San Marcos 6

Jesús kjui rajna Nazaret

(Mt. 13:53-58; Lc. 4:16-30)

1Kuthimejan Jesús ko ni bakao sakjuixin na̱ nthi̱ꞌa̱ ko sakjui na̱ Nazaret, rajnee Jesús. 2Ko are juii nchaꞌon nchejugaꞌa chujni Israel, Jesús kuexiꞌin kjuaago juajnee Ndo Dio ngain niꞌngo, ko chujni bakiꞌin bakiseꞌen na̱ ixin thi bakjaago jeꞌe, ko ndachro na̱:

—¿Thinoo kuangixin xa kain jiꞌi? ¿Kexreen anto jian chunxin xa Ndo Dio ko kexreen ncheꞌe xa thi naꞌa dikunxin ni? 3¿Ajeꞌa xii jiꞌi xi carpintero, thi xeꞌen María ko xan choo Jacobo, José, Judas ko Simón? ¿Ajeꞌa nchri choo xa te nchra nthiꞌi ngain rajnaa ná?

Mexinxin chujni bagithikaonꞌa na̱ thi bandachro Jesús. 4Ko Jesús ndachro:

—Kainxin chujni nchesayeꞌe na̱ ni dayee juajnee Ndo Dio, aro ni xrajeꞌo rajnee, ni nduꞌa ko ni chujnii nchesayeꞌa na̱.

5Mexinxin Jesús nthi̱ꞌa̱ chroꞌa bincheꞌe thi naꞌa bagikunxin chujni. Jeꞌo thuꞌa chujni kuxrueꞌen are jeꞌe kuentaꞌa raa ngataꞌa na̱. 6Ko Jesús anto kuiseꞌen ixin chujni nthi̱ꞌa̱ chunthiaꞌa na̱ ngain jeꞌe. Aro Jesús kjui ikanxin rajna te chiaon.

Jesús ruaꞌan ni bakao ixin bakjaago na̱ juajnee Ndo Dio

(Mt. 10:5-15; Lc. 9:1-6)

7Kuthimejan Jesús baye̱e ni theyoo bakao ko ruaꞌan yoo ko yoo na̱ ngain icha rajna ko jeꞌe bajon juachaxin ngain na̱ ixin nchao sengi na̱ espíritu jianꞌa chunda chujni. 8Ko kai kuetuꞌen na̱ ixin xruꞌin sikao na̱ nguii thi tsji na̱, ko rugikaoꞌa na̱ thi tsamanxin na̱, xruꞌin niuthja ko tumi. Jeꞌo rugikao na̱ ntha kutho ixin tsjixin na̱, 9kathe jichjanga na̱ ko luntho tengaa na̱. 10Ko kai ndachro:

—Are saso ra ngain naa nchianduꞌa na̱ ko rundathjo ra na̱ ixin nchao sithuꞌa ra, nthi̱ꞌa̱ dithuꞌa ra sachrjexinja ra rajna mee. 11Ko ja̱ chrujan rajna sinaoꞌa na̱ sayáꞌa ra na̱ ko sinaoꞌa na̱ tsiꞌin na̱ thi runichja ra, dachrjexin ra rajna mee ko tuntsjenga ra jinche jiyaa kathea ra. Jamee tsjaguxin ra ixin bithikaonꞌa ra na̱.

12Ko ni theyoo bakao Jesús sabinthekji na̱ ko ndache na̱ kain chujni ixin tsinthuꞌe na̱ thi jianꞌa ncheꞌe na̱ ko sithikaon na̱ Ndo Dio. 13Kai bagengi na̱ tsjé espíritu jianꞌa beꞌe ngain chujni, ko bakinga na̱ aceite chujni niꞌi ko bakuxrueꞌen na̱.

Beꞌen Juan thi banchegithe chujni

(Mt. 14:1-12; Lc. 9:7-9)

14Chujni anto bakekin na̱ thi bancheꞌe Jesús, mexinxin rey Herodes kunuꞌe thi bancheꞌe jeꞌe, aro kanxion chujni bandachro na̱:

—Juan, thi banchegithe chujni, kjan xechon, mexinxin chundaxin juachaxin ncheꞌe kain yaa.

15Ko ikanxion na̱ bandachro na̱:

—Jiꞌi Elías, thi bagayée juajnee Ndo Dio.

Ko ikanxion na̱ ndachro na̱:

—Xii jiꞌi inchin naa thi bagayée juajnee Ndo Dio are saꞌo.

16Are Herodes kuiꞌin kain yaa, jeꞌe ndachro:

—Jiꞌi Juan, thi jaꞌan kuetuꞌan chrijin jaa ko jai xechon.

17Ko jiꞌi kuꞌen, ixin are saꞌo Herodes ndachro ixin biaxiꞌin Juan ngain nduꞌa xiiso ko kuiaxin na̱ chiacadena. Jamee bincheꞌe ixin jeꞌe bekaꞌo Herodías, chriꞌi Felipe, xan choo Herodes. 18Ko Juan udindachro ngain Herodes:

—Jaꞌa jianꞌa rincheꞌe ixin jaꞌa rikoꞌo chriꞌi xan choo.

19Mexinxin nchri Herodías anto bakuñauꞌe Juan ko binao naruguenxon, aro chroꞌa guen nchra are mee, 20ixin Herodes baxraguen Juan ko bakanchrjandaꞌa ixin chrujan runchekao na̱, ixin Herodes benuꞌe ixin Juan bancheꞌe thi jian ko bagithikaon Ndo Dio, ko Herodes banchexruxiꞌin bakiꞌin thi bandachro Juan, maski bakinxinꞌa. 21Aro juii naa nchaꞌon, are Herodías nchao banchia ixin rugeꞌen Juan. Ko mee kuꞌen ngain kiee Herodes are chjee juine tsjé chujni, ni baketuꞌan, ni anto renthe ngain nunthe Galilea ko xi baketuꞌan xi soldado. 22Ko xeꞌen Herodías bixiꞌin xan ngain thi tene na̱ ko the xan. Ko Herodes ko kain chujni juinekaꞌo anto binchexruxiꞌin na̱ ixin kexreen the xan nchrii mee, mexinxin Herodes ndachro ngain xan nchrii:

—¿Keꞌe rinao? Jeꞌo danchia ko jaꞌan ruchjaꞌa.

23Ko Herodes ndache xan ko bajin ixin juachaxiin chunda jeꞌe, nchao sajon thi sanchia xan ko ndachro:

—Jaꞌan nchao ruchjaꞌa kain thi sanchiana, maski sanchiana ngusinenxin nunthe jaꞌan thetuꞌan.

24Jeꞌe xan bachrje xan ko banchiangiꞌi xan janee xan:

—¿Keꞌe sanchia ngain xi rey?

Ko janee xan ndachro jan:

—¡Danchieꞌe xi rey jaa Juan, thi nchegithe chujni!

25Ko jaikua kjan xan bixiꞌin xan thi beꞌe xi rey ko ndachro xan:

—Jaꞌan jaxon rinaꞌo dichjana jaa Juan ngaa naa laato.

26Ko xi rey anto kuaa xa juachjaon, aro ixin bajin xa ngathexin kon kain chujni te nthi̱ꞌa̱ ixin sajon xa kain thi sanchia xan nchrii, mexinxin xi rey bajon thi banchia xan ko jañaa chrjuin rukunuꞌe xan. 27Ko are mee rey Herodes kuetuꞌen naa xi soldado rukiauꞌe xa jaa Juan. 28Ko xi soldado kjui xa ngain thi jiaxiꞌin Juan ko kunchrijin xa jaa ko ngaa laato juiauxin xa ko bajon xa ngain xan nchrii ko jeꞌe xan bajon xan ngain janee xan.

29Ko are kain chujni bakao Juan kunuꞌe na̱ keꞌe kuꞌen, kjui na̱ biruee na̱ Juan ko bikjabaa na̱.

Jesús bajon juine naꞌo no̱ chujni

(Mt. 14:13-21; Lc. 9:10-17; Jn. 6:1-14)

30Chujni bakao Jesús kjan xrathe na̱ ngain ko kuekin na̱ thi bincheꞌe na̱ ko kexreen kjuaago na̱ nguii thi kjui na̱. 31Kuthimejan Jesús ndachro ngain na̱:

—Xrakui ra, chjin ná thi xruꞌin chujni jii ixin nthi̱ꞌa̱ sinchejugaꞌa ra nchin.

Jesús ndachro jañaa ixin tsjé chujni bakii ngain na̱, ko chroꞌa bane na̱. 32Ko jañaa Jesús ko ni bakao kuani na̱ ngaa naa ntha barko ko sakjui na̱ naa nunthe thi xruꞌin chujni jii. 33Aro tsjé chujni batsuan na̱ Jesús ko ni bakao ko bikon na̱ are sabinthekji. Mexinxin tsjé chujni juixin tsjé rajna sakjui na̱ nguixin ngandeꞌe nda, ko bitaon na̱ nthiꞌá ko saꞌo biji na̱ ko nthi̱ꞌa̱ xrathe na̱ ngain Jesús. 34Ko are Jesús banianxin ntha barko, bikon anto tsjé chujni ko kuiakunueꞌe na̱ ixin xrathe na̱ nthi̱ꞌa̱ xraa kuleko xruꞌin chujni thingaria. Ko Jesús kuexiꞌin kjuague na̱ tsjé ixin Ndo Dio. 35Ko are ukutsukjin, chujni bakao Jesús juii na̱ ngain ko ndachro na̱:

—Utsukjin ko nthiꞌi xruꞌin jii. 36Thetuꞌen na̱ satsji na̱ thi jii nchia o thi jii rajna ixin sikeꞌna na̱ thi sine na̱.

37Ko Jesús ndachro:

—Jaꞌa ra dajon ra thi sine na̱.

Ko ni bakao ndachro na̱:

—¿Kexreen jaꞌan ná tsji ná sikeꞌna ná niuthja sine kain chujni teꞌi? Ja̱ tsji ná sikeꞌna ná sinthaxian ná inchin tumi dacha naa chujni ncheꞌe xra nguii nano.

38Ko Jesús ndachro:

—Thji ra ditsjeꞌe ra kejaꞌin niuthja chunda ra.

Ko are tsjeꞌe na̱ kejaꞌin niuthja techunda na̱, juii na̱ ko ndachro na̱ ngain Jesús:

—Jii naꞌo niuthja ko yoo kuchee.

39Kuthimejan Jesús kuetuꞌen kainxin chujni ixin ruchjeeya na̱ ko tarunthe na̱ ngataꞌa ka. 40Ko jañaa bincheꞌe na̱ ko chjeeya na̱ nanaa renkia na̱ ko ithuꞌa na̱ chjeeya na̱ yoo thi kan ko the na̱. 41Kuthimejan Jesús kuaa thi naꞌo niuthja ko thi yoo kuchee ko tsjeꞌe nui ko binchenchaon nio. Kuthimejan baaña niuthja ko chjee chujni bakao ixin kunchjeyeꞌe na̱ nio kain chujni ko kai kunchjeeya na̱ thi yoo kuchee. 42Ko kainxin chujni juine na̱ ko kujeꞌe na̱ jian. 43Ko ni bakao Jesús batse na̱ theyoo nthaxra tekauntja niuthja ko kuchee xexin bine na̱. 44Ko ni bine niuthja kjui inchin naꞌo no̱ ni xii.

Jesús kjuixin ruthee ngatauꞌen jinda

(Mt. 14:22-27; Jn. 6:16-21)

45Kuthimejan Jesús kuetuꞌen chujni bakao ixin rukani na̱ ntha barko ko kuathua na̱ jinda ixin sarukji na̱ ngain rajna Betsaida. Ko Jesús xra bithuꞌe nthi̱ꞌa̱ ixin chuꞌen sarukji kainxin chujni. 46Ko are juexin sakjui kain na̱, Jesús sakjui ngain naa jna ixin nichjee Ndo Dio. 47Ko are undakunthie, ntha barko nandaa biji ntha ngusine nda rugathujin, ko jeꞌo Jesús bithuꞌe nthi̱ꞌa̱ ngandeꞌe nda. 48Ko are uchiaon jidingasaan Jesús bikon ixin anto tangi tedakangi na̱ ntha barko ixin suji tedetan na̱ chrintho. Ko Jesús kjuixin ruthee ngain na̱ ngatauꞌen jinda ko jeꞌe bincheꞌe ixin xraa rugatho nao. 49Aro ni bakao bikon na̱ Jesús jithjixin ruthee ngatauꞌen jinda, jeꞌe na̱ xraxaon na̱ ixin naa nthanchaꞌan ko binthekuyao na̱, 50ixin kain na̱ bikon na̱ ko anto xraon na̱. Aro Jesús nichja ngain na̱ ko ndachro:

—Xraonꞌa ra, jaꞌan Jesús na.

51Ko kuani ngaa ntha barko thi tengaa na̱, ko tuinxion tabeꞌe chrintho. Ko jeꞌe na̱ xratao bithuꞌe na̱. 52Ixin jeꞌe na̱ xra kuinxinꞌa na̱ keꞌe ruchro thi bincheꞌe Jesús ngain thi nchaꞌon binchenchaon niuthja.

Jesús nchexrueꞌen chujni niꞌi ngain nunthe Genesaret

(Mt. 14:34-36)

53Are juexin kuathua na̱ jinda, biji na̱ nuntheꞌe Genesaret. Ko nthi̱ꞌa̱ kuenchrua na̱ ntha barko ngandeꞌe jinda. 54Ko are banianxin na̱ ntha barko, chujni tuin batsuan na̱ Jesús. 55Ko ni nunthe mee, are bakunuꞌe na̱ thinoo beꞌe Jesús, kain ni bechunda ni niꞌi bakiaꞌo na̱ ngain Jesús ni nii na̱ ngain nthatuꞌen na̱. 56Ko nguii thi bakji inchin kain rajna, kain rajnanchjan, ko kain ni te ngataon jngi bagakeꞌe na̱ ni niꞌi na̱ ngandeꞌe nthiꞌá ko banchetseꞌen na̱ ñao Jesús ixin rugithuexin rukathe na̱ kara jeꞌo ngandeꞌe lunthue. Ko kainxin chujni bakatheꞌe lunthue Jesús bakuxrueꞌen na̱.

Currently Selected:

San Marcos 6: plsNT

Highlight

Copy

Compare