Santiago 3

Neje ni

1Jaꞌa ra xro choo ná, ndachroꞌa ra ixin tsjé ra rinao ra rukjan ra inchin xi tjaago ixin jian nuꞌa ra ixin kain ná xro tjaago ná icha suji jie̱ suanna. 2Kain ná sathjia ná ko nthoꞌo ná thi jianꞌa. Ja̱ chrujan chujni nichja jeꞌo thi jian, chujni mee naa chujni xruꞌin jianꞌa ncheꞌe ko thixiꞌin ko ncheꞌa kain thi jianꞌa thiakuꞌen nthauꞌe. 3Jaꞌan ná dakeꞌe ná ngain ruꞌa kunxin naa chia tengathjenxin ná ba ixin sithikaon ná ba, ko jañaa sithikaon ná ba ko tsjiꞌo ná ba thi jaꞌan ná sinao ná. 4Tsjeꞌe ra kai ntha barko; maski anto yeye ntha ko rugundeꞌe ntha suji chrintho ixin tsingi ntha, aro thi dakangi ntha jeꞌo nchegunda naa ntha anto nchiin, diꞌin timón, ko yaa dithikaunxin ntha barko dikao ntha thi jeꞌe rinao. 5Jañaa kai neje ni, maski anto nchiin, aro nchao sincheꞌe tsjé thi jianꞌa. ¡Xraa naa xruꞌi anto nchiin aro tsixiꞌin tsjaaga nguixin naa ntha jié! 6Ko neje ni inchin naa xruꞌi, ko kai nchao sincheꞌe tsjé thi jianꞌa. Neje ná jii ngain nthauꞌa ná ko nchejianꞌa nguii nthauꞌa ná, ko nchao sincheꞌe ixin satho ná tangi ixin dayee juachaxiin xruꞌi dangaꞌa. 7Chujni nchao nchesancho kain kuxiigo chrintho, kunthua, kunchee ko kain kuxiigo jii ngangi ndachaon. 8Aro xruꞌin chujni nchao rukeꞌe ko runichja inchin jeꞌe rinao ixin neje ni anto jianꞌa ko xruꞌin chujni thixiꞌin keꞌe neje ko chunda xraa naa ndachikjan ko nchao nasuenxion chujni. 9Kunixin neje ná nthusayeꞌe ná Ndo Dio Ndudaa ná. Kai neje ná danchiaxin ná ixin jianꞌa tsjiꞌi inaa chujni, thi chujni binchechjian Ndo Dio inchin jeꞌe ndo. 10Kunixin xrajeꞌo ruꞌa ná nthusayexin ná Ndo Dio, ko nichja ná ixin jianꞌa tsjiꞌi inaa chujni. Jaꞌa ra xro choo ná, jaꞌan ná ichroꞌa sinthoꞌo ná jiꞌi. 11¿Anchao thi chrinxin jinda, nchao sachrjexin nda anto jní ko nda anto tsjá? 12Jaꞌa ra xro choo ná, ¿anchao naa ntha higo sinchechjian aceituna, o naa ntha uva nchao sinchechjian tho higo? Jañaa kai thi jichrinxin jinda, chroꞌa sachrjexin nda xijntha ko nda anto jní.

Thi jian juaxraxaon dajon Ndo Dio

13Ja̱ ngayaꞌa ra jii naa chujni nuꞌe jian ko thinxin jian, ncho tjaago chujni mee thi jian ncheꞌe ko tsainꞌa ñao ixin thi jeꞌe nuꞌe ko thinxin. 14Aro ja̱ suji juachjueꞌe chunda ra ngain ansean ra ko ningakuꞌen ra chujni, tainꞌa ñao ra ixin thi nuꞌa ra, ko ja̱ jañaa tencheꞌe ra, chunxinꞌa ra thi ndua. 15Ixin kain thi nuꞌa ra jiꞌi, jeꞌa ngajni thixin, jiꞌi thi tjaago juaxraxauen chujni nthiꞌi ngataꞌa nunthe ko mee juaxraxauen nchiijin. 16Ixin thi jii juachjueꞌe ko ningakuꞌen choo ná, kai jii thi thinxinꞌa choo ná ko kain thi jianꞌa. 17Aro thi jian juaxraxaon thinxin ngajni, ngain juaxraxaon mee xruꞌin jianꞌa jii ixin ncheketuꞌa chujni, thjengijna chujni chundaꞌa, tainꞌa ñao, thiakunuꞌe chujni ko jian ncheꞌe ngain kexeꞌo chujni ixin yaa dachrjexin ngain ansean. 18Ko thi chujni thjee ixin chrjuin tsunuꞌe ngain anseen icha chujni, Ndo Dio ruchjee ndo na̱ thi chrjuin tsunuꞌe ngain anseen na̱ ko sincheꞌe na̱ thi jian.

Currently Selected:

Santiago 3: plsNT

Highlight

Copy

Compare