Filipenses 1

Xroon dikji̱n Pablo ngain ni Filipenses

1Jaꞌan Pablo ko Timoteo ni nchexree Jesucristo chjaꞌa ra juajna kain ra xro dithikaon ra Jesucristo ngain rajna Filipos, ko kain ni thetuꞌan niꞌngo ko thjengijna ni thetuꞌan. 2Ndo Dio Ndudaa ná ko Nchaa ná Jesucristo, sinthanchaon ra ko ruchjaa ra thi chrjuin tsunuꞌe ansean ra.

Pablo nichjee Ndo Dio ixin ni dithikaon ngain ndo

3Thexruxian Ndo Dio are xraxaꞌon ixin jaꞌa ra. 4Ko jaꞌan anto chaꞌna are nichjaa Ndo Dio ixin kain ra, 5ixin kjuengijna ni ra are nakuexianxon ndathjan icha chujni ixin thi jian juajnee Jesucristo ko jai xra tethjengijna ni ra. 6Ko jaꞌan nuna jian ixin Ndo Dio kuexiꞌin bincheꞌe ndo thi jian ngajin ra, ko xra jainxon sincheꞌe ndo ngajin ra rukjanja Jesucristo. 7Ko jañaa jikininxin ruxraxaon ra ixin anto thjuaꞌa ra; ko jaꞌa ra kjuengijna ni ra kjuaago ná thi jian juajna bayáa, maski biaxinna, ko tenkuaꞌa na ngathexin kon ni ncheꞌe jie̱ ixin thi jian juajna jiꞌi. 8Ko Ndo Dio nuꞌe ndo jian ixin jaꞌan anto thjuaꞌa ra kain ra, jañaa inchin Jesucristo kjuaguꞌna. 9Ko jaꞌan danchiaa Ndo Dio ixin jaꞌa ra icha ruthjueꞌe choo ra ko icha jian tsinxin ra 10ixin tsunuꞌa ra tsinchieꞌe ra kexeꞌe thi jian. Ko jañaa ixruꞌin jianꞌa seꞌe ngajin ra are Jesucristo tsii. 11Ko Jesucristo tsjengijna ra ixin jaꞌa ra sincheꞌe ra thi jian, ko jamee chujni sinchesayeꞌe na̱ Ndo Dio.

Pablo ndachro ixin Jesucristo techunxin ni

12Jaꞌan rinaꞌo tsunuꞌa ra ixin kain thi kunna kjuengijna na ixin nichja thi jian juajnee Jesucristo. 13Ko kainxin xi soldado jinda nchia jixiꞌin xi thetuꞌan ko kain ni te nthi̱ꞌa̱ nuꞌe na̱ ixin jaꞌan jiaxinna ixin ndathjan chujni juajnee Jesucristo. 14Ko ixin jiaxinna icha tsjé xan choo ná nichja xan juajnee Ndo Dio, ko xraonꞌa xan nichja xan.

15Ko kanxion chujni nichja na̱ ixin Jesucristo ixin tunchjueꞌe na̱ ko ningakuna na̱, aro ikanxion na̱ tjaago thi jian juajna ixin jañaa dachrjexin ngain anseen na̱. 16Ko thi ni tjaago juajnee Jesucristo ixin ningakuna na̱ aro jeꞌa ixin thjueꞌe na̱ Jesucristo, yaa ncheꞌe na̱ ixin icha tsaa juachjaon ixin jiaxinna. 17Aro ikanxion na̱ ixin thjueꞌe na̱ Jesucristo mexin tjaago na̱ thi jian juajnee, ko nuꞌe na̱ ixin jaꞌan riꞌi nthiꞌi ixin runichjaxin juajnee Jesucristo. 18Ko thi ncheꞌe ni teꞌi ndusenaꞌa ja̱ tjaago na̱ juajnee Jesucristo ixin thjueꞌe na̱ o naꞌi, aro jeꞌe na̱ nichja na̱ ixin Jesucristo. Mexinxin jaꞌan anto chaꞌna.

Ko xra ruchaꞌna icha. 19Ko jaꞌan nuna ixin jaꞌa ra tenichjeꞌe ra Ndo Dio ixin jaꞌan ko Espiritue Jesucristo nchesuji na, ko tuin sachrjexin nthiꞌi. 20Thi jaꞌan icha rinaꞌo ko chunthia ixin jian sinthaꞌa kain ko xruꞌin tsusuananxin. Ko ruxraonꞌa na maski ndaseꞌen na o sarichon, kain nchaꞌon Jesucristo tsusayeꞌe ixin jaꞌan. 21Ja̱ sarichon jaꞌan, jeꞌo sinthaꞌa inchin rinao Cristo, ko ja̱ ndaseꞌen na, icha jian ixin jaꞌan. 22Ko ja̱ xra sarichon ngain nthao jiꞌi ixin xra tsjaago juajnee Jesucristo. Jaꞌan nunaꞌa kexeꞌe thi tsinchiaa. 23Tangi tsinchiaa ngain kayui thi ndachrjan jiꞌi. Jaꞌan rujinaꞌo ndarugeꞌen na ixin sarukji rugariꞌi ngain Jesucristo, ko jiꞌi icha jian ixin jaꞌan. 24Aro ixin jaꞌa ra, icha nchao jaꞌan xra sarichon. 25Ko mexinxin jaꞌan jian nuna ixin xra sithuna ngajin ra, ko icha ruchaꞌa ra ko ruchunthia ra ngain Ndo Dio. 26Ko jañaa are jaꞌan rukjan na inaa, jaꞌa ra icha ruchaꞌa ra ko sinchesayeꞌe ra Jesucristo.

27Jaꞌan nthatsaꞌan ñao ra ixin jian ncheꞌe ra inchin thetuꞌan juajnee Jesucristo. Ixin maski saso o sasoꞌa ngajin ra, jaꞌan rinaꞌo tsian ixin jian tedithikaon ra ko tetjaago ra juajnee Ndo Dio ko nakua juaxraxaon chunda ra ixin chunthia ra ngain Jesucristo, 28ko dithuaxinꞌa ra sinthaxraon ra chujni ningakuꞌan ra. Ko jiꞌi dikunxin na̱ ixin tateditjaan na̱ ixin thi jianꞌa ncheꞌe na̱, aro jaꞌa ra rukjan ra inaa chujni narua ko jiꞌi thixin ngain Ndo Dio. 29Ndo Dio chjaa ra juachaxin ixin jeoꞌa bithikaon ra Jesucristo, kai ixin tangi tsuꞌan ra ixin jeꞌe. 30Jaꞌa ra xrajeꞌo tangi sathuꞌe ra xraa jaꞌan. Jaꞌa ra ubikon ra kexreen tangi bagathua ko xraridathua.

Currently Selected:

Filipenses 1: plsNT

Highlight

Copy

Compare