra, ja̱ jeꞌe nthakunuꞌa ra thi chrjuin ruthjueꞌe choo ra, ko ja̱ tuenao ra ixin Espíritu Santo jii ngajin ra, ja̱ thiakunueꞌe ra chujni, 2nchekununa ni ra chrjuin ixin xrajeꞌo tunuꞌa ra, xrajeꞌo thjueꞌe choo ra, xrajeꞌo juaxraxaon dinthechunda ra ixin thi sincheꞌe ra. 3Ko ncheꞌa ra xra ixin tsainxin ñao ra o ixin kuetukoꞌo choo ra. Icha jian ncheꞌe ra inchin thetuꞌan Ndo Dio, ko xraxaon ra ixin icha chujni icha jian ncheꞌe na̱ ke jaꞌa ra. 4Thjeꞌa ra thi jian jeꞌo ixin jaꞌa ra, kai thjee ra thi jian ixin icha chujni.

5Ko kain ra xraxaon ra inchin Jesucristo xraxaon; 6ixin maski Cristo kai Ndo Dio, aro jeꞌe binaoꞌa binchegunda juachaxiin nthiꞌi ngataꞌa nunthe. 7Ko jeꞌe kuinthuꞌe kain juachaxin bechunda ixin kjan inchin naa ni ncheꞌe xra are kunkjiꞌi inchin naa chujni. 8Ko are ubangi, jeꞌe nichjangiꞌa ko bithikaon Ndo Dio, bithjaja nchaꞌon beꞌen nganito ntha cruz. 9Mexinxin Ndo Dio chjee thi icha jié juachaxin ko jeꞌe thi thetuꞌan kain. 10Ko naa nchaꞌon are tsusayeꞌe Jesús, sinthethuxin nthajuchjiꞌi kainxin thi te ngajni ko ngain nunthe ko kainxin thi te ngangi jinche, 11ko kain ná rundachro ixin Jesucristo, Nchaa ná, ko jañaa tsusayexin Ndo Dio Ndudaa ná.

Kain ni dithikaon Jesucristo tsjaago ixin jian ncheꞌe na̱

12Jaꞌa ra xro choo ná, xro anto thjuaꞌa ra, jañaa inchin bithikaon ra kain nchaꞌon ko jeoꞌa are bariꞌi ngajin ra ko jai icha dithikaon ra maski riꞌa ngajin ra. Kunixin juaxraon tsjeꞌe ra ixin isincheꞌa ra thi jianꞌa ixin ukjan ra naa chujni narua 13ixin Ndo Dio thi chjaa ra thi jian xraxaon ra, ko thjengijna ra ndo ixin sincheꞌe ra inchin jeꞌe ndo rinao.

14Kain yaa ncheꞌe ra, aro nichjakuaꞌa ra ixin chujni ko thetukoꞌa ra na̱, 15ko jañaa xruꞌin chujni rundachro ixin jaꞌa ra tencheꞌe ra thi jianꞌa, ixin jaꞌa ra xeꞌen Ndo Dio, ko jiꞌi ruchro ixin ncheꞌe ra thi jian ngayee chujni jianꞌa xraxaon ko jianꞌa ncheꞌe. Mexinxin jaꞌa ra tsungiixin ra inchin kunutse tungiixin ba ngajni. 16Ko thinthueꞌa ra thi jian bithikaon ra ngain juajna binthakjan ra inaa chujni narua. Ko jañaa are tsii Jesucristo, jaꞌan nchao tsununa chrjuin ixin jaꞌa ra ixin are mee jaꞌan tsununa ixin jamaunkuaꞌa binthaꞌa xra. 17Ko jaꞌa ra chunthia ra ngain Ndo Dio ko ncheꞌe ra xree ndo, ko jiꞌi xraa naa thi nchekininxin ra Ndo Dio. Maski ja̱ suenna na̱ jiꞌi ruxethjaxin thi jaꞌa ra tenchekininxin ra Ndo Dio. Ja̱ jiꞌi tsuꞌen jaꞌan anto ruchaꞌna ko jañaa ruchaa ná kain ná. 18Jañaa kai jaꞌa ra chaꞌa ra inchin jaꞌan chaꞌna.

Thi bincheꞌe Timoteo ko Epafrodito

19Jaꞌan chuan ngain Nchaa ná Jesucristo ixin tuin ruruaꞌan Timoteo ngajin ra, ko are jeꞌe rukjan, jaꞌan ruchaꞌna are jaꞌan tsununa ixin jaꞌa ra. 20Xruꞌin inaa chujni chunda inchin jeꞌe ixin ta juachjaon ixin kexreen sinthe ra jian 21ixin kain chujni nthiꞌi icha ta na̱ juachjaon ixin jeꞌo xree na̱ ko jeꞌa ixin xree Jesucristo. 22Aro jaꞌa ra unuꞌa ra ixin Timoteo anto jian ko kjuengijna na ixin nichja ná juajnee Jesucristo inchin naa chjan thjengijna xan ndudee xan. 23Ko jaꞌan ruruaꞌan Timoteo are tsjexin tsununa keꞌe tsuꞌen. 24Ko jaꞌan chunthia ngain Nchaa ná Jesucristo ixin tuin kai sajon juachaxin sasutsjaꞌa ra.

25Aro jai xraxaꞌon ixin rugunda ruruaꞌan ra Epafrodito, thi ruanna ni ra ixin kjuengijna na ngain xra ixin jeꞌe bachjana thi jaꞌan bagundana. 26Jeꞌe anto rinao sikon ra ko anto jita juachjaon ixin jaꞌa ra kunuꞌa ra ixin jeꞌe kuniꞌi. 27Ko nduaxin jeꞌe beniꞌi ko uchiaon ndarugeꞌen aro Ndo Dio kuiakunueꞌe jeꞌe, ko jeoꞌa jeꞌe, kai jaꞌan kuiakunuana ndo ixin jaꞌan ikuaꞌa icha juachjaon. 28Mexinxin jaꞌan anto rinaꞌo ruruaꞌan Epafrodito ngajin ra ixin jaꞌa ra anto ruchaꞌa ra are sikon ra inaa, ko jaꞌan isarichinꞌa. 29Dayeꞌe ra Epafrodito ixin kai dithikaon Nchaa ná ko chaꞌa ra ko nchesayeꞌe ra chujni ncheꞌe xra inchin jeꞌe 30ixin uchiaon ndarugeꞌen ngain xree Jesucristo. Ko maski tangi bathuꞌe, jeꞌe kjuengijna na ixin jaꞌa ra chroꞌa kjuengijna ni ra.

Currently Selected:

Filipenses 2: plsNT

Highlight

Copy

Compare