San Marcos 8

Jesús bajon bine noo no̱ chujni

(Mt. 15:32-39)

1Ko nchaꞌon taꞌa kjan xrathe tsjé chujni ngain Jesús, ko xruꞌin bechunda na̱ ixin rujine na̱. Mexinxin Jesús baye̱e chujni bakao ko ndachro ngain na̱:

2—Jaꞌan nchenina chujni teꞌi ixin uchunda nii nchaꞌon te na̱ nthiꞌi ngajin, ko xruꞌin chunda na̱ ixin sine na̱. 3Ja̱ rundathjan na̱ ixin satsji na̱ nchianduꞌa na̱ ko xruꞌin sine na̱ ndasendaxin na̱ ntha ngatja nthiꞌá, ixin kanxion na̱ kjín juixin na̱.

4Ko chujni bakao Jesús ndachro na̱:

—¿Thinoo siruee na̱ tsjé niuthja ixin sine kain chujni teꞌi? Ixin nthiꞌi thi te ná xruꞌin jii.

5Jesús banchiangi ngain na̱ ko ndachro:

—¿Kejaꞌin niuthja chunda ra?

Ko jeꞌe na̱ ndachro na̱:

—Yaato niuthja.

6Kuthimejan Jesús kuetuꞌen kainxin chujni tabinthe na̱ ngataꞌa nunthe, ko jeꞌe kuaa thi yaato niuthja ko kuexruxiꞌin Ndo Dio, ko kunchjenga nio ko bajon nio ngain ni bakao ixin jeꞌe na̱ kunchjeeya na̱ nio ngain chujni. Ko jañaa bincheꞌe na̱. 7Kai bechunda na̱ kanxion kuchechjan, ko Jesús kuexruxiꞌin Ndo Dio ko bajon ba ngain ni bakao ixin kai kunchjeeya na̱ ba. 8Kainxin na̱ bine na̱ ko kujeꞌe na̱ jian. Kuthimejan xra binchekaon na̱ yaato nthaxra thi xexin bine na̱. 9Ko kain chujni bine, kjui inchin noo no̱ na̱. Ko Jesús chuꞌen sakjuika kain na̱, 10kuthimejan jeꞌe ko ni bakao kuani na̱ ntha barko ko sakjui na̱ nuntheꞌe Dalmanuta.

Xi fariseo banchia xa ixin Jesús runcheꞌe naa thi naꞌa dikunxin ni

(Mt. 16:1-4; Lc. 12:54-56)

11Ko are biji na̱ nthi̱ꞌa̱, kunchieꞌen kanxion xi fariseo ngain Jesús ko tsjé banchiangiꞌi xa ixin jañaa Jesús runcheꞌe thi ruganchia xa, ko banchieꞌe xa runcheꞌe naa thi xra naꞌa dikunxin ni rukixin ngajni. 12Kuthimejan Jesús anto suji baaba ko ndachro:

—¿Unda chujni te jai rinao na̱ sikon na̱ naa thi xra naꞌa dikunxin na̱? Aro jaꞌa ra rindathjo ra ixin xruꞌin jiꞌi sikon ra.

13Ko Jesús kuinthuꞌe kain xa nthi̱ꞌa̱ ko kjan bengaa ntha barko ko sakjui tuenxin jinda.

Thi nchegeꞌen nchue niuthja chunda xi fariseo

(Mt. 16:5-12)

14Ko chujni bakao Jesús ndatjañeꞌe na̱ bikaoꞌa na̱ niuthja ixin rujine na̱. Ko jeꞌo nakua niuthja bechunda na̱ are tethji na̱ ngaa ntha barko. 15Kuthimejan Jesús kuetuꞌen na̱ ko ndachro:

—Tsjeꞌe ra jian thi nchegeꞌen nchue niuthja chunda xi fariseo ko thi nchegeꞌen nchoꞌo chunda Herodes.

16Ko ni bakao Jesús ndache choo na̱:

—Jañaa jinichja ixin xruꞌin niuthja bikoo ná.

17Aro Jesús kunuꞌe keꞌe tetjao na̱ ko ndachro ngain na̱:

—¿Unda tetjao choo ra ixin chundaꞌa ra niuthja? ¿Axra dikonꞌa ra ko xra thinxinꞌa ra? ¿Unda jaꞌa ra xruꞌin thinxin ra? 18Maski tatetsjeꞌe ra, aro xraa chujni dikonꞌa te ra, thiꞌin ra, aro xraa chujni thinꞌa te ra. ¿A undatjañaꞌa ra? 19Are jaꞌan kunchjenga thi naꞌo niuthja ixin bine thi naꞌo no̱ xii, ¿kejaꞌin nthaxra xra binchekaon ra thi xexin bine na̱?

Kuthimejan ni bakao Jesús ndachro na̱:

—Theyoo nthaxra.

20Kuthimejan ndachro Jesús inaa:

—Ko are jaꞌan kunchjenga thi yaato niuthja ixin bine thi noo no̱ chujni, ¿kejaꞌin nthaxra xra binchekaon ra thi xexin bine na̱?

Ko ni bakao Jesús ndachro na̱:

—Yaato nthaxra.

21Kuthimejan Jesús ndachro ngain na̱:

—¿Ko unda xra thinxinꞌa ra thi jaꞌan ndathjo ra?

Jesús binchexrueꞌen naa thi bagikonꞌa ngain rajna Betsaida

22Ko are biji na̱ ngain rajna Betsaida, kanxion chujni nthi̱ꞌa̱ juiauꞌe na̱ Jesús naa xii chroꞌa bagikon. Ko binchetseꞌen na̱ ñao ixin rukathe. 23Ko Jesús tseꞌe raa xii mee ko sabikao ngandeꞌe rajna. Ko nthi̱ꞌa̱ Jesús kjua ndathee ngain jmakon xa ko bakeꞌe raa ngataꞌa xa, ko banchiangiꞌi xa ixin aunchao dikon xa. 24Ko jeꞌe xa ndachro xa:

—Jaan, dikon chujni, aro xraa nthaa te na̱ ko satethji ntha.

25Kuthimejan Jesús bakeꞌe raa ngain jmakon xa inaa, ko thi bagikonꞌa ukuxrueꞌen jmakon ko ubikon jian. 26Kuthimejan Jesús kuetuꞌen xa ixin sarukji xa nchianduꞌa xa ko ndache xa:

—Kjanxinꞌa rajna ko xruꞌin chujni thekiꞌin thi kuꞌen.

Pedro ndachro ixin Jesús, mee thi Cristo

(Mt. 16:13-20; Lc. 9:18-21)

27Jesús ko chujni bakao sakjui na̱ ngain rajnanchjan te chiaon rajna diꞌin Cesariee Filipo. Ko are tethji na̱ ngatja nthiꞌá, Jesús banchiangiꞌi na̱:

—¿Keꞌe ndachro chujni ixin kensen na jaꞌan?

28Ko jeꞌe na̱ ndachro na̱:

—Kanxion chujni ndachro na̱ ixin jaꞌa Juan thi banchegithe chujni, ikanxion na̱ ndachro na̱ ixin jaꞌa Elías ko ikanxion na̱ ndachro na̱ ixin jaꞌa naa chujni dayee juajnee Ndo Dio.

29Kuthimejan Jesús banchiangi ngain ni bakao:

—Ko jaꞌa ra, ¿keꞌe ndachro ra ixin kensen na jaꞌan?

Ko Pedro ndachro ngain Jesús:

—Suixin thi Cristo.

30Aro Jesús kuetuꞌen chujni bakao ixin xruꞌin chujni rundache na̱ ixin jeꞌe thi Cristo.

Jesús ndachro ixin jeꞌe ndaseꞌen

(Mt. 16:21-28; Lc. 9:22-27)

31Kuthimejan Jesús kuexiꞌin kjuague chujni bakao ixin jeꞌe, thi Xii juixin ngajni, rugunda anto tangi tsuꞌen ngaa raa kain xi thetuꞌan ngain rajna, kain xi thetuꞌen xi daana ko kain xi tjaago ley. Ko ndachro ixin naruguenxon na̱, aro ngain nchaꞌon ninxin jeꞌe ruxechon. 32Ko ixin Jesús jian ndachro keꞌe rukuꞌen, mexinxin Pedro bantsjenda Jesús ko binchesatheꞌe. 33Aro Jesús ngaria ko tsjeꞌe chujni bakao, ko binchesatheꞌe Pedro ko ndachro:

—¡Sathjixin ngajin ixin jaꞌa rinichja xraa nchiijin! Ko jaꞌa xraxaonꞌa inchin xraxaon Ndo Dio, jaꞌa jeꞌo xraxaon inchin xraxaon chujni te ngain nunthe jiꞌi.

34Kuthimejan Jesús baye̱e chujni bakao ko kain chujni te nthi̱ꞌa̱ ko ndachro:

—Ja̱ chrujan thi rinao rurueꞌe na, rugunda rutjañeꞌe kain thi jixraxaon sincheꞌe, maski anto tangi tsuꞌen ko ja̱ rugunda seꞌen, seꞌen ixin jaꞌan, ko rurueꞌe na. 35Ixin thi rinao xruꞌin tsuꞌen, chujni jiꞌi icha daka ndasitjaan. Aro thi ruxrajon tangi tsuꞌen ko ruxrajon seꞌen ixin tjaago thi jaꞌan nthaꞌa, chujni mee rukjan inaa chujni narua ko xruꞌin nchaꞌon seꞌen. 36Ixin xruꞌin xree ja̱ naa chujni sacha kainxin thi jii ngain nunthe jiꞌi ko ndasinchetjaan almee. 37¿O kejaꞌin tsenanxin chujni almee? 38Ja̱ chrujan chujni tusuee runichja ixin jaꞌan ko ixin thi jian juajnana ngain chujni ncheꞌe jianꞌa ko nchesayeꞌa Ndo Dio, kai jaꞌan, thi Xii juixin ngajni, tsusuaꞌna ixin chujni mee are siꞌi kunixin juachaxiin Ndudana ko kain ángel jii nthi̱ꞌa̱ ngajni.

Currently Selected:

San Marcos 8: plsNT

Highlight

Copy

Compare