Santiago 4

Ncheꞌe ra thi rinao Ndo Dio

1¿Thinoo thixin thi theto ra ko ningakuꞌen choo ra? Mee thixin ngain juachjueꞌe jii ngain ansean ra ko kain thi jianꞌa xraxaon ra. 2Jaꞌa ra anto chjuaꞌa ra ko rujinaunkua ra chrujan ruginthechunda ra, mexinxin duꞌen ra chujni ko teche ra ixin juachjueꞌe ko thetukoꞌo ra chujni aro chroꞌa dinthechunda ra thi rinao ra ixin danchieꞌa ra Ndo Dio. 3Ko are jaꞌa ra danchia ra, dayeꞌa ra ixin thi danchia ra jianꞌa sinchegunda ra ixin jeꞌo rinao ra thi thiakuꞌen nthauꞌa ra. 4¡Jaꞌa ra xro thjueꞌa ra ko dithikaonꞌa ra Ndo Dio! ¿Anuaꞌa ra ixin thi jian dakao thi jianꞌa jii ngain nunthe, mee ndakjan naa thi ningakuꞌen Ndo Dio? Ko ja̱ jaꞌa ra sakjiꞌo ra jian thi jianꞌa jii ngain nunthe, jaꞌa ra takjan ra chujni ningakuꞌen Ndo Dio. 5¿O a xraxaon ra ixin jeꞌa ndua thi ndachro ngain Xruen Ndo Dio: “Espíritu kuinthuꞌe Ndo Dio ngajin ná, Espíritu mee anto thjuaa ná ko chjiigo ixin jaꞌan ná”? 6Ndua Ndo Dio anto thjuaa ná ndo inchin ndachro ngain Xruen ndo: “Ndo Dio kayakuen chujni anto taꞌin ñao, aro jeꞌe thjueꞌe ko thjengijna chujni tainꞌa ñao.” 7Mexinxin dithikaon ra Ndo Dio, ko thixiꞌan ra ko ncheꞌa ra thi rinao nchiijin, ko nchiijin satsjixin ngajin ra. 8Tunchieꞌen ra ngain Ndo Dio ko jeꞌe ndo tsunchieꞌen ndo ngajin ra. Jaꞌa ra xro ncheꞌe ra thi jianꞌa, thinthuꞌe ra thi jianꞌa tencheꞌe ra. Ko jaꞌa ra, xro xraxaon ra ixin nchao sithikaon ra Ndo Dio, ko kai nchao sincheꞌe ra thi jianꞌa, ncherua ansean ra. 9Ta ra juachjaon ko xraxaon ra ixin thi jituꞌan ra, ko tsjanga ra. Ko itjanoꞌa ra ko icha jian tsjanga ra, ko ichaꞌa ra ko icha jian dinthechiꞌin ra. 10Tainꞌa ñao ra ngathexin kon Nchaa ná, ko jeꞌe sinthakjan ra chujni renthe.

Runichjaꞌa ni jianꞌa ixin inaa chujni

11Jaꞌa ra xro choo ná, nichjaꞌa ra jianꞌa ixin chujni dithikaon Jesucristo. Ixin thi nichja jianꞌa ixin jeꞌe na̱, jincheꞌe jie̱ ngain na̱. Ko chujni mee jinichja jianꞌa ixin ley kuetuꞌan Ndo Dio ko ndakjan naa chujni ncheꞌe jie̱ ko jeꞌa chujni dithikaon ley. 12Ixin jeꞌo nakua thi bajon ley, ko mee thi nchao sinchekjan chujni naa chujni narua o nchao sincheꞌe jie̱. ¿Aro kensen jaꞌa ixin sincheꞌe jie̱ ngain inaa chujni?

Tainꞌa ñao ra ixin thi sincheꞌe ra ndue

13Thiꞌin ra jiꞌi, jaꞌa ra xro ndachro ra: “Jai o ndue satsjin ná ngain kexeꞌo naa rajna, ko nthi̱ꞌa̱ sunthe ná naa nano ko tsachji ná ko sinthukji na̱ ko sacha ná tsjé tumi.” 14Ko nuaꞌa ra keꞌe sikuꞌen ndue, ko nuaꞌa ra a xra sinthechon ra. Jaꞌa ra inchin naa ranunthe xraago nchin, kuthimejan ndaditjaan. 15Icha jian jaꞌin rundachro ra: “Ja̱ Ndo Dio sajon juachaxin sunthechon ná, nchao sinthoꞌo ná jiꞌi o jiꞌa.” 16Aro jaꞌa ra nthaxruxiꞌan ra taꞌin ñao ra ixin thi nichja ra, ko kain thi taꞌin ñao ra anto jianꞌa. 17Ko chujni nuꞌe ncheꞌe thi jian ko ncheꞌa, chujni mee jincheꞌe thi jianꞌa.

Currently Selected:

Santiago 4: plsNT

Highlight

Copy

Compare