San Marcos 7

Thi nchekjan jianꞌa chujni

(Mt. 15:1-20)

1Kanxion xi fariseo ko kanxion xi tjaago ley binthekixin xa rajna Jerusalén, binthekunchieꞌen xa ngain Jesús, 2ko bikon xa ixin kanxion chujni bakao Jesús tene na̱ ko kunthiꞌa na̱ jinda. 3(Ixin kain xi fariseo ko chujni Israel, baneꞌa na̱ ja̱ bakunthiꞌa na̱ jinda tsjé nthiꞌa, ko jañaa bancheꞌe na̱ ixin anto bagithikaunxin na̱ kain thi kjuaago ni ndo dachriꞌi na̱ xrachrjen. 4Ko are bakjanxin na̱ ndaasin xruꞌin bane na̱ ja̱ bakunthiꞌa na̱ jinda. Ko xra ncheꞌe na̱ tsjé thi dikukueꞌen na̱, inchin kexreen baxreen laato, chi, ko kain traste chia ko kexreen suni na̱ jian saon banthejuataꞌa na̱.) 5Kuthimejan xi fariseo ko xi bakjaago ley banchiangiꞌi na̱ Jesús:

—¿Unda chujni chrjiꞌo ncheꞌa na̱ thi binthakuan ná ni ndudachriꞌa ná xrachrjen? Ixin jine na̱ ko tunthiꞌa na̱ jinda tsjé nthiꞌa.

6Kuthimejan Jesús ndachro:

—¡Jaꞌa ra xro kunxon jian ra aro nduaꞌa! Nchao dikji̱n Isaías, thi bagayee juajnee Ndo Dio ixin jaꞌa ra are ndachro:

Chujni rajna jiꞌi jeꞌo ruꞌa na̱ nchesayananxin na,

aro anseen na̱ xruꞌin tunuꞌe na̱ ixin ruthjuena na̱ jaꞌan.

7Mexinxin kunxon nchesayana na̱,

ixin thi jeꞌe na̱ tenchekueꞌen na̱ chujni juxon thi thetuꞌan xii nthiꞌi ngataꞌa nunthe.

8Jaꞌa ra idithikaonꞌa ra thi thetuꞌan Ndo Dio ko jeꞌo dithikaon ra thi binthakuaꞌan ra chujni.

9Ko Jesús xra ndachro ngain na̱:

—Jaꞌa ra anto jian dikjee ra ixin kexreen isithikaonꞌa ra thi thetuꞌan Ndo Dio ko jeꞌo ncheꞌe ra thi binthakuaꞌan ra chujni. 10Ixin ley bayée Moisés ndachro: “Chundeꞌe ra juasaaya ngain ndudaa ra ko ngain janaa ra”, ko “Thi sinchekininxin jianꞌa ngain ndudee o ngain janee jikininxin seꞌen.” 11Ko jaꞌa ra xra tjaago ra ixin naa chujni nchao rundache ndudee o janee: “Jaꞌan chroꞌa tsjengijna suixin ixin kain thi chunda jaꞌan, ndakjan Corbán” (jiꞌi ruchro ixin jaꞌan ubajon kain ngain Ndo Dio). 12Ko are jañaa ndachro na̱, jaꞌa ra itanchrjandaꞌa ra na̱ ixin tsjengijna na̱ ndudee na̱ o janee na̱. 13Ko jañaa jaꞌa ra incheꞌa ra thi thetuꞌan Ndo Dio, jeꞌo ixin icha dithikaon ra thi kjuaguꞌa ra ni ndo dachriꞌa ra xrachrjen, ko jiꞌi thi kjuaguꞌe ra chujni jai. Ko xra ncheꞌe ra icha thi jianꞌa inchin jiꞌi.

14Kuthimejan Jesús kjan baye̱e kain chujni ko ndachro:

—Thiꞌin ra jian kainxin thi jaꞌan rundachrjan ko thinxin ra. 15Jeꞌa thi jine chujni kjanxin na̱ jianꞌa. Thi nchekjan jianꞌa chujni, mee thi dachrjexin ngain anseen na̱. 16Jaꞌa ra xro thiꞌin ra, thinxin ra jian.

17Kuthimejan are Jesús kuinthuꞌe kain chujni, jeꞌe kjan sabixiꞌin nchia ko chujni bakao banchiangi na̱ ngain ixin keꞌe ruchro thi kjuaago. 18Ko Jesús ndachro ngain na̱:

—¿Akai jaꞌa ra thinxinꞌa ra? ¿Athinxinꞌa ra ixin thi kjan chujni jianꞌa, jeꞌa ixin thi jine na̱? 19Ixin thi jine chujni thjiꞌa ngaxiꞌin anseen na̱, mee sathji ngaxiꞌin tseꞌe na̱, kuthimejan dachrje.

Ko jañaa ndachro Jesús ixin kain thi jine ni thjua. 20Ko kai ndachro:

—Thi thixin ngain anseen chujni, mee thi nchekjan na̱ jianꞌa. 21Ixin ngain anseen na̱ dachrjexin thi jianꞌa jeꞌe na̱ xraxaon na̱, inchin thi sejuakaꞌo na̱ kexeꞌo chujni, tsee na̱, thi nasuenxon na̱ chujni, 22thi dejuakaꞌo na̱ nchrii jeꞌa chriꞌi na̱ ko xii jeꞌa xixiꞌi na̱, thi anto thiakuꞌen na̱ sechunda na̱ tsjé tumi, thi juxon jianꞌa xraxaon na̱, thi juxon ncheeya na̱, thi anto thiakuꞌen na̱ ncheꞌe na̱ thi jianꞌa, thi chjueꞌe na̱, thi nichja na̱ nduaꞌa ixin inaa chujni, thi anto taꞌin ñao na̱ ko thi atho cha thinxin na̱. 23Kainxin thi jianꞌa yaa thixin ngain anseen na̱ ko mee thi nchekjan na̱ chujni jianꞌa.

Nchrii juixin nunthe Sirofenicia chunthia nchra Jesús

(Mt. 15:21-28)

24Jesús sakjuixin nthi̱ꞌa̱ ko sakjui ngain nuntheꞌe rajna Tiro ko rajna Sidón. Ko nthi̱ꞌa̱ bithuꞌe ngain naa nchia ko binaoꞌa ixin rukunuꞌe chujni thinoo beꞌe jeꞌe. Aro chujni kunuꞌe na̱ thinoo beꞌe. 25Ko tuin kunuꞌe janee naa xan nchrii bechunda espíritu jianꞌa ixin nthi̱ꞌa̱ beꞌe Jesús, mexinxin kjui ko bethuxin ngakee ruthee Jesús. 26Naniita jiꞌi kukueꞌen inchin ni griego ixin juixin ngain nunthe Sirofenicia. Ko binchetseꞌen nchra ñao Jesús ixin rugantsje espíritu jianꞌa bexiꞌin xeꞌen nchra. 27Aro Jesús ndachro ngain naniita:

—Tajanda saꞌo tsjengijna chujni judío. Ixin nchaoꞌa jii ja̱ naa ndudaꞌa santsjeꞌe ndo xeꞌen ndo niuthja ixin ruchjee ndo kunia.

28Ko naniita batheꞌe ngain Jesús:

—¡Jaan, ndua! Aro kunia jingiꞌi nthanchaon kai jine ba nchuchjeꞌen niuthja thingo chjan.

29Ko Jesús ndachro:

—¡Jaan, atho nchao ndachro jaꞌa! Chaꞌa ko sathji ixin espíritu jianꞌa usakjuixin ngain xaꞌan.

30Ko are naniita mee biji nchianduꞌa, bithja xeꞌen tajitsingataꞌa xan saon, ko espíritu jianꞌa bechunda xan usadikjixin ngain xan.

Jesús nchexrueꞌen naa thi chroꞌa banichja ko chroꞌa bakiꞌin

31Kuthimejan Jesús sakjanxin nuntheꞌe rajna Tiro ko batho ngain rajna Sidón ko no nuntheꞌe Decápolis, bijija ngain nda diꞌin Galilea. 32Ko nthi̱ꞌa̱ bikauꞌe na̱ Jesús naa xii chroꞌa bakiꞌin ko chroꞌa banichja, ko binchetseꞌen na̱ ñao jeꞌe ixin tsiin raa ngataꞌa xii mee ixin rukuxrueꞌen xa. 33Ko Jesús bachrjendakaꞌo xii mee ngayexin kain chujni ko xranxiꞌin kon raa ngain ndatsjuen xa ko kuinga ndathee kon raa ko katheꞌe neje xa. 34Kuthimejan tsjeꞌe Jesús ngajni, ko baaba suji ko ndachro ngain xa:

—¡Efata! —mee ruchro: ¡Xireꞌe!

35Ko xiree ndatsjuen xa ko unchao kuiꞌin xa ko unchao nichja xa. 36Ko Jesús kuetuꞌen kain chujni ixin rundachroꞌa na̱ keꞌe bincheꞌe. Ko are jeꞌe icha baketuꞌen na̱ ixin rundachroꞌa na̱, jeꞌe na̱ icha bakekin na̱. 37Aro chujni anto kuiseꞌen na̱ ko bandachro na̱:

—¡Jeꞌe nchao ncheꞌe kain! Ixin chujni thinꞌa, jeꞌe nchao nchekiꞌin na̱ ko chujni nichjaꞌa, jeꞌe nchao nchenichja na̱.

Currently Selected:

San Marcos 7: plsNT

Highlight

Copy

Compare